လါယူၤလံ ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့,ဖၣ်အၣ်ဒီးသထူၣ်ကီၢ်ဆၣ်ဟီၣ်က၀ီၤအပူၤ စှၤသီအတီၢ်ပူၤတၢ်စူၤတပယူၥ်ဃီဒီးဘီနီၤကျိထံဒိၣ်ထီၣ်အဃိ ဒူသ၀ီလၢအိၣ်ထံကျိကၢၢ်နံၤလၢတၢ်လီၢ်လီၤဖုၣ်အံၤတဖၣ် ထံနုၥ်လီၤ၀ဲလၢသ၀ီပူၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤ.
စးထီၣ်ဖဲအပူၤကွံၥ်စှၤသီအခါန့ၣ် ခီဖျိတၢ်စူၤကိးမုၢ်နံၤမုၢ်နၤအဃိဘီနီၤကျိဒိၣ်ထီၣ်၀ဲဒီးဒူသ၀ီလၢအလီၤဖုၣ်လၢအိၣ်ဘူး၀ဲ ထံကျိတဖၣ် လၢအမ့ၢ်ကၠိ၀ဲသ၀ီ,ထံဖးဒိၣ်ထၣ်,ထံဖးဒိၣ်ခံဃုၥ်ဒီးသ၀ီလၢအဂၤတဖၣ်အံၤ ဖဲမဟါမုၢ်နၤခီန့ၣ်ထံနုၥ်လီၤလၢသ၀ီပူၤ ဘၣ်ဟဲကဲထီၣ်၀ဲဒ်အံၤလီၤအဂ့ၢ်န့ၣ် ကမျၢၢ်လၢအိၣ်ဖဲန့ၣ်တဖၣ်စံး၀ဲန့ၣ်လီၤ.
ထံဖးဒိၣ်ထၣ်သ၀ီဖိပိၥ်မုၣ်တဂၤ စံး၀ဲလၢ“ထံဒိၣ်ထီၣ်န့ၣ်ဖဲတနံၤအံၤလီၤ.ကဘၣ်ဖဲမနၤ ၃း၀၀ နၣ်ရံၣ်န့ၣ်လီၤ. ဘီနီၤကျိဒိၣ်ထီၣ်ပှဲၤ လီၤလၥ်ဘျီယွၤလီၤ၀ဲလၢသ၀ီပူၤန့ၣ်. ခဲအံၤထံဒိၣ်ဘံလ့ကီၢ်ဆၣ်ဒီတဘ့ၣ်လီၤ. ကၠိနါက့ထံထီၣ်ခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်ဖဲတဂီၤအံၤန့ၣ်လီၤ.
လၢန့ၣ်အမဲၥ်ညါခီဖျိထံဒိၣ်ထီၣ်အံၤအဃိစံၥ်လၢအိၣ်သ၀ီခိၣ်သဃၢၤတဖၣ်အံၤစ့ၢ်ကီးထံနုၥ်လီၤ၀ဲခဲလၢၥ်ဃၣ်ဃၣ်အဂ့ၢ်န့ၣ် ထံဖးဒိၣ်ထၣ်သ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
ကိးမုၢ်နံၣ်ဒဲးမ့တုၤဃီၤဖဲတၢ်စူၤအခါအတီၢ်လံန့ၣ် ဒူသ၀ီလၢအိၣ်ဘူးဘီနီၤကျိကၢၢ်နံၤအံၤတဖၣ်အါဒၣ်တက့ၢ်သဂၢၢ်ဘၣ်၀ဲ ထံဒိၣ် ဃိၣ်ယွၤလီၤလၢသ၀ီပူၤဒီးလီၤဆီဒၣ်တၢ်မ့မ့ၢ်လၢကၠိ၀ဲသ၀ီအံၤန့ၣ်နးဒိၣ်တစဲးခီဖျိအိၣ်ဘူး၀ဲထံနံၤထံးတီတီလီၤအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စ့ၢ်ကီး စံး၀ဲဒ်အံၤန့ၣ်လီၤ.
