လါဖ့ၤဘြူၤအါရံၤ ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ခီၣ်ချ့သုးရ့ၣ်(ခမရ-၄၀၅)မဲးပြ့ခံပယီၤသုး ကလၢၤအံၤ ဖဲလါဖ့ၤဘြူၤအါရံၤ ထီၣ် ၁ သီအနံၤ ဟီၣ်က၀ီၤ(KNLA)သုးပၥ်ဖှိၣ်ထီၣ်န့ၢ်၀ဲသုးကလၢၤအံၤဒီး ဘၣ်ဆၣ်မ့မ့ၢ် ဒုးယၤခိၣ်ဒီးသုးရ့ၣ်ခိၣ်န့ၣ် ဃ့ၢ်ဖျိးထီၣ်တုၤ လၢခဲအံၤတၢ်လူၤဖီၣ်၀ဲတန့ၢ် ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ထီၣ်န့ၢ်မဲးပြ့ခံသုးကလၢၤအံၤအခါ တၢ်မၤန့ၢ်ကျိချံပှၥ်သၣ်အမဲၥ်ညါ တၢ်ဖီၣ်န့ၢ်၀ဲသုးခိၣ်ဖိဃုၥ်ဒီးအပှၤကအိၣ်လၢ(၂၀)ဘျဲၣ်ညါ ဒီး ဘၣ်ဆၣ်မ့မ့ၢ်လၢဒုးယၤခိၣ်ဒီးသုးရ့ၣ်ခိၣ် ၂ ဂၤဃုၥ်ဒီးပှၤအဂၤ(၂၀)ဃၣ်ဃၣ်ဃ့ၢ်ဖျိးထီၣ်တုၤလၢခဲအံၤတၢ်လူၤဖီၣ်၀ဲအဖၢမုၢ် အဂ့ၢ်န့ၣ် သုးက့ပှၤဘၣ်မူဘၣ်ဒါစံး၀ဲ န့ၣ်လီၤ.
ဘၣ်ဃးတၢ်ဂ့ၢ်အံၤ (သုးက့ ၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ဒုးယၤခိၣ်ဒီးသုးရ့ၣ်ခိၣ်လၢ အစံၣ်ဖျိးတဖၣ်န့ၣ် တဂီၤညါအံၤပှၤလူၤတရီးဘၣ်ဖၢလီၤ.ပှၤဖီၣ်တန့ၢ်ဒံးဘၣ်.ယဆိမိၣ်တနံၤအံၤဒု ကဘၣ်ဖျိးထီၣ်တထံၣ်ထံၣ်ဒၣ်ခီ. ပှၤလၢအစံၣ်ဖျိးတဖၣ်န့ၣ် အနီၣ်ဂံၢ်န့ၣ်ကအိၣ်တ့ၢ်က့ၤအဂၤ(၂၀)ဒ်န့ၣ်လီၤ.ခဲအံၤပယီၤသုး လၢပှၤက၀ီၤဃၥ်အီၤတဖၣ်န့ၣ် ပှၤတဲလၢအကျဲကတံၥ်လၢၥ်လံ တဲ၀ဲဒ်န့ၣ်” အဂ့ၢ်န့ၣ် စံး၀ဲန့ၣ်လီၤ.”
ပယီၤသုးအဂၤ(၂၀)ဃၣ်ဃၣ်လၢအဃ့ၢ်ပူၤဖျဲးထီၣ်တဖၣ်အံၤအကျါ ပှၤအခိၣ်ဒိၣ်ခံဂၤလၢအမ့ၢ် သုးခိၣ်ဒိၣ်စိ သဲၣ်လွ့ၤအူ အံၤ မ့ၢ်၀ဲပတြီၤဒုးယၤခိၣ် ဒီး မ့မ့ၢ်လၢသုးခိၣ်ဒိၣ်ဂီၢ်ဂ့ၢ် စဲသူၤရၣ်ထ့ အံၤန့ၣ်မ့ၢ်၀ဲသုးရ့ၣ်ခိၣ်အဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူ ဘၣ်ဒါအအိၣ်န့ၣ်လီၤ.
