လါယူၤ ၂၃ သီ, ၂၀၂၆ နံၣ်, ခ့ၣ်အဲးစံၣ်
လ့က့ၣ်သုးကလၢၤလၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤအံၤ ပယီၤသုးဟဲက့ၤထီၣ်မၤန့ၢ်ကဒါ ဝဲ ဝံၤလီၢ်ခံ နုၥ်လီၤအိၣ်ဆိးလၢသဝီပူၤဒီးခဲအံၤလၢကတ့ထီၣ်သုးကလၢၤလၢအသီအဂီၢ်စးထီၣ်ခူၣ်ဝဲ တၢ်ဆဲးကျိးအကျိၤ (ဆက်သွယ်ရေးမြောင်း) အဃိ ကမျၢၢ် တဖၣ်က့ၤဟံၣ်က့ၤဃီက့ၤဖံးအီၣ်မၤအီၣ်တၢ်တဘူၣ်ဒီးတုၤခဲအံၤကၠိစ့ၢ်ကီး တၢ်အိးထီၣ် ဝဲတဘူၣ်တၢ်ပံးဃၥ်ဝဲအဖၢမုၢ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
လ့က့ၣ်သုးကလၢၤလၢတၢ်ပၢၢ်ဆၢသုးကရူၢ်ထီၣ်မၤန့ၢ်ဝဲဖဲလါအ့ဖြ့ၣ်အခါအံၤဖဲအပူၤကွံၥ်လါမ့ၤ ၁၂ သီအနံၤ ပယီၤသုးဟဲက့ၤ ထီၣ်မၤန့ၢ်ကဒါဝဲဝံၤလီၢ်ခံ ခီဖျိသုးကလၢၤလီၢ်လံၤန့ၣ်တၢ်မၤဟးဂီၤတ့ၢ်ဝဲခဲလၢၥ်အဃိ အဝဲသ့ၣ်အံၤနုၥ်လီၤအိၣ်ဆိးလၢသဝီပူၤ ကမျၢၢ်အဟံၣ်အဃီတၢ်ဆၢကတီၢ်ထီၣ်ဘးဝဲ (၁)လါဘျဲၣ် လံန့ၣ်လီၤ.
တကီၢ်ခါခဲအံၤ လၢလ့က့ၣ်သဝီဟးထီၣ် သဝီဃၢၤတၢ်သွၣ်ခိၣ်ကလဲၤဆူဃီဖိပျဲၢ်သဝီတကပၤအံၤ ပယီၤသုးတၢ်ရဲၣ်တၢ်ကျဲၤ အိၣ်လၢကတ့ထီၣ်သုးကလၢၤလၢအသီဒီး ခဲအံၤစးထီၣ်ခူၣ်ဝဲတၢ်ဆဲးကျိးအကျိၤ(ဆက်သွယ်ရေးမြောင်း)လံအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဝဲန့ၣ်လီၤ.
“ခဲအံၤလၢသဝီကတီၢ်န့ၣ်အဝဲသ့ၣ်ခူၣ်လီၤ(ဆက်သွယ်ရေး)ကျိၤလဲးလိးလီၤ.မ့ၢ်အကတ့ထီၣ်အလီၢ်အကျဲဧါတသ့ၣ်ညါဘၣ်. ခူၣ်လီၤ ဝဲလၢလ့က့ၣ်သဝီဟးထီၣ်လၢဃီဖိပျဲၢ်သဝီတကပၤန့ၣ်. အတ့ထီၣ်ဝဲန့ၣ်အကိးမၢပှၤသဝီဖိတအိၣ်ဘၣ်.မ့မ့ၢ်လ့က့ၣ်ဒီး တးပီသဝီ လၥ်ခီဒုပှၤက့ၤအိၣ်တဘူၣ်နီတဂၤ ဒံးဘၣ်.တၢ်မၢၤမ့မ့ၢ်သဝီလၢအဂၤဒုက့ၤအိၣ်အိၣ် တနီၤမီၤ.ဘၣ်ဆၣ်အဝဲသ့ၣ် လဲၤကိးမၢဝဲ တဘူၣ်ဘၣ်.ပယီၤသုးန့ၣ်ကဟးထီၣ်ကိးမၢပှၤသဝီဖိလၢအဂၤစ့ၢ်ကီးဟးထီၣ်လၢတၢ်ချၢ တဘူၣ်ဘၣ်.မ့ဟးထီၣ်န့ၣ်ပှၤခးအီၤအဃိ ဟးထီၣ်တဘူၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးစးထီၣ်လၢပယီၤသုးနုၥ်လီၤအိၣ်ဆိးလၢသဝီပူၤတုၤလၢခဲအံၤ ဘၣ်တၢ်လဲၤခးစဲးပြဲးအီၤကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA) သုးပၥ်ဖှိၣ်အိၣ်ဝဲတလီၢ်လီၢ်ဘၣ်ဆၣ် ပယီၤသုးအံၤဆဲးခူၣ်ဝဲ(ဆက်သွယ်ရေးမြောင်း)အဖၢမုၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်တးပီသုးကလၢၤလၢအိၣ်ဘူးလ့က့ၣ်လၢဘၣ်တၢ်ထီၣ်ကဝီၤခးတ့ၢ်အီၤအံၤစ့ၢ်ကီး ဖဲတၢ်ဒုးကဲထီၣ်အခါခီဖျိပယီၤသုး နုၥ်လီၤဒွဲၣ်အူအီၣ်ကမျၢၢ်ကဟံၣ်အဃီအိၣ်အဃိ သဝီဖိတဖၣ်က့ၤဟံၣ်က့ၤဃီဃ့ၢ်ထီၣ်စ့ၢ်ကီးဝဲသဝီဒီတဖျၢၣ်တုၤလၢခဲအံၤတၢ်ဆၢ ကတီၢ်ထီၣ်ဘးဝဲလၢ(၂)လါဘျဲၣ်လံန့ၣ်လီၤ.
