လါအီးကထိဘၢၣ် ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ် သုးက့-၆ တၢ်ပၢ, ဖဲရၤမတံဝ့ၢ်ကလံၤထံးဟီၣ်ကဝီၤကျဲမုၢ်အဖီခိၣ်အလိၥ်န့ၣ် ဖဲလါအီးကထိဘၢၣ် ၁၇ သီအနံၤ, ဘၣ်ဖဲမုၢ်ဃ့ၢ်လီၤ ၁ နၣ်ရံၣ်ဘျဲၣ်အဆၢကတီၢ်န့ၣ် တၢ်ခးဝဲဒၣ်ကမျၢၢ်သိ လ့ၣ်လၢအလ့ၢ်ထီၣ်လ့ၢ်လိၤတခိၣ်ကဲထီၣ်ဝဲသးအဃိသံ ၁ ဂၤ ဒီး ဘၣ်ဒိဝဲ ၃ ဂၤ အဂ့ၢ်သ့ၣ်ညါဘၣ်န့ၣ်လီၤ.
တကီၢ်ခါခဲအံၤပယီၤသုးကရူၢ်ဒီးKNLAသုးပၥ်ဖှိၣ်အဘၢၣ်စၢၤဒုးယၤတၢ်ဖ့ၣ်ဆၢဆူၣ်ဝဲဒၣ်ဖဲလ့က့ၣ်ကိၥ်-ပ ဟံၣ်ကျီးကျဲမုၢ်အံၤဒီးသိလ့ၣ်တခိၣ်လၢအိၣ်ဟဲထီၣ်န့ၢ်ဝဲလၢပဟံၣ်ကျီးတကပၤဒီးလၢကလဲၤဆူ ဖလူသဝီ တကပၤအဆၢကတီၢ်သုးကရူၢ်ခးဝဲဒၣ်ဒီးပှၤလၢအိၣ်လၢသိလ့ၣ်အပူၤဘၣ်ဒိ ၃ ဂၤန့ၣ်စ့ၢ်ကီးသုးကရူၢ်ဖီၣ်က့ၤ ကိးဝဲဒၣ်အဂ့ၢ်ဂံၢ်ခီၣ်ထံးတၢ်ကစီၣ်သ့ၣ်တဖၣ်စံးဝဲန့ၣ်လီၤ.
တၢ်ပၢၢ်ဆၢဂံၢ်ခီၣ်ထံးတၢ်ကစီၣ်တဂၤစံးဝဲလၢ “ဖဲတနံၤန့ၣ်ဂီၤခီအဆၢကတီၢ်န့ၣ်တၢ်ဒုးကဲထီၣ်ဝဲဒၣ်ဖဲလ့က့ၣ် ကိၥ်, မ့လဲၣ်ပၣ်, အ့ၣ်ကၠံမၠဲၣ်တကပၤန့ၣ်န့ၣ်လီၤ. မ့မ့ၢ်သိလ့ၣ်တခိၣ်န့ၣ်မ့ၢ်ဝဲဒၣ် ကီထဲၣ်လၢအိၣ်ကၠီၣ်ခဲၣ်တဂၤ န့ၣ်အသိလ့ၣ်န့ၣ်လီၤ. ဖဲလၢဟဲက့ၤထီၣ် လ့က့ၣ်ကိၥ်-ပဟံၣ်ကျီးဒီးကထီၣ်ဆူဖလူအဆၢကတီၢ်န့ၣ်သုးကရူၢ် ခးဝဲဒီးကျိစဲးလးမီၤနီၤ. ပှၤနီသိလ့ၣ်ဖိဒု သံကွံၥ်ဝဲလီၤ. ပှၤလၢပၣ်ဃုၥ်လၢသိလ့ၣ်ပူၤ ၃ ဂၤနါက့ဘၣ်ဒိဝဲဒၣ် လီၤ. ပှၤသၢဂၤန့ၣ်တသံဘၣ်, ဖီၣ်က့ၤကိး ဝဲဒၣ်န့ၣ်လီၤ.” အဂ့ၢ်စံးဝဲဒၣ်န့ၣ်လီၤ.
ဒ်အန့ၣ်အသိးဖဲလါအီးကထိဘၢၣ် ၁၇ သီအနံၤ,ဂီၤခီတကပၤန့ၣ်လၢခံခီခံကပၤတၢ်ဒုးတၢ်ယၤကဲထီၣ်ဝဲဖဲ အ့ၣ်ကၠ့မၠဲၣ်သဝီအဆၢကတီၢ်ပယီၤသုးကရူၢ်လၢအိၣ်ဖဲအ့ၤကၠ့မၠဲၣ်သီခါဖၠၣ်သ့ၣ်တဖၣ်ခးဝဲပှၤသဝီဖိလၢမၤအီၣ်ဝဲတၢ်ထုးထီၣ်မဲး ၂ ဂၤအဃိဘၣ်သံကွံၥ်ဝဲဒၣ်စ့ၢ်ကီးအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါတုၤတကီၢ်ခါလါအီးကထိဘၢၣ် ၁၉ သီအနံၤအံၤန့ၣ် လၢလ့က့ၣ်ကိၥ်ဝ့ၢ်သီ, အ့ၤကၠ့မၠဲၣ်ဒီး မ့လဲၣ်ပၣ်သဝီတၢ်လီၢ်အခိၣ်အဃၢၤဖဲန့ၣ်သ့ၣ်တဖၣ်တၢ်ဒုးတၢ်ယၤကဲထီၣ်ဒံးဝဲအဖၢမုၢ်ဒံးအဂ့ၢ်ပှၤလီၢ်အိၣ်ကမှံဖိသ့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