တကတီၢ်ဃီဖဲတၢ်ထီၣ်န့ၢ်သုးကလၢၤအံၤအခါန့ၣ်န့ၣ် ပယီၤသုးသံဘၣ်ဒိဘၣ်ထံး၀ဲဒၣ်အါမးဒီး ဒ်န့ၣ်အသိးတၢ်ဒုးဘျီ၀ဲအံၤ တၢ်ပၢၢ်ဆၢသုးပၥ်ဖှိၣ် ကရူၢ်တကပၤဘၣ်ဟ့ၣ်လီၤကွံၥ်အသးသမူ(၂)ဂၤအဂ့ၢ်န့ၣ် FFD ထုးထီၣ်ပၥ်ဖျါ၀ဲအသိး သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတၢ်ထီၣ်သုးကလၢၤဘျီ၀ဲအံၤတၢ်မၤန့ၢ်၀ဲ ဟီၤ၀့ၤစၤ(၁)ခိၣ်, (၁၂၀ မမ)ကျိဖးဒိၣ် ဃုၥ်ဒီးအချံ, (၆၀ မမ)ကျိဖးဒိၣ် ဃုၥ်ဒီးအချံ ဃုၥ်ဒီးကျိဖးဒိၣ်,ကျိဖိ,ကျိချံပှၥ်သၣ်ဃုၥ်ဒီးစဲးတၢ်ဖိတၢ်လံၤလၢအဂၤတဖၣ်ပၣ်ဃုၥ်၀ဲအါမးအဂ့ၢ်န့ၣ် သ့ၣ်ညါဘၣ်လၢ သုးက့ပှၤဘၣ်မူဘၣ်ဒါအအိၣ်န့ၣ်လီၤ.
ဒ်န့ၣ်အသိးမဲးပြ့ခံသုးကလၢၤလၢတၢ်ထီၣ်န့ၢ်၀ဲခဲအံၤန့ၣ်အိၣ်ဆီလီၤသးလၢဘံလ့ကီၢ်ဆၣ်ပူၤန့ၢ်၀ဲလၢအနံၣ်(၄၀)ဘျဲၣ်လံဒီး သုးကလၢၤအံၤအိၣ်ဘူး၀ဲဒီးမုၢ်တြီၢ်ကီၢ်ရ့ၣ်(သုးက့ ၅)တကးဒံးဘၣ် သုးကလၢၤအံၤအရ့ဒိၣ်လၢသုးကီၣ်ကးအဒုးယၤဂ့ၢ်၀ီပူၤထဲလဲၣ် အဂ့ၢ်န့ၣ် (သုးက့ ၁) သုးက့ခိၣ် သုးခိၣ်ကျၢၣ်ဖိ စီၤစိမၠ့ၣ်ထွ့ စံး၀ဲဒ်အံၤန့ၣ်လီၤ.
“သုးကလၢၤတဖျၢၣ်အံၤအိၣ်ဆီလီၤသးန့ၢ်အနံၣ်(၄၀)ဘျဲၣ်လံ.အတၢ်ပညိၣ်မိၢ်ပှၢ်န့ၣ်ကလဲၤထီၣ်ဆူဖၣ်ပူၣ်.မ့၀ံၤဘံလ့အံၤလဲၤဃီၤဆူကၠဲးထိၣ်ကီၢ်ဆၣ်သုတန့ၢ်တဂ့ၤအဂီၢ်န့ၣ်သုးကလၢၤ၀ဲအံၤမၤတံၥ်ပကျဲ.လၢသုးကလၢၤအံၤအဃိပကလဲၤဆူကၠဲးထိၣ်တကပၤန့ၣ် ပဘၣ်ကွၢ်တၢ်အိၣ်သး၀ံၤမးပလဲၤလီၤ”အဂ့ၢ်န့ၣ် စံး၀ဲန့ၣ်လီၤ.
တၢ်လဲၤထီၣ်ခးမဲးပြ့ခံပယီၤသုးကလၢၤဘျီ၀ဲအံၤန့ၣ်မ့ၢ်၀ဲဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်တဖၣ်, ကညီဒီကလုၥ်ဂၢၤသးကရၢ(KNDO)ဃုၥ်ဒီး (PDF ),(BPLA),(Force for Federal Democracy-FFD)သုးပၥ်ဖှိၣ်သ့ၣ်တဖၣ် ပၥ်ဖှိၣ်ထီၣ်ဒုးသကိး၀ဲတၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
