ယါဖူကရူၢ်ဟီၣ်က၀ီၤအပူၤၦၤဃ့ၢ်တၢ်ဒုးဖိတဖၣ်သဂၢၢ်ဘၣ်ဒီးအိၣ်လီၢ်အိၣ်ဆိးတၢ်ဂ့ၢ်ကီ

လါယူၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်

တနီသရံၣ်ကီၢ်ခီဒိၣ် ယ့ၣ်ဖၠူၣ်ကီၢ်ဆၣ် ယါဖူသ့ၣ်သ၀ီအကပိာ်ကပၤတၢ်လီၢ်သ့ၣ်တဖၣ်မ့ၢ်လၢတၢ်ဒုးတၢ်ယၤ ကဲထီၣ်၀ဲလၢခံခီခံကပၤအဘၢၣ်စၢၤအဃိၦၤလီၢ်က၀ီၤဖိလၢဘၣ်ဃ့ၢ်တၢ်ဒုးတၢ်ယၤသ့ၣ်တဖၣ်ကတီၢ်ခဲအံၤန့ၣ်မ့ၢ်လၢတၢ်စူၤခါကတီၢ်အဃိဘၣ်သဂၢၢ်၀ဲဒၣ်ဒီးတၢ်အိၣ်တၢ်ဆိးလီၢ်ကျဲၤအဂ့ၢ်ၦၤမၤစၢၤၦၤလီၢ်အိၣ်ကမှံသ့ၣ်တဖၣ်စံး၀ဲန့ၣ်လီၤႉ

ယါဖူသ့ၣ်သ၀ီအကပိာ်ကပၤတၢ်လီၢ်အပူၤအံၤဖဲလါယူၤ(၇)သီအနံၤန့ၣ်ခီဖျိတၢ်ဒုးတၢ်ယၤကဲထီၣ်၀ဲလၢခံခီခံကပၤအဘၢၣ်စၢၤအမဲာ်ညါသုးကီၣ်ကး(မီရၣ်၀တံ)ထံသုးအ၀ဲၤလီၢ်ခိၣ်သ့ၣ်လၢအိၣ်(ယ့ၣ်ဖၠူၣ်)ကီၢ်ဆၣ်အပူၤအံၤခးလီၤ၀ဲကျိၣ်ဖးဒိၣ်အဃိသ၀ီဒီဖျၢၣ်ၦၤလီၢ်က၀ီၤဖိသ့ၣ်တဖၣ်ဘၣ်ဃ့ၢ်ထီၣ်၀ဲဒ်အံၤအဖီခိၣ်တကီၢ်ခါခဲအံၤန့ၣ်အ၀ဲသ့ၣ်သဂၢၢ်ဘၣ်၀ဲဒီးတၢ်အိၣ်တၢ်ဆိးတၢ်ကီတၢ်ခဲအဂ့ၢ်ယ့ၣ်ဖၠူၣ်ကီၢ်ဆၣ်ၦၤမၤစၢၤၦၤလီၢ်အိၣ်ကမှံဖိတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “စးထီၣ်လၢဘၣ်ဃ့ၢ်တုၤခဲအံၤန့ၣ်အ၀ဲသ့ၣ်ဘၣ်ကွၢ်ဆၢၣ်မဲာ်၀ဲတၢ်အိၣ်တၢ်ဆိးလီၢ်ကျဲအဖၢ မုၢ်လီၤႉ ကတီၢ် ခဲအံၤန့ၣ်မ့ၢ်လၢတၢ်စူၤခါမီၤနီၤႉ ၀ံၤဒီးအ၀ဲသ့ၣ်ဃ့ၢ်အိၣ်ကဒုသးတၢ်လီၢ်လၢအဘူးန့ၣ်အိၣ်၀ဲ ကျီးကရၢၢ်အပူၤလီၤအဃိန့ၣ်အ၀ဲသ့ၣ်ဘၣ်အိၣ်လၢကျီးကရၢၢ်တၢ်လီၢ်လၢအလီၤဟိအလီၢ်ပူၤလီၤႉ တၢ်အခိၣ်ဒု(တၤလပၣ်)သ့ၣ်တဖၣ်ဒီးကဆ့ၣ်နီၤအဂီၢ်တၢ်အဒါ(ချီၣ်)သ့ၣ်တဖၣ်လိၣ်၀ဲမီၤနီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ပယီၤသုးကီၣ်ကးခီၣ်ချ့သုးရ့ၣ်(ခမရ-၄၁၀)လၢအိၣ်ဆီလီၤအသးဖဲ(ယ့ၣ်ဖၠူၣ်)၀့ၢ်ဟီၣ်က၀ီၤအပူၤအၦၤသ့ၣ် တဖၣ်တကီၢ်ခါခဲအံၤန့ၣ်ခီဖျိအ၀ဲသ့ၣ်နုာ်လီၤဟံန့ၢ်တၢ်လီၢ်လၢ(ယါဖူသ့ၣ်)သ၀ီပူၤအဃိၦၤလီၢ်က၀ီၤဖိသ့ၣ်တဖၣ်က့ၤအိၣ်က့ၤဆိးလၢဒူသ၀ီအပူၤတဘူၣ်ဒံးဘၣ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ

