လါမ့ၤ ၈ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးအံၤလၢကလဲၤထီၣ်လူၤက့ၤ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤ ဖၣ်ပူၣ်သုးကလၢၤလၢဟီၣ်ကဝီၤ(KNLA)သုးပၥ်ဖှိၣ် ကဝီၤခးဝဲန့ၢ်လၢတနံၣ်ဘျဲၣ်ဃၣ်ဃၣ်အံၤအဂီၢ်န့ၣ် ဖဲအပူၤကွံၥ်စှၤသီအခါသုးနီၣ်ဂံၢ်(၂၀၀၀)ဃၣ်ဃၣ် ဟဲတုၤဝဲလၢကမၤမိၢ်ဝ့ၢ် အဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ်မူဘၣ်ဒါဒီးကမျၢၢ်တဖၣ်အအိၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ် ပယီၤသုးအံၤတၢ်ရဲၣ်တၢ်ကျဲၤအိၣ်လၢကလဲၤထီၣ်(စစ်ကူ) လၢဖၣ်ပူၣ်သုးကလၢၤ တၢ်ဒုးဆူၣ်လီၢ်အဃိ ဖဲအပူၤကွံၥ်လါမ့ၤ ၅ သီ ဒီး ၆ သီအခါန့ၣ် လၢမၠဲၣ်ကၠံငူၣ်(ခီၣ်တီၣ်)ဝ့ၢ်အံၤတဆီ ခီဃီၤဝဲဃိၣ်လိၥ်ကျိလဲၤထီၣ်ဝဲ ဆူကမၤမိၢ်ဒီးသိလ့ၣ်(၆)ဘ့,(၁၀)ဘ့ အခိၣ်(၄၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
(သုးက့ ၇) KNLA ပှၤဘၣ်မူဘၣ်ဒါလၢအထံၣ်ပယီၤသုးခီထံကျိလၢအမဲၥ်တဂၤစံးဝဲလၢ“အတၢ်ပညိၣ်န့ၣ်အကဘၣ်လဲၤထီၣ်လူၤ က့ၤဖၣ်ပူၣ်သုးကလၢၤလီၤ.ဖဲလါထီၣ် ၅ သီန့ၣ်လဲၤဃီၤတဒူၣ်ဒီးဖဲ ၆ သီန့ၣ်လဲၤကဒီးတဒူၣ်.အလဲၤအခိၣ်တီတဝီန့ၣ်အနီၣ်ဂံၢ်က အိၣ်လၢ(၄၀၀)ဘျဲၣ်,လၢခံတနံၤန့ၣ်ကအိၣ်လၢ(၁၀၀၀)ဘျဲၣ်.ပၥ်ဖှိၣ်ခဲလၢၥ်န့ၣ်ကအိၣ်လၢ(၂၀၀၀)ညါ.အဝဲသ့ၣ်လဲၤထီၣ်ဒီး(၆)ဘ့ကါ,(၁၀)ဘ့ကါန့ၣ်ကအိၣ်အခိၣ်(၅၀)ညါလဲၤထီၣ်ဒီးတၢ်ပီးတၢ်လီဒီဒူၣ်.ဖဲမဟါတနံၤန့ၣ်ကဘီယူၤလဲၤထီၣ်လၢ(သုးက့ ၅)တကပၤ သၢဘ့ၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ပယီၤသုးဟဲထီၣ်တုၤလၢကမၤမိၢ်ဝ့ၢ်ပူၤအါအါဂီၢ်ဂီၢ်ဝံၤလီၢ်ခံမုၢ်ဆ့ၣ်ထီၣ်န့ၣ် ဟဲက့ၤလီၤကဒါဆူမၠဲၣ်ကၠံငူၣ်(ခီတီၣ်)တကပၤအနီၣ်ဂံၢ် ကအိၣ်လၢအဂၤ(၄၀၀)ဘျဲၣ် ညါအဃိ ပှၤသ့ၣ်တဖၣ်အံၤအကျါတနီၤန့ၣ်ဆီတလဲအသးပၣ်ဃုၥ်ဝဲအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ တဂၤဃီဝဲန့ၣ်စံးဝဲန့ၣ်လီၤ.
ဒ်န့ၣ်အသိးဖဲပယီၤသုးသ့ၣ်တဖၣ်လဲၤထီၣ်ဖဲကမၤမိၢ်အခါန့ၣ်စ့ၢ်ကီး ခီဖျိတၢ်ခးလိၥ်သးကဲထီၣ်ဝဲဒီးဟီၣ်ကဝီၤ(KNLA)အဘၢၣ်စၢၤ အဃိ ပယီၤသုးတကပၤသံဘၣ်ဒိဘၣ်ထံးအိၣ်ဝဲအဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ.
