လါယူၤလံ, ၂၃သီ, ၂၀၂၆နံၣ် ခ့ၣ်အဲးစံၣ်.
တၢ်ကမၤစၢ်လီၤက့ၤတၢ်စုဆူၣ်ခီၣ်တကးလၢကီၢ်ပယီၤပူၤဒီးကဒိးန့ၢ်ဘၣ်ဟီၣ်ခိၣ်ဖိခွဲးယၥ်တၢ်တုၤသိးထဲသိးဃုၥ်ဒီးထံဂုၤကီၢ်ဂၤပှၤဂ့ၢ်ဝီၢ်တၢ်ဆီၣ်ထွဲမၤစၢၤအဂီၢ် ကညီတၢ်ကရၢကရိအမဲရကၤ လဲၤထံၣ်လိၥ်အိၣ်ဖှိၣ်တဲသကိးဝဲဒီးကီၢ်ပဒိၣ်ပှၤဘၣ်မူဘၣ်ဒါတဖၣ်လၢ (U.S) ဟံၣ်ဝါ ဖဲအပူၤကွံၥ် လါယူၤလံ,၂၀သီအနံၤအဂ့ၢ် သ့ၣ်ညါဘၣ်ဒ် ကညီတၢ်ကရၢကရိအမဲရကၤပှၤဘၣ်မူဘၣ်ဒါ စံးဝဲဒၣ်အသိးန့ၣ်လီၤ.
ဘၣ်ဃးတၢ်လဲၤထံၣ်လိၥ်တဲသကိးတၢ်ဘျီဝဲအံၤ တၢ်ဂ့ၢ်တကျိၤဒီး အတၢ်မုၢ်လၢ်ကွၢ်စိသ့ၣ်တဖၣ်န့ၣ် ကညီတၢ်ကရၢကရိအမဲရကၤ(KOA) ပှၤနဲၣ်တၢ် စီၤအဲၣ်န့ၢ်သီ စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ “ပတၢ်လဲၤထံၣ်လိၥ်သးဘျီဝဲအံၤ လၢပတၢ်ကရၢကရိတကပၤ တၢ်ပညိၣ်တၢတထံၣ်မ့ၢ်ဝဲ ပကမၤလိသ့အါထီၣ် သးစၢ်လၢကကဲခိၣ်နၢ်ခါဆူညါတဖၣ် ဒ်သိးကသ့တဲတၢ်လၢခိၣ်နၢ်တဖၣ်အမဲၥ်ညါ ဒီးခံထံၣ်တထံၣ်မ့ၢ်ဝဲ ဒ်ကီၢ်ကီၢ်အမဲရကၤထုးထီၣ်ဝဲတၢ်ဘျၢ(၂)ထံၣ်လၢပမ့ၢ် (The Brave Burma Act)တၢ်ကမၤစၢ်လီၤက့ၤသုးကရူၢ်တၢ်စုဆူၣ်ခီၣ်တကးလၢကီၢ်ပယီၤပူၤဒီး (Dismantle Foreign Scam Syndicates Act)တၢ်ကထီဒါဘၣ်ဃးတၢ်လံၣ်တၢ်လီလၢအီၣ်လဲပူၤသ့ၣ်တဖၣ်န့ၣ်လီၤ“အဂ့ၢ် စံးဝဲဒၣ်န့ၣ်လီၤ.
ဒ်န့ၣ်အသိး တၢ်အိၣ်ဖှိၣ်ဘျီဝဲအံၤ ဘၣ်တၢ်တီခိၣ်ရိၣ်မဲအီၤလၢ တၢ်ကရၢကရိ(၃)ဖုလၢအမ့ၢ် (California Karen Youth Connection), (US Campaign For Burma)ဒီး(Karen Organization of America) န့ၣ်လီၤ. လၢန့ၣ်အမဲၥ်ညါ ဂံၢ်ခီၣ်ထံးပှၤတဝၢတၢ်ကရၢကရိလၢအဂၤ(၁၉)ဖုစ့ၢ်ကီး ဆှၢထီၣ်ဝဲသူၣ်ဘီၣ်သးစၢ်ခၢၣ်စးတဖၣ် ဖဲတၢ်အိၣ်ဖှိၣ်ဘျီဝဲအံၤအိၣ်ဝဲအဂ့ၢ်န့ၣ်သ့ၣ်ညါဘၣ်န့ၣ်လီၤ.
တၢ်အိၣ်ဖှိၣ်ဘျီဝဲအံၤန့ၣ် အမဲရကၤကီၢ်, ကီၢ်စဲၣ်(၉)ဘ့ၣ်အပူၤ ကညီသးစၢ်ခၢၣ်(၃၄)ဂၤ ပၣ်ဃုၥ်ပၣ်ဂီၢ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ. မ့မ့ၢ်လၢကီၢ်အမဲရကၤတကပၤ ဝဲၤဒၢး(၁၅)ဖျၢၣ်ပှၤဘၣ်မူဘၣ်ဒါဒီး ကီၢ်ပဒိၣ်ခၢၣ်စးပှၤဘၣ်မူဘၣ်ဒါတဖၣ်ဟဲထီၣ်ဝဲဒၣ်န့ၣ်လီၤ.
ဒ်န့ၣ်အသိး တချုးလၢတၢ်လဲၤထံၣ်လိၥ်သးဒီး ကီၢ်ပဒိၣ်ဒံးဘၣ်အဆၢကတီၢ်န့ၣ် အဝဲသ့ၣ်အိၣ်ဒီး တၢ်ကတဲၥ်ကတီၤသူၣ်ဘီၣ်သးစၢ်တၢ်မၤလိဘၣ်ဃး တၢ်ကတိၤန့ၢ်ခဲးတၢ် စးထီၣ်လၢလါမးရှးလံၤလံၤအဂ့ၢ်, တၢ်ထံၣ်လိၥ်အိၣ်ဖှိၣ်ဒီးကီၢ်ပဒိၣ်ပှၤဘၣ်မူဘၣ်ဒါဒ်အံၤန့ၣ် မ့ၢ်ဝဲဒၣ်တၢ်(၂)ဘျီတဘျီအဂ့ၢ် သ့ၣ်ညါဘၣ်လၢပှၤတီၤခိၣ်ရိၣ်မဲတၢ်အအိၣ်န့ၣ်လီၤ.
