လါအီးကထိဘၢၣ် ၁၆သီ, ၂၀၂၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,တၢ်ြကဲၢ်ကီၢ်ဆၣ်ပှၤဂ့ၢ်ဝီမူးပွဲတၢ်ရဲၣ်တၢ်ကျဲတဖၣ်အပူၤ,တၢ်ဖၢနုၥ်ဃုၥ်ဝဲ(အၣ်ဝၣ်ဒ့)တၢ်လိၣ်ကွဲတၢ်တၤကျိၣ်တၤစ့အဂ့ၢ်,သ့ၣ်ညါဘၣ်ဒ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
သုးက့(၇)ဖၣ်အၣ်ကီၢ်ရ့ၣ်,ကီၢ်ဆၣ်တဖၣ်အပူၤ,ဘၣ်ဃးဒီး(အၣ်ဝၣ်ဒ့)တၢ်တၤကျိၣ်တၤစ့တၢ်လိၣ်ကွဲတၢ်ဖံးတၢ်မၤအံၤ,တၢ်တြီဃၥ်အိၣ်ဝဲဘၣ်ဆၣ်,တကီၢ်ခါခဲအံၤတၢ်ကြဲၢ်ကီၢ်ဆၣ်အပူၤ(အၣ်ဝၣ်ဒ့)တၢ်တၤကျိၣ်တၤစ့တၢ်လိၣ်ကွဲတၢ်ဖံးတၢ်မၤအံၤအိးထီၣ်ဝဲအသးအိၣ်ဝဲတနီၤလံအဂ့ၢ်,လီၢ်ကဝီၤကမျၢၢ်တဖၣ်စံးဝဲန့ၣ်လီၤ.
တၢ်ကြဲၢ်ကီၢ်ဆၣ်အပူၤ,(အၣ်ဝၣ်ဒ့)တၢ်လိၣ်ကွဲအိးထီၣ်ဝဲအသးအိၣ်တနီၤလံအဖီခိၣ်,ဘၣ်ဃးဒီး(အၣ်ဝၣ်ဒ့)တၢ်လိၣ်ကွဲအံၤန့ၣ်တၢ်မၤဝဲန့ၢ်ထဲတၢ်ဘူၣ်တၢ်ဘါမူးပွဲအရ့ဒိၣ်တဖၣ်အပူၤလီၤဒီးတၢ်တဟ့ၣ်ခွဲးလၢကဒုးအိၣ်အီၤဖးဒိၣ်ဖးထီဘၣ်အဂ့ၢ်,ဖၣ်အၣ်ကီၢ်ရ့ၣ်ခိၣ်(ပဒိၣ်စီၤအီၣ်မီၣ်အ့)စံးဝဲဒ်အံၤန့ၣ်လီၤ.
