လါအီးကထိဘၢၣ် ၇သီ, ၂၀၂၅နံၣ်, ခ့ၣ်အဲးစံၣ်,
ခါလၢကဟဲ(၂၇၆၅)(၂၀၂၆)နံၣ်ကညီနံၣ်ထီၣ်သီမုၢ်နံၤအံၤ,တၢ်ကမၤလၤကပီၤဝဲအီၤလီၤဘီလီၤမုၢ်လၢစွ့ၣ်ကိၣ်ကိၤဝ့ၢ်သီတၢ်လီၢ်အပူၤအဂ့ၢ်,သ့ၣ်ညါဘၣ်ဒ်သုးခိးကီၢ်ဆၢ(BGF)ဂံၢ်ခီၣ်ထံးတၢ်ဘိးဘၣ်ရၤလီၤပၥ်ဖျါအိၣ်ဝဲအသိးန့ၣ်လီၤ.
ဒ်သိးကညီနံၣ်ထီၣ်သီမူးတၢ်ရဲၣ်တၢ်ကျဲၤအံၤကကဲထီၣ်လိၣ်ထီၣ်အဂီၢ်အပူၤကွံၥ်လါအီးကထိဘၢၣ်(၄)သီအနံၤအပူၤ,တၢ်မၤတ့ၢ်ဝဲတၢ်တဲသကိးတၢၣ်ပီၣ်စိတၢ်အိၣ်ဖှိၣ်အတၢ်ရဲၣ်တၢ်ကျဲၤတခါဖဲစွ့ၣ်ကိၣ်ကိၤတၢ်ပၥ်သူၣ်ခ့သးပှၢ်ဟံၣ်အိၣ်ကဒုဘျီၣ်ဒိၣ်အပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒီးကညီနံၣ်ထီၣ်သီမူးတၢ်ရဲၣ်တၢ်ကျဲၤကကဲထီၣ်လိၣ်ထီၣ်အဂီၢ်တၢ်ကတိၤတၢၣ်ပီၣ်စိအတၢ်အိၣ်ဖှိၣ်အပူၤသုးခိးကီၢ်ဆၢ(BGF)ကရူၢ်ကရၢအမဲၥ်ညါ,ကညီတၢ်မုၥ်တၢ်ခုၣ်ကီၣ်ကးကရၢ(PC),ကညီတၢ်ဘူၣ်တၢ်ဘါသီဘုၣ်သီခါကရူၢ်ကရၢ,ကီၢ်စဲၣ်ကညီလံၥ်လဲၢ်တၢ်ဆဲးတၢ်လၤပၣ်တံၣ်,(KCO)ကညီတၢ်ဃံတၢ်လၤကရၢခိၣ်နၢ်တဖၣ်ဒီးပအိၣ်ကလုၥ်ဒူၣ်ဖိတဖၣ်ပၣ်ဃုၥ်ပၣ်ဂီၢ်(၂၀၀)ဂၤဃၣ်ဃၣ်အဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးဒီးတၢ်ကမၤဝဲကညီနံၣ်ထီၣ်သီမူးတၢ်ရဲၣ်တၢ်ကျဲၤဒိၣ်ဒိၣ်မုၢ်မုၢ်အဖီခိၣ်,(KCO)ကညီတၢ်ဃံတၢ်လၤကရၢပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
“တၢ်ရဲၣ်တၢ်ကျဲၤဒိၣ်ဒ်အံၤဒုထီၣ်ဘးလၢကီၢ်စဲၣ်ဒီတဘ့ၣ်ပတီၢ်ညါန့ၣ်လီၤ.ဘၣ်မနုၤဃိလဲၣ်န့ၣ်သုးခိၣ်ဖးဒိၣ်စံးလီၤဝဲလၢပကမၤတၢ်ရဲၣ်တၢ်ကျဲၤလၢပကညီကလုၥ်ဒ်အံၤအဂီၢ်အဆိကတၢၢ်ပတၢ်ဃူတၢ်ဖိးကဘၣ်အိၣ်ဝဲ,ခံပကျိၣ်စ့တၢ်ဆီၣ်ထွဲတၢ်လီၢ်တၢ်ကျဲကဘၣ်အိၣ်အဃိန့ၣ်ကြၢးဒီးစွ့ၣ်ကိၣ်ကိၤတၢ်လီၢ်လီၤမီၤနီၤအဃိအသုကဂုၥ်ကျဲးစၢးဝဲလၢအဂ့ၤကတၢၢ်ဒီးမုၢ်လၢ်ဝဲလၢကမျၢၢ်တဖၣ်ကပၣ်ဃုၥ်ပၣ်ဂီၢ်သ့ခဲလၢၥ်အဂီၢ်”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ,ကညီကီၢ်စဲၣ်အပူၤတကီၢ်ခါခဲအံၤတၢ်မုၥ်တၢ်ခုၣ်တအိၣ်ဒံးဝဲဒၣ်ဘၣ်ဒီးကမျၢၢ်တဖၣ်ဘၣ်ဃ့ၢ်အိၣ်ကဒုဘၣ်ကီဘၣ်ခဲအဆၢကတီၢ်တၢ်ပဲၥ်ထံနီၤဖးအိၣ်ဝဲလၢတကြၢးတၢ်မၤဝဲမူးပွဲလီၤဘီလီၤမုၢ်ဒံးဘၣ်အဖီခိၣ်,အဝဲစံးစ့ၢ်ကီးဝဲဒ်အံၤန့ၣ်လီၤ.
