လါအ့ဖြ့ၣ် ၂၃သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်,အ့ရှၢၣ်ကျဲမုၢ်ဖးဒိၣ်ဒီတကျိၤကီၢ်ပူၤပှၤဃ့ၢ်တၢ်ဒုးလီၢ်အိၣ်ကမှံဖိအသီအဂၤ(၅၀၀၀၀)ဘျဲၣ်သ့ၣ်တဖၣ်အံၤလိၣ်ဘၣ်ဝဲဂ့ၢ်ဝီၢ်အူတၢ်ဆီၣ်ထွဲမၤစၢၤအဂ့ၢ်,ကညီတၢ်မၤစၢၤဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ထုးထီၣ်ပၥ်ဖျါစံးဝဲဒၣ်ဖဲမဟါလါအ့ဖြ့ၣ်(၂၂)သီအနံၤန့ၣ်လီၤ.
ကီၢ်ပူၤပှၤဃ့ၢ်တၢ်ဒုးလီၢ်အိၣ်ကဒုဖိအသီအဂၤ(၅၀၀၀၀)ဘျဲၣ်သ့ၣ်တဖၣ်အံၤတကီၢ်ခါခဲအံၤအရ့ဒိၣ်ကတၢၢ်လိၣ်ဘၣ်ဝဲဂ့ၢ်ဝီၢ်အူတၢ်အီၣ်မိၢ်ပှၢ်တၢ်တိစၢၤမၤစၢၤအဒိၣ်ကတၢၢ်ဒီး,လၢတၢ်အီၣ်မိၢ်ပှၢ်(၃)လါအဂီၢ်တၢ်ထိၣ်ဒွးလီၤပၥ်ဝဲတၢ်လၢၥ်ဘူၣ်လၢၤစ့ကအိၣ်ဝဲလၢစ့ယိၤ(၅၄)ကကွဲၢ်အဂ့ၢ်,(KPSN)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဃးဒီးလီၢ်အိၣ်ကမှံဖိတၢ်အီၣ်မိၢ်ပှၢ်အဂီၢ်စ့ယိၤ(၅၄)ကကွဲၢ်ဘးတၢ်လိၣ်ဘၣ်အဖီခိၣ်,(KPSN)ပှၤကတိၤတၢ်ပၢနီၢ်ဝါခုၣ်ရှံစံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“လီၤဆီဒၣ်တၢ်အ့ရှၢၣ်ကျဲမုၢ်ဖးဒိၣ်ဒီတကျိၤအပူၤတၢ်ဒုးကဲထီၣ်ဒီးသုးကီၣ်ကးတကပၤသူကဘီယူၤဟဲခးလီၤတၢ်အဃိန့ၣ်ခဲအံၤပှၤဘၣ်ဃ့ၢ်ထီၣ်ကိၢ်ကိၢ်လၢၤလၢၤအိၣ်ဝဲဒီဒူၣ်လီၤ.တၢ်ဘၣ်ဒိဘၣ်ထံးတၢ်သံတၢ်ပှၢ်နါက့အိၣ်ဝဲကိးနံၤလီၤအဃိန့ၣ်ခဲအံၤပှၤဃ့ၢ်ထီၣ်တဖၣ်န့ၣ်အနီၣ်ဂံၢ်ကအိၣ်လၢ(၅၀၀၀၀)ဘျဲၣ်ဆူအဖီခိၣ်လီၤ.အဝဲသ့ၣ်တဖၣ်လိၣ်ဘၣ်ဝဲလီၤဆီဒၣ်တၢ်,တၢ်အီၣ်မိၢ်ပှၢ်ဒီးကသံၣ်ကသီမ့ၢ်တၢ်အရ့ဒိၣ်ကတၢၢ်လီၤ.အဃိန့ၣ်ပဒွးက့ၤဝဲပှၤအဂၤ(၅၀၀၀၀)ဘျဲၣ်နီၢ်တဂၤတလါဟုသးတပိလၢသၢလါဂီၢ်အဃိန့ၣ်ကလီၤတဲၥ်ဘၣ်ဝဲလၢစ့ယိၤ(၅၄)ကကွဲၢ်မီၤနီၤ.