အဝဲစံးဝဲလၢ“အၣ်ဝၣ်ဒ့ဒုလ့ၤတက့ၤတဘၣ်မၤဘၣ်န့ၢ်ပတဲကျၢဃၥ်လံ,မ့မၤန့ၣ်,မၤကသ့ဝဲထဲတခါလၢတၢ်မၤဘူၣ်ဒိၣ်ဘူၣ်ထီအရ့ဒိၣ်ဒ်အမ့ၢ်,တၢ်ဘူၣ်တၢ်ဘါအမူး,သီခါယူၤအဘူၣ်အပွဲတဖၣ်လီၤ.ဒီးကဘၣ်မၤဝဲထဲဖဲတၢ်ပၥ်ပနီၣ်အီၤအနံၤအသီအဆၢကတီၢ်အပူၤလီၤ.မ့မ့ၢ်လၢတၢ်ကဒုးအိၣ်ထီၣ်မၤအီၤဖးဒိၣ်ဖးထီဖးယံၥ်သ့ၣ်တဖၣ်န့ၣ်ဒုလ့ၤတက့ၤမၤတသ့ဘၣ်.ပတဟ့ၣ်ခွဲးဘၣ်”အဂ့ၢ်စံးဘၣ်ခ့ၣ်အဲၣ်စံၣ်ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ,(အၣ်ဝၣ်ဒ့)တၢ်လိၥ်ကွဲမူးပွဲတဖၣ်အပူၤ,ဒ်ပှၤဘၣ်မူဘၣ်ဒါတဖၣ်အတၢ်တၢၣ်ပီၣ်တဲသကိးအိၣ်ဝဲအဖီခိၣ်,ထုးထီၣ်ဝဲလံၥ်တၢ်နဲၣ်လီၤလၢတၢ်ကဘၣ်လူၤပိၥ်မၤထွဲဝဲတဖၣ်အိၣ်ဝဲလံဒီးတၢ်ကဘၣ်လူၤပိၥ်ထွဲဝဲအဂ့ၢ်,တၢ်ကြဲၢ်ကီၢ်ဆၣ်ခိၣ်,ပဒိၣ်စီၤဆၣ်ပလဲၤဒံၤဝါစံးဝဲဒ်အံၤန့ၣ်လီၤ.
အဝဲစံးဝဲလၢ“ဘၣ်ဃး(အၣ်ဝၣ်ဒ့)တၢ်လိၣ်ကွဲတခါဒုန့ၣ်အခဲအံၤတၢ်ယီၤထီၣ်က့ၤတဘျီတၢ်ဟးထီၣ်က့ၤလီၤညီထီၣ်လံအဃိန့ၣ်,ပဟီၣ်ကဝီၤအပူၤတနီၤပှၤတဲပှၤလၢစးထီၣ်လံ,အိၣ်ထီၣ်လံ,အိၣ်ဝဲဒၣ်ဒီဒူၣ်ဒီထၢလံ,အဃိန့ၣ်ပဝဲဒၣ်ခီဒုဒ်ပခိၣ်ပနၢ်တၢ်တဲသကိးအဖီခိၣ်အသိး,ပအိၣ်ဒီးပလံၥ်တၢ်နဲၣ်လီၤသ့ၣ်တဖၣ်အဃိ,ပနဲၣ်လီၤလၢကရူၢ်ပူၤ,ဒူပူၤသဝီတဖၣ်အပူၤလံ,ဒီးလံၥ်သ့ၣ်တဖၣ်အံၤတုၤဃီၤဝဲလၢကရူၢ်ကရၢလၢအမၤတၢ်တဖၣ်အစုပူၤလံ.ပပၥ်ပနီၣ်န့ၣ်အဝဲသ့ၣ်တၢ်ဆၢကတီၢ်,ပဟ့ၣ်ကူၣ်ပတဲအဝဲသ့ၣ်တဖၣ်အိၣ်ဝဲဒၣ်လီၤ.လ့ၤတက့ၤပကးတံၥ်မ့တန့ၢ်ဘၣ်ဆၣ်,ဒ်သိးကစှၤလီၤအဂီၢ်ဒုပတြီဃၥ်အိၣ်ဝဲန့ၣ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
