လါအီးကထိဘၢၣ် ၁၄ သီ, ၂၀၂၅ နံၣ်, ခ့ၣ်အဲးစံၣ်
မၠၣ်ဝတံၣ်ဝ့ၢ်ဃၢၤ စွ့ၣ်ကိၣ်ကိၤနံၣ်ထီၣ်သီတၢ်ြပၢဒိတၢ်ဂဲၤကလံၣ်အဂီၢ် ဒိကရူၢ်လၢအဒိးန့ၢ်နီၣ်ဂံၢ်(၁)အံၤ တၢ်ကဟ့ၣ်ဝဲခိၣ်ဖး အကလီၢ်(၁၀၀၀)ကၠး အဂ့ၢ်န့ၣ် ဟီၣ်ကဝီၤတၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
လၢကဟဲလါဒံၣ်စ့ဘၢၣ်(၁၉)သီ ကညီနံၣ်(၂၇၆၅)နံၣ်ဒီကလုၥ်နံၣ်ထီၣ်သီအံၤအဂီၢ် ဖဲအပူၤကွံၥ်လါအီးကထိဘၢၣ် ၄ သီ အနံၤန့ၣ် ကညီသုးခိးကီၢ်ဆၢ(BGF),(KNU/KNLA-PC)ဖီၣ်စုကဝဲၤကရူၢ်ခိၣ်နၢ်ဃုၥ်ဒီး ကီၢ်စဲၣ်လံၥ်လဲၢ်ဒီးတၢ်ဆဲးတၢ်လၤကရၢ, လီၢ်ကဝီၤ ကညီတၢ်ဘူၣ်တၢ်ဘါခိၣ်နၢ်, ကညီတၢ်ဃံတၢ်လၤကရၢ(KCO)ပှၤဘၣ်မူဘၣ်ဒါဃုၥ်ဒီးခိၣ်နၢ်ဘၣ်ထွဲလၢအဂၤတဖၣ် မၤဝဲ တၢ်အိၣ်ဖှိၣ်ဖဲ စွ့ၤကိၣ်ကိၤ ဟီၣ်ကဝီၤတၢ်လီၢ်တတီၤန့ၣ်လီၤ.
လၢတၢ်အိၣ်ဖှိၣ်ဘျီဝဲန့ၣ်အပူၤတၢ်ဆၢတဲၥ်အိၣ်ထီၣ်လၢ ကညီကီၢ်စဲၣ် ပတီၢ်အဂီၢ် တၢ်ကမၤဖှိၣ်သကိးဝဲကညီနံၣ်ထီၣ်သီ တၢ်ရဲၣ် တၢ်ကျဲၤဒိၣ်ဒိၣ်မုၢ်မုၢ်လၢစွ့ၤကိၣ်ကိၤဝ့ၢ်သီအံၤအပူၤဒီး ဒ်န့ၣ်အသိးတၢ်ရဲၣ်တၢ်ကျဲၤအပူၤကအိၣ်ဝဲဒီး တၢ်ဂဲၤကလံၣ်ပြၢဒိဃုၥ်ဒီး ဖျၢၣ်ထူ,တၢ်ထိ,(ဘးစကဲးဘီ)တၢ်ပြၢသ့ၣ်တဖၣ်အံၤကပၣ်ဃုၥ်ဝဲန့ၣ်လီၤ.
