Home တၢ်ကစီၣ် ပဒိၣ်သုးအံၤလုၢ်သ့ၣ်ခါပတာ်၀ဲ NCA ဒီး ဆဲးထီဒါ၀ဲကမျၢၢ်ထီဘိအဂ့ၢ် ဃိၣ်လိာ်တၢ်မုာ်တၢ်ခုၣ်ကရၢၢ် ကမံးတံာ်စံး၀ဲ

ပဒိၣ်သုးအံၤလုၢ်သ့ၣ်ခါပတာ်၀ဲ NCA ဒီး ဆဲးထီဒါ၀ဲကမျၢၢ်ထီဘိအဂ့ၢ် ဃိၣ်လိာ်တၢ်မုာ်တၢ်ခုၣ်ကရၢၢ် ကမံးတံာ်စံး၀ဲ

1720
0
Photo: Salween Peace Park

လါအ့ြဖ့ၣ် ၂၇ သီႇ ၂၀၂၀ နံၣ်ႇ ခ့ၣ်အဲးစံၣ်

ကီၢ်ပယီၤသုးအံၤ လုၢ်သ့ၣ်ခါပတာ်၀ဲဒၣ်ထံကီၢ်ဒီဘ့ၣ်တၢ်ပတုာ်တၢ်ခး =NCA ဒီး ဆဲးဒုးထီဒါဒံး ၀ဲကမျၢၢ်ထံဖိကီၢ်ဖိအဂ့ၢ်န့ၣ် ဃိၣ်လိာ်တၢ်မုာ်တၢ်ခုၣ်ကရၢၢ်ကမံးတံာ် ထုးထီၣ်ပာ်ဖျါ၀ဲဒီးစံး၀ဲလီၤႉ

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်ြတီၢ် (ဖၣ်ပူၣ်)ကီၢ်ရ့ၣ် သုးက့ ၅ႇ လူၤသီကီၢ်ဆၣ်အပူၤန့ၣ် ဖဲအပူၤကွံာ် လါမးရှး ၃၁ သီအနံၤန့ၣ် စီၤသဲးမံလၢပယီၤသုးခးသံ၀ဲအံၤ တၢ်သ့ၣ်နီၣ်ဆၢက့ၤအဂီၢ် ဖဲမဟါ လါအ့ြဖ့ၣ် ၂၃ သီအနံၤန့ၣ် ထုးထီၣ်၀ဲလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ပယီၤသုးအံၤ မ့ၢ်တလုၢ်သ့ၣ်ခါပတာ်၀ဲ တၢ်ပတုာ်တၢ်ခးအတၢ်သိၣ်တၢ်သီတဖၣ်ဘၣ်ဒီး လီၢ်က၀ီၤပူၤတၢ်ဖ့ၣ်ဆၢတဖၣ် မ့ၢ်တမၤဒ်တၢ်စုဆူၣ်ခီၣ်တကးအကျိၤအကျဲဒီး မ့ၢ်ဘှါရှဲ၀ဲဒ် တၢ်သူၣ် ဘျၢသးဘျၢအသိးန့ၣ် တလိၣ်လၢကဘၣ်ဟ့ၣ်ရှူကွံာ်ကမျၢၢ်တဂၤလၢၤဘၣ်အဂ့ၢ် စံး၀ဲလီၤႉ

ဃိၣ်လိာ်တၢ်မုာ်တၢ်ခုၣ်ကရၢၢ်ကမံးတံာ် ၦၤကတိၤတၢ်ပၢ နီၢ်ဆၣ်မူ စံး၀ဲ “မ့ၢ်တုၤလၢတၢ်ကိၢ်ခါဆၢကတီၢ်လံန့ၣ် လၢမုၢ်ြတီၢ်လီၢ်က၀ီၤပူၤန့ၣ် ပယီၤသုးအံၤဟူးဂဲၤအါထီၣ်၀ဲဒၣ်လီၤႉ လီၤဆီဒၣ်တၢ် တၢ်တ့ကျဲတၢ်ဂ့ၢ်န့ၣ်လီၤႉ အဃိန့ၣ် ဒ်ပတဲအသိးလီၤ အ၀ဲသ့ၣ်န့ၣ်ဆဲးလီၤ၀ဲတၢ်ပတုာ်တၢ်ခးလံာ်ဃံးဃာ်အံၤန့ၣ် တပးကဲ၀ဲဘၣ်ႉ အဲၣ်ဒိးစံး၀ဲန့ၣ် လီၢ်က ၀ီၤကမျၢၢ်တဖၣ် အလုၢ်အၦ့ၤန့ၣ် တပာ်သ့ၣ်ညါ၀ဲလၢာ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

