လါဖ့ၤဘြူၤအါရံၤ ၂၄ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါဖ့ၤဘြူၤအါရံၤ ၂၃ သီ ဂီၤခီအဆၢကတီၢ်န့ၣ် လၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ကြဲၢ်ကီၢ်ဆၣ် တၢ်ကြဲၢ်ဝ့ၢ်ဃၢၤန့ၣ် ပယီၤသုးဒီး (KNLA)အဘၢၣ်စၢၤတၢ်ဖ့ၣ်စၢကဲထီၣ်တဆံးတက့ၢ်အဃိ ဝ့ၢ်ပူၤကမျၢၢ်ဃုၥ်ဒီးဒူသဝီလၢ အိၣ်ဘူးဖဲန့ၣ်တစှၤန့ၢ်န့ၣ်(၂)ဖျၢၣ်ဘၣ်ဃ့ၢ်ထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးလၢအနုၥ်လီၤအိၣ်ဖဲတၢ်ကြဲၢ်ဒီး, ပနွဲၢ်ကျါ, ပညၤပျံသဝီပူၤသ့တဖၣ်အံၤ ဖဲမဟါဂီၤခီ ၁၀း၀၀ ဃၣ်ဃၣ် အဆၢကတီၢ် န့ၣ် ခီဖျိအဝဲသ့ၣ်ဟးထီၣ်ဟူးဂဲၤတလၢဝဲတၢ်ပၥ်ပနီၣ်လီၢ်အဃိ တၢ်ပၢၢ်ဆၢသုးကရူၢ်လဲၤဟ့ၣ်ပလီၢ်ဝဲဒီးဒြိဝံၤ ပယီၤသုးအံၤ က့ၤခးလီၤ ကဒါ ကျိဖးဒိၣ်အဖီခိၣ်တၢ်ကြဲၢ်ဝ့ၢ်ပူၤကမျၢၢ်ဃုၥ်ဒီးသဝီ(၂)ဖျၢၣ်အံၤကမျၢၢ်တဖၣ် ဃ့ၢ်ထီၣ်ဝဲဒၣ်န့ၣ်လီၤ.
ဘၣ်ဃးတၢ်ဂ့ၢ်အံၤ တၢ်ကြဲၢ်ကီၢ်ဆၣ်ခိၣ် ပဒိၣ်စီၤပလဲဒံၤဝါ စံးဝဲလၢ“မဟါတနံၤန့ၣ်လၢတၢ်အိၣ်သးတခါအဖီခိၣ်န့ၣ်အိၣ်ဒၣ်ခးစိ လီၤသးလီၤ, တမ့ၢ်တၢ်ဒုးကဲထီၣ်ဖးဒိၣ်ဘၣ်.လၢတၢ်ကဲထီၣ်သးအံၤအဃိ တၢ်ကြဲၢ်,ပနွဲၢ်ကျါ,ပညၤပျံသဝီတဖၣ်အံၤ အဝဲသ့ၣ်ပျံၤ တၢ်ဘျီဟးဃ့ၢ်အိၣ်ဝဲန့ၣ်လီၤ.အနီၢ်ကီၢ်န့ၣ်ပှၤခးစိတၢ်န့ၣ်ပယီၤလီၤ.ပှၤမၤသ့ၣ်ညါအဝဲသ့ၣ်ပှၤလဲၤတ့ၢ်လီၤဒီးဒြိဒ်န့ၣ်လီၤမီၤ.တၢ်အဝဲသ့ၣ်န့ၣ်လဲၤတလၢတၢ်ပၥ်ပနီၣ်အဃိကမ့ၢ်ဒၣ်ပှၤခးသ့ၣ်ညါအီၤဒ်န့ၣ်လီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် တၢ်ကြဲၢ်ဝ့ၢ်ဃုၥ်ဒီး ပနွဲၢ်ကျါ, ပညၤပျံကမျၢၢ်လၢအဃ့ၢ်ထီၣ် တဖၣ်တနီၤန့ၣ် လဲၤစံၣ်အိၣ်ဝဲ လၢဖၣ်အၣ်အိၣ်အသိးတနီၤန့ၣ်လဲၤဃ့ၢ်အိၣ်ဝဲလၢတၢ်လီၢ်အဘံၣ်အဘၢလီၢ်အိၣ်ဝဲဒၣ်န့ၣ်လီၤ.
