လါယနူၤအါရံၤ ၁၃သီ, ၂၀၂၆နံၣ်, ခ့ၣ်အဲးစံၣ်,
အမဲရကၤထံကီၢ်,မဲၤနံၤစိထၣ်ကီၢ်ဆၣ်ဟီၣ်ကဝီၤဝ့ၢ်တဖၣ်အပူၤတကီၢ်ခါခဲအံၤ(Immigration and Customs Enforcement)(ICE)ပှၤဘၣ်မူဘၣ်ဒါတဖၣ်ဖီၣ်ဝဲတၢ်တပယူၥ်ဃီအိၣ်ဝဲအဃိ,ဘၣ်ကီဘၣ်ခဲကညီဖိလၢတုၤအိၣ်အမဲရကၤထံကီၢ်ပူၤတနီၤပျံၤတၢ်ဖုးတၢ်အိၣ်ဒီးတၢ်ဘၣ်ယိၥ်ဘၣ်ဘှီအဂ့ၢ်,သ့ၣ်ညါဘၣ်န့ၣ်လီၤ.
(ICE)ကရူၢ်ကရၢသ့ၣ်တဖၣ်အံၤဟးသမံသမိးဖီၣ်ဝဲတၢ်တပယူၥ်ဃီအိၣ်ဝဲအဃိ,ကမျၢၢ်လီၢ်ကဝီၤဖိတဖၣ်ဘၣ်အိၣ်ဆိးဝဲလၢတၢ်ပျံၤတၢ်ဖုးတၢ်ဘၣ်ယိၥ်အပူၤဒီးဟးထီၣ်က့ၤဝဲလၢတၢ်ချၢတဘူၣ်လၢၤဘၣ်အဂ့ၢ်,ကညီပိၥ်မုၣ်လၢအိၣ်ဆိးဖဲမဲၤနံၤစိထၣ်တဂၤစံးဝဲဒ်အံၤန့ၣ်လီၤ.
“ဖီၣ်တၢ်ပတယူၥ်ဃီလီၤ.ကဆဲးဖီၣ်ဝဲဒံးတၢ်လီၤ.ပှၤဟးထီၣ်တၢၤတၢ်ကမှံၤနါက့ဖီၣ်ဝဲစ့ၢ်ကီးလီၤ.အဃိခဲအံၤပှၤပျံၤတၢ်ပှၤဟးထီၣ်တၢ်ချၢတဘူၣ်ဘၣ်.ပှၤမ့ထံၣ်အဝဲသ့ၣ်ဟဲလံန့ၣ်ပှၤပၥ်ဖှိၣ်ထီၣ်သးတဖှိၣ်လိၣ်ဃီဒီးပှၤမၤဝဲတၢ်ကိးသတြီပၥ်ဖျါထီၣ်သးသ့ၣ်တဖၣ်အိၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တကီၢ်ခါခဲအံၤတၢ်အိၣ်သးအဖီခိၣ်မဲၤနံၤစိထၣ်ကီၢ်ဆၣ်ဝ့ၢ်တဖၣ်အပူၤအါတက့ၢ်တၢ်ကးတံၥ်ဃၥ်ဝဲဖိဒံဖိသၣ်တၢ်မၤလိကၠိဒီးတၢ်ဘၣ်သိၣ်လိက့ၤဝဲတၢ်လၢ(အိၤလဲ)ပူၤအဂ့ၢ်,အဝဲစံးဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ,စးထီၣ်ဖဲတလါအံၤလါယနူၤအါရံၤခံနွံတနွံအတီၢ်ပူၤကီၢ်ဆၣ်ဝ့ၢ်တဖၣ်အပူၤတၢ်ဖီၣ်ဝဲကညီဘၣ်ကီဘၣ်ခဲဖိဒီးကီၢ်ပယီၤထံကီၢ်ကလုၥ်ဒူဖိတစှၤန့ၢ်(၅)ဂၤဘၣ်အိၣ်ဝဲဒၣ်လံအမဲၥ်ညါပှၤလၢတၢ်ဖီၣ်ဃၥ်အီၤသ့ၣ်တဖၣ်အံၤတၢ်လူၤက့ၤဝဲတန့ၢ်ညီညီဘၣ်အသိး,အပူၤကွံၥ်လါယနူၤအါရံၤ(၁၁)သီအနံၤအပူၤဖီၣ်ဃၥ်ဝဲကညီပိၥ်မုၣ်တဂၤစ့ၢ်ကီးတုၤခဲအံၤတၢ်လူၤက့ၤတန့ၢ်ဒံးဝဲဒၣ်ဘၣ်အဂ့ၢ်,အဝဲစံးအါထီၣ်ကဒီးဝဲဒ်အံၤစ့ၢ်ကီးန့ၣ်လီၤ.
