လါယနူၤအါရံၤ ၃သီ, ၂၀၂ နံၣ်, ခ့ၣ်အဲးစံၣ်,
ခံပတီၢ်တပတီၢ်ဒီးသၢပတီၢ်တပတီၢ်(၂၀၂၅)နံၣ်ပယီၤသုးကရူၢ်အတၢ်ဃုထၢအဂီၢ်,အိၣ်ကတီၤပၥ်ဝဲသးလၢတၢ်ဒိးဃုထၢသးလံအဂ့ၢ်,ကညီဒီကလုၥ်ဒံၣ်မိၣ်ကရ့ၣ်တ့ၣ်ပၣ်တံၣ်(KNDP)စံးဝဲဒၣ်န့ၣ်လီၤ.
လၢတၢ်ဃုထၢအံၤအဂီၢ်တကီၢ်ခါခဲအံၤ,မၤဝဲတၢ်လီၤကရၢကရိကမျၢၢ်ဒီးတၢ်ထီထီၣ်ပၣ်တံၣ်(Signboard)တဖၣ်လၢဟီၣ်ကဝီၤပူၤဒ်တၢတပတီၢ်တချူးတၢ်မၤဝဲတၢ်ဃုထၢအဆၢကတီၢ်အသိးလံအဂ့ၢ်,ပၣ်တံၣ်နဲၣ်ရွဲၣ်(မါအီၣ်ပၠ့ၤစိ)စံးဝဲဒ်အံၤန့ၣ်လီၤ.
“ခဲအံၤပစးထီၣ်ဟူးဂဲၤဒ်အပူၤကွံၥ်တချူးတၢ်မၤတၢတပတီၢ်တၢ်ဃုထၢအသိးလံန့ၣ်လီၤ.ပမၤတၢ်ဟးလီၤကရၢကရိတၢ်,တၢ်ထီထီၣ်(Signboard),တၢ်ဟးရၤလီၤလံၥ်လဲၢ်လံန့ၣ်လီၤ.ပမၤအီၤဖဲတၢ်လီၢ်လၢပနုၥ်လီၤသ့သ့ၣ်တဖၣ်န့ၣ်လီၤ.ပနုၥ်လီၤဃုထၢဘၣ်ပသးလံအဃိ,ပကဘၣ်ဆဲးမၤတုၤအကတၢၢ်လီၤ”အဂ့ၢ်စံးဝဲဒၣ်န့ၣ်လီၤ.
(၂၀၂၅)နံၣ်သုးကရူၢ်တီခိၣ်ရိၢ်မဲမၤဝဲတၢ်ဃုထၢအံၤအဆိကတၢၢ်တပတီၢ်အပူၤမၤတ့ၢ်ဝဲလၢရၤမတံ,ဖၣ်အၣ်,ဒီၣ်ဖးခိၣ်ဟီၣ်ကဝီၤအပူၤဒီးခံပတီၢ်ဒီးသၢပတီၢ်အံၤကမၤဝဲလၢဖၣ်ပူၣ်,လူၢ်ပျဲၢ်,ကီးတရံး,နိၣ်တကီဟီၣ်ကဝီၤပူၤအဂ့ၢ်,သ့ၣ်ညါဘၣ်ဒ်ပယီၤသုးကရူၢ်ကရၢဘိးဘၣ်ရၤလီၤဝဲအသိးန့ၣ်လီၤ.
ဒီးတၢတပတီၢ်တၢ်ဃုထၢဝံၤအလီၢ်ခံတၢ်ရၤလီၤဝဲတၢ်ဖးအစၢလၢဖိးသဲးစးတအိၣ်ဝဲဘၣ်ဆၣ်,ပယီၤသုးခိၣ်နၢ်လီၢ်လံၤကရူၢ်ကရၢပၣ်ကီၢ်စၢဖှိၣ်တၢ်ဃူးဖိးဒီးတၢ်ဂုၤထီၣ်ပသီထီၣ်ပၣ်တံၣ်(USDP)အံၤမၤနၢၤဝဲတၢ်ဒီး(KNDP)တခီဒိးန့ၢ်ဘၣ်ဝဲလၢနီၢ်ဂံၢ်ခံအလီၢ်အဂ့ၢ်,ပယီၤသုးကရူၢ်ကရၢပၣ်တံၣ်ဘၣ်ထွဲတဖၣ်ပၥ်ဖျါဝဲဒၣ်န့ၣ်လီၤ.
ပယီၤသုးကရူၢ်ကရၢတဖၣ်ပၥ်ဖျါဝဲအဖီခိၣ်,(KNDP)ပၣ်တံၣ်နဲၣ်ရွဲၣ်မါအီၣ်ပၠ့ၤစိစံးအါထီၣ်စ့ၢ်ကီးဝဲဒ်အံၤန့ၣ်လီၤ.
“ပှၤတဲအိၣ်အါမံၤလီၤ.တကီၢ်ခါတၢ်နီၢ်နီၢ်ပတသ့ၣ်ညါတၢ်လီၤတံၢ်လီၤဆဲးလၢအိၣ်ဒီးတၢ်ဒုးသးဘၣ်အဃိ,ပကဘၣ်တူၢ်လိၥ်တၢ်အစၢခဲလၢၥ်လီၤ.လီၢ်ခံကတၢၢ်တၢ်အိၣ်သးတဟးထီၣ်ဒံးဘၣ်ဆၣ်,ပမ့ကွၢ်ခဲအံၤကရူၢ်ကရၢတၢ်အိၣ်သးဒုတၢ်မုၢ်လၢ်အိၣ်ဒံးဝဲလီၤ”အဂ့ၢ်စံးဝဲဒၣ်န့ၣ်လီၤ.
ပယီၤသုးအတၢ်ဃုထၢအံၤမ့ၢ်တၢ်အယိၥ်အဘျၣ်တတီတတြၢ်အဃိ,ကညီဖီၣ်စုကဝဲၤကရူၢ်ကရၢ,ကမျၢၢ်ထံဖိကီၢ်ဖိဒီးပၣ်တံၣ်ဘၣ်ထွဲတဖၣ်တဘၣ်ဆီၣ်ထွဲဝဲဒၣ်ဘၣ်အဂ့ၢ်,ခ့ၣ်အဲၣ်ယူၣ်ဘိးပၥ်ဖျါတ့ၢ်ဝဲအိၣ်ဝဲဒၣ်ဘၣ်ဆၣ်,တၢ်ဃုထၢအပူၤကညီပၣ်တံၣ်နုၥ်လီၤဒိးဃုထၢဝဲအသး(၂)ဖုအိၣ်ဝဲအသိး,ကညီဖီၣ်စုကဝဲၤကရူၢ်ကရၢတနီၤဟံးန့ၢ်ဝဲပယီၤသုးတၢ်ဘံၣ်တၢ်ဘၢအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,တၢတပတီၢ်ပယီၤသုးတၢ်ဃုထၢအံၤတၢ်မၤတ့ၢ်ဝဲဖဲအပူၤကွံၥ်လါဒံၣ်စဲဘၢၣ်(၂၈)သီအနံၤဒီးခံပတီၢ်တပတီၢ်ဒီးသၢပတီၢ်အပူၤ,ကစးထီၣ်မၤကဒါက့ၤဝဲဖဲတလါအံၤလါယနူၤအါရံၤ(၁၁)သီဒီး(၂၅)သီအပူၤအဂ့ၢ်,ပယီၤသုးကရူၢ်ကရၢဘိးဘၣ်ရၤလီၤဝဲဒၣ်န့ၣ်လီၤ.
