လၢကထီၣ်ဆူဖၣ်ပူၣ်အဂီၢ်ပယီၤသုးကျိၤဟဲထီၣ်တုၤလၢမီလိၥ်ကျိ,တၢ်ဒုးအပူၤသံဘၣ်ဒိဘၣ်ထံးဒီးတၢ်မၤန့ၢ်ဝဲစုကဝဲၤအိၣ်

လါမ့ၤ ၁၉ သီ, ၂၀၂၆ နံၣ်, ခ့ၣ်အဲးစံၣ်

လၢကလဲၤထီၣ်ဝဲဆူခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ကမၤမိၢ်ဒီးဖၣ်ပူၣ်ဝ့ၢ်အံၤအဂီၢ် ပယီၤသုးဂံၢ်ဘါ အဂၤ (၂၀၀၀)ဃၣ်ဃၣ် လၢအဟဲထီၣ်တဖၣ်အံၤ ဟဲထီၣ်တုၤဝဲလၢမီလိၥ်ကျိတကပၤလံဒီး ခီဖျိဟီၣ်ကဝီၤ(KNLA)ခိးခးအဝဲသ့ၣ်လၢ တၢ်ဒ့ၣ်စၢၤတၢ်ဒုး ကဲထီၣ် အဃိ ပယီၤသုးသံတၢ်ဘၣ်ဒိဘၣ်ထံးအိၣ်ဝဲအသိးတၢ်မၤန့ၢ်ဃုၥ်ဝဲစုကဝဲၤပီးလီအိၣ်ဝဲတနီၤအဂ့ၢ်န့ၣ် ပှၤလၢဘူးဒီးဟီၣ်ကဝီၤ တၢ်ပၢၢ်ဆၢသုးကရူၢ်တကပၤစံးဝဲအသိး သ့ၣ်ညါဘၣ်န့ၣ်လီၤ.

လၢမၠဲၣ်ကၠံငူၣ်(ခီၣ်တီၣ်)အံၤတဆီအပူၤကွံၥ်လါမ့ၤထီၣ် ၅ သီဒီး ၆ သီအနံၤ ပယီၤသုး(စစ်ကူ)တဖၣ်အံၤဟဲတုၤဝဲလၢကမၤမိၢ်ဝံၤ ဆဲးလဲၤထီၣ်ဝဲဆူ ၀ါဒူ,သါအီၣ်ပျ့ၣ်,မဲၤကၠံၣ်ခံဒီးလၢၢ်ကွဲသဝီတကပၤဒီးဒ်သိးကဆဲးလဲၤထီၣ်ဆူညါကန့ၢ်အဂီၢ်ပယီၤသုးသူဝဲကျိဖးဒိၣ်, ဒြိ,ကဘီယူၤမၤဆှဲဝဲကျဲဒီးခဲအံၤထီၣ်တုၤဝဲဒၣ်ဖဲမီလိၥ်ကျိ,န့ၢ်ကးသဝီဒီးတၢ်ဒုးဆဲးကဲထီၣ်ဝဲလၢခံခီခံကပၤအဘၢၣ်စၢၤကိးမုၢ်နံၤဒဲဒီးန့ၣ်လီၤ.

စးထီၣ်လၢပယီၤသုးဟဲထီၣ်ခံခီခံကပၤတၢ်ဘၣ်သဂၢၢ်ခးလိၥ်သးကဲထီၣ်န့ၢ်ဝဲခံနွံဃၣ်ဃၣ်အတီၢ်ပူၤအံၤန့ၣ် ပယီၤသုးတကပၤ သံဘၣ်ဒိဘၣ်ထံးအိၣ် တကးဒံးဘၣ်တၢ်မၤန့ၢ်ဃုၥ်ဝဲစုကဝဲၤကျိချံပှၥ်သၣ်ပီးလီအိၣ်ဝဲအဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢသုးကရူၢ် တဖၣ် စံးဝဲအိၣ်န့ၣ်လီၤ.

ဘၣ်ဆၣ်ဘၣ်ဃးတၢ်ဂ့ၢ်အံၤ ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲ မုၢ်တြီၢ်ကီၢ်ရ့ၣ် ပှၤကတိၤတၢ်ပၢ ပဒိၣ်စီၤရီဘ့ၤမူ အံၤအခါ စံးဝဲလၢ “ပယီၤသုးကျိၤအံၤဟဲထီၣ်တုၤလံလၢမီလိၥ်ကျိ,န့ၢ်ကးသဝီတကပၤန့ၣ်လံ.အဝဲသ့ၣ်စူးကါဝဲပှၤနီၣ်ဂံၢ်အါဒီး ဒုးကဲထီၣ်ဝဲဒၣ်သုးကျိၤခံဘိသၢဘိလၢမုၢ်နုၥ်မုၢ်ထီၣ်အဃိတၢ်ဘၣ်ဂံၥ်ဂူၥ်ဒုဆူၣ်န့ၢ်ပတဲသ့လီၤ.မ့မ့ၢ်လၢပယီၤတကပၤဒုတၢ်ဘၣ်ဒိဘၣ်ထံးဒုအိၣ်လီၤ. မ့ၢ်မ့ၢ်အဘၣ်ဒိဘၣ်ထံးအနီၣ်ဂံၢ်ခီန့ၣ်တဒိးန့ၢ်ဘၣ်တၢ်ဂ့ၢ်တၢ်ကျိၤဒံးဘၣ်အဃိတဲတသ့ဒံးဘၣ်.ဒ်န့ၣ်အသိး တၢ်မၤန့ၢ်ဝဲ တၢ်စုကဝဲၤတၢ်ပီးတၢ်လီထဲလဲၣ်ခီန့ၣ်ပတဒိးန့ၢ်ဘၣ်အဃိပတဲတဘၣ်ဒံးဘၣ်”အဂ့ၢ်န့ၣ် စံးဝဲန့ၣ်လီၤ.