အပူၤကွံၥ်ပယီၤသုးမ့ဟဲထီၣ်ဘၣ်ဆၣ်ခဲအံၤဟဲထီၣ်အနီၣ်ဂံၢ်အါအါဂီၢ်ဂီၢ်အဃိ (သုးက့ ၅) အမဲၥ်ညါ တၢ်တယးဝဲလၢကလဲၤ ထီၣ်ဝဲ ဆူ(သုးက့ ၁)လ့က့ၣ်,တးပီသုးကလၢၤလၢတၢ်ဒုးဆူၣ်ဝဲခဲအံၤအဂ့ၢ်န့ၣ် သ့ၣ်ညါဘၣ်န့ၣ် လီၤ.
ဘၣ်ဃးဒီးတၢ်ဂ့ၢ်အံၤန့ၣ် (သုးက့ ၁) KNLA ပှၤဘၣ်မူဘၣ်ဒါတဂၤစံးဝဲလၢ“ပနၢ်ဟူလၢခဲအံၤပယီၤသုးဟဲထီၣ်တုၤလၢကမၤမိၢ်န့ၣ် ကအိၣ်လၢအဂၤလၢအကထိဃၣ်ဃၣ်ညါ. ပှၤဟဲထီၣ်တဖၣ်အံၤန့ၣ်အါလၢသုးဖိသီလီၤ. ကဟဲထီၣ်လၢသုးက့(၁)တနီၤဒီး လၢ(သုးက့ ၅) တကပၤတနီၤ .ယဆိမိၣ်ဒုကလဲၤထီၣ်လၢသုးက့(၅)တကပၤအါ. မ့ဟဲထီၣ်လၢပအိၣ်တကပၤဒု ဝဲစ့ၢ်ကီး ပအိၣ် ကတဲၤကတီၤပၥ်သးလံ.ပနၢ်ဟူလၢအဟဲထီၣ်စိၥ်တၢ်ဖိတၢ်လံၤကျိဖးဒိၣ်,ဒြိလၢသ့းတၣ်ပူၤဒီဒူၣ် လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤလၢ(သုးက့ ၁)ဘံလ့ကီၢ်ဆၣ်တးပီသုးကလၢၤတကပၤစ့ၢ်ကီးဒုးယၤတၢ်ဖ့ၣ်စၢဆဲးကဲထီၣ်ဝဲလၢခံခီခံကပၤအဘၢၣ်စၢၤ အသိး သုးကလၢၤသုတလီၤတဂ့ၤအဂီၢ်လၢကျဲအဘိဘိပယီၤသုးကျိၤ(၃)ဘိဟဲထီၣ်တုၤဝဲလၢသုးကလၢၤပူၤလံတကးဒံးဘၣ် ပယီၤသုးအံၤတၢ်ရဲၣ်တၢ်ကျဲၤအိၣ်လၢကက့ၤထီၣ်ဟံန့ၢ်က့ၤဝဲလ့က့ၣ်သုးကလၢၤလၢအဘၣ်ဟ့ၣ်ဆှူဝဲအံၤအဂ့ၢ်န့ၣ် သ့ၣ်ညါဘၣ်လၢ (KNLA)ပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးလၢဟဲထီၣ်တဖၣ်အံၤအိၣ်ဟဲထီၣ်ဝဲလၢဖၣ်အၣ်ဝ့ၢ်ဆူမၠဲၣ်ကၠံငူၣ်(ခီၣ်တီၣ်)ဝံၤခီဃီၤဝဲဆူဃိၣ်လိၥ်ကျိဝၢ်ခီ ကမၤမိၢ်ဝ့ၢ်တကပၤဒီး ပှၤဟဲထီၣ်သ့ၣ်တဖၣ်အံၤအကျါခီဖျိပၣ်ဃုၥ်ဝဲဒီးသုးဖိသီလၢအဘၣ်တၢ်ထၢန့ၢ်ဆူၣ်သုးဒီး ပှၤသ့ၣ်တဖၣ်အံၤ သ့ၣ်ညါဝဲလၢ ကဘၣ်လဲၤထီၣ်ဆူတၢ်မဲၥ်ညါအဃိ တနီၤန့ၣ်စံၣ်ဖျိးဝဲလၢကျဲပူၤအိၣ်ဝဲအါမးအဂ့ၢ်န့ၣ် (သုးက့ ၇)လီၢ်ကဝီပှၤဘၣ်မူ ဘၣ်ဒါ လၢအိၣ်ဘူးဖဲန့ၣ်တဖၣ်စံးဝဲအသိး သ့ၣ်ညါဘၣ်န့ၣ်လီၤ.
