လါယူၤ ၂၃ သီ, ၂၀၂၆ နံၣ်, ခ့ၣ်အဲးစံၣ်
ဖဲလါယူၤ ၁၅ သီ တုၤ ၁၇ သီ လၢသၢသီအတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုတီၤဖီလၥ် တၢ်ဟ့ၣ်တၢ်သ့ၣ် ညါဒီးရိၣ်ဖှိၣ်သူၣ်ထီၣ်ဆီလီၤတၢ်မၤကမံးတံၥ်(EIWC)တီခိၣ်ရိၣ်မဲ မၤဝဲတၢ်ထံၣ်လိၥ်တၢၣ်ပီၣ်တဲသကိးတၢ်ဒီး ကညီပှၤတဝၢ ဂံၢ်ခီၣ်ထံးတၢ်ကရၢကရိ(KCBOs/KCSOs)အဂ့ၢ်န့ၣ် လီၢ်ခၢၣ်သးထုးထီၣ်ပၥ်ဖျါဝဲဖဲတနံၤအံၤအသိးသ့ၣ်ညါဘၣ်န့ၣ်လီၤ.
ဒီးလၢတၢ်ထံၣ်လိၥ်တၢၣ်ပီၣ်တဲသကိးတၢ်အိၣ်ဖှိၣ်ဘျီဝဲအံၤအပူၤန့ၣ် ပှၤတဝၢဂံၢ်ခီၣ်ထံးတၢ်ကရၢကရိ (၂၆)ဒူၣ် အခၢၣ်စး (၈၁)ဂၤ ဟဲထီၣ်ဝဲဒၣ်န့ၣ်လီၤ.
လၢတၢ်အိၣ်ဖှိၣ်ဘျီဝဲအံၤအပူၤ တၢ်တၢၣ်ပီၣ်တဲသကိးဝဲဘၣ်ဃးတကီၢ်ခါထံရူၢ်ကီၢ်သဲးတၢ်အိၣ်သး, ခ့ၣ်အဲၣ်ယူၣ် ထံရူၢ်ကီၢ်သဲး အတၢ်အိၣ်ဆၢထၢၣ်ဒီးတၢ်မၤရဲၣ်ကျဲၤ, တၢ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်တၢ်မၤကျဲဃုၥ်ဒီး ထံရူၢ်ကီၢ်သဲး အတၢ်လဲၤကျဲတၢ်ဂ့ၢ်သ့ၣ်တဖၣ်အံၤ တၢ်တၢၣ်ပီၣ်တဲသကိးဝဲန့ၣ်လီၤ.
လၢန့ၣ်အမဲၥ်ညါတၢ်သူၣ်ထီၣ်ဖဲၣ်ဒရၢၣ်ယူးနံး(Federal Unit)ကအိၣ်ထီၣ်အဂီၢ်, တၢ်ပၢၢ်ဆၢကတီၢ်ကီၢ်သူလ့ၤလံၥ်ဃံးဃၥ် အဂ့ၢ်, တၢ်ပၢၢ်ဆၢကတီၢ်ကီၢ်သူလ့ၤပှၤကူၣ်လိၥ်ကီၣ်ကးဒီးကီၢ်သူလ့ၤတၢ်ပၢတၢ်ြပးကီၣ်ကးအဂ့ၢ်, ကီၢ်သူလ့ၤ တၢ်သူၣ်ထီၣ် တၢ်ဘျၢသဲးစး ခိၣ်သ့ၣ်(ပတြီၥ်-၃ လၢတၢ်ဆှၢနုၥ်တ့ၢ်အီၤ)တၢ်ဂ့ၢ်သ့ၣ်တဖၣ်အံၤစ့ၢ်ကီးပှၤဘၣ်မူဘၣ်ဒါ ဘၣ်ထွဲ တဖၣ်ပၥ်ဖျါ ထီၣ်ဝဲဝံၤ တၢ်ဟံန့ၢ်ဝဲတၢ်ဟ့ၣ်ကူၣ်ဟ့ၣ်ဖးသ့ၣ်တဖၣ်အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ဒ်န့ၣ်အသိးလၢတၢ်ထံၣ်လိၥ်တၢၣ်ပီၣ်တဲသကိးဘျီဝဲအံၤအပူၤန့ၣ် တၢ်တၢၣ်ပီၣ်တဲသကိးဝဲ ကညီထံရူၢ်ကီၢ်သဲးတၢ်အိၣ်သး, ပှၤဂ့ၢ်ဝီ,တၢ်ဘူၣ်တၢ်ဘါဂ့ၢ်ဝီဒီး ကလုၥ်ဒူၣ်အဂၤတဖၣ်အဘၢစၢၤဒ်သိးတၢ်နၢ်ပၢၢ်လိၥ်သးကအါထီၣ်အဂီၢ်ဒီး တၢ်သူၣ်ထီၣ်ထံကီၢ် (National Building) ဂ့ၢ်ဝီအပူၤတၢ်မၤဖှိၣ်မၤသကိးတၢ်အဂ့ၢ်ကဆူၣ်ထီၣ်တၢ်ဂ့ၢ်သ့ၣ်တဖၣ်အံၤ တၢ်တဲသကိးဃုၥ်ဝဲစ့ၢ်ကီး န့ၣ် လီၤ.
လၢတၢ်န့ၣ်အဃိဒ်သိးကညီတၢ်ကရၢကရိအတၢ်ပၥ်ဖှိၣ်မၤသကိးတၢ်အဂံၢ်ကဆူၣ်ထီၣ်အဂီၢ် ဒီးထံဂူၢ်ကီၢ်သဲးတၢ်ဖံးတၢ်မၤပူၤ လၢထံရူၢ်ကီၢ်သဲးဂ့ၢ်ဝီ, တၢ်ပၢတၢ်ြပးဂ့ၢ်ဝီ,တၢ်ကရၢကရိဂ့ၢ်ဝီတဖၣ်အံၤ ဒ်မူဒါလီၤဘၣ်ဝဲအသိးကညီတၢ်ကရၢကရိတဖၣ်အံၤ ကပၥ်ဖှိၣ်မၤသကိးမၤထဲးဂံၢ်ထဲးဘါမၤလိၣ်ထီၣ်ဖးထီၣ်ဝဲန့ၣ်တၢ်ပၥ်လီၤဝဲတၢ်ပၥ်သးလၢတၢ်အိၣ်ဖှိၣ်တဲသကိးဘျီဝဲအံၤအပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်မၤဝဲတၢ်တၢၣ်ပီၣ်တဲသကိးတၢ်ရဲၣ်တၢ်ကျဲၤအံၤအပူၤန့ၣ် လီၢ်ခၢၣ်သး ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူဝ့, ကရၢခိၣ်-၂ ပဒိၣ်စီၤဆၢဂ့ၤ, , နဲၣ်ရွဲၣ်ခိၣ်ကျၢၢ်သဃဲၤ-၁ ပဒိၣ်စီၤသီသံၣ်ဘှဲ, နဲၣ်ရွဲၣ်ခိၣ်ကျၢၢ်သဃဲၤ-၂ ပဒိၣ်စီၤလၣ်ထိ, ကရၢဖိ ပဒိၣ်စီၤသမ့ၤထိ ဃုၥ်ဒီးခိၣ်နၢ်ဘၣ်ထွဲလၢအဂၤဒီး ဂံၢ်ခီၣ်ထံးတၢ်ကရၢကရိခိၣ်နၢ်ခၢၣ်စးစုၥ်စုၥ်ဟဲထီၣ်ဝဲဒၣ်န့ၣ်လီၤ.
