လါယနူၤအါရံၤ ၁၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ဒီၣ်ယၣ်ကရူၢ် အပူၤကွံၥ်ပယီၤသုးကျိၤလၢအနုၥ်လီၤအိၣ်ဖဲကၠဲးတူၢ်ကိ သဝီပူၤအံၤတဖၣ် တချုးအဝဲသ့ၣ်ဟးထီၣ်ဒံးဘၣ်အခါန့ၣ် နုၥ်လီၤဟံန့ၢ်ဝဲကမျၢၢ်အစ့(၃၀၀၀၀၀)ဒီးစိၥ်ဃုၥ်ဝဲတၢ်ဖိတၢ်လံၤ အါမး အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ဖဲလါယနူၤအါရံၤ ၁၀ သီအနံၤန့ၣ် ပယီၤသုးဂံၢ်ဘါလၢအနီၣ်ဂံၢ်ကအိၣ်(၁၀၀)ဘျဲၣ်အံၤနုၥ်လီၤဝဲလၢကၠဲးတူၢ်ကိသဝီပူၤဝံၤ တၢ်ဒုး ကဲထီၣ်ဝဲဒီးဟီၣ်ကဝီၤ(KNLA) သုးရ့ၣ်-၂ သုးဒ့-၂ အဘၢၣ်စၢၤဒိၣ်ဒိၣ်မုၢ်မုၢ်ဒီး ဖဲန့ၣ်ပယီၤသုးတကပၤသံဘၣ်ဒိဘၣ်ထံးတစှၤန့ၢ် ၁၈ ဂၤ ညါအဃိ ဖဲ ၁၂ သီအနံၤန့ၣ် ဘၣ်ဂုၤက့ၤလီၢ်ခံဟးထီၣ်က့ၤဆူသဝီပူၤအံၤန့ၣ်လီၤ.
ဘၣ်ဆၣ်ပယီၤသုးသ့ၣ်တဖၣ်အံၤဖဲအနုၥ်လီၤအိၣ်လၢသဝီပူၤအံၤအခါ နုၥ်လီၤမၤဟးဂီၤဝဲကမျၢၢ်အဟံၣ်အဃီ တကးဒံးဘၣ် အမဲၥ်ညါစိၥ်ဃုၥ်ဝဲကမျၢၢ်အတၢ်ဖိတၢ်လံၤ,ကျိၣ်စ့လၢဟံၣ်ပူၤဒီးကျးဆါတၢ်အပူၤဘၣ်ဟဲကဲထီၣ်သးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ သဝီပှၤဘၣ်မူဘၣ်ဒါပိၥ်ခွါလၢအိၣ်ဖဲန့ၣ်တဂၤစံးဝဲလၢ“ အသီ ၁၀ ခါန့ၣ် ပယီၤသုးဟဲတုၤလၢကၠဲးတူၢ်ကိသဝီပူၤ. ၁၁ သီ အနံၤန့ၣ်နါက့အအိၣ်တ့ၢ်စ့ၢ်. ဖဲတၢ်ခံသီအံၤတၢ်ဒုးကဲထီၣ်ဆဲးတဲးလီၤ. တၢ်တနံၤန့ၣ်ပှၤသဝီဖိစံၣ်ထီၣ်ခဲလၢၥ်လီၤ. အဝဲသ့ၣ် ဟဲအိၣ်ဖဲကၠဲးတူၢ်ကိသဝီပူၤဘျီဟံၣ်လၢပှၤပံးဃၥ်တဖၣ်န့ၣ်မၤလီၤပှီၢ်ပှၤဟံၣ်တြဲၤဘျီနုၥ်လီၤဟံပှၤတၢ်ကူတၢ်ကၤ,ယၣ်လၢအသီတဖၣ်န့ၣ်.ကယဲၢ်မ့ၢ်တၢ်အိၣ်န့ၣ်ဟံဝဲခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ပယီၤသုးသ့ၣ်တဖၣ်အံၤဖဲအဝဲသ့ၣ်အိၣ်လၢသဝီပူၤအခါနုၥ်လီၤမၤဟးဂီၤဝဲ သဝီဖိ အဟံၣ်,ကျးဆါတၢ်အတြဲၤဟံန့ၢ်ကွံၥ်ဝဲသဝီဖိ(၈)ဂၤအဟံၣ်ပူၤတၢ်ဖိတၢ်လံၤအါမးအမဲၥ်ညါဟံဃုၥ်စ့ၢ်ကီးဝဲဒီၤမိမိဝ့အစ့(၁၀၀၀၀၀)ဘးဒီး ဒီၤမၠၣ်ရှ့ၤအစ့(၂၀၀၀၀၀)ကၠး ပၥ်ဖှိၣ်ခဲလၢၥ်(၃၀၀၀၀၀)ကၠးအသိး စိၥ်ဃုၥ်စ့ၢ်ကီးဝဲဆဲးကၢး(၁)ခိၣ်အဂ့ၢ်န့ၣ် စံးဝဲ န့ၣ်လီၤ.
တကးဒံးဘၣ်ပယီၤနုၥ်လီၤဟံသဝီဖိအတၢ်လံၤ,ကျိၣ်စ့အမဲၥ်ညါဖဲအဝဲသ့ၣ်နုၥ်လီၤအိၣ်ဆိးလၢသဝီပူၤ လါယနူၤအါရံၤ ၁၁ သီ အနံၤ န့ၣ်စ့ၢ်ကီး ခးသံဃုၥ်စ့ၢ်ကီးဝဲကမျၢၢ် (၃)ဂၤ ဒီး ဖီၣ်မၤဒၢၣ်ဝဲကၠဲးတူၢ်ကိသဝီဃၢၤ ကဒံၣ်ပူၤသဝီဖိပိၥ်ခွါ(၃၈)နံၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီဖဲပယီၤသုးနုၥ်လီၤအိၣ်ဆိးလၢသဝီပူၤအံၤကိးမုၢ်နံၤဒဲးဃၣ်ဃၣ်န့ၣ် အမျိၥ်သုး (အမတ-၃၁၄) ခးလီၤ ကျိဖးဒိၣ်အါမး အဃိ ကမျၢၢ်အဟံၣ်ဘၣ်ဒိဘၣ်ထံးဟးဂီၤဝဲ(၁)ဖျၢၣ်န့ၣ်လီၤ.
ဒ်န့ၣ်အသိးစးထီၣ်ဖဲ ၁၁ သီတုၤလၢ ၁၂ သီ ပယီၤသုးနုၥ်လီၤအိၣ်လၢကၠဲးတူၢ်ကိသဝီပူၤ ဒီးတၢ်ဒုးကဲထီၣ်အခါန့ၣ် သဝီအံၤဃုၥ်ဒီး ကၠဲးကၠံၣ်ခၣ်,ခဲမီၣ်သဝီဖိခဲလၢၥ်ဃၣ်ဃၣ်ဃ့ၢ်ထီၣ်ဝဲဒီးဘၣ်ဆၣ်ခဲအံၤခီဖျိပယီၤသုးဟးထီၣ်က့ၤလံအဃိအဝဲသ့ၣ်ဟဲက့ၤအိၣ်ဆိးကဒါ လၢအဒူသဝီလံအဂ့ၢ်န့ၣ် သ့ၣ်ညါဘၣ်လၢသဝီအံၤပှၤဘၣ်မူဘၣ်ဒါအအိၣ်န့ၣ်လီၤ.
