လါအီကူး ၁၁