လါဒံၣ်စဲဘၢၣ် ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲယူၣ်-ဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤထံဆဲးမဲးယွၤသုးရ့ၣ်လၢအပူၤကွံၥ်အိၣ်လၢကီၢ်သူလ့ၤသုးမုၢ်ဒိၣ် (KTLA)အတၢ်တီခိၣ်ရိၣ်မဲအဖီလၥ်အံၤဖဲလါနိၣ်ဝ့ဘၢၣ်ထီၣ်(၁)သီအနံၤန့ၣ်ဆီတလဲက့ၤအဖံဘၣ်ခိၣ်တၢ်ပနီၣ်ဒီးဒိးတၢ်တီခိၣ်ရိၣ်မဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)လံအဂ့ၢ်ထံဆဲးမဲးယွၤသုးရ့ၣ်ဘိးဘၣ်ဒုးသ့ၣ်ညါကမျၢၢ်ထံဖိကီၢ်ဖိဖဲတနံၤအံၤလါဒံၣ်စဲဘၢၣ်(၃၁)သီအနံၤန့ၣ်လီၤ.
(KNLA)ထံဆဲးမဲးယွၤသုးရ့ၣ်အပှၤဘၣ်မူဘၣ်ဒါသုးခိၣ်ထးဆဲးစံးဝဲလၢ“လၢတၢ်အိၣ်သးတကတီၢ်ညါအံၤန့ၣ်ပက့ၤဆီတလဲလံဧါ,ပတဆီတလဲလံဧါန့ၣ်ပက့ၤဒုးသ့ၣ်ညါလီၤတံၢ်က့ၤလၢလံၥ်တၢ်ပၥ်ဖျါန့ၣ်လီၤ. ပက့ၤဆီတလဲလံအဃိန့ၣ်ပ ကွဲးဒုးသ့ၣ်ညါက့ၤဝဲကမျၢၢ်ထံဖိကီၢ်ဖိသ့ၣ်တဖၣ်န့ၣ်လီၤ.” အဂ့ၢ်စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါထံဆဲးမဲးယွၤသုးရ့ၣ်အံၤမ့ၢ်ဆီတလဲက့ၤအသးဆူ(KNLA)ဘၣ်ဆၣ်တၢ်ပၥ်ဒ့ၣ်ပၥ်ကမၣ်ဒီးတၢ်ထံၣ်အၢ,တၢ်ထံၣ်သီလၢ(KTLA)အဖီခိၣ်တအိၣ်နီတမံၤဘၣ်ဒီးမ့မ့ၢ်တခီတၢ်တိၥ်မ့ၢ်ဒၣ်တၢ်တမံၤဃီလၢတၢ်ကဒုးလီၤပှီၢ်ကွံၥ်ဝဲကလုၥ်ဒိၣ်စိသနူ,သုးမီၤစိရိၤသနူဝံၤသူၣ်ထီၣ်က့ၤကီၢ်သူလ့ၤလၢအသဘျ့လၢပပှၤကလုၥ်ဒီတကလုၥ်အတၢ်မိၣ်န့ၢ်သးလီအသိးအဂ့ၢ်ပၥ်ဖျါစ့ၢ်ကီးဝဲန့ၣ်လီၤ.
ဖဲထံဆဲးမဲးယွၤသုးရ့ၣ်အိၣ်ဆၢထၢၣ်ဝဲဒ်(KTLA)အဆၢကတီၢ်လၢတၢ်မဲၥ်ညါတၢ်မၤပျီပူၤန့ၣ်တၢ်မၤသကိးတၢ်ဒီး(KNU)တနီသရံၣ်ကီၢ်ဆၣ်ဒီး(KNLA)သုးရ့ၣ်(၁၁)သ့ၣ်တဖၣ်အိၣ်ဝဲထီဘိစ့ၢ်ကီးအဂ့ၢ်န့ၣ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲန့ၣ်လီၤ.
