လါမ့ၤ ၁၄ သီ, ၂၀၂၆ နံၣ်, ခ့ၣ်အဲးစံၣ်
လ့ၣ်က့ၣ်သုးကလၢၤလၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤလၢဟီၣ်ကဝီၤ(KNLA)သုးပၥ်ဖှိၣ် ထီၣ်န့ၢ်ဝဲအိၣ်တလါဃၣ်ဃၣ်အံၤန့ၣ် တကီၢ်ခါခဲအံၤပယီၤသုးဟဲက့ၤထီၣ်မၤန့ၢ်ဝဲကဒါဝဲလံအဂ့ၢ်န့ၣ် လီၢ်ကဝီၤကမျၢၢ်စံးဝဲအသိး သုးက့ပှၤဘၣ်မူဘၣ်ဒါပၥ်ဂၢၢ်ပၥ်ကျၢၤစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
လ့က့ၣ်သုးကလၢၤလၢအိၣ်ဆီလီၤအသးဖဲပယၢ်ရီကရူၢ်အပူၤအံၤ တချုးတါလီၤဒံးဘၣ်လါအ့ဖြ့ၣ် ၁၂ သီအနံၤန့ၣ် ဟီၣ်ကဝီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)ဒီးတၢ်ပၢၢ်ဆၢသိၣ်မှံၤလၢအဂၤတဖၣ်ပၥ်ဖှိၣ်ထီၣ်သး ထီၣ်မၤန့ၢ်ဝဲသုးကလၢၤအံၤန့ၣ်လီၤ.
ဘၣ်ဆၣ်တၢ်ထီၣ်န့ၢ်သုးကလၢၤအံၤဝံၤလီၢ်ခံ ဖဲလါမ့ၤ ၁၁ သီအနံၤန့ၣ် ပယီၤသုးလၢအဟဲထီၣ်(စစ်ကူ)တဖၣ်ဟဲက့ၤထီၣ်မၤန့ၢ် ကဒါဝဲလံဒီး ခဲအံၤအိၣ်ဆီလီၤသးလၢလ့က့ၣ်သဝီပူၤအဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“အဟဲက့ၤထီၣ်ကဒါဝဲန့ၢ်လံ.(စစ်ကူ)ဟဲထီၣ်အဘိအါခဲအံၤနုၥ်လီၤဝဲန့ၢ်တဘိလံ.မ့မ့ၢ်လၢသုးကလၢၤပူၤတီတီဒုက့ၤအိၣ်ဝဲတဘူၣ်ဘၣ်,ခီဖျိပပှၤဒိးလီၤဃၥ်မ့ၣ်ပိၢ်အိၣ်အဃိလီၤ.အခဲအံၤအိၣ်ဝဲဖဲလ့က့ၣ်သဝီပူၤန့ၣ်လီၤ.တၢ်ချၢဒုဟးထီၣ်ဝဲတဘူၣ်ဘၣ်,သဝီချၢစ့ၢ်ကီး အိၣ်ဒီးပှၤသုးဖိလီၤ.”အဂ့ၢ်န့ၣ်စံးဝဲန့ၣ်လီၤ.
လ့က့ၣ်သုးကလၢၤလၢပယီၤသုးဟဲက့ၤထီၣ်မၤန့ၢ်ကဒါက့ၤဝဲခဲအံၤန့ၣ် လါအ့ဖြ့ၣ် ၁၂ သီတၢ်ထီၣ်န့ၢ်အီၤဝံၤတကတီၢ်ဃီ တးပီသုး ကလၢၤလၢအိၣ်ဆီလီၤသးဘူးဝဲဒီးသုးကလၢၤအံၤစ့ၢ်ကီး(KNLA)သုးပၥ်ဖှိၣ်ဆဲးထီၣ်ကဝီၤခးဝဲဒီးတၢ်ဒုးကဲထီၣ်ဝဲ ဒိၣ်ဒိၣ် မုၢ်မုၢ်လၢခံခီခံကပၤအဘၢၣ်စၢၤအဃိ ပယီၤသုးတကပၤသံဘၣ်ဒိဘၣ်ထံးဝဲအါမးန့ၣ်လီၤ.
လ့က့ၣ်သုးကလၢၤအံၤ မ့ၢ်သုးကလၢၤတဖျၢၣ်လၢသုးမီၤစိရိၤအခိၣ် မ့အီၣ်လဲၣ် ကဲတ့ၢ်ဘၣ်ဝဲသုးရ့ၣ်ခိၣ်အဃိ မ့သုးကလၢၤ တဖျၢၣ်လၢအရ့ဒိၣ်ဝဲဒၣ်လၢအဝဲသ့ၣ်အဂီၢ်န့ၣ်လီၤ.ဘၣ်ဆၣ်လၢအတၢ်ဟဲထီၣ်ဆ့ၣ်နီၤအိၣ်ဝဲအံၤတမ့ၢ်လၢအိၣ်ဝဲကန့ၢ်ယံၤယံၤထၢထၢဘၣ် အဂ့ၢ်န့ၣ် (KNLA)ခိၣ်နၢ်လၢအိၣ်ဖဲန့ၣ်တဂၤ ပဲၥ်ထံနီၤဖးစံးစ့ၢ်ကီးဝဲန့ၣ်လီၤ.
