လါယူၤ ၁၉ သီ, ၂၀၂၅ နံၣ်, ခ့ၣ်အဲးစံၣ်
သထူၣ်,ကၠဲးထိၣ်ဒီးဘံလ့ကီၢ်ဆၣ်အပူၤ စးထီၣ်ဖဲတလါယူၤတလါအံၤအတီၢ်ပူၤန့ၣ် သုးကီၣ်ကးအပှၤသမံသမိးဖီၣ်၀ဲသိလ့ၣ်ဒီး သိလ့ၣ်ယီၢ်(စဲးကၢး)လၢအလံၥ်လဲၢ်တအိၣ်ဘၣ်တဖၣ်ဟဲအါထီၣ်အဃိ ခိခိၣ်ဒူသ၀ီကမျၢၢ်တဖၣ်လဲၤလီၤလၢ၀့ၢ်ပူၤ တဘူၣ်လၢၤဘၣ် အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤ.
ဖဲအပူၤကွံၥ်လါမ့ၤ ၂၀ သီ န့ၣ်ပၠံၣ်တီၣ်တၢ်အိၣ်ဖှိၣ်အခါ သုးမီၤစိရိၤအခိၣ် မ့အီၣ်လဲၣ် စံးလီၤ၀ဲလၢသိလ့ၣ်,သိလ့ၣ်ယီၢ်လၢအလံၥ် အလဲၢ်တအိၣ်ဘၣ်တဖၣ်တၢ်ကဘၣ်ဖီၣ်ဟံထီၣ်ဖီၣ်ထီၣ်အရ့ဒီးဖဲန့ၣ်၀ံၤလီၢ်ခံစးထီၣ်ဖဲလါယူၤ ၁ သီအနံၤန့ၣ် လၢကီၢ်ပယီၤတၢ်လီၢ် အါတီၤအပူၤ တၢ်ဖီၣ်၀ဲသိလ့ၣ်,စဲးကၢး လၢအလံၥ်အလဲၢ်တအိၣ်ဘၣ်တဖၣ်ဟဲအိၣ်ထီၣ်၀ဲန့ၣ်လီၤ.
ဒ်န့ၣ်အသိးလၢကၠဲးထိၣ်ကီၢ်ဆၣ်,ဘံလ့ကီၢ်ဆၣ်,သထူၣ်ကီၢ်ဆၣ် ၀့ၢ်ပူၤ၀့ၢ်ချၢကျဲဖးဒ့တၢ်လီၢ်သ့ၣ်တဖၣ်န့ၣ် တၢ်အိၣ်ခိးဖီၣ်၀ဲသိလ့ၣ် လၢအလံၥ်အလဲၢ်တအိၣ်ဘၣ်တဖၣ်၀ံၤ စဲးကၢး(သိလ့ၣ်ယီၢ်)ဒီးသိလ့ၣ်တဖၣ်တၢ်ဘၣ်က့ၤရ့ထီၣ်အီၤအိၣ်လၢအကလီၢ်တုၤအကလီၢ် လၢအဆံညါအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲအသိး သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိခီဖျိတၢ်ဖီၣ်သိလ့ၣ်ဒီးဆဲးကၢးအိၣ်ထီၣ်ဒ်အံၤအဖီခိၣ် ကမျၢၢ်လၢအိၣ်ခိခိၣ်ဒူပူၤသ၀ီပူၤသ့ၣ်တဖၣ်လဲၤလီၤဟးလၢ၀့ၢ်ပူၤ တဘူၣ်လၢၤ၀ဲဘၣ်အသိး အ၀ဲသ့ၣ်ဖီၣ်တၢ်ဘျီ၀ဲအံၤဘၣ်ရ့ထီၣ်အမဲၥ်ညါတၢ်သ့ကွံၥ်သိလ့ၣ်ဒုးလီၤ၀ဲလၢဃိၥ်ပူၤစ့ၢ်ကီးအိၣ်၀ဲအဂ့ၢ်န့ၣ် သထူၣ်ကီၢ်ဆၣ်ပူၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“စးထီၣ်ဖဲတလါအံၤထီၣ်န့ၣ်အ၀ဲသ့ၣ်သမံသမိးဖီၣ်တၢ်တုၤလၢခဲအံၤလီၤ.