စီၤသဲးမံအံၤ မ့ၢ်၀ဲ မုၢ်ြတီၢ်ကီၢ်ရ့ၣ်ႇ လူၤသီကီၢ်ဆၣ်ႇ ထံဘီခံသ၀ီဖိတဂၤဒီး ဖဲအပူၤကွံာ် လါမးရှး ၃၁ သီအနံၤန့ၣ် စီၤနွဲၢ်ပျီတၢ်လီၢ် ပယီၤသုးတ့ကျဲအလီၢ်အံၤ ဖဲအခီတဲာ်ကျဲအဆၢကတီၢ် ပယီၤသုးခးသံအီၤ၀ံၤအလီၢ်ခံ သံ၀ဲဒၣ်ဒီး တုၤလၢမုၢ်မဆါတနံၤအံၤ တၢ်ဟးဃု၀ဲအစိၣ်တဘၣ်ဒံးဘၣ်ဒီးဟးမၢ်ကွံာ်၀ဲဒၣ်အဂ့ၢ် လီၢ်က၀ီၤပူၤၦၤဘၣ်မူဘၣ်ဒါတဖၣ် စံး၀ဲလီၤႉ

လၢန့ၣ်အမဲာ်ညါ စီၤသဲးမံအံၤ အ၀ဲမ့ၢ်ဒူသ၀ီသ့ၣ်ၦၢ်ကမံးတံာ်ခိၣ်နၢ်တဂၤအသိး မ့ၢ်စ့ၢ်ကီး ၀ဲကီၢ်သ့ၣ် ဂုၢ်စံၣ်ညီၣ်ကွီၢ်ခိၣ်(၂)ဂၤတဂၤ အဂ့ၢ်န့ၣ် ဃိၣ်လိာ်တၢ်မုာ်တၢ်ခုၣ်ကရၢၢ် ကမံးတံာ် လံာ်ဟ့ၣ်ယုၢ်အပူၤ ပာ်ဖျါ၀ဲန့ၣ်လီၤႉ

ဘၣ်ဆၣ် ဘၣ်ထွဲဒီးတၢ်ခး၀ဲတၢ်ဂ့ၢ်အံၤန့ၣ် ဖဲလါအ့ြဖ့ၣ် ၂ သီအနံၤ ကီၢ်ပယီၤ သုးမုၢ်ဒိၣ် တၢ်ဒီသဒၢ ၀ဲၤလီၢ်ခိၣ်သ့ၣ်အံၤ တၢ်ထုးထီၣ်ပာ်ဖျါ၀ဲအသိး ပယီၤသုးကျိၤလၢအဟံးန့ၢ်၀ဲကျဲတၢ်ဘံၣ်တၢ်ဘၢအံၤ ခီဖျိလၢခ့ၣ်အဲၣ်ယူၣ်သုးကရူၢ်တဖၣ် ဟဲခးတံာ်တာ်၀ဲတၢ်ဒီး ကျိဖးဒိၣ်ကျိဖိအဃိ ကီၢ်ပဒိၣ်သုးကျိၤတပၤက့ၤခးဆၢကဒါက့ၤ၀ဲ၀ံၤအလီၢ်ခံ ဖဲလဲၤမၤရှဲလဲ၀ဲတၢ်အဆၢကတီၢ် ဖီၣ်ချုးန့ၢ်၀ဲခ့ၣ်အဲၣ်ယူၣ်အၦၤတဂၤဃုာ်ဒီးကျိချံၦာ်သၣ်အဂ့ၢ်န့ၣ် ပာ်ဖျါ၀ဲဒၣ်လီၤႉ

ဒ်န့ၣ်အသိး ဖဲအပူၤကွံာ် ၂၀၁၈ နံၣ်ႇ လါအ့ြဖ့ၣ် ၅ သီအနံၤစ့ၢ်ကီး ၦၤဟူးဂဲၤဘၣ်ထဲွ လီၢ်က၀ီၤ ကလုာ်ဒူၣ် ၦၤထူ လံၤဖိတဖၣ် အတၢ်ခွဲးတၢ်ယာ်ႇ ဟီၣ်ခိၣ်ကပံာ်ဒီး တၢ်ကွၢ်ထဲကွဟုကယာ်က့ၤသ့ၣ်ၦၢ် လၢအမ့ၢ် ၦၤထူလံၤဖိခိၣ်နၢ် လၢၢ်မုၢ်ပျီသ၀ီဖိ စီၤအိၣ်မူအံၤစ့ၢ်ကီး ပယီၤသုးခးသံအီၤဒီး ဘၣ်တၢ်မၤလီၤ မၢ်ကံွာ်အစိၣ်ကဲ ထီၣ်တ့ၢ်အသးစ့ၢ်ကီးအဂ့ၢ်န့ၣ် ဃိၣ်လိာ်တၢ်မုာ်တၢ်ခုၣ်ကရၢၢ် ကမံးတံာ်ၦၤဘၣ်မူဘၣ်ဒါတဖၣ် စံး၀ဲလီၤႉ