လါယူၤ ၂၀ သီ, ၂၀၂၅ နံၣ်, ခ့ၣ်အဲးစံၣ်
တနံၤအံၤလါယူၤအသီ(၂၀)လၢအလီၤဘၣ်ဝဲဟီၣ်ခိၣ်ဒီဖျၢၣ်ဘၣ်ကီဘၣ်ခဲအမုၢ်နံၤအံၤအဖီခိၣ်န့ၣ်(TBC)ဃ့ၢ်ထီၣ်ဝဲဒၣ်ကီၢ်ကၠီၣ်တဲၣ်ပဒိၣ်ဒီးထံဂုၤကီၢ်ဂၤသ့ၣ်တဖၣ်လၢကမၤအါထီၣ်ဘၣ်ဝဲတၢ်ဆီၣ်ထွဲမၤစၢၤဒီးတၢ်ခွဲးတၢ်ယၤသ့ၣ်တဖၣ်လၢပှၤဘၣ်ကီဘၣ်ခဲလၢအအိၣ်လၢကီၢ်ကၠီၣ်တဲၣ်ဒီးကီၢ်ပယီၤကီၢ်ဆၢဒဲကဝီၤသ့ၣ်တဖၣ်အဂီၢ်အဂ့ၢ်(TBC)ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
တကီၢ်ခါအခဲအံၤန့ၣ်ပှၤဘၣ်ကီဘၣ်ခဲဖိလၢအိၣ်ဆိးကီၢ်ကၠီၣ်တဲၣ်-ကီၢ်ပယီၤကီၢ်ဆၢပှၤနီၣ်ဂံၢ်(၁၀၈,၀၀၀)ဂၤသ့ၣ်တဖၣ် သဂၢၢ်ဘၣ်ဝဲတၢ်ဃံးတၢ်စ့ၤခီဖျိလၢတၢ်ဆီၣ်ထွဲမၤစၢၤသ့ၣ်တဖၣ်လီၤစှၤကွံၥ်ဝဲအဃိဟ့ၣ်ဝဲတၢ်ဆီၣ်သနံး(TBC)လၢတၢ်ဘၣ်ထုးစှၤလီၤကွံၥ်ဝဲပှၤဒဲကဝီၤဖိသ့ၣ်တဖၣ်တၢ်အီၣ်အိၣ်ထီၣ်တ့ၢ်ဝဲဒၣ်န့ၣ်လီၤ.
လၢတၢ်န့ၣ်အဃိမ့ၢ်လၢတကီၢ်ခါခဲအံၤတၢ်ဆီၣ်ထွဲမၤစၢၤသ့ၣ်တဖၣ်လီၤစှၤကွံၥ်ဝဲဒၣ်အဃိတၢ်ဃံးတၢ်စ့ၤအိၣ်ထီၣ်ဝဲဒၣ်လၢတၢ်အီၣ်တၢ်အီတကပၤမ့ၢ်ဂ့ၤ,ဆူၣ်ချ့တကပၤမ့ၢ်ဂ့ၤဒ်အံၤအဖီခိၣ်လၢတကီၢ်ခါခဲအံၤတၢ်ဃံးတၢ်စ့ၤအဆၢကတီၢ်တၢ် ကြၢးဃုသကိးဝဲကျဲလၢတၢ်ကဘှါၡဲတၢ်ဃံးတၢ်စ့ၤသ့ၣ်တဖၣ်အံၤအဂ့ၢ်(TBC)ဆီၣ်တခူထီၣ်ဝဲလၢအလံၥ်ပၥ်ဖျါအပူၤ န့ၣ်လီၤ.
ဒ်န့ၣ်အသိးလၢတၢ်ကဘှါၡဲတၢ်ဃံးတၢ်စ့ၤတဖၣ်အံၤအဂီၢ်(TBC)တကပၤဃ့ထီၣ်ဝဲလၢ”တၢ်ကပျဲပှၤဒဲကဝီၤဖိလၢအိၣ်ကီၢ်ကၠီၣ်တဲၣ်ပူၤသ့ၣ်တဖၣ်ကဖံးကမၤဘၣ်တၢ်လၢအဖိးမံဒီးသဲစးစ့ၢ်ကီး”ဒီးတၢ်မ့ၢ်ပျဲအဝဲသ့ၣ်ခီန့ၣ်အနီၢ်ကစၢ်ဒၣ်ဝဲဆီၣ်ထွဲမၤစၢၤက့ၤအဟံၣ်ဖိဃီဖိသ့ဝဲအသိးတမ့ၢ်ထဲဒိးသန့ၤအသးလၢတၢ်ဆီၣ်ထွဲမၤစၢၤအဖီခိၣ်လၢၤဘၣ်အဂ့ၢ်(TBC)စံးဝဲဒၣ်န့ၣ်လီၤ.
တကတီၢ်ဃီဒ်(TBC)အလံၥ်ဘိးဘၣ်ရၤလီၤအိၣ်ဝဲအသိးန့ၣ်လၢကီၢ်ပယီၤပူၤစ့ၢ်ကီးထံကီၢ်တၢ်အိၣ်သးတဂၢၢ်တကျၢၤဘၣ်ဒီးခီဖျိတၢ်ဒုးတၢ်ယၤအဃိပှၤ(၃)ကကွဲၢ်ဘျဲၣ်ဘၣ်ဃ့ၢ်တၢ်ဒုးတၢ်ယၤ,ဘၣ်သုးလီၢ်သုးကျဲအိၣ်ထီၣ်ဝဲဒၣ်ဒီးလၢအကျါပှၤကညီလၢအကလးဟဲဃ့ၢ်ထီၣ်အိၣ်ကဒုဝဲဒၣ်ဆူကီၢ်ကၠီၣ်တဲၣ်တကပၤလံအသိးပှၤနီၣ်ဂံၢ်သ့ၣ်တဖၣ်အံၤကအါထီၣ်န့ၢ်ဒံးအလီၢ်သ့ဝဲဒၣ်အဖီခိၣ်ထံဂုၤကီၢ်ဂၤတၢ်မၤဘူၣ်ကစၢ်တဖၣ်ကဆဲးဟ့ၣ်တၢ်ဆီၣ်ထွဲမၤစၢၤဒံးအဂ့ၢ်အဂ့ၢ်ပၥ်ဖျါဝဲန့ၣ် လီၤ.
လၢတၢ်န့ၣ်အဃိတနံၤအံၤလၢအလီၤဘၣ်ဝဲဟီၣ်ခိၣ်ဒီဖျၢၣ်ဘၣ်ကီဘၣ်ခဲမုၢ်နံၤအံၤအဖီခိၣ်ဒ်သိးဒီပှၤဘၣ်ကီဘၣ်ခဲဖိလၢအိၣ်ကီၢ်ကၠီၣ်တဲၣ်တကပၤမ့ၢ်ဂ့ၤ,လၢကီၢ်ပူၤမ့ၢ်ဂ့ၤဒ်သိးကဒိးန့ၢ်ဘၣ်ဝဲတၢ်ဆီၣ်ထွဲမၤစၢၤဒီးတၢ်ခွဲးတၢ်ယၤသ့ၣ်တဖၣ်အဂီၢ်(TBC)ဃ့ၢ်ထီၣ်ဝဲဒၣ်ကီၢ်ကၠီၣ်တဲၣ်ပဒိၣ်ဒီးထံဂုၤကီၢ်ဂၤသ့ၣ်တဖၣ်ဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ.
