လါအ့ဖြ့ၣ် ၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် လ့က့ၣ်သဝီအပူၤခီဖျိပယီၤသုးလဲၤခးလီၤတၢ်ခံသီတပယူၥ်ဃီအဃိ ဒူသဝီလၢအိၣ်ဘူးဖဲန့ၣ်တစှၤန့ၢ်(၅)ဖျၢၣ်ပျံၤတၢ်ဃ့ၢ်ထီၣ်ဝဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ပယၢ်ရီကရူၢ် လ့က့ၣ်သဝီအံၤဖဲလါအ့ဖြ့ၣ်ထီၣ် ၁ သီ မုၢ်နၤခီ ၁၂း၀၀ နၣ်ရံၣ်ဘျဲၣ်အဆၢကတီၢ်န့ၣ် သုးမီၤစိရိၤ(jet fighter) ကဘီယူၤ လဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၄ ဖျၢၣ်လၢသဝီပူၤအဃိ ကမျၢၢ်ဘၣ်ဒိတဂၤအမဲၥ်ညါဟံၣ်တၢ်သူၣ်ထီၣ် ဟးဂီၤ(၁၂)ဖျၢၣ် န့ၣ်လီၤ.
တၢ်ကဲထီၣ်သးဖဲန့ၣ်ဝံၤမၤကဒီးဖဲမုၢ်ဆ့ၣ်ထီၣ်မဟါလါအ့ဖြ့ၣ် ၂ သီ မုၢ်နၤခီ ၁၁း၄၀ မံးနံးဃၣ်ဃၣ်အဆၢကတီၢ်န့ၣ် သုးမီၤစိရိၤ (Y-12)ကဘီယူၤ(၂)ဘ့ၣ် ဟဲခးလီၤကဒီးဝဲကျိဖိတစှၤန့ၢ်ဝဲ(၄၀)ဃၣ်ဃၣ်အံၤဆူလ့က့ၣ်သဝီပူၤဒီးတးပီသဝီဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိကဘီယူၤလဲၤခးလီၤကဒီးတၢ်ဘျီဝဲအံၤခီဖျိခးလီၤဝဲလိၤလိၤဆူလ့ၣ်က့ၣ်သဝီပူၤအဃိ ဟံၣ်တၢ်သူၣ်ထီၣ်ဟးဂီၤ ဘၣ်ဒိဘၣ်ထံးအါထီၣ်ကဒီးဝဲဘၣ်ဆၣ်သဝီအံၤခီဖျိအိၣ်ဘူးဒီးသုးကလၢၤအဃိတၢ်ဟးဂီၤဘၣ်ဒိဘၣ်ထံးအနီၣ်ဂံၢ်န့ၣ် မၤလီၤတံၢ် တန့ၢ်ဒံးဘၣ် အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤဒ်အံၤန့ၣ်လီၤ.
“ကဘီယူၤန့ၣ်ဟဲထီၣ်ဒီးခးလီၤဝဲကျိဖးဒိၣ်ဖဲတးပီသဝီချၢန့ၣ်(၂)ဖျၢၣ်ဖဲ ၁၀း၄၀ အခါန့ၣ်. မ့ဝံၤအလဲၤထီၣ်ဖဲလ့က့ၣ်သဝီဘျီ ခးလီၤ ဝဲဖဲန့ၣ်တဘျုးလၢအဝီညါ.တၢ်မၢၤခးလီၤဝဲကျိဖးဒိၣ်(၁၂၀ မမ)အသၣ်လီၤ. ပှၤအိၣ်ဖဲန့ၣ်တဲလၢကဘီယူၤဟဲခးလီၤတၢ်န့ၣ်အိၣ် (၄၁)ဖျၢၣ်.ခးလီၤဝဲသဝီပူၤလဲလဲလီၤ.ယသံကွၢ်ပှၤန့ၣ်ဟံၣ်ဒုဘၣ်ဒိဘၣ်ထံးကယၢ်လီၤ.တၢ်မၢၤလီၤကရဲလၢသူတသ့လၢၤ ဘၣ် န့ၣ်အိၣ်တဖျၢၣ်.ခဲအံၤပှၤလဲၤကွၢ်တဘူၣ်ဒံးဘၣ်ခီဖျိအိၣ်ဘူးဒီးသုးကလၢၤအဃိမီၤ”အဂ့ၢ်န့ၣ် စံးဝဲန့ၣ်လီၤ.
