လါအီကူး ၁၉ သီ, ၂၀၂၅ နံၣ်, ခ့ၣ်အဲးစံၣ်
ထံဖိကီၢ်ဖိကအိၣ်ဘၣ်မုၥ်မုၥ်ခုၣ်ခုၣ်အဂီၢ် ကညီသုးခိးကီၢ်ဆၢ(BGF/KNA)ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) မ့ၢ်တၢ်တဒူၣ်ဃီဒီးအတၢ်လဲၤကျဲမ့ၢ်တၢ်တမံၤဃီလီၤအဂ့ၢ်န့ၣ် ခံခီခံကပၤခိၣ်နၢ်စံးလီၤဝဲလၢဖီၣ်စုကဝဲၤခံဒူၣ်တၢ်အိၣ်ဖှိၣ်ပူၤ ဖဲမဟါ လါအီကူး ၁၈ သီန့ၣ်လီၤ.
ဖဲမဟါလါအီကူး ၁၈ သီ ဂီၤခီအဆၢကတီၢ်န့ၣ် လၢတီနီၢ်မုၢ်ထီၣ် (DKBA)သုးဝဲၤလီၢ်ခိၣ်သ့ၣ် ဆိၣ်စံမၠဲၣ်(ကီၢ်သူမှံခံ)ဟီၣ်ကဝီၤ အပူၤ လၢဟီၣ်ကဝီၤတၢ်မုၥ်တၢ်ခုၣ်အဂီၢ် (BGF/KNA)ဒီး(DKBA)ခံဒူၣ်အံၤမၤဝဲတၢ်ထံၣ်လိၥ်တၢၣ်ပီၣ်တဲသကိး တၢ်အိၣ်ဖှိၣ် တခါဒီး လၢတၢ်ရဲၣ်တၢ်ကျဲၤအပူၤ (BGF)သုးဟီၣ်ကဝီၤ-၂ အခိၣ် သုးခိၣ်ကျၢၢ်ဖိ စီၤဝ့ၤဝ့ စံးလီၤဝဲဒ်အံၤန့ၣ်လီၤ.
“တဂီၤအံၤပထံၣ်လိၥ်ဘၣ်သးဘၣ်သးမုၥ်ဒိၣ်မးဒီးကဲထီၣ်တၢ်သူၣ်ဆူၣ်သးဆူၣ်ဖးဒိၣ်ညါလီၤ.ပဝဲဒၣ်အံၤပဟဲလီၤတဒူၣ်ဃီ တထၢဃီလီၤ.ဘၣ်ဆၣ်ဖဲ(၂၀၁၀)ထံရူၢ်ကီၢ်သဲးတၢ်ဆီတလဲသးအဃိပလီၤဖးက့ၤဖဲန့ၣ်.ပလီၤဖးဘၣ်ဆၣ်ခိၣ်နၢ်ခံကပၤလၢၤန့ၣ် တၢ်နၢ်ပၢၢ်လိၥ်သးအိၣ်ထီဘိလီၤ.ပ(BGF)တကပၤနါက့တုၤလၢခဲအံၤပထီထီၣ်ဆ့ကၤသးနါပှၢ်လၢ(DKBA/BGF)လီၤ.တၢ်လၢ (DKBA)န့ၣ်ပတမၤလီၤမၢ်နီတဘျီဘၣ်လၢဖုသီခါပၥ်ပနီၣ်န့ၢ်ပှၤန့ၣ်အိၣ်ထီဘိလီၤ.ခဲအံၤနါက့ပခံဒူၣ်အံၤပတၢ်လဲၤကျဲန့ၣ် မ့ၢ်တၢ်တဒူၣ်ဃီလီၤ.တလိၣ်လၢပကဘၣ်ပဲၥ်ဖးနီၤဖးလိၥ်ပသးနၤန့ၣ်(DKBA)ယၤန့ၣ်(BGF)ဒ်န့ၣ်ဘၣ်.နီၢ်နီၢ်ပတၢ်လဲၤကျဲန့ၣ်အဒ်သိးလိၥ်သးလီၤ”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးဆၢကတီၢ်ခဲအံၤအလီၢ်အိၣ်လၢတၢ်ကဘၣ်အိၣ်ဃူအိၣ်ဖိးလံအဃိ (DKBA)ဒီး(BGF)ဖံဘၣ်ခိၣ်တၢ်ပနီၣ်မ့တဒ်သိးလိၥ် သးဘၣ်ဆၣ် ပကမၤသကိးတၢ်လၢကညီနီၣ်တယၢ်တဘ့ၣ်ဃီအဖီလၥ်အဂ့ၢ်န့ၣ် (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤစွ့ၤဝၣ် စ့ၢ်ကီးစံးလီၤဝဲ ဒ်အံၤန့ၣ်လီၤ.