အဝဲစံးဝဲလၢ
တချုးတၢ်ထီၣ်လ့က့ၣ်သုးကလၢၤန့ၢ်ဒံးဘၣ်အခါဒီးတးပီသုးကလၢၤအံၤသုတလီၤတဂ့ၤအဂီၢ် လၢတၢ်ဆၢကတီၢ်ခံနွံအတီၢ်ပူၤ ပယီၤသုးဒီးဘူးဒးကညီသုးမုၢ်ဒိၣ်(DKBA)သုးပၥ်ဖှိၣ်ဂုၥ်ကျဲးစၢး ဟဲထီၣ်ဝဲလၢကျဲအဘိဘိဒီး ဟဲထီၣ်လၢကျဲဒီ တကတီၢ် အခါ စ့ၢ်ကီးတၢ်ခးလိၥ်သးကဲထီၣ်ဝဲဒီး(KNLA)သုးပၥ်ဖှိၣ် အဘၢၣ်စၢၤ အဃိ သံဘၣ်ဒိဘၣ်ထံးဝဲအါမး အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒီးဖဲတၢ်လဲၤထီၣ်တးပီသုးကလၢၤတၢ်ဒုးဒီတကတီၢ်အပူၤစ့ၢ်ကီး သုးမီၤစိရိၤအံၤသူဝဲကဘီယူၤကဘီယူၤ, ပၤရၤမီၤတၤလ့ၤထံ ဟဲတ့ၢ်လီၤဝဲမ့ၣ်ပိၢ်,ကျိဖးဒိၣ်အိၣ်ဝဲကိးမုၢ်နံၤဒဲးလီၢ်ကဝီၤကမျၢၢ်သံဘၣ်ဒိၣ်ဘၣ်ထံး ဟံၣ်,တၢ်ဘူၣ်တၢ်ဘါ တၢ်သူၣ်ထီၣ် လီၤပှီၢ် ဟးဂီၤအမဲၥ်ညါ ပှၤနီၣ်ဂံၢ် (၂၀၀၀၀)ဃၣ်ဃၣ်ဘၣ်ဃ့ၢ်ထီၣ်ဝဲဒၣ်တုၤလၢခဲအံၤန့ၣ်လီၤ.
ဒ်န့ၣ်အသိးလါမ့ၤ ၁၁ သီပယီၤသုးဟဲက့ၤထီၣ်မၤန့ၢ်ကဒါလ့က့ၣ်သုးကလၢၤဝံၤမုၢ်ဆ့ၣ်ထီၣ်လါမ့ၤ ၁၂ သီ မုၢ်နၤခီ ၁၁း၃၀ မံးနံး အဆၢကတီၢ်န့ၣ်စ့ၢ်ကီးတၢ်ဒုးကဲထီၣ်တအိၣ်လၢ နိၣ်ဘၢၣ်ဘီကရူၢ် မဲးဘီခံသဝီအပူၤ သုးမီၤစရိၤ(Jet Fighter)ကဘီယူၤလဲၤ တ့ၢ်လီၤ ဝဲမ့ၣ်ပိၢ်(၂)ဖျၢၣ်အဃိ ဘၣ်သံဝဲမုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ် ဘီကၠိၣ်လဲၤသဝီဖိ သးစၢ်ပိၥ်မုၣ်(၁၉)နံၣ်လၢ အလဲၤစံၣ်အိၣ်ကဒုသးဖဲန့ၣ်တဂၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
တကးဒံးဘၣ်လၢကဘီယူၤလဲၤခးလီၤတၢ်ဘျီဝဲအံၤစ့ၢ်ကီးနီၢ်ခုၣ်ဂ့ၤဖီ(၄)နံၣ်,စီၤဝ့ဂီၤထူ(၆)နံၣ်,နီၢ်ဒါပူၣ်(၁၉)နံၣ်, စီၤတၢ်ဘံၤ(၃၂)နံၣ်, စီၤစိသါ(၄၂)နံၣ်သ့ၣ်တဖၣ်အံၤ ကျိဖးဒိၣ်အက့အခီဘၣ်အဝဲသ့ၣ်ဘၣ်ဒိဘၣ်ထံးဝဲဒၣ်အသိး ဟံၣ်စ့ၢ်ကီးဟးဂီၤလီၤပှီၢ်ဝဲ(၃)ဖျၢၣ် အဂ့ၢ် န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤလ့က့ၣ်သုးကလၢၤလၢပယီၤသုးဟဲက့ၤထီၣ်မၤကဒါဝဲအံၤဒီးတးပီသုးကလၢၤအခိၣ်အဃၢၤတကပၤန့ၣ် ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢ ပယီၤသုးဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤတုၤလၢခဲအံၤန့ၣ်လီၤ.
လၢန့ၣ်အမဲၥ်ညါတကီၢ်ခါခဲအံၤပယီၤသုးအဂၤ(၅၀)ဃၣ်ဃၣ်လၢအဘၣ်ဒိဘၣ်ထံးအိၣ်လၢတးပီသုးကလၢၤတကပၤန့ၣ်စ့ၢ်ကီး လၢတၢ်ကက့ၤလီၤဆှၢကူစါယါဘျါအဝဲသ့ၣ်ဆူဝ့ၢ်ပူၤအဂီၢ်ခီဖျိ တၢ်ခိးခးအဝဲသ့ၣ်လၢကျဲအဃိ ထံၣ်ဘၣ်ဝဲတၢ်ကီတၢ်ခဲဒီး အိၣ်ကတၥ်ထီအသးဖဲန့ၣ်အိၣ်လၢခံနွံဃၣ်ဃၣ်လံအဂ့ၢ်န့ၣ် (KNLA)ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