ဒ်န့ၣ်အသိးတုၤလၢခဲအံၤပယီၤသုးလၢအိၣ်တးပီသုးကလၢၤပူၤတဖၣ်အံၤလၢသုးကလၢၤပူၤအမဲၥ်ညါအဝဲသ့ၣ်ရၤလီၤအသးနုၥ်လီၤအိၣ်ဝဲလၢသဝီပူၤကမျၢၢ်အဟံၣ်အဃီစ့ၢ်ကီးအိၣ်ဝဲအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
လၢတၢ်န့ၣ်အဃိခီဖျိပယီၤသုးအံၤနုၥ်လီၤအိၣ်ဆိးရၤလီၤအသုးလၢသဝီ(၂)ဖျၢၣ်အံၤအပူၤအဃိ တုၤလၢခဲအံၤလ့က့ၣ်,မူဒ့သဝီဒီး တးပီသဝီ သဝီ(၃)ဖျၢၣ် ကမျၢၢ်တဖၣ်လဲၤဖံးလဲၤမၤတၢ်တဘူၣ်လၢၤဘၣ်အသိး ကၠိစ့ၢ်ကီးခီဖျိ တၢ်အိၣ်အိးထီၣ်ဝဲတဘူၣ်ဒံးဘၣ် အဖီခိၣ် ပှၤကၠိဖိလၢအဃ့ၢ်ထီၣ်တဖၣ်တနံၣ်အံၤ ဘၣ်လဲၤထီၣ်က့ၤကၠိလၢသဝီလၢအဂၤအဂ့ၢ်န့ၣ် ပဒိၣ်စီၤအ့နဲၤ စံးအါထီၣ်ဝဲန့ၣ်လီၤ.
“ခဲအံၤတးပီ,လ့က့ၣ်ကမျၢၢ်တဖၣ်န့ၣ်က့ၤအီၣ်မုၢ်မၤအီၣ်ဝဲၤတဘူၣ်နီဂၤဒံးဘၣ်.မ့မ့ၢ်လၢပှၤကၠိဖိတဖၣ်န့ၣ် တနီၤန့ၣ်အမိ အပၢ်လဲၤဃ့ၢ်ပလဲၥ်သးလၢပှၤဒူပှၤသဝီအဃိ ပျဲထီၣ်လိၤအဖိကၠိဖဲန့ၣ်လီၤ. မ့မ့ၢ်လၢတၢ် ကရဲၣ်ကျဲၤလၢကဒုးအိၣ်ထီၣ်န့ၢ်ကၠိလၢ အဝဲသ့ၣ် ဂီၢ်လီၤလီၤဆီဆီဒုတအိၣ်ဘၣ်.တၢ်မၢၤပှၤကၠိဖိလၢအဘၣ်ကၠိတဖၣ်န့ၣ် လဲၤထီၣ်ဝဲလၢ ပှၤဒူပှၤသဝီန့ၣ် မ့မ့ၢ်အမိအပါတဖၣ်ခီဒု ဟးဃ့ၢ်အိၣ်လၢတၢ်ချၢန့ၣ်လီၤ”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးသဝီ(၃)ဖျၢၣ်အံၤကမျၢၢ်တဖၣ်လၢကဖံးအီၣ်မၤအီၣ်တၢ်အဂီၢ်သဂၢၢ်ဘၣ်ဝဲတၢ်ကီတၢ်ခဲတကးဒံးဘၣ် ဒူသဝီကမျၢၢ် အဂၤလၢအိၣ်တယံၤတဘူးဒီးပယီၤသုးကလၢၤတဖၣ်အံၤစ့ၢ်ကီး လဲၤက့ၤဖံးမၤတၢ်မ့ဘူၣ်ဘၣ်ဆၣ် ဘၣ်လဲၤက့ၤမၤဝဲလၢ တၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