“ပမ့ၢ်ဒၣ်တၢ်တမံၤဃီ,တၢ်ပနီၣ်တဘ့ၣ်ဃီအဃိန့ၣ်ယထံၣ်လၢဆၢကတီၢ်ဘၣ်လၢပကဘၣ်ထိၣ်ဃူထိၣ်ဖိးလိၥ်သးလံလီၤ.ပဖံဘၣ်ခိၣ်မ့တဒ်သိးလိၥ်သးဘၣ်ဆၣ်ပမ့မၤတၢ်တခါဂ့ၤတခါဂ့ၤပမၤတၢ်လၢနီၣ်တယၢ်တဘ့ၣ်ဃီအဖီလၥ်.အဃိမုၢ်တနံၤအံၤတၢ်ဆၢကတီၢ်တုၤလၢပကဘၣ်ထိးဖှိၣ်ဝၥ်ဖှိၣ်ထီၣ်ပသးဒီးဒ်သိးကမျၢၢ်ကအိၣ်မုၥ်အိၣ်ခုၣ်ဘၣ်အဂီၢ်ခါဆူညါသုမ့ထံၣ်လိၥ်သုသးန့ၣ်သုမ့ၢ်တၢ်ဒူၣ်ဃီတထၢဃီအဃိတဘၣ်အ့ၣ်လိၥ်သးဘၣ်အိၣ်ဃူအိၣ်ဖိးလၢကညီနီၢ်တယၢ်တဘ့ၣ်ဃီခဲလၢၥ်တက့ၢ်”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်တကီၢ်ခဲအံၤလၢတၢ်ဒုးတၢ်ယၤအံၤအဃိ ကမျၢၢ်ထံဖိကီၢ်ဖိအါအါဂီၢ်ဘၣ်ဃ့ၢ်မှံဟးဖျိး,ဘၣ်ကဲထီၣ်ပှၤဘၣ်ကီဘၣ်ခဲ ဖိအါမးလံအဖီခိၣ် ဟီၣ်ကဝီၤပူၤတၢ်ဂုၤထီၣ်ပသီ ထီၣ်ကအိၣ်ထီၣ်အဂီၢ်န့ၣ် မူဒါအိၣ်လၢဖီၣ်စုကဝဲၤကရူၢ်ကရၢအစုပူၤအသိး ကဒိးန့ၢ်ထံကီၢ်သဘျ့အဂီၢ်အလီၢ်အိၣ်လၢတၢ်ကြၢးဂဲၥ်လိၥ်ဝဲလၢတၢ်ကူၣ်သ့ကျဲ အဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံး စ့ၢ်ကီးဝဲန့ၣ်လီၤ.
လၢဖီၣ်စုကဝဲၤကရူၢ်(၂)ဒူၣ်အံၤတၢ်တၢၣ်ပီၣ်တဲသကိးအံၤအပူၤန့ၣ် တၢ်တဲသကိးဝဲဖီၣ်စုကဝဲၤခံဒူၣ်အံၤအတၢ်ပၥ်ဖှိၣ်မၤသကိး တၢ်အဂ့ၢ်အကျိၤ,လီၢ်ကဝီၤကမျၢၢ်ပှၤဃ့ၢ်မှံဟးဖျိးတၢ်အိၣ်သးအမဲၥ်ညါတၢ်တဲသကိးဃုၥ်ဝဲတကီၢ်ခါထံရူၢ်ကီၢ်သဲးတၢ်အိၣ်သးလၢအကဲထီၣ်တဖၣ်ဒီးခါဆူမဲၥ်ညါတၢ်ကဘၣ်ပၥ်ဖှိၣ်မၤသကိးဘှါဆှဲအီၤဒ်လဲၣ်ဃုၥ်ဒီးတၢ်ဂ့ၢ်လၢအဂၤတၢ်တဖၣ်တၢ်တၢၣ်ပီၣ်တဲသကိးဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတၢ်မၤတၢ်ထံၣ်လိၥ်အိၣ်သကိးတၢ်ရဲၣ်တၢ်ကျဲၤဘျီဝဲအံၤအပူၤ DKBA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ, သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤဝၣ်, ပၢဆှၢသုးဂ့ၢ်ဝီခိၣ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ, သုးခိၣ်ကျၢၢ်ဖိ စဲကၠီၤလၣ်, သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ ဃုၥ်ဒီးခိၣ်နၢ်လၢအဂၤဒီး လၢ(BGF)တကပၤန့ၣ် ဟဲထီၣ်ဝဲ သုးဟီၣ်ကဝီၤ-၂ ဒုးယၤခိၣ် သုးခိၣ်ကျၢၢ်ဖိ စီၤတ့ၤဝ့, သုးဟီၣ်ကဝီၤ-၄ အခိၣ် သုးခိၣ်ကျၢၢ်ဖိ စီၤမိၣ်သိၤ ဃုၥ်ဒီးခိၣ်နၢ်လၢအဂၤသ့ၣ်တဖၣ် လဲၤထီၣ်ဝဲန့ၣ်လီၤ.
