လါယူၤလံ ၉ သီ, ၂၀၂၅ နံၣ်, ခ့ၣ်အဲးစံၣ်
ကညီထံရူၢ်ကီၢ်သဲးပၣ်တံၣ် တၢ်လီၤကရၢကရိရိၣ်ဖှိၣ်အခိၣ်လီၢ်လံၤလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ်တဖၣ်အံၤ ပၣ်တံၣ်ခိၣ်နၢ်လၢအိၣ်ဖၣ်အၣ်တဖၣ်ဟဲဆဲးကျိးအ၀ဲသ့ၣ်လၢကနုၥ်လီၤကဒါလၢပၣ်တံၣ်ပူၤအိၣ်ဘၣ်ဆၣ် သးတအိၣ်လၢ ကနုၥ်လီၤ၀ဲလၢၤဘၣ်အဂ့ၢ်န့ၣ် တၢ်လီၤကရၢကရိရိၣ်ဖှိၣ်အခိၣ်လီၢ်လံၤတဖၣ် စံး၀ဲန့ၣ်လီၤ.
တၢ်ဃုထၢလၢသုးကီၣ်ကးကမၤ၀ဲဖဲတနံၣ်အံၤလၢၥ်န့ၣ် ကညီထံရူၢ်ကီၢ်သဲးပၣ်တံၣ်လီၢ်ခၢၣ်သးခိၣ်နၢ်ဒိၣ်ထီလၢအိၣ်ဖၣ်အၣ်၀့ၢ်ပူၤ တဖၣ် ဟဲဆဲးကျိး၀ဲမၠၣ်၀တံၣ် က၀ီၤဒ့,ဒူသ၀ီ,ကီၢ်ဆၣ်,ကီၢ်ရ့ၣ်ပတီၢ် တၢ်ကရၢကရိရိၣ်ဖှိၣ်အခိၣ်လီၢ်လံၤတဖၣ်လၢကနုၥ်လီၤ ကဒါ လၢပၣ်တံၣ်ပူၤအိၣ်ဒီးဘၣ်ဆၣ်တနီၤန့ၣ်သးတအိၣ်နုၤလီၤကဒါ၀ဲလၢၤဘၣ်အဂ့ၢ်န့ၣ် ကညီပၣ်တံၣ်တၢ်ရိၣ်ဖှိၣ်အခိၣ်လီၢ်လံၤ တဂၤ စံး၀ဲဒ်အံၤန့ၣ်လီၤ.
“ဖဲမၠၣ်၀တံၣ်အံၤလၢကက့ၤနုၥ်ကဒါဆူကညီပၣ်တံၣ်အဂီၢ်ပၣ်တံၣ်ခိၣ်နၢ်လၢအိၣ်ဖၣ်အၣ်တဖၣ်ဟဲဆဲးကျိးတၢ်အိၣ်မီၤ.ပနၢ်ဟူလၢဖဲအံၤ ပှၤတက့ၤမၤကဒါနီတဂၤဘၣ်.ပှၤလၢအမၤတၢ်လၢကညီလံၥ်လဲၢ်ဒီးတၢ်ဆဲးတၢ်လၤတဖၣ်န့ၣ်ဟးထီၣ်ကွံၥ်ခဲလၢၥ်လီၤ”အဂ့ၢ်န့ၣ် ကညီပၣ်တံၣ်တၢ်ကရၢကရိရိၣ်ဖှိၣ်အခိၣ်လီၢ်လံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤမၠၣ်၀တံၣ်၀့ၢ်ပူၤန့ၣ် ကညီထံရူၢ်ကီၢ်သဲးပၣ်တံၣ်တဖၣ် မၤ၀ဲတၢ်ဟးလီၤကရၢကရိရိၣ်ဖှိၣ်တၢ်ဟူးတၢ်ဂဲၤတအိၣ်၀ဲ ဘၣ် ဒီးဘၣ်ဆၣ် တၢ်ဟဲဆဲးကျိးဆိဃၥ်၀ဲပၣ်တံၣ်ဖိလီၢ်လံၤအိၣ်၀ဲန့ၣ်လီၤ.