(သုးက့ ၅)ဖၣ်ပူၣ်တၢ်လီၢ်လၢပယီၤသုးကလဲၤထီၣ်ဝဲခဲအံၤန့ၣ် ဟီၣ်ကဝီၤလၢတၢ်ပၢၢ်ဆၢသုးပၥ်ဖှိၣ်ထီၣ်ကဝီၤခးဝဲ န့ၢ်လၢတနံၣ် ဘျဲၣ်ဃၣ်ဃၣ်အံၤလၢတၢ်ဒုးဒီတကတီၢ်အပူၤပယီၤသုးသံဘၣ်ဒိဘၣ်ထံးအါမးလံအဃိလၢကလဲၤထီၣ်မၤအါထီၣ်ဂံၢ်ဘါ အဂီၢ် ပယီၤသုးဟဲထီၣ်ဝဲအဘျီတဖၣ်အဘျီဘၣ်ဆၣ်ထီၣ်ဝဲဆူညါတန့ၢ်အိၣ်ကတၥ်ထီအသးဖဲကမၤမိၢ်ဝ့ၢ်ဃၢၤ၀ါဒူတၢ်လီၢ်အံၤန့ၣ်လီၤ.
ဖၣ်ပူၣ်ဒုးယၤသုးကလၢၤလၢသုးမီၤစိရိၤဂုၥ်ကျဲးစၢးဆှၢထီၣ်ဝဲအသုးနီၣ်ဂံၢ်အံၤ မ့ၢ်သုးကလၢၤလၢအရ့ဒိၣ်လၢသုးမီၤစိရိၤအဂီၢ် ဒီးအိၣ်ဆီလီၤအသးလၢဟီၣ်ကဝီၤ တၢ်ကိပူၤတကးဒံးဘၣ်အကပိၤကပၤဖဲန့ၣ်သုးကလၢၤအဂၤတအိၣ်လၢၤဘၣ်အဃိ သုးကလၢၤအံၤမ့လီၤန့ၣ် တၢ်လီၢ်ဖဲန့ၣ်သုးမီၤစိရိၤနုၥ်လီၤဟူးဂဲၤလ့ၤတက့ၤတညီလၢၤဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ် ဒါစံးဝဲန့ၣ်လီၤ.
တကးဒံးဘၣ်သုးကလၢၤအံၤခီဖျိတၢ်ဒီၣ်တဲၥ်ကွံၥ်ဝဲတၢ်အီၣ်တၢ်အီကျဲခဲလၢၥ်အဃိ ပယီၤသုးလၢအိၣ်သုးကလၢၤအပူၤတဖၣ် ထံၣ်ဘၣ်ဝဲတၢ်ကီတၢ်ခဲလၢတၢ်အီၣ်တၢ်အီတကပၤအဃိ လၢ(Y-8) ကဘီယူၤအံၤတဆီ ဟဲတ့ၢ်လီၤဝဲတၢ်အီၣ်တၢ်အီ, ကျိချံပှၥ် သၣ်ဘိၣ်အိၣ်ဝဲတလီၢ်လီၢ်အသိး ပယီၤသုးခးလီၤကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်လၢသုးကလၢၤ အခိၣ်အဃၢၤ အိၣ်ဝဲတလီၢ်လီၢ်န့ၣ်လီၤ.
(သုးက့ ၅)ဟီၣ်ကဝီၤအပူၤ အဘူးကတၢၢ်ဖဲအပူၤကွံၥ်လါအ့ဖြ့ၣ်တလါအတီၢ်ပူၤန့ၣ်စ့ၢ်ကီး ကဘီတူၢ်သုးကလၢၤ,ကီၢ်သွ့ကၠိဒီး ထၢနဲးကၠိပယီၤသုးကလၢၤလၢအိၣ်လူၤသီကီၢ်ဆၣ်အပူၤအံၤ ဟီၣ်ကဝီၤ(KNLA)သုးပၥ်ဖှိၣ်ထီၣ်မၤန့ၢ်ကွံၥ်ဝဲဒီး လၢတၢ်ထီၣ်သုးကလၢၤ ဘျီဝဲန့ၣ်အပူၤစ့ၢ်ကီးတၢ်မၤန့ၢ်ဝဲကျိချံပှၥ်သၣ်အါအါဂီၢ်ဂီၢ်ဒံးန့ၣ်လီၤ.