စဲးကၢး,သိလ့ၣ်လၢလံၥ်လဲၢ်တအိၣ်ဘၣ်တဖၣ်န့ၣ် ဖီၣ်၀ဲ ခဲလၢၥ်.ဘၣ်တတီၤတီၤန့ၣ်ပှၤဖီၣ်ဃုၥ်ဒီးအကစၢ်လၢၤကၠီလီၤ.အသမံသမိး၀ဲပှၤနီသိလ့ၣ်,စဲးကၢးကစၢ်န့ၣ်အလံၥ်လဲၢ်ကဘၣ်အိၣ်,သမံသမိး၀ဲခိၣ်ဖျီၣ်.မ့၀ံၤပှၤလၢအတၢ်တအိၣ်ဘၣ်တဖၣ်န့ၣ်အ၀ဲသ့ၣ်သ့ကွံၥ်၀ဲအဆဲးကၢး,မ့မ့ၢ်ပှၤကစၢ်န့ၣ်ဖီၣ်က့ၤကိးထၢနုၥ်လီၤ၀ဲလၢတၢ်ဒုးဃၥ်လီၢ်၀ံၤဟ့ၣ်၀ဲတၢ်ကမၣ်မီၤနီၤ.လၢသထူၣ်၀့ၢ်ပူၤဒုလဲၤလီၤတညီဘၣ်.ဘၣ်ဆၣ်ပှၤလၢသိလ့ၣ်အလံၥ်လဲၢ်အိၣ်ညါဒုလဲၤ၀ဲဘူၣ်န့ၣ်.လၢတအိၣ်ဘၣ်ညါဒုဘၣ်အိၣ်ကနၣ်ထံန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢကၠဲးထိၣ်ကီၢ်ဆၣ်တကပၤန့ၣ်စ့ၢ်ကီး ဆဲးကၢးလၢအလံၥ်လဲၢ်တအိၣ်ဘၣ်တဖၣ်န့ၣ်တၢ်ဘၣ်က့ၤရ့ထီၣ်၀ဲစဲးကၢးတခိၣ်န့ၣ် တုၤလၢ (၅၀၀,၀၀၀)ကလီၢ်ညါဒီး မ့မ့ၢ်လၢသိလ့ၣ်တခိၣ်န့ၣ်ဘၣ်ရ့ထီၣ်အိၣ်တုၤလၢအကလီၢ်(၃၀)ညါအဂ့ၢ်န့ၣ် သ့ၣ်ညါဘၣ်လၢ ကမျၢၢ် အအိၣ် န့ၣ်လီၤ.
တကီၢ်ခါခဲအံၤခီဖျိ၀့ၢ်ပူၤတၢ်ဖီၣ်၀ဲသိလ့ၣ်,စဲးကၢးလၢလံၥ်လဲၢ်တအိၣ်ဘၣ်တဖၣ်အံၤအဃိ ဒူသ၀ီကမျၢၢ်လၢလုၢ်အီၣ်အသးသမူလၢ တၢ်ဆါတၢ်ပှ့ၤတဖၣ်လၢကလဲၤပှ့ၤဆါတၢ်ဒီးကလဲၤစိၥ်ဆါတၢ်သူတၢ်သၣ်အဂီၢ်ထံၣ်ဘၣ်၀ဲတၢ်ကီတၢ်ခဲအသိး ၀့ၢ်ပူၤကမျၢၢ်လၢအနီ ဒိးလဲအီၣ်သိလ့ၣ်လၢလံၥ်လဲၢ်တအိၣ်ဘၣ်တဖၣ်စ့ၢ်ကီးဘၣ်ဆိကတီၢ်ကွံၥ်၀ဲတၢ်ဖံးတၢ်မၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဘံလ့,ကၠဲးထိၣ်,သထူၣ်အမဲၥ်ညါလၢဖၣ်အၣ်၀့ၢ်အခိၣ်အဃၢၤစ့ၢ်ကီးတၢ်ဖီၣ်၀ဲသိလ့ၣ်လၢအလံၥ်လဲၢ်တအိၣ်ဘၣ်အိၣ်၀ဲဘၣ်ဆၣ်မ့မ့ၢ်လၢမၠၣ်၀တံၣ်ဒီးလူၢ်ပျဲၢ်၀့ၢ်လၢ ကညီသုးခိးကီၢ်ဆၢ(BGF)အပှၤအိၣ်၀ဲအံၤတၢ်ဖီၣ်၀ဲတအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢ ကမျၢၢ်အိၣ်၀့ၢ်ပူၤ တဖၣ်အအိၣ်န့ၣ်လီၤ.