တကီၢ်ခါခဲအံၤတနီသရံၣ်ကီၢ်ခီအပူၤမ့ၢ်လၢတၢ်စူၤလီၤ၀ဲတပယူာ်ဃီအဃိၦၤဃ့ၢ်တၢ်ဒုးဖိလၢလဲၤအိၣ်လဲၤဆိးလၢကျီးကရၢၢ်ပူၤသ့ၣ်တဖၣ်သဂၢၢ်ဘၣ်၀ဲဒီးတၢ်အိၣ်တဆူၣ်အိၣ်တချ့တၢ်ဂ့ၢ်ကီအမဲာ်ညါကသံၣ်ကသီတကူတလၢတၢ်ဂ့ၢ်ကီစ့ၢ်ကီးသဂၢၢ်ဘၣ်၀ဲအဂ့ၢ်ၦၤမၤစၢၤၦၤလီၢ်အိၣ်ကမှံဖိစံးအါထီၣ်၀ဲဒၣ်န့ၣ်လီၤႉ

“ၦၤဃ့ၢ်တၢ်ဒုးဖိသ့ၣ်တဖၣ်န့ၣ်အနီၣ်ဂံၢ်အိၣ်၀ဲ(၅၀၀)ဂၤဘျဲၣ်မီၤနီၤႉ ၦၤဖိသၣ်သ့ၣ်တဖၣ်န့ၣ်အါကတၢၢ်လီၤႉ ၦၤဖိသၣ်အါဒၣ်တၢ်တက့ၢ်န့ၣ်တၢ်စူၤခါအဆၢကတီၢ်န့ၣ်မ့ၢ်လၢတၢ်ချံၣ်အဃိန့ၣ်ဆိက့ဆါဘီအိၣ်၀ဲလီၤႉ မ့မ့ၢ်ဆၢကတီၢ်ခဲအံၤဒုကသံၣ်ကသီလၢအိၣ်ဒီးၦၤန့ၣ်ပကူဆါယါဘျါန့ၢ်၀ဲလီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါ(ယါဖူသ့ၣ်)သ၀ီအဃၢၤမ့ၢ်လၢခံခီခံကပၤတၢ်ဒုးတၢ်ယၤကဲထီၣ်၀ဲဒီးသုးကီၣ်ကးထံသုးစ့ၢ်ကီးခးတပျုာ်တပျီၤကျိဖးဒိၣ်အဃိဘၣ်သံ၀ဲဖိသၣ်ဆံး(၈)လါတဂၤႇ ဖိသၣ်ဖိ(၇)နံၣ်တဂၤဃုာ်ဒီးအမိၢ်အပၢ် ခဲလၢာ်(၄)ဂၤဘၣ်သံ၀ဲဒၣ်အဂ့ၢ်လီၢ်က၀ီၤဖိသ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

တကီၢ်ခါခဲအံၤသုးကီၣ်ကးသ့ၣ်တဖၣ်လၢတၢ်ကက့ၤထီၣ်မၤန့ၢ်က့ၤ၀ဲတၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒိၣ်စိဖီၣ်ဂၢၢ်ဃာ်၀ဲယ့-ဒ၀ဲၢ်ကျဲမုၢ်အံၤအဂီၢ်သုးကီၣ်ကးအံၤဟူးဂဲၤဟဲထီၣ်၀ဲဒၣ်ဒီးကမျၢၢ်အသိလ့ၣ်ႇ သိလ့ၣ်တီၣ်လၢၢ် သ့ၣ်တဖၣ်အဖီခိၣ်စးထီၣ်ဖဲလါယူၤ(၉)သီအနံၤန့ၣ်တၢ်ဂ့ၢ်အရ့ဒိၣ်မ့ၢ်တအိၣ်ဘၣ်န့ၣ်တဘၣ်လ့ၣ်ထီၣ်လ့ၣ်လိၤ၀ဲကျဲမုၢ်အံၤဘၣ်အဂ့ၢ်(MSRF)ဟ့ၣ်ပလီၢ်ဃာ်၀ဲဒၣ်န့ၣ်လီၤႉ