လါအီကူၥ်, ၁၁သီ, ၂၀၂၆နံၣ် ခ့ၣ်အဲးစံၣ်
(Kaw Thoo Lei Army-KTLA) ကီၢ်သူလ့ၤသုးမုၢ်ဒိၣ် ဆၣ်ကဆီသုးတြိၤ, လၢအဘၣ်တၢ်တီခိၣ်ရိၣ်မဲအီၤလၢ သုးကခိၣ်အဲၣ်ခွံ(ကိး)ကီၤလၤဖိအံၤ ထုးထီၣ်ဝဲဒၣ်လံၥ်ဟ့ၣ်ပလီၢ်တဘ့ၣ်ဘၣ်ဃး ဝ့ၢ်တၢ်အဲၣ် ဆူ မဲၢ်သမံးထၣ် ထံကျဲအံၤ မုၢ်နၤမုၢ်ဆါ ကမျၢၢ်ထံဖိကီၢ်ဖိတဖၣ် လ့ၤတက့ၤအသုတလ့ၢ်လိၤတဂ့ၤအဂီၢ် ထုးထီၣ်ပၥ်ဖျါဝဲဒၣ်ဖဲ လါအီကူၥ်, ၁၀သီ, ၂၀၂၆နံၣ် အဂ့ၢ် သ့ၣ်ညါဘၣ်န့ၣ်လီၤ.
လံၥ်ပၥ်ဖျါပူၤအံၤ စးထီၣ်လၢ လါအီကူၥ်, ၁၀သီ, တုၤလၢ လါဒံၣ်စ့ဘၢၣ်, တနံၣ်အံၤဒီတနံၣ်အတီၢ်ပူၤ ကမျၢၢ်ဒီးထံဖိကီၢ်ဖိတဖၣ် လ့တက့ၤ မုၢ်ဆါမုၢ်နၤ တၢ်တဘၣ်လ့ၢ်လိၤဝဲ ဝ့ၢ်တၢ်အဲၣ်တုၤလီၤလၢ မဲၢ်သမ့းထၣ်ထံကျဲအံၤဘၣ်အဂ့ၢ် ပၥ်ဖျါဝဲဒၣ်န့ၣ်လီၤ. ဘၣ်ဆၣ်မ့မ့ၢ်လၢ ဝ့ၢ်တၢ်အဲၣ်တုၤလီၤလၢ ကမိၤသွ့ခံ ဒီး ဝ့ၢ်တၢ်အဲၣ်ထီၣ်ဆူ ပိချိခံအခီ တၢ်လ့ၢ်လိၤအီၤသ့ထဲလၢမုၢ်ဆါခီဒီး မ့မ့လၢမုၢ်နၤခီန့ၣ် လ့တက့ၤတၢ်လ့ၢ်လိၤအီၤတသ့ဘၣ်အဂ့ၢ်ပၥ်ဖျါဝဲဒၣ်န့ၣ်လီၤ.
လၢန့ၣ်အမဲၥ်ညါ ဘၣ်ဃးဒီးသိလ့ၣ်တကပၤ ကွံဝၢ်ဝးတုၤလၢ မဲၢ်သမ့းခံအံၤ မုၢ်ဆါမုၢ်နၤလ့ၤတက့ၤ တၢ်တဘၣ်လ့ၢ်လိၤအီၤဘၣ်အဂ့ၢ်ထုးထီၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး ဘၣ်ဃးဒီး (KTLA) ထုးထီၣ်လံၥ်ဟ့ၣ်ပလီၢ်ဒ်အံၤအဖီခိၣ် ကဲထီၣ်ဝဲတၢ်ကီတၢ်ခဲဒီး တၢ်တံၥ်တၤလၢကူၣ်သ့ တကပၤအိၣ်ဝဲအဂ့ၢ် ကူၣ်သ့ပှၤဘၣ်မူဘၣ်ဒါတဂၤစံးဝဲဒၣ်န့ၣ်လီၤ.