ဖၣ်ပူၣ်ဒုးယၤသုးကလၢၤလၢ(KNLA)သုးပၥ်ဖှိၣ်ထီၣ်ကဝီၤခးဝဲတၢ်ဆၢကတီၢ်န့ၢ်(၂)နံၣ်ဃၣ်ဃၣ်အံၤန့ၣ် ခီဖျိတၢ်သံတၢ်ဘၣ်ထံး အိၣ်ပှၤနီၣ်ဂံၢ်လီၤစှၤအဃိ လၢကဟဲထီၣ်မၤစၢၤဝဲအဂီၢ်ပယီၤသုးကျိၤလၢဟဲထီၣ်တဖၣ်စ့ၢ်ကီးသဂၢၢ်ဘၣ်ဝဲဒီးတၢ်သံတၢ်ပှၢ်တၢ်ဘၣ် ဒိဘၣ်ထံးဒီတကတီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးတကီၢ်ခါခဲအံၤပယီၤသုးကျိၤလၢအဟဲထီၣ်တုၤဖဲမီလိၥ်ကျိအခိၣ်အဃၢၤအံၤသ့ၣ်တဖၣ်စ့ၢ်ကီး ဒွဲၣ်အူအီၣ်ကွံၥ်ဝဲ ပှၤကမျၢၢ်အဟံၣ်အဃီတဖၣ်ဒီး တကးဒံးဘၣ်လၢန့ၣ်အမဲၥ်ညါခီဖျိလၢတၢ်ဒုးတၢ်ယၤကဲထီၣ်ဒီးကဘီယူၤလဲၤခးလီၤတၢ်အဃိ မီလိၥ်ကျိဃုၥ်ဒီးဒူသဝီလၢအိၣ်ဘူးကမျၢၢ်ပှၤနီၣ်ဂံၢ်လၢအကထိဘၣ်ပၥ်တ့ၢ်အဒူအသဝီဘၣ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢ လီၢ်အသိးတနီၤန့ၣ်လဲၤစံၣ်ထီၣ်အိၣ်ဝဲလၢထံဆၢကီၢ်ဆၢစ့ၢ်ကီးအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

လီၢ်ကဝီၤကမျၢၢ်လၢဘူးဒီးပှၤဃ့ၢ်တၢ်ဒုးဖိတဂၤစံးဝဲလၢ“ခဲအံၤလၢန့ၣ်တကပၤန့ၣ်ပယီၤသုးဟဲထီၣ်အဃိပှၤကမျၢၢ်စံၣ်ထီၣ်လၢၤလံပှၤအိၣ်တဘူၣ်လၢၤဘၣ်.ဒ်သိးပသဝီန့ၣ်ပယီၤသုးမၢပှၤအိၣ်လၢသဝီပူၤ,ပှၤစံၣ်ထီၣ်န့ၣ်အဝဲသ့ၣ်တအဲၣ်ဝဲဘၣ်.တဲဝဲဒၣ်ပှၤမ့ၢ်စံၣ်ထီၣ်န့ၣ်အကဒွဲၣ်အူအီၣ်ပှၤဟံၣ်.ခဲအံၤယဆိမိၣ်အဒွဲၣ်အူအီၣ်ဝဲလံဧါတသ့ၣ်ညါလၢၤဘၣ်.ပှၤဟဲခးလီၤတၢ်တလီၢ်လီၢ်ဘျီပှၤသဝီဖိန့ၣ်အိၣ်တဘူၣ်လၢၤဘၣ်.ခဲအံၤပနၢ်ဟူလၢလၢၢ်ကွဲသဝီတကပၤန့ၣ်ပယီၤသုးဒွဲၣ်အူအီၣ်ပှၤဟံၣ်.ပဆဲးကျိးပှၤတန့ၢ်လၢၤဘၣ်.” အဂ့ၢ် န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

တကီၢ်ခါခဲအံၤဟီၣ်ကဝီၤတၢ်လီၢ်လၢပယီၤသုးဟဲအိၣ်ဆီလီၤသးအခိၣ်အဃၢၤတဖၣ်အံၤခီဖျိလၢကဘီယူၤဟဲခးလီၤတၢ်ကိးနံၤဒဲးဃၣ်ဃၣ်အဃိ ကမျၢၢ်ဟံၣ်တၢ်သူၣ်ထီၣ်အမဲၥ်ညါကၠိဃုၥ်ဒီးသီခါဖၠၣ်တၢ်သူၣ်ထီၣ်ဟးဂီၤဒၣ်အါမးဘၣ်ဆၣ်ဟီၣ်ကဝီၤပူၤဖဲန့ၣ် ခီဖျိပယီၤသုးဟူးဂဲၤဒံးဝဲအဃိ ဘၣ်ဃးတၢ်ဟးဂူၥ်ဟးဂီၤအနီၣ်ဂံၢ်နီၣ်ဒွးတၢ်အိၣ်သးအံၤတၢ်မၤလီၤတံၢ်ဝဲတန့ၢ်ဒံးဘၣ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.