လါမ့ၤ ၁၈ သီ, ၂၀၂၆ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ပူၤ ပယီၤသုးလၢနုၥ်လီၤအိၣ်လ့က့ၣ်သဝီပူၤအံၤတဖၣ်မၢကမျၢၢ်လၢကဟဲက့ၤအိၣ် လၢဟံၣ်ဘၣ်ဆၣ် ဒူသဝီအခိၣ်အဃၢၤန့ၣ်ခီဖျိဒုးယၤတၢ်ဖ့ၣ်စၢဆဲးကဲထီၣ်ဒံးအဃိ ကမျၢၢ်တဖၣ်က့ၤဝဲတဘူၣ်ဒံး ဘၣ် အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲဒၣ် န့ၣ်လီၤ.
လ့က့ၣ်သုးကလၢၤလၢဟီၣ်ကဝီၤ(KNLA)သုးပၥ်ဖှိၣ်ထီၣ်မၤန့ၢ်တ့ၢ်ဝဲဖဲအပူၤကွံၥ်လါအ့ဖြ့ၣ် ၁၂ သီအခါအံၤတၢ်ဆၢကတီၢ်တလါ ဃၣ်ဃၣ်ဝံၤဖဲတလါအံၤလါမ့ၤ ၁၁ သီအနံၤန့ၣ် ပယီၤသုးဟဲက့ၤထီၣ်မၤန့ၢ်ကဒါဝဲဘၣ်ဆၣ် သုးကလၢၤအခိၣ်အဃၢၤခီဖျိတၢ်ဒိးလီၤ ဃၥ်ဝဲ မ့ၣ်ပိၢ်အဃိ ပယီၤသုးသ့ၣ်တဖၣ်အံၤက့ၤနုၥ်လီၤအိၣ်လၢသုးကလၢၤပူၤတဘူၣ်,နုၥ်လီၤအိၣ်ဆိးဝဲလၢသဝီပူၤန့ၣ်လီၤ.
တကီၢ်ခါခဲအံၤပယီၤသုးလၢအိၣ်သဝီပူၤသ့ၣ်တဖၣ် မၢဝဲသီခါဒီးကမျၢၢ်လၢအဃ့ၢ်ထီၣ်တဖၣ်အံၤ ကဟဲက့ၤအိၣ်လၢသဝီပူၤဒီး တုၤလၢခဲအံၤပယီၤသုးအိၣ်ဆီလီၤသးဒံးလၢသဝီပူၤ,တၢ်ဘံတၢ်ဘၢစ့ၢ်ကီးတအိၣ်ဒံးဝဲဘၣ်အဃိ ကမျၢၢ်လၢအဃ့ၢ်ထီၣ်တဖၣ် က့ၤအိၣ်ဝဲတအိၣ်ဒံးဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဝဲန့ၣ်လီၤ.
အဝဲစံးဝဲလၢ“ခဲအံၤပသ့ၣ်ညါဘၣ်လၢပယီၤသုးန့ၢ်မၢဝဲဒၣ်သီခါဟဲက့ၤအိၣ်လၢဖၠၣ်ဒီးဒူဖိသဝီဖိဟဲက့ၤအိၣ်လၢဟံၣ်မီၤ.ဘၣ်ဆၣ်ခဲအံၤတၢ်ဘံၣ်တၢ်ဘၢတအိၣ်ဒံးဘၣ်အဃိကမျၢၢ်ဒုဟဲက့ၤအိၣ်လၢအဟံၣ်အဃီတအိၣ်ဒံးဘၣ်.သီခါစ့ၢ်ကီးဟဲက့ၤတဘူၣ်ဘၣ်.ပှၤသဝီဖိကက့ၤအိၣ်အဂီၢ်ခီဖျိပယီၤသုးအိၣ်ဆီလီၤသးလၢဒူသဝီပူၤဒီးကမျၢၢ်ဘၣ်ယိၣ်ဝဲလၢတၢ်ဒုးမ့ကဲထီၣ်န့ၣ်တၢ်ဘၣ်ဒိဘၣ်ထံးကအိၣ်အဃိပတနၢ်ဟူပှၤသဝီဖိက့ၤအိၣ်နီဂၤဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဟါအံၤန့ၣ်လီၤ.