လီၤဆီဒၣ်တၢ်မ့မ့ၢ်တၢ်ဂဲၤကလံၣ်ပြၢဒိတကပၤခီန့ၣ် တၢ်နီၤဖးလီၤဝဲအဒိၣ်တပတီၢ်ဒီး အဆံးတပတီၢ်န့ၣ်လီၤ. အဒိၣ်တကပတီၢ်န့ၣ် နီၣ်ဂံၢ်(၁)ခိၣ်ဖး တၢ်ကဟ့ၣ်ဝဲစ့ပယီၤအကလီၢ်(၁၀၀၀)ကၠးဒီး လၢအဆံးတပတီၢ် နီၢ်ဂံၢ်(၁)ခိၣ်ဖးန့ၣ် တၢ်ကဟ့ၣ်ဝဲလၢစ့ပယီၤ အကလီၢ် (၆၀၀)ကၠး အဂ့ၢ်န့ၣ် တၢ်ဆၢတဲၥ်လီၤဝဲဖဲလါအီးကထိဘၢၣ် ၁၁ သီ တၢ်အိၣ်ဖှိၣ်ခံဝီတ၀ီအပူၤ အဂ့ၢ်န့ၣ် သ့ၣ်ညါဘၣ်န့ၣ် လီၤ.
ဒ်န့ၣ်အသိးတၢ်ဂဲၤကလံၣ်ခိၣ်ဖးလၢတၢ်ကဟ့ၣ်ဝဲခဲအံၤန့ၣ် အပူၤကွံၥ်ခိၣ်ဖးစ့နီၣ်ဂံၢ်ထဲအံၤ တၢ်ဟ့ၣ်ဝဲတအိၣ်နီတဘျီဒံးဘၣ် မ့ၢ်တၢ်အဆိကတၢၢ်တဘျီလီၤဒီး တကတီၢ်ဃီလၢတၢ်ဟ့ၣ်အါထီၣ်ခိၣ်ဖးစ့နီၣ်ဂံၢ်ဒ်အံၤအဖီခိၣ်အံၤ မ့ၢ်တၢ်ဒုး ဆူၣ်ထီၣ်ပှၤဂဲၤ ကလံၣ်ဒိဖိအသးလၢကနုၥ်လီၤပၣ်ဃုၥ်အါထီၣ်လၢတၢ်ဂဲၤကလံၣ်အပူၤတကးဒံးဘၣ်တၢ်ဆဲးတၢ်လၤစ့ၢ်ကီးကလဲၤထီၣ်လဲၤထီဝဲအဂ့ၢ်န့ၣ် တၢ်ြပၢဘျီဝဲအံၤပူၤပှၤဘၣ်မူဘၣ်ဒါတဖၣ် စံးဝဲအိၣ်န့ၣ်လီၤ.
ဘၣ်ဃးတၢ်ဟ့ၣ်ခိၣ်ဖးစ့အနီၣ်ဂံၢ်အါဒ်အံၤအဖီခိၣ်ထံၣ်ဝဲဒ်လဲၣ်န့ၣ် KCO ပှၤဘၣ်မူဘၣ်ဒါတဂၤစံးဝဲလၢ “မ့ဟ့ၣ်ဝဲဒ်အံၤဒုဂ့ၤဝဲ လၢပှၤဖိဒံဖိသၣ်တဖၣ်အဂီၢ်န့ၣ်.မ့ဘၣ်တဲခိၣ်ဖး(၁၀၀၀)န့ၣ်စှၤဒံး,မ့အါန့ၢ်အဝဲအံၤဒုဂ့ၤဝဲ.ဒိကကဲထီၣ်တခိၣ်ခိၣ်န့ၣ်နဘၣ်ဒုးအီၣ်ဒုးအီ.ဖိသၣ်မ့လီၤဘဲန့ၣ်လဲၤပှ့ၤအီၣ်ကိၣ်တယိး,ဖးကဖီလၢစဲၢ်ပူၤထုးထီၣ်အကစၢ်စ့အိၣ်စ့ၢ်ကီးလီၤ.မ့န့ၢ်စူးအါဒုလၢဖိသၣ်အဂီၢ်ဒုကကိၢ်ညၢ်ဝဲန့ၣ်.ပှၤဖိသၣ်ကဟဲဂဲၤကလံၣ်တဘျီဘျီန့ၣ်စ့လၢၤလၢထၢၣ်ပူၤဒီဒူၣ်ညါလီၤ.” စံးဘၣ်ခ့ၣ် အဲးစံၣ်-ကညီ တၢ်ကစီၣ်န့ၣ်လီၤ.