(BGF)ဒီး(DKBA)အံၤအပူၤကွံၥ်မ့မ့ၢ်ဝဲဖီၣ်စုကဝဲၤကရူၢ်တဒူၣ်ဃီဘၣ်ဆၣ် (DKBA)ကရူၢ်အံၤဖဲကီၢ်ပယီၤအူသ့စ့ၤပၢတၢ်အစိၤခါန့ၣ် ဆဲးလီၤဝဲထံကီၢ်တၢ်ပတုၥ်တၢ်ခးလံၥ်ဃံးဃၥ်ဘၣ်ဆၣ် မ့မ့ၢ်(BGF)ကရူၢ်အံၤခီန့ၣ်မ့ၢ်ကရူၢ်လၢအိၣ်ဝဲဒၣ်လၢသုးမီၤစိရိၤစုတီၤဖီလၥ် လိၤလိၤန့ၣ်လီၤ.
ဖဲကရူၢ်ခံဒူၣ်အံၤမၤတၢ်တဲသကိးအံၤအပူၤန့ၣ် တထံၣ်ဘၣ်စ့ၢ်ကီးလၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒီး ကညီတၢ်မုၥ် တၢ်ခုၣ်ကီၣ်ကးကရၢ(KNU/KNLA-PC)ပၣ်ဃုၥ်ပၣ်ဂီၢ်ဝဲတအိၣ်ဘၣ်အသိး (BGF)ဒီး(DKBA)ကရူၢ်ခံဒူၣ်အံၤစ့ၢ်ကီးလီၤဆီဒၣ် တၢ်သုးဟံန့ၢ်တၢ်စိတၢ်ကမီၤဝံၤလီၢ်ခံစှၤနံၣ်အတီၢ်ပူၤအံၤတၢ်ကစီၣ်ဟးထီၣ်လၢအပၥ်ဖှိၣ်မၤသကိးတၢ်အိၣ်ဒီး(KNU/KNLA)လၢအပၢၢ်ဆၢထီဒါသုးမီၤစိရိၤလၢအဟံန့ၢ်ဆူၣ်ထံကီၢ်တၢ်စိတၢ်ကမီၤတဒူၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲဖီၣ်စုကဝဲၤကရူၢ်ခံဒူၣ်အံၤမၤဝဲတၢ်ထံၣ်လိၥ်အိၣ်သကိးလၢဟီၣ်ကဝီၤတၢ်မုၥ်တၢ်ခုၣ်ဂီၢ်အကတီၢ်အံၤန့ၣ် လၢကညီ ကီၢ်စဲၣ် မၠၣ်ဝတံၣ်-ကီးတရံး အ့ရှါကျဲမုၢ် ဒီး ကြုၢ်တု-တန့ခၠါကျဲတကပၤန့ၣ် သုးမီၤစိရိၤအံၤလၢကထီၣ်ဒိၣ်စိက့ၤတၢ်လီၢ် သ့ၣ်တဖၣ် အံၤအဂီၢ် ဆှၢထီၣ်ကဒီးဝဲအသုးဂံၢ်ဘါအါအါဂီၢ်ဂီၢ်ဒီးတၢ်ဒုးဆဲးကဲထီၣ်ဝဲကိးမုၢ်နံၤဒဲးဃၣ်ဃၣ်လၢ (KNLA)ဒီးပယီၤသုး အဘၢၣ်စၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကညီဖီၣ်စုကဝဲၤကရူၢ်ကရၢလၢအလီၤဖးတဖၣ်ဒ်သိးကအိၣ်က့ၤဃူဃူဖိးဖိးအဂီၢ် ဖဲအပူၤကွံၥ်(၂၀၂၃)နံၣ် လါမ့ၤ ၂၈ သီအခါန့ၣ် KNU/BGF/DKBA ဒီး KNU/KNLA-PC ခိၣ်နၢ်တဖၣ်မၤတၢ်ထံၣ်လိၥ်အိၣ်သကိးဒီး ဖဲန့ၣ်ဒုးအိၣ်ထီၣ်ဝဲ ကညီဖီၣ်စုကဝဲၤကရူၢ် တၢ်ဃူတၢ်ဖိးကမံးတံၥ် အံၤဒံးန့ၣ်လီၤ.