အပူၤကွံၥ်စးထီၣ်ဖဲလါယနူၤအါရံၤထီၣ်တချုးတၢ်မၤဒံးတၢ်ဃုထၢအကူၥ်-၃ ဘၣ်အခါ ပယီၤသုးသ့ၣ်တဖၣ်အံၤဟ့ၣ်ထီၣ် တၢ်ဂ့ၢ် လၢတၢ်ဖးဒၢတၢ်ဘံၣ်တၢ်ဘၢအဂီၢ်ဝံၤဟဲထီၣ်ဒီးနုၥ်လီၤအိၣ်ဟံန့ၢ်အလီၢ်အကျဲလၢဒူသဝီတၢ်လီၢ်သ့ၣ်တဖၣ်အံၤအပူၤဒီး ခဲအံၤတၢ်ဃု ထၢဝံၤလံဘၣ် တက့ၤလီၤဒံးဘၣ်အမဲၥ်ညါဆီတလဲအသုးကအိၣ်လၢ(၂)ဘျီ(၃)ဘျီလံအဂ့ၢ်န့ၣ် ပဒိၣ်စီၤပလဲဒံၤဝါ စံးဝဲန့ၣ်လီၤ.
တကးဒံးဘၣ်ပယီၤသုးလၢအအိၣ်ဖဲကြုၢ်တု,ပနွဲၢ်ကျါဒီးပညၤပျံသဝီပူၤအံၤတၢ်တယးကွၢ်ဝဲလၢအသုးဂံၢ်ဘါကအိၣ်လၢ(၃၀၀)ခိၣ်ဃၢၤ ဒီး အဝဲသ့ၣ်အံၤတဟးထီၣ်ဘၣ်မ့မ့ၢ်တခီဆဲးအိၣ်ဒံးဝဲဖဲန့ၣ်အဃိ ဘၣ်သ့ၣ်သ့ၣ်အဝဲသ့ၣ်ကအိၣ်ဒီးတၢ်ရဲၣ်တၢ်ကျဲၤတခါခါ သ့ဝဲအဂ့ၢ် လီၢ်ကဝီၤပှၤဘၣ်မူဘၣ်ဒါတဖၣ်ပဲၥ်ထံ နီၤဖးစံးဝဲန့ၣ်လီၤ.
ဒ်န့ၣ်အသိးတၢ်ကြဲၢ်ဒူသဝီကမျၢၢ်လၢအဃ့ၢ်ထီၣ်ခဲအံၤသ့ၣ်တဖၣ်အံၤဖဲအပူၤကွံၥ်လါယနူၤအါရံၤတၢ်ဃုထၢအခါစ့ၢ်ကီးခီဖျိပယီၤသုး နုၥ်လီၤအဃိတနီၤန့ၣ်ဃ့ၢ်ထီၣ်တ့ၢ်လၢန့ၣ်တဘျီလံဘၣ်ဆၣ် ဖဲမဟါခီဖျိတၢ်က့ၤကဲထီၣ်ကဒါဒ်အံၤအဃိ ခဲအံၤပှၤအိၣ်ဖဲန့ၣ် တဖၣ်အါဒၣ်တက့ၢ်ဃ့ၢ်ထီၣ်ဝဲခဲလၢၥ်ဃၣ်ဃၣ်န့ၣ်လီၤ.
ဟီၣ်ကဝီၤတၢ်လီၢ်လၢအကဲထီၣ်သးဖဲမဟါန့ၣ်မ့ၢ်ဝဲ(KNLA) သုးရ့ၣ်-၁၉ ဒီး သုးရ့ၣ်-၂၂ ဟီၣ်ကဝီၤအသိး တၢ်ကဲထီၣ်သးဖဲမဟါဝံၤ လီၢ်ခံတုၤလၢတနံၤအံၤ လါဖ့ၤဘြူၤအါရံၤ ၂၄ သီ မုၢ်ထူၣ်အံၤန့ၣ် ခံခီခံကပၤတၢ်ဟူးတၢ်ဂဲၤတအိၣ်ဖျါ နီမံၤဒံးဘၣ် ဘၣ်ဆၣ်အိၣ်ဒံးဝဲ လၢတၢ်ကွၢ်ဟုၣ်ကွၢ်စူၣ်တၢ်ဖ့ၣ်စၢပူၤအဖၢမုၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