“ဘၣ်ဃးတၢ်တဖၣ်န့ၣ်ခိၣ်နၢ်ဒိၣ်ထီသ့ၣ်တဖၣ်လဲၤခီဖျိတ့ၢ်ဝဲအါဖးဒီးယံၤလံအဃိသ့ၣ်ညါထံၣ်စိဝဲခဲလၢၥ်ဂ့ၤဂ့ၤလီၤ.ပဝဲပကဲတၢ်ဃံတၢ်လၤကရၢအဃိဒ်ပမၤဘူးမၤစၢၤသ့အသိးပမၤလီၤ.ပကွၢ်ကဒါက့ၤပကညီကီၢ်စဲၣ်ပူၤကမျၢၢ်ဘၣ်ကီဘၣ်ခဲနါက့တမ့ၢ်ဖဲခဲအံၤဘၣ်အိၣ်တ့ၢ်ပၥ်ဖးယံၤလံ,အဃိပှဲၤသိးတၢ်သ့တၢ်ဘၣ်အိၣ်ပကလဲၤသကိးလၢတၢ်မုၥ်တၢ်ခုၣ်အပူၤလီၤ”အဂ့ၢ်စံးထီၣ်ဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ,တၢ်မၤတၢ်အိၣ်ဖှိၣ်တဲသကိးဆိတၢ်ရဲၣ်တၢ်ကျဲၤအပူၤသုးခိးကီၢ်ဆၢ(BGF)အခိၣ်သုးခိၣ်ဒိၣ်စိစီၤခၠံၣ်သူၣ်စံးလီၤဝဲလၢ“နံၣ်ထီၣ်သီတၢ်ရဲၣ်တၢ်ကျဲၤအံၤတၢ်ကမၤဝဲအီၤဒိၣ်ဒိၣ်မုၢ်မုၢ်အဖီခိၣ်,တၢ်ပဲၥ်ထံနီၤဖးကအိၣ်ဝဲအကလုၥ်ကလုၥ်န့ၣ်လီၤ.ဘၣ်ဆၣ်ဒ်ဒီတကလုၥ်အမူအဒါတခါအသိး,ကညီကလုၥ်ဒူၣ်တဖၣ်အဂီၢ်ကမၤဝဲလၢအလၢပှဲၤဒီးအသံးအကၥ်လီၤ”အဂ့ၢ်,(BGF)ဂံၢ်ခီၣ်ထံးအတၢ်ပၥ်ပူၤပၥ်ဖျါဝဲဒၣ်စ့ၢ်ကီးဝဲဒၣ်န့ၣ်လီၤ. စွ့ၣ်ကိၣ်ကိၤဝ့ၢ်သီဟီၣ်ကဝီၤအပူၤဘၣ်ဃးတၢ်ကမၤဝဲကညီနံၣ်ထီၣ်သီမူးဒိၣ်ဒိၣ်မုၢ်မုၢ်ဘျီဝဲအံၤသုးခိးကီၢ်ဆၢ(BGF)(၉၉၉)ဒုးယၤခိၣ်ခံစီၤခၠံၣ်ခၠံၣ်ကတီခိၣ်ရိၣ်မဲဟံးန့ၢ်ဝဲမူဒါအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ဒ်သိးတၢ်ရဲၣ်တၢ်ကျဲၤကကဲထီၣ်လိၣ်ထီၣ်လၢအဆိအချ့အဂီၢ်,တကီၢ်ခါခဲအံၤစးထီၣ်ကတဲၤကတီၤမၤဝဲလံအအဂ့ၢ်,ပၥ်ဖျါဝဲဒၣ်လၢ(ThaungYing-FC)တၢ်ရၤလီၤအပူၤအိၣ်ဝဲစ့ၢ်ကီးန့ၣ်လီၤ.
