လါအ့ဖြ့ၣ် ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်ပူၤ ခံသီအတီၢ်ပူၤပယီၤသုးခးလီၤကျိဖး ဒိၣ်အဃိ ကမျၢၢ်ဘၣ်ဒိ၀ဲ(၈)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ၀ဲဖဲတနံၤအံၤလါအ့ဖြ့ၣ် ၁၅ သီအနံၤန့ၣ်လီၤ.
ဖဲလါအ့ဖြ့ၣ် ၁၀ သီ ဟါခီ ၆း၀၀ နၣ်ရံၣ်အဆၢကတီၢ်န့ၣ် ပယီၤသုးလၢအိၣ်ဆီလီၤသးဖဲကီးတရံး၀့ၢ်ပူၤအံၤတဖၣ် လဲၤတ့ၢ်လီၤ၀ဲဒြိလၢ မီမးသ၀ီသီပူၤအဃိ ဖိသၣ်မုၣ်(၁၀)နံၣ်တဂၤ, ပိၥ်ခွါ(၅၅)နံၣ်တဂၤဒီး ပိၥ်မုၣ်(၅၀)နံၣ်တဂၤ ဘၣ်ဒိဘၣ်ထံး ၀ဲအဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါအ့ဖြ့ၣ် ၈ သီ ဟါခီ ၁၀း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး ပယီၤသုးလၢအိၣ်ကီးတရံး၀့ၢ်ပူၤအံၤ တဖၣ် ခးလီၤ၀ဲ(၁၂၀ မမ)ဒီး(၁၂၂ မမ)ကျိဖးဒိၣ် လီၤတဲၥ်ပိၢ်ဖးထီၣ်၀ဲလၢအၤကီၤ(အံကောင်)သ၀ီ, ကၠဲၣ်သလဲၣ်(ကျိုက်သလိုက်)သ၀ီပူၤဒီး ဒီၣ်ပလၤ(ဒေါက်ပလန်)သ၀ီတဖၣ်အံၤ အပူၤန့ၣ်လီၤ.
ခီဖျိလၢကျိဖးဒိၣ်အံၤအဃိ ကမျၢၢ်ပိၥ်မုၣ်ပိၥ်ခွါဘၣ်ဒိဘၣ်ထံး၀ဲ(၅)ဂၤအကျါ ပၣ်ဃုၥ်၀ဲ ဖိသၣ်မုၣ်(၁၄)နံၣ်တဂၤ, ဖိသၣ်ပိၥ်ခွါ(၉)နံၣ် တဂၤဒီး ဖိသၣ်ပိၥ်ခွါ(၆)နံၣ်တဂၤန့ၣ်လီၤ.လၢန့ၣ်အမဲၥ်ညါခီဖျိကျိဖးဒိၣ်အံၤအဃိဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
ဒ်န့ၣ်အသိးဖဲမဟါလါအ့ဖြ့ၣ် ၁၄ သီဒီး တနံၤအံၤ ၁၅ သီ တါလီၤအဆၢကတီၢ်အံၤ လၢကြုၢ်တုကီၢ်ဆၣ် ဒူသ၀ီအပူၤ ခီဖျိတၢ်ဒုးကဲထီၣ်ဒီးပယီၤသုးခးလီၤကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်အဃိ ကမျၢၢ်သ့ၣ်တဖၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကီၣ်ကးအံၤကီၢ်ပယီၤပူၤဟီၣ်ခိၣ်ဟူးကမျၢၢ်သဂၢၢ်ဘၣ်တၢ်ကီတၢ်ခဲနးနးကလဲၥ်ဘၣ်ဆၣ် တၢ်ဖံးတၢ်မၤလၢအမၤညီနုၢ်၀ဲလၢအမ့ၢ် ဟးခးလီၤကျိဖးဒိၣ်,ခးလီၤတၢ်ဒီးဒြိ,ကဘီယူၤအံၤ မၤ၀ဲကိးမုၢ်နံၤဒဲးလၢအအိၣ်ဒီးတၢ်ပညိၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
စးထီၣ်လၢလါအ့ဖြ့ၣ် ၂ သီ သုးကီၣ်ကးဘိးဘၣ်ရၤလီၤလၢကပတုၥ်ဆိဃၥ်တၢ်ဒုးလၢ(၂၀)သီအတီၢ်ပူၤဘၣ်ဆၣ် သူ၀ဲဒၣ်ဒြိ, ကျိဖးဒိၣ်,ကဘီယူၤဟးခးလီၤတၢ်လၢကလုၥ်ဒူၣ်တၢ်ပၢၢ်ဆၢကရူၢ်ကရၢဟီၣ်က၀ီၤပူၤတၢ်လီၢ်သကုၤဆးဒးအဃိ ကမျၢၢ်သံ ဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲန့ၣ်အကျါမ့မ့ၢ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤလၢအမ့ၢ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃), ဘျံးဒ၀ဲၢ်ကီၢ်ရ့ၣ်(သုးက့ ၄), မုၢ်တြီၢ်ကီၢ်ရ့ၣ်(သုးက့ ၅)ဒီး ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်က၀ီၤအပူၤန့ၣ် ခီဖျိပယီၤသုးခးလီၤကျိဖးဒိၣ်,ဒြိဒီးကဘီယူၤအံၤအဃိ ကမျၢၢ်သံဘၣ်ဒိဘၣ်ထံးအမဲၥ်ညါသီခါဖၠၣ်,ဟံၣ်တၢ်သူၣ်ထီၣ်ဟးဂီၤ၀ဲဒၣ်အိၣ်အဂ့ၢ်န့ၣ် ခ့ၣ်အဲၣ်ယူၣ်တၢ်မၤနီၣ်အပူၤ သ့ၣ်ညါဘၣ်န့ၣ်လီၤ.
