လါယနူၤအါရံၤ ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ကၠဲးတူၢ်ကိတၢ်သမံသမိးတြဲၤလၢပယီၤသုးထီၣ်ဟံန့ၢ်ဆ့ၣ်နီၤအိၣ်န့ၢ် (၂)သီဃၣ်ဃၣ်အံၤ ဖဲမဟါဂီၤခီအဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂ သုးဒ့-၂ ထီၣ်ဟံန့ၢ်ကဒါ က့ၤဝဲ န့ၢ်လံ အဂ့ၢ်န့ၣ် သုးပှၤဘၣ်မူဘၣ်ဒါအံၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
(KNLA)သုးဒ့-၂ တၢ်သမံသမိးတြဲၤလၢကၠဲးတူၢ်ကိသဝီဃၢၤကျဲဖးဒ့အံၤ ဖဲလါယနူၤအရံၤ ၁၀ သီ ဂီၤခီအဆၢကတီၢ်န့ၣ် ပယီၤသုးကျိၤနုၥ်လီၤအဃိ သုးဒ့-၂ အပှၤဘၣ်ထုးကွံၥ်အသးဒီးဘၣ်တၢ်မၤန့ၢ်ကွံၥ်ဝဲဒီးပယီၤသုးဆ့ၣ်နီၤအိၣ်ဆိးဝဲဖဲန့ၣ်လီၤ.
ဘၣ်ဆၣ်ပယီၤသုးသ့ၣ်တဖၣ်အံၤခီဖျိ သုးဒ့-၂ အပှၤက့ၤကဝီၤခးအဝဲသ့ၣ်တပယူၥ်ဃီအဃိ ဖဲမဟါလါယနူၤအါရံၤ ၁၂ သီ ဂီၤခီ ၉း၀၀ နၣ်ရံၣ် ဃၣ်ဃၣ်အဆၢကတီၢ်န့ၣ် တၢ်ထီၣ်ဟံန့ၢ်က့ၤတၢ်သမံသမိးတြဲၤလီၢ်အံၤန့ၢ်က့ၤဝဲဂ့ၤဂ့ၤန့ၣ်လီၤ.
ဒ်န့ၣ်အသိးပယီၤသုးဟဲထီၣ်ဒီးတၢ်ဒုးကဲထီၣ်လၢ(၂)သီအတီၢ်ပူၤအံၤစ့ၢ်ကီး ပယီၤသုးတကပၤသံတစှၤန့ၢ်ဝဲ(၁၈)ဂၤအဂ့ၢ်န့ၣ် သုးဖိလၢအပၣ်ဃုၥ်ထၢတၢ်ဒုးပူၤ တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါဒ်အံၤန့ၣ်လီၤ.
“ပယီၤသုးန့ၣ်ဟဲနုၥ်လီၤဘျီဟဲဆ့ၣ်နီၤအိၣ်ဝဲဖဲကညီသုးအတြဲၤ.တြဲၤတခါအံၤတမ့ၢ်တြဲၤဖးဒိၣ်ဘၣ်,တြဲၤဖိလီၤ. အဟဲနုၥ် လီၤအိၣ်ဖဲန့ၣ်ပလဲၤခးအဝဲသ့ၣ်ကိးမုၢ်နံၤဘျီအသံအဘၣ်ဒိဘၣ်ထံးအိၣ်အါ.အဝဲသ့ၣ်ဘၣ်ဒိဆါဘျီဖဲတဂီၤအံၤ ဂီၤခီန့ၣ် တူၢ်ဝဲတန့ၢ် လၢၤဘၣ်ဘျီအဝဲသ့ၣ်ဟးထီၣ်ကွံၥ်လီၤ.အဟဲအိၣ်တၢ်လီၢ်တခါအံၤဘၣ်လၢတၢ်ခၢၣ်သးဘျီတူၢ်ဝဲယံၤယံၤတန့ၢ်ဘၣ်.ခဲအံၤကၠဲးတူၢ်ကိပှၤကညီသုးတြဲၤအံၤပဟဲထီၣ်ဟံန့ၢ်က့ၤန့ၢ်လၢၤလံ. သီသီတနံၤန့ၣ်ပယီၤသုးသံ(၁၅)ဂၤ,လၢခံတနံၤအံၤသံ(၃)ဂၤ.”အဂ့ၢ်န့ၣ် စံးဝဲ န့ၣ်လီၤ.
ဒ်သုးပှၤဘၣ်မူဘၣ်ဒါစံးဝဲအသိးန့ၣ် ပယီၤသုးသ့ၣ်တဖၣ်အံၤဟးထီၣ်ဒီးဂုၤကဒါဝဲဆူစွ့ၣ်ယီၣ်ပၠးကရူၢ် ကၠးတရီသဝီမုၢ်နုၥ် (၃၁၄)အမျိၥ်သုးကလၢၤဒီး လၢတၢ်ဒုးဘျီဝဲအံၤအပူၤန့ၣ် ပယီၤသုးသံဘၣ်ဒိဘၣ်ထံးအမဲၥ်ညါမ့မ့ၢ်လၢသုးဒ့-၂ တကပၤန့ၣ် သံတအိၣ်ဘၣ်ဒိဝဲ(၂)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါပယီၤသုးသ့ၣ်တဖၣ်အံၤဟးထီၣ်ဝံၤကၠဲးတူၢ်ကိ,ကၠဲးကၠံၣ်ခၣ်ဒီးခဲမီၣ်သဝီဖိ လၢအဃ့ၢ်ထီၣ်ခဲလၢၥ် ဃၣ်ဃၣ် အံၤတဖၣ်က့ၤဆူဟံၣ်အိၣ်တနီၤလံဘၣ်ဆၣ် ခီဖျိပယီၤသုးခးလီၤဒံးဝဲကျိဖးဒိၣ်အဃိ တနီၤန့ၣ် က့ၤဝဲတဘူၣ်ဟးအိၣ် ကဒုဒံးသး လၢတၢ်ဘံၣ်တၢ်ဘၢလီၢ်အဖၢမုၢ်ဒံးအဂ့ၢ်န့ၣ် သဝီပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