လၢန့ၣ်အမဲၥ်ညါမၠၣ်၀တံၣ်၀့ၢ်အံၤအိၣ်ဆီလီၤသးလၢကီၢ်ဆၢဒီး ခီဖျိ၀့ၢ်အံၤတၢ်ဖံးအီၣ်မၤအီၣ်မုၢ်ကျိၤ၀ဲၤကွၥ်တၢ်ခွဲးတၢ်ယၥ်အိၣ်အဃိ ပှၤအိၣ်လၢပကိကီၢ်ခီဒိၣ်ဃုၥ်ဒီးကီၢ်ပယီၤတၢ်လီၢ်လၢအဂၤတဖၣ်ဟဲဆီလီၤသးအိၣ်ဆိး၀ဲအါမးန့ၣ်လီၤ.ဒ်န့ၣ်အသိးလၢကဟဲတၢ်ဃုထၢအံၤ မၠၣ်၀တံၣ်၀့ၢ်ပူၤ တၢ်ကစီၣ်ဟးထီၣ်ကလုၥ်ဒူၣ်လၢအဂၤတဖၣ်ကနုၥ်လီၤလၢကညီပၣ်တံၣ်ပူၤ၀ံၤကဒိးဃုထၢသးလၢ ဘျီၣ်ဒိၣ်ခၢၣ်စးအိၣ်၀ဲ အဂ့ၢ် ကညီပၣ်တံၣ်ကရၢဖိလီၢ်လံၤတဂၤ စံး၀ဲန့ၣ်လီၤ.
“ဖဲမၠၣ်၀တံၣ်အံၤ ပှၤလၢအဲၣ်ဒိးနုၥ်လီၤလၢကညီပၣ်တံၣ်ပူၤန့ၣ်အိၣ်,ဘၣ်ဆၣ်အ၀ဲသ့ၣ်န့ၣ်တမ့ၢ်ကညီကလုၥ်ဘၣ်. အ၀ဲသ့ၣ် နုၥ်လီၤပၣ်တံၣ်မ့၀ံၤန့ၣ် ကဒိးဃုထၢသးလၢခိၣ်နၢ်,ဘျီၣ်ဒိၣ်ခၢၣ်စးအလီၢ်အိၣ်လီၤ. မ့ၢ်ပှၤကတူၢ်လိၥ်ဧါ တတူၢ်လိၥ်ဧါဒု တသ့ၣ်ညါ ဘၣ်”အဂ့ၢ်န့ၣ် စံး၀ဲန့ၣ်လီၤ.
လၢတၢ်ဃုထၢအဂီၢ်ကညီထံရူၢ်ကီၢ်သဲးပၣ်တံၣ်လၢအက့ၤမၤနီၣ်မၤဃါကဒါအပၣ်တံၣ်သ့ၣ်တဖၣ် ဘၣ်ဃးအ၀ဲသ့ၣ် တၢ်လီၤ ကရၢကရိရိၣ်ဖှိၣ်တၢ်ဟူးတၢ်ဂဲၤတၢ်အိၣ်သးအဂ့ၢ်အကျိၤတဖၣ်ကသ့ၣ်ညါအါထီၣ်အဂီၢ်န့ၣ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးတန့ၢ်ဒံး၀ဲဘၣ်န့ၣ်လီၤ.
တကီၢ်ခါအံၤလၢကညီကီၢ်စဲၣ် မၠၣ်၀တံၣ်ဒီးဖၣ်အၣ်၀့ပူၤန့ၣ် ပၣ်တံၣ်လၢအဟးလီၤကရၢကရိရိၣ်ဖှိၣ်တၢ်တဖၣ်န့ၣ်အိၣ်ဒံးဒၣ်ထဲ ကီၢ်စၢဖှိၣ်သွံၣ်ဃူဖိးဒီးတၢ်ဂုၤထီၣ်ပသီပၣ်တံၣ်တဒူၣ်ဧိၤဒံးလီၤအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