“တၢ်ဖီၣ်ဝဲအံၤန့ၣ်ပလူၤဘၣ်ကီဒိၣ်မးလီၤ.ခီဖျိအဝဲသ့ၣ်ဖီၣ်ဝဲဝံၤဆှၢဝဲဆူတၢ်လီၢ်အဂၤတဘျီဃီအဃိန့ၣ်လီၤ.မဟါတဟါဖီၣ်ဝဲကညီပိၥ်မုၣ်မိၢ်ဖိဆံးတဂၤန့ၣ်ပဆိမိၣ်လၢပၥ်ဝဲဖဲအံၤလီၤ.နါက့တနံၤအံၤပသ့ၣ်ညါက့ၤလၢဆှၢဝဲဆူ(Texas).အဃိပကဘၣ်မၤချ့ထီၣ်ပတၢ်ဟူးတၢ်ဂဲၤလီၤမ့တမ့ၢ်ဘၣ်န့ၣ်အဝဲသ့ၣ်ကဆှၢက့ၤဝဲဆူကီၢ်ပယီၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ICE (Immigration and Customs Enforcement) အံၤဟူးဂဲၤဝဲလၢကီၢ်အမဲရံၣ်ကၤ ထံလီၢ်ကီၢ်ပူၤတၢ်ဘံၣ်တၢ်ဘၢဝဲၤကျိၤဖီလၥ်(U.S. Department of Homeland Security – DHS)ဒီးဟံးန့ၢ်ဝဲမူဒါလၢတဖိးမံသဲးစးထံဂုၤကီၢ်ဂၤဖိအတၢ်နုၥ်လီၤဟးထီၣ်လၢထံလီၢ်ကီၢ်ပူၤ,ဒုးဆိကတီၢ်ဖီၣ်ဃၥ်ဝဲၦၤတခီထံတခီကီၢ်ဖိဒီး,ဆှၢဖျိးကွံၥ်ဝဲတၢ်လၢထံလီၢ်ကီၢ်ပူၤအဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,တကီၢ်ခါခဲအံၤဟူးဂဲၤဝဲလၢတၢ်ဖီၣ်ဝဲဘၣ်ကီဘၣ်ခဲကညီဖိလၢဖိးမံသဲးစးလံၥ်လဲၢ်တၢ်အုၣ်ကီၤသးလၢပှဲၤတအိၣ်ဒံးဝဲဒၣ်ဘၣ်တဖၣ်အမဲၥ်ညါ,ဖီၣ်စ့ၢ်ကီးဝဲကီၢ်ပယီၤထံကီၢ်ကလုၥ်ဒူၣ်ဖိဒီးထံကီၢ်အဂၤကလုၥ်ဒူၣ်ဖိလၢနုၥ်လီၤအိၣ်ဆိးလံၥ်လဲၢ်တၢ်အုၣ်ကီၤသးလၢပှဲၤတအိၣ်ဒံးဝဲဒၣ်ဘၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်ဒ်ကညီပှၤတဝၢဂ့ၢ်ဝီပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ဒ်န့ၣ်အသိး,လၢတၢ်ဖီၣ်ဝဲတဖိးမံသဲးစးပှၤတခီထံတခီကီၢ်ဖိအတၢ်ရဲၣ်တၢ်ကျဲၤအံၤအဝဲသ့ၣ်တဖၣ်မၤဝဲတၢ်သူဂံၢ်ဘါတၢ်စုဆူၣ်ခီၣ်တကးဒ်အမ့ၢ်တၢ်မၤဒၢၣ်မၤလီၤ,တၢ်မၤတၢ်ဟးဂီၤပဲတြီဒီးတၢ်သူတၢ်ကတိၤဆူၣ်ဆူၣ်ကိၤကိၤလၢပှၤတခီထံတခီကီၢ်ဖိတဖၣ်အဖီခိၣ်အိၣ်ဝဲဒၣ်အဂ့ၢ်,ကညီပှၤတဝၢဂ့ၢ်ဝီပှၤဟူးဂဲၤဖိတဖၣ်စံးဝဲဒၣ်စ့ၢ်ကီးန့ၣ်လီၤ.
