လါယူၤ ၃ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ အပူၤကွံာ်လါမ့ၤတလါအတီၢ်ပူၤပယီၤသုးႇသုးခိးကီၢ်ဆၢ(BGF)သုးပာ်ဖှိၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးတဖၣ်အဘၢၣ်စၢၤတၢ်ဒုးကဲထီၣ်(၃၄၀)ဘျီဖဲန့ၣ်ပယီၤသုးတကပၤသံ(၁၀၀)ဘျဲၣ်အကျါပၣ်ဃုာ်သုးရ့ၣ်ခိၣ်(၂)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲမဟါလါယူၤ ၂ သီအနံၤန့ၣ်လီၤႉ
ဖဲအပူၤကွံာ်လါမ့ၤတလါအတီၢ်ပူၤခံခီခံကပၤတၢ်ဒုးကဲထီၣ်(၃၄၀)အပူၤန့ၣ်ပယီၤသုးဒီး(BGF)တကပၤသံ၀ဲ(၁၄၃)ဂၤအကျါပၣ်ဃုာ်သုးရ့ၣ်ခိၣ်(၂)ဂၤႇဘၣ်ဒိ(၁၀၈)ဂၤန့ၣ်လီၤႉဒ်န့ၣ်အသိး(KNLA)တကပၤဘၣ်လုၢ်ထီၣ်ကွံာ်အသးသမူ(၁)ဂၤဒီးဘၣ်ဒိ(၇)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ(သုးက့ ၅)အၦၤမၤဟးဂီၤကွံာ်ပယီၤသုးအသိလ့ၣ်(၄)ခိၣ်ႇ ၀ံစိာ်တီဆၢတၢ်ကဲဘျုးအဂီၢ်တိၤ(၂)ဘိႇကသ့ၣ်ယီၤသံ(၂၉)ဒုဒီးပယီၤသုးမီၤစိရိၤအရူဟးဂီၤ၀ဲ(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
လၢန့ၣ်အမဲာ်ညါပယီၤသုးမီၤစိရိၤခးလီၤကျိဖးဒိၣ်(၁၀၆)ဘျီဆူဒူသ၀ီတၢ်ဖံးအီၣ်မၤအီၣ်လီၢ်ကျဲပူၤအဃိ ကမျၢၢ်သံ၀ဲ(၂)ဂၤဒီးဘၣ်ဒိ၀ဲ(၁၄)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ဒ်န့ၣ်အသိးလၢခ့ၣ်အဲၣ်ယူၣ်ဒူသထူၣ်(သုးက့ ၁)ဟီၣ်က၀ီၤအပူၤစ့ၢ်ကီး လါမ့ၤတလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီး(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်(၄၁)ဘျီဒီးဖဲန့ၣ်ပယီၤသုးသံ(၇၁)ဂၤႇဘိၣ်ဒိ(၅၃)ဂၤအဂ့ၢ်န့ၣ် ထုးထီၣ်ပာ်ဖျါ၀ဲဖဲမဟါလါယူၤ ၂ သီအနံၤန့ၣ်လီၤႉ
(သုးက့ ၁)ဟီၣ်က၀ီၤပူၤခံခီခံကပၤတၢ်ဒုးကဲထီၣ်(၄၁)ဘျီအပူၤန့ၣ် ပယီၤသုးသိလ့ၣ်ဟးဂီၤ၀ဲ(၅)ခိၣ်ဒီး(KNLA)သုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၂)ဂၤႇဘၣ်ဒိ(၁၁)ဂၤအဂ့ၢ်န့ၣ် ခ့ၣ်အဲၣ်ယူၣ်ဒူသထူူၣ်ကီၢ်ရ့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