(အၣ်ဝၣ်ဒ့)တၢ်လိၣ်ကွဲအပူၤ,တၢ်တၤကျိၣ်တၤစ့တၢ်ဖံးတၢ်မၤတဖၣ်အမဲၥ်ညါ,တၢ်မၤဆါကသံၣ်မူၤဘှီး,တၢ်ဟုၣ်တၢ်ဘျး,တၢ်ဟးဂုၤဟးဂီၤအိၣ်ဝဲအဃိ,လၢတၢ်ကမၤလီၤစှၤဝဲတၢ်သ့ၣ်တဖၣ်အံၤအဂီၢ်,တၢ်ထုးထီၣ်ရၤလီၤဝဲလံၥ်တၢ်နဲၣ်လီၤအဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တကတီၢ်ဃီ,သုးက့(၇)ဖၣ်အၣ်ကီၢ်ရ့ၣ်ပူၤအံၤ,(KNU)ကညီဒီကလုၥ်စၢဖှိၣ်ကရၢအမဲၥ်ညါ,ကညီဖီၣ်စုကဝဲၤကရူၢ်ကရၢဒ်အမ့ၢ်(ကညီတၢ်မုၥ်တၢ်ခုၣ်ကီၣ်ကးကရၢ,(KNLA/PC)ဃုၥ်ဒီးသုးခိးကီၢ်ဆၢ(BGF)သ့ၣ်တဖၣ်စ့ၢ်ကီးဒုးအိၣ်ထီၣ်ဝဲတၢ်မၤတၢ်တၤကျိၣ်တၤစ့ဒ်သိးအံၤသ့ၣ်တဖၣ်အိၣ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
ဖၣ်အၣ်ကီၢ်ရ့ၣ်အပူၤအံၤ,လၢကမၤလီၤမၢ်ကွံၥ်ဝဲတၢ်တၤကျိၣ်တၤစ့တၢ်ဖံးတၢ်မၤအံၤအဂီၢ်,(ခ့ၣ်အဲၣ်ယူၣ်)ခိၣ်နၢ်တဖၣ်ကးတံၥ်ဃၥ်ဝဲတၢ်လိၣ်ကွဲတၢ်ဖံးတၢ်မၤအံၤအိၣ်ဝဲဘၣ်ဆၣ်,ခီဖျိပှၤတီခိၣ်ရိၢ်မဲတၢ်လိၣ်ကွဲတၢ်ဖံးတၢ်မၤကရူၢ်ကရၢတနီၤအကျါ,ပှၤတနီၤအတၢ်ပၣ်ဃုၥ်ပၣ်ဂီၢ်အိၣ်ဝဲလၢတၢ်တီခိၣ်ရိၢ်မဲတၢ်လိၣ်ကွဲအံၤအပူၤအဃိ,အပူၤကွံၥ်(၂၀၂၃)နံၣ်အပူၤတၢ်မၤဝဲတၢ်ဟ့ၣ်ပလီၢ်ဆဲးလီၤမံၤအိၣ်ဝဲဒၣ်န့ၣ်လီၤ
ဒ်န့ၣ်အသိး,ဖၣ်အၣ်ကီၢ်ရ့ၣ်တၢ်ကြဲၢ်ကီၢ်ဆၣ်အပူၤအံၤအပူၤကွံၥ်(၁၅)နံၣ်,အနံၣ်(၂၀)အစိၤအဆၢကတီၢ်,တဘျီလၢ်လၢ်ဖဲတၢ်မၤဝဲမူးပွဲအဆၢကတီၢ်ဟီၣ်ကဝီၤခိၣ်နၢ်တဖၣ်ဘၣ်ကွဲးဝဲ“တၢ်ဘၣ်မၤထွဲမူးပွဲတၢ်ကလုၢ်”အိၣ်ဝဲဒီး,လံၥ်တၢ်ကလုၢ်အပူၤတၢ်ဂ့ၢ်ခိၣ်သ့ၣ်တဖၣ်မ့ၢ်ဝဲ“တၢ်တဘၣ်မၤတၢ်တၤကျိၣ်တၤစ့ဒီးတၢ်မူၤတၢ်ဘှီး”ဘၣ်အိၣ်ဝဲဒၣ်အဖီခိၣ်,တကီၢ်ခါခဲအံၤဟီၣ်ကဝီၤပူၤခိၣ်နၢ်တနီၤအဲၣ်ဒိးကွဲးထုးထီၣ်ဒံးဝဲလံၥ်တၢ်ကလုၢ်ဒ်လၢညါအိၣ်ဘၣ်ဆၣ်,မၤဝဲတတုၤလီၢ်ထီၣ်ဘးဘၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