နီၢ်ကီၢ်တခီကလိၣ်ဘၣ်အါန့ၢ်အံၤဒံးလီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ခီဖျိလီၢ်အိၣ်ကဒုဖိအသီအဂၤ(၅၀၀၀၀)လိၣ်ဘၣ်ဝဲတၢ်အီၣ်မိၢ်ပှၢ်တၢ်တိစၢၤမၤစၢၤအဖီခိၣ်,ကညီတၢ်မၤစၢၤဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ကရူၢ်ကရၢအံၤဃ့ထီၣ်ဝဲထံဂုၢ်ကီၢ်ဂၤကရူၢ်ကရၢတၢ်ကရၢကရိ,ပှၤတဝၢဂ့ၢ်ဝီတၢ်ကရၢကရိဃုၥ်ဒီးနီၢ်တဂၤတၢ်သးအိၣ်တၢ်ဆီၣ်ထွဲမၤစၢၤတၢ်မၤဘူၣ်ကစၢ်တဖၣ်လၢကဟ့ၣ်ဝဲတၢ်တိစၢၤမၤစၢၤအဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
ဒီးတၢ်မၤစၢၤလၢတၢ်သးအိၣ်ဟ့ၣ်ဝဲသ့ၣ်တဖၣ်အံၤပှၤမၤဘူၣ်တၢ်ဖိကိးဒံနီၢ်ဂၤဒဲးဆှၢခီဖျိဝဲလၢကရူၢ်ကရၢဘၣ်ထွဲတဖၣ်အစုပူၤသ့ဝဲအသိး,ဟ့ၣ်ခီဖျိဝဲလၢကျဲအဂၤတဖၣ်သ့ဝဲအဂ့ၢ်(KPSN)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
အပူၤကွံၥ်လါအ့ဖြ့ၣ်(၁၄)သီအနံၤအပူၤ,ကီးတရံးကီၢ်ဆၣ်အ့ရှၢၣ်ကျဲမုၢ်ဖးဒိၣ်အပူၤတၢ်ဒုးကဲထီၣ်ဝဲလၢသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဃိ,ကီးတရံးကီၢ်ဆၣ်ဟီၣ်ကဝီၤသဝီကရူၢ်(၂)ဘ့ၣ်ဒီးကြုၢ်တုကီၢ်ဆၣ်သဝီကရူၢ်(၉)ဘ့ၣ်အပူၤကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်ဝဲဒၣ်အဂၤ(၃၈၀၀၀)ဘျဲၣ်ဃၣ်ဃၣ်အိၣ်ဝဲအဂ့ၢ်,(KPSN)ပၥ်ဖျါဝဲဒၣ်လၢလံၥ်ထုးထီၣ်ပၥ်ဖျါအပူၤန့ၣ်လီၤ.
ဒ်န့ၣ်အသိး,တၢ်ဒုးအပူၤခီခံကပၤတၢ်ခးလိၥ်သးဒီးသုးကီၣ်ကးကဘီယူၤပညိၣ်ခးလီၤဝဲတၢ်ဆူကမျၢၢ်အိၣ်ဆိးဒူသဝီတၢ်လီၢ်တၢ်ကျဲပူၤအဃိ,သုးက့(၇)ဖၣ်အၣ်ကီၢ်ရ့ၣ်(နဘူ)တန့ဆါကီၢ်ဆၣ်ဟီၣ်ကဝီၤဃုၥ်ဒီး(ထံၣ်လိၤ)ဟီၣ်ကဝီၤအပူၤလီၢ်ကဝီၤကမျၢၢ်တဖၣ်ဘၣ်ဃ့ၢ်ထီၣ်ဝဲအိၣ်ဝဲတနီၤအဖီခိၣ်,တၢ်လူၤမၤလီၤတံၢ်က့ၤဝဲလီၢ်အိၣ်ကမှံဖိတဖၣ်အံၤအနီၣ်ဂံၢ်နီၣ်ဒွးအဖၢမုၢ်လီၤအဂ့ၢ်(KPSN)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