အဝဲစံးဝဲလၢ ” ပမ့ၢ်လဲၤခီဘၣ်ကျဲလၢအဝဲသ့ၣ်အိၣ်ဒီး ပအိၣ်ဒီးတၢ်ဘၣ်ယိၣ်လီၤ ပမ့ၢ်သ့ၣ်ညါတၢ်လီၢ်လၢအဝဲသ့ၣ် ဟူးဂဲၤဝဲအါအလီၢ်ဒီးလ့တက့ၤ ပလဲၤတဘူၣ်ဘၣ်န့ၣ်လီၤ. လၢန့ၣ်အမဲၥ်ညါ မ့ၢ်ဘၣ်လၢ ပလဲၤဟ့ၣ်တၢ်မၤလိဒီး ပဘၣ်ဆဲးကျိၥ်ဆိဒီး ခိၣ်နၢ်ပှၤဘၣ်မူဘၣ်ဒါမ့ၢ်ဝံၤ အဝဲသ့ၣ်အုၣ်ကီၤပှၤမ့ၢ်ဘူၣ်မးဒီးအလဲၤသ့လီၤ အုၣ်ကီၤပှၤမ့ၢ်တဘူၣ်ဘၣ်ဒီးပလဲၤတသ့ဘၣ်န့ၣ်လီၤ. ပမ့ၢ်ဘၣ်နုၥ်လီၤထၢစရီလၢပျီပူၤ မ့ဘၣ်လၢ KTLA ဟူးဂဲၤတၢ်လီၢ်န့ၣ် ပဘၣ်အိၣ်ခိးလၢအဝဲသ့ၣ်က့ၤထီၣ်လၢအတၢ်အိၣ်တၢ်ဆိးလီၢ်မး ပနုၥ်လီၤထၢစရီသ့ဝဲဒၣ်အဃိကဲထီၣ်ဝဲဒၣ် တၢ်တံၥ်တၤတခါန့ၣ်လီၤ.”အဂ့ၢ် စံးဝဲဒၣ်န့ၣ်လီၤ.
ဘၣ်ဃးဒီး KTLAဆၣ်ကဆီသုးတြိၤ အလံၥ်ထုးထီၣ်ဟ့ၣ်ပလီၢ်အံၤန့ၣ် ဒ်သိးကသ့ၣ်ညါ ဘၣ် KTLAတၢ်ပၥ်သးအဂီၢ် ကညီကွဲၤလ့လိၤဆဲးကျိးသံကွၢ်ဒီး KTLAသုးရိၣ်မဲခိၣ်ကျၢၢ် သုးခိၣ်နၢၤဒါဘၣ်ဆၣ် ဆဲးကျိးတန့ၢ်ဘၣ်အဂ့ၢ် ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.
ဟီၣ်ကဝီၤလၢ KTLA ဆၣ်ကဆီသုးတြိၤ ထုးထီၣ်ဝဲဒၣ်လံၥ်ဟ့ၣ်ပလီၢ်အံၤန့ၣ် အိၣ်ဒၣ်လၢ KNU ဘျံးဒဝဲၢ်ကီၢ်ရ့ၣ် သုးက့(၄) ထံမိၢ်ပှၢ်ဟီၣ်ကဝီၤဒီး ကစၢၢ်ဒိၣ်ကီၢ်ဆၣ် တၢ်ပၢဟီၣ်ကဝီၤပူၤဒီး တကီၢ်ခါခဲအံၤ တၢ်လီၢ်တၢ်ကျဲသ့ၣ်တဖၣ်န့ၣ်မ့ၢ်စ့ၢ်ကီးဝဲဟီၣ်ကဝီၤလၢ KTLA နုၥ်လီၤဟူးဂဲၤဝဲဟီၣ်ကဝီၤသ့ၣ်တဖၣ်န့ၣ်လီၤ.
