လါအ့ဖြ့ၣ် ၂၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူသထူၣ်ကီၢ်ရ့ၣ်(သုးက့-၁),ကၠဲးထိၣ်ကီၢ်ဆၣ်အပူၤ ဖဲမဟါလါအ့ဖြ့ၣ်(၂၁)သီ တနံၤဃီအတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)ဒီးကမျၢၢ်တၢ်ဒီသဒၢသုး(PDF)ခိးခးဝဲပယီၤသုးကီၣ်ကးအပှၤကဲထီၣ်၀ဲခံဘျီအဃိ ပယီၤသုးသံ(၆)ဂၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဖဲလါအ့ဖြ့ၣ်(၂၁)သီ ဂီၤခီ(၁၁)နၣ်ရံၣ်ဘျဲၣ်အဆၢကတီၢ်န့ၣ် (PDF)လဲၤခးဝဲပယီၤသုးအပှၤဖဲ(ဝ့ပၠၣ်)တဘျီဒီး ဒ်န့ၣ်အသိးဖဲဟါခီ(၃) နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး(KNLA)ခိးခးဝဲပယီၤသုးအသိလ့ၣ်လၢအဟဲထီၣ်သ့ၣ်တဖၣ်ဖဲအံလူၢ်ကရူၢ်,အံလူၢ်ဖိသဝီပူၤ တဘျီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ (KNLA)သုးရ့ၣ်-၃ အပှၤတဂၤစံးဝဲလၢ “ဖဲမဟါအနံၤန့ၣ်တၢ်ဒုးကဲထီၣ်ဝဲခံဘျီဖဲ အံလူၢ်ဖိ, အံလူၢ်ဖးဒိၣ်တကပၤ န့ၣ်မီၤနီၤ. ဖဲ(၁၁) နၣ်ရံၣ်ဘျဲၣ်န့ၣ်တဘျီ,ဖဲ(၃)နၣ်ရံၣ်ဘျဲၣ်န့ၣ်တဘျီန့ၣ်လီၤ. တၢ်ကဲထီၣ်သးဖဲ(၁၁)နၣ်ရံၣ်ဘျဲၣ်န့ၣ် လၢ()ဖိသ့ၣ်တဖၣ်ဒီးမ့မ့ၢ်လၢ (၃)နၣ်ရံၣ်ဘျဲၣ်န့ၣ်လၢပပှၤန့ၣ်လီၤ. တၢ်ခိးခးဝဲဒုၣ် ဒါသိလ့ၣ်န့ၣ်, သိလ့ၣ်အပူၤဒုၣ်ဒါပှဲၤပှဲၤန့ၣ်လီၤ. ပနၢ်ဟူလၢပယီၤသုးတကပၤသံ(၆)ဂၤ ” အဂ့ၢ်န့ၣ်စံးဘၣ်ခ့ၣ်အဲးစံၣ်-က ညီတၢ် ကစီၣ်န့ၣ်လီၤ.
လၢန့ၣ်အမဲၥ်ညါတၢ်ကဲထီၣ်သး၀ံၤဖဲမဟါ(၂၂)သီအနံၤစ့ၢ်ကီး တၢ်လဲၤခးပယီၤသုးကဲထီၣ်တဘျီအဃိ ပယီၤသုးခီၣ်ချ့သုးရ့ၣ် (ခမရ-၃)အပှၤခးလီၤကဒါက့ၤကျိဖးဒိၣ်ဆူ(အံလူၢ်ကရူၢ်ဒီးခၠီပၠၣ်ကရူၢ်)ဒူသဝီအပူၤဘၣ်ဆၣ် တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ.
” မဟါခးလီၤဝဲကျိဖးဒိၣ်န့ၣ်ဖးရးညါမီၤနီၤ. ပယီၤသုးလၢ(ခမရ-၃)သ့ၣ်တဖၣ်န့ၣ်ခးလီၤဝဲကျိဖးဒိၣ်လီၤ. အဝဲသ့ၣ်ဟဲက့ၤရဲၣ်လီၤအ သးဒီဒူၣ်ဒီးခးလီၤဝဲကျိဖးဒိၣ်ဒ်န့ၣ်န့ၣ်လီၤ. ပယီၤသုးအံၤဘၣ်ယိၣ်ဝဲလၢပှၤကလဲၤမၤအီၤအဃိခးစိလီၤဝဲ ကျိဖးဒိၣ်မီၤနီၤ. အဝဲသ့ၣ်ခး လီၤဝဲလၢပၥ်ပညိၣ်ဃၥ်ဝဲအလီၢ်လၢ အံလူၢ်ကရူၢ်, ခၠီပၠၤကရူၢ်အပူၤန့ၣ်လီၤ. ကမျၢၢ်ဒုတၢ်ဘၣ်ဒိဘၣ်ထံး တအိၣ်ဘၣ်ဘၣ်ဆၣ်ဘၣ် အိၣ်လၢတၢ်ပလီၢ်ပဒီအပူၤန့ၣ်လီၤ. ” အဂ့ၢ်န့ၣ်စံးဝဲန့ၣ်လီၤ.
ဒ်န့ၣ်အသိးပယီၤသုးသိလ့ၣ်လၢအဟဲထီၣ်တၢ်ခိးခး၀ဲသ့ၣ်တဖၣ်အံၤ လီၢ်က၀ီၤပှၤဘၣ်မူဘၣ်ဒါတဖၣ်တၢ်တယးကွၢ်၀ဲလၢ ကလဲၤထီၣ်မၤပှဲၤအသုးဂံၢ်ဘါလၢ (သုးက့-၆) ကြုၢ်တု-ကီးတရံးလၢတၢ်ဒုးဆူၣ်၀ဲကိၢ်ကိၢ်လၢၤလၢၤခဲအံၤဒီး တကးဒံးဘၣ် ၀့ၢ်တကူၣ်-မီၣ်လမၠဲၣ်ကျဲစှၤသီအတီၢ်ပူၤအံၤပယီၤသုးအတၢ်ဟူးတၢ်ဂဲၤဟဲအါထီၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