တကးဒံးဘၣ်လၢအတကပၤစ့ၢ်ကီးသုးဟံန့ၢ်တၢ်စိတၢ်ကမီၤဝံၤလီၢ်ခံ ခီဖျိတၢ်အိၣ်သးအကလုၥ်ကလုၥ်အဃိ ဟီၣ်ကဝီၤပူၤဖိဒံ ဖိသၣ်သူၣ်ဘီၣ်သးစၢ်တနီၤလဲၤထီၣ်ဃုဖံးဃုမၤက့ၤတၢ်လၢထံဂုၤကီၢ်ဂၤတကပၤအိၣ်အါထီၣ်ဝဲအဖီခိၣ် လၢဒိတၢ်ဂဲၤကလံၣ် တကပၤတၢ်ကီတၢ်ခဲအိၣ်ထီၣ်ဝဲအသိး ဒိကကဲထီၣ်တခိၣ်ခိၣ်န့ၣ်ဘၣ်ဟ့ၣ်လီၤတၢ်ဆၢကတီၢ်အါမးအမဲၥ်ညါ ဒိၣ်တခိၣ်န့ၣ် တၢ်လၢၤ ဘူၣ်လၢၤစ့အစှၤကတၢၢ်စ့ပယီၤအကလီၢ်(၁၀၀၀)ကၠးအဂ့ၢ်န့ၣ် ဒိကရူၢ်အခိၣ်သ့ၣ်တဖၣ်စံးဝဲအသိး သ့ၣ်ညါဘၣ် န့ၣ်လီၤ.
ကညီနံၣ်ထီၣ်သီတၢ်ရဲၣ်ကျဲၤလၢတၢ်ကမၤဝဲဖဲစွ့ၤကိၣ်ကိၤဝ့ၢ်သီအံၤ ဘၣ်တၢ်တီခိၣ်ရိၣ်မဲမၤအီၤလၢသုးခိးကီၢ်ဆၢ(BGF)ဖီၣ်စုကဝဲၤ ကရူၢ်အံၤဒီး လၢန့ၣ်အမဲၥ်ညါတၢ်ဆၢကတီၢ်လၢတၢ်ကမၤဝဲကညီဒီကလုၥ်နံၣ်ထီၣ်သီအကတီၢ်အံၤ ထံရူၢ်ကီၢ်သဲးတၢ်အိၣ်သးတမုၥ် တခုၣ်,ကမျၢၢ်ထံဖိကီၢ်ဖိစ့ၢ်ကီးဘၣ်ဃ့ၢ်မှံဟးဖျိးအဃိ တၢ်ပဲၥ်ထံနီၤဖးအိၣ်ထီၣ်ဝဲအကလုၥ်ကလုၥ် န့ၣ်လီၤ.
ဒ်န့ၣ်အသိးတကီၢ်ခါခဲအံၤဘၣ်ဃးကညီနံၣ်ထီၣ်သီတၢ်ရဲၣ်တၢ်ကျဲၤအပူၤ ဒိကရူၢ်လၢကနုၥ်လီၤတပြၢတၢ်အိၣ်ပှဲၤဒူၣ်အိၣ်ပှဲၤဖု လံလဲၣ်န့ၣ် တၢ်ထုးထီၣ်ပၥ်ဖျါဝဲတအိၣ်ဒံးဘၣ်ဘၣ်ဆၣ် တၢ်ဂဲၤကလံၣ်ပြၢဒိတၢ်ရဲၣ်တၢ်ကျဲၤအံၤတၢ်ကစးထီၣ်အီၤဖဲလါဒံၣ်စ့ဘၢၣ် ၁၃ သီ တုၤ ၁၉ သီ နံၣ်ထီၣ်သီအနံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