ဒ်လီၢ်ကဝီၤကမျၢၢ်လၢဘူးဒီး(KNLA)တဖၣ်စံးဝဲအသိးန့ၣ် ပယီၤသုးလၢနုၥ်လီၤအိၣ်လ့က့ၣ်သဝီပူၤသ့ၣ်တဖၣ်အံၤ ခီဖျိဟီၣ်ကဝီၤ (KNLA) လဲၤခးစဲးပြဲးအဝဲသ့ၣ်တလီၢ်လီၢ်အဃိ ဒ်သိးတၢ်ဟဲခးအဝဲသ့ၣ်သုတသ့တဂ့ၤအဂီၢ် လၢတၢ်ဒီသဒၢလီၤက့ၤသးအဂီၢ် ကိးက့ၤကမျၢၢ်လၢကဟဲက့ၤအိၣ်လၢသဝီပူၤဒီးကသူအီၣ်ဝဲပှၤကမျၢၢ်ဒ်တၢ်ဒီသဒၢတခါအသိးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိလၢဘူးဒီးသဝီဖိလၢအဃ့ၢ်ထီၣ်တဂၤစ့ၢ်ကီးစံးဝဲလၢ“ပယီၤသုးန့ၣ်ပှၤမ့တအိၣ်နီတဂၤဘၣ်န့ၣ်မၢပှၤဒ်န့ၣ်လီၤ.ပၥ်ကဲပှၤကမျၢၢ်ဒ်(ကၤဘၤ)တၢ်ဒီသဒၢတခါအသိးမီၤ.ဘၣ်ဖဲပှၤမၤတၢ်ဆၢကတီၢ်ဒုပှၤက့ၤအိၣ်ဘူးဝဲလဲၣ်. အဝဲသ့ၣ်အိၣ်ဝဲတဘူၣ်ဘၣ်အဃိကိးမၢပှၤသဝီဖိဟဲက့ၤအိၣ်ဒ်န့ၣ်လီၤ.ပှၤမ့ဟဲက့ၤအိၣ်န့ၣ်ပှၤမ့ဟဲခးတၢ်န့ၣ်ကဘၣ်ဒၣ်ဝဲလၢကမျၢၢ်ဒ်န့ၣ်လီၤ.လၢအဂၤဒုတအိၣ်ဘၣ်ခဲအံၤနါက့သဝီပူၤန့ၣ်ပှၤဟံၣ်ပှၤဃီလီၤပှီၢ်အူအီၣ်ဟးဂီၤအိၣ်ဒီဒူၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
လ့က့ၣ်သဝီလၢတၢ်ဒုးဆဲးကဲထီၣ်ဝဲတုၤလၢခဲအံၤန့ၣ် ဖဲမဟါလါမ့ၤ ၁၇ သီအနံၤန့ၣ်စ့ၢ်ကီး သုးမီၤစိရိၤ (Jet fighter)ကဘီယူၤ ဟဲတ့ၢ်လီၤန့ၢ်ဝဲတၢ်ဘိၣ်တဖၣ်အဂ့ၢ်န့ၣ် ပှၤလၢဘူးဒီး(KNLA)တဖၣ် စံးဝဲန့ၣ် လီၤ.
တကးဒံးဘၣ်ပယီၤသုးလၢဘၣ်ဒိဘၣ်ထံးလၢတးပီသုးကလၢၤတၢ်ဒုးအပူၤတဖၣ်စ့ၢ်ကီးလၢကက့ၤကူစါယါဘျါအသးဆူဝ့ၢ်ပူၤအဂီၢ်တုၤလၢခဲအံၤ တၢ်က့ၤလီၤဆှၢဝဲတဘူၣ်အိၣ်ကတးထီသးဖဲတးပီသုးကလၢၤအခိၣ်အဃၢၤဖဲန့ၣ်တုၤလၢခဲအံၤအဂ့ၢ်န့ၣ် သ့ၣ်ညါဘၣ် လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
လ့က့ၣ်သဝီဃုၥ်ဒီးဒူသဝီကမျၢၢ်လၢအိၣ်ဘူးဖဲန့ၣ်တဖၣ်စးထီၣ်ဖဲအပူၤကွံၥ်လါအ့ဖြ့ၣ်ထီၣ် ၁ သီအခါန့ၣ် ခီဖျိလၢတၢ်ထီၣ် သုးကလၢၤတၢ်ဒုးကဲထီၣ်ဒီးကဘီယူၤဟဲတ့ၢ်လီၤမ့ၣ်ပိၢ်,ခးလီၤကျိဖးဒိၣ်ကိးမုၢ်နံၤဒဲးအဃိ လီၢ်ကဝီၤကမျၢၢ်(၂၀,၀၀၀)ဃၣ်ဃၣ် ဃ့ၢ်ထီၣ်တၢ်ဆၢကတီၢ်အိၣ်တလါဘျဲၣ်လံန့ၣ်လီၤ.
တကီၢ်ခါခဲအံၤလီၢ်ကဝီၤကမျၢၢ်လၢအဃ့ၢ်ထီၣ်တဖၣ်လဲၤအိၣ်ဝဲလၢကစၢၢ်ခိၣ်ကလိကျါ,ပှၢ်ပူၤ,ပှၤဒူပှၤသဝီလၢအယံၤဒီးတၢ်ဘၣ် ယိၣ်အလီၢ်တဖၣ်ဒီး ခဲအံၤခီဖျိတၢ်ဒုးစဲးပြဲးဆဲးကဲထီၣ်အဃိ ကက့ၤအိၣ်လၢအဒူသဝီအဟံၣ်အဃီအဂီၢ်တၢ်ဘံၣ်တၢ်ဘၢတအိၣ်ဒံး ဘၣ်အဃိလၢခါဆူညါကတီၢ်ယံၤအဂီၢ်လိၣ်ဘၣ်ဝဲအိၣ်ဆိးလီၢ်ကျဲ,ဂံၢ်ခီၣ်ထံးတၢ်အီၣ်တၢ်အီ,ကသံၣ်ကသီတၢ်ဆီၣ်ထွဲမၤစၢၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒ်န့ၣ်အသိးဆၢကတီၢ်ခဲအံၤတုၤဃီၤဝဲဒၣ်လၢတၢ်စူၤခါပှၤကဘၣ်ဖံးအီၣ်မၤအီၣ်က့ၤလံတကးဒံးဘၣ်တၢ်ဆၢကတီၢ်စ့ၢ်ကီးတုၤဃီၤဝဲလၢကၠိကထီၣ်လံအဃိ လီၢ်ကဝီၤကမျၢၢ်ဃုၥ်ဒီးဖိဒံဖိသၣ်,ပှၤကၠိဖိလၢဘၣ်ထီၣ်ကၠိသ့ၣ်တဖၣ် သဂၢၢ်ဘၣ်ဝဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