ကဘီယူၤဟဲခးလီၤကျိဖးဒိၣ်ဘျီဝဲအံၤအဖျၢၣ်(၄၀)ဃၣ်ဃၣ်အကျါ(၂)ဖျၢၣ်န့ၣ်တပိၢ်ဖးထီၣ်ဝဲဘၣ်အဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
တကးဒံးဘၣ်ဖဲမဟါ ၂ သီ မုၢ်ဃ့ၢ်လီၤအဆၢကတီၢ်န့ၣ် စ့ၢ်ကီး ပယီၤသုးလၢၤလၢအိၣ်ဘံလ့ဝ့ၢ်အံၤခးစိဃီၤဝဲကျိဖးဒိၣ်ဆူ ယယၢ်ရီကရူၢ်ဒူသဝီအပူၤဒံးန့ၣ်လီၤ.
လၢတၢ်န့ၣ်အဃိတကီၢ်ခါခဲအံၤလ့က့ၣ်,တၤပီသဝီဃုၥ်ဒီးဒူသဝီလၢအိၣ်ဘူးဖဲန့ၣ်သဝီတစှၤန့ၢ်(၅)ဖျၢၣ်ကမျၢၢ်တဖၣ်ဃ့ၢ်ထီၣ်ဝဲအဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ် စီၤအ့နဲၤ စံးအါထီၣ်ဝဲန့ၣ်လီၤ.
“ခဲအံၤတမ့ၢ်ထဲလၢလ့က့ၣ်,တၤပီသဝီလၢသုးကလၢၤအိၣ်(၂)ဖျၢၣ်အံၤတကးဘၣ်သဝီလၢအိၣ်ဘူးဖဲန့ၣ်ကိးဖျၢၣ်ဒဲးဃၣ်ဃၣ် န့ၣ်အါဒၣ်တက့ၢ်ဃ့ၢ်ထီၣ်လီၤအဝဲသ့ၣ်အိၣ်လၢသဝီပူၤတဘူၣ်လၢၤဘၣ်.ဒ်သိးပယၢ်ရီ,သူကဘံ,ကၠိဝဲ,ထံဆံၣ်ဘီ,ဃီဖိပျဲၢ်သဝီ တဖၣ်အံၤအိၣ်လၢသဝီပူၤတဘူၣ်လၢၤဘၣ်”အဂ့ၢ်န့ၣ် စံးဝဲန့ၣ်လီၤ.
လ့က့ၣ်ဒီးတၤပီသဝီလၢပယီၤသုးကလၢၤအိၣ်ဆီလီၤသးအံၤန့ၣ်အပူၤကွံၥ်ဟီၣ်ကဝီၤတၢ်ပၢၢ်ဆၢကရူၢ်လဲၤခးစဲးပြဲးဝဲမ့အိၣ်ဘၣ်ဆၣ် တချုးကဘီယူၤဟဲခးလီၤတၢ်ဒံးဘၣ်န့ၣ်တၢ်လဲၤခးဝဲသုးကလၢၤအံၤတအိၣ်ဝဲဘၣ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ် န့ၣ်လီၤ.
ဘၣ်ဆၣ်ဘၣ်ဃးတၢ်ကဲထီၣ်သးဘျီဝဲအံၤပယီၤသုးအံၤနၢ်ဟူဝဲလၢဟီၣ်ကဝီၤတၢ်ပၢၢ်ဆၢကရူၢ်ကလဲၤထီၣ်ခးအဝဲသ့ၣ်သးကလၢၤ အဃိကဘီယူၤဟဲခးလီၤတၢ်ဘၣ်ဟဲကဲထီၣ်ဝဲအဂ့ၢ်န့ၣ် ကမျၢၢ်တနီၤစံးဝဲအိၣ်န့ၣ်လီၤ.
လ့က့ၣ်ဒီးတးပီးသုးကလၢၤအံၤဟဲအိၣ်ဆီလီၤသးဖဲဟီၣ်ကဝီၤပူၤဝဲန့ၣ်ကအိၣ်လံဝဲလၢအနံၣ်(၄၀)ဘျဲၣ်လံဒီး တကီၢ်ခါခဲအံၤ သုးရ့ၣ်လၢအိၣ်ဆီလီၤသးဖဲန့ၣ်မ့ၢ်ဝဲ သုးတြိၤ(၄၄)စုတီၤဖီလၥ် ခီၣ်ချ့သုးရ့ၣ်(ခမရ-၂)ဒီး သုးကလၢၤခံဖျၢၣ်အံၤတၢ်တယးကွၢ်ဝဲ သုးနီၣ်ဂံၢ်ကအိၣ်အဂၤ(၁၀၀)ဘျဲၣ်န့ၣ်လီၤ.