“မ့မ့ၢ်ဒူသ၀ီလၢအိၣ်ဘီနီၤကျိထံနံၤတဖၣ်န့ၣ်ထံနုၥ်လီၤလၢသ၀ီပူၤကိးသ၀ီဃၣ်ဃၣ်လီၤ.ဒ်သိး ပယၢ်ရီ,ဃီဖိပျဲၢ်,ထံဆံၣ်ဘီသ၀ီ န့ၣ် ထံထီၣ်တတုၤဒံးလၢသ၀ီပူၤဘၣ်,တုၤလၢသ၀ီဃၢၤဒံးလီၤ.မ့မ့ၢ်လၢကၠိ၀ဲသ၀ီ,ထံဖးဒိၣ်ထၣ်သ၀ီန့ၣ်အိၣ်တီတီထံကျိကပၤအဃိထံဒိၣ်ထီၣ်ကအိၣ်လၢကိးမုၢ်နံၣ်ဒဲးလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဒ်န့ၣ်အသိးတကီၢ်ခါခဲအံၤလၢဖၣ်အၣ်ကီၢ်ဆၣ်ဒီးသထူၣ်ကီၢ်ဆၣ်ဘၢၣ်စၢၤ ဒူသ၀ီလၢအိၣ်ဘူးဘီနီၤကျိနံၤအံၤသ့ၣ်တဖၣ်စ့ၢ်ကီး ထံနုၥ်လီၤတုၤ၀ဲလၢဒူသ၀ီအခိၣ်အဃၢၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤ.
ဒူသထူၣ်ကီၢ်ရ့ၣ် ကီၢ်ဆၣ်ပူၤ ဒူသ၀ီလၢအိၣ်ဘီနီၤကျိကၢၢ်နံၤဃုၥ်ဒီးဒူသ၀ီလၢအဂၤတဖၣ် အါဒၣ်တက့ၢ်န့ၣ် လုၢ်အီၣ်အသး သမူ လၢတၢ်မၤအီၣ်စံၥ်,မၤအီၣ်ကထံပိၥ်,သူၣ်အီၣ်ဖျးအီၣ်ပဲ,နံၣ်သိသ့ၣ်တဖၣ်န့ၣ်လီၤ. လၢန့ၣ်အမဲၥ်ညါအပူၤကွံၥ်(၂၀၂၄)တၢ်စူၤခါ န့ၣ်စ့ၢ်ကီး ကီၢ်ရ့ၣ်ဒီတဘ့ၣ်အပူၤသဂၢၢ်ဘၣ်၀ဲထံဒိၣ်ဃိၣ်ယွၤအဃိ ဘုသံဘုဟးဂီၤ၀ဲဒၣ်အါအါဂီၢ်ဂီၢ်ကဲထီၣ်ဒံး၀ဲန့ၣ်လီၤ.
ဒ်တနံၤအံၤလါယူၤလံ ၉ သီ ကီၢ်ပယီၤမူခိၣ်ကလံၤသီၣ်ဂီၤ၀ဲၤကျိၤထုးထီၣ်ပၥ်ဖျါ၀ဲအသိးန့ၣ် ကီၢ်ခီ,ကီၢ်စဲၣ်အါဘ့ၣ် အကျါလၢ အပၣ်ဃုၥ်၀ဲ ပကိကီၢ်ခီ,တလၢၤကီၢ်စဲၣ်ဒီးကညီကီၢ်စဲၣ်ဟီၣ်က၀ီၤအပူၤန့ၣ် တုၤလၢတနံၤအံၤဟါခီန့ၣ် တၢ်ကစူၤဖးဒိၣ်၀ဲလၢတၢ် လီၢ်သကုၤဆးဒးသ့၀ဲအဂ့ၢ်န့ၣ် စံး၀ဲန့ၣ်လီၤ.