“ထံဆဲးမဲးယွၤသုးကျိၤအံၤစးထီၣ်လၢအသုးကျိၤအိၣ်ထီၣ်ဝံၤန့ၣ်ဒီးပတနီသရံၣ်ကီၢ်ဆၣ်ဒီးသုးရ့ၣ်(၁၁)န့ၣ်အဝဲသ့ၣ်ဆဲးကျိးမၤသကိးတၢ်တဘိယူၥ်ဃီန့ၣ်လီၤ. တၢ်ဖံးသကိးမၤသကိး,တၢ်ဒုးသကိးသုးမီၤစိရိၤဒီးတၢ်ကွၢ်ထွဲလိၥ်သးယၢ်ခီယၢ် ပၤ,တၢ်ဆဲးကျိးလိၥ်သး မၤဝဲထီဘိလီၤ. အဃိမ့ၢ်ဒၣ်တၢ်တမံၤဃီအဖီခိၣ်လၢခံန့ၣ်အဝဲသ့ၣ်ပၥ်ဖှိၣ်လိၥ်က့ၤသးအိၣ်က့ၤ လၢသုးက့(၄)တၢ်တီခိၣ်ရိၣ်မဲအဖီလၥ်န့ၣ်လီၤ. ” အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိးဖဲပယီၤသုးမီၤစိရိၤမၤဝဲတၢ်ထီၣ်ဒုးတနီသရံၣ်ကီၢ်ဆၣ်အပူၤဖဲ(၂၀၂၃)နံၣ်လါအ့ၣ်ဖြ့ၣ်အတီၢ်ပူၤမ့ၢ်ဂ့ၤ,ဒီးဖဲပယီၤသုးမီၤစိရိၤမၤကဒီးတၢ်ထီၣ်ဒုးစးထီၣ်ဖဲ(၂၀၂၄)နံၣ်လါဒံၣ်စဲဘၢၣ်တုၤအဆၢကတီၢ်ခဲအံၤန့ၣ်ထံဆဲးယွၤသုးရ့ၣ်အံၤပၣ်ဃုၥ်မၤသကိးတၢ်တပယူၥ်ဃီဃုၥ်ဒီး(KNLA)သုးရ့ၣ်(၁၁),တနီသရံၣ်ကီၢ်ဆၣ်ဒီးတၢ်ပၢၢ်ဆၢသိၣ်မှံၤကရၢတနီၤအဂ့ၢ်သ့ၣ်ညါဘၣ်န့ၣ်လီၤ.
ဘၣ်ထွဲဒီးထံဆဲးမဲးယွၤသုးရ့ၣ်အံၤအခီၣ်ထံးခီၣ်ဘိဘၣ်တၢ်စးထီၣ်ဒုးအိၣ်ထီၣ်အီၤလၢ(၄)သုးက့ခိၣ်သုးခိၣ်ကျၢၢ်ဖိစီၤမုၢ်လၢ်ဖဲ(၂၀၁၈)နံၣ်ဒီးဖဲ(၂၀၂၁)ပယီၤသုးမီၤစိရိၤဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ်ခံ(KNLA)သုးက့(၄)သုးက့ခိၣ်တၢ်ဆီတလဲအိၣ်ထီၣ်ကတီၢ်တၢ်နၢ်ပၢၢ်ကမၣ်အိၣ်ထီၣ်ဝဲဒၣ်လၢထံဆဲးမဲးယွၤသုးကျိၤဒီးသုးက့(၄)အဘၢၣ်စၢၤအဃိထံဆဲးမဲးယွၤသုးကျိၤဆီတလဲက့ၤအသးဆူကီၢ်သူလ့ၤသုးမုၢ်ဒိၣ်(KTLA)ဒ်ထံဆဲးမဲးယွၤသုးရ့ၣ်တရ့ၣ်အသိးအဂ့ၢ်ပၥ်ဖျါဝဲလၢလံၥ်ပၥ်ဖျါအပူၤန့ၣ်လီၤ.
ခီဖျိတၢ်အိၣ်သးအကလုၥ်ကလုၥ်အဖီခိၣ်ဖဲ(၂၀၂၅),လါအီးကထိဘၢၣ်အတီၢ်ပူၤန့ၣ်(KNU)ကရၢမိၢ်ပှၢ်ပှၤဘၣ်မူဘၣ်ဒါထံၣ်လိၥ်အိၣ်သကိးသးဒီးထံဆဲးမဲးယွၤသုးရ့ၣ်ပှၤဘၣ်မူဘၣ်ဒါလၢတၢ်ကပၥ်ဖှိၣ်မၤသကိးက့ၤတၢ်လၢ(KNU)အဖီလၥ်န့ၣ်လီၤ.အလီၢ်ခံဖဲလါနိၣ်ဝ့ဘၢၣ်ထီၣ်(၁)သီအနံၤန့ၣ်ထံဆဲးမဲးယွၤသုးရ့ၣ်အပှၤဘၣ်မူဘၣ်ဒါအၢၣ်လီၤတူၢ်လိၥ်ဆီတလဲက့ၤအသးလၢ(KNLA)ဒ်အံၤလီၤအဂ့ၢ်သ့ၣ်ညါဒ်တၢ်ပၥ်ဖျါပူၤအသိးန့ၣ်လီၤ.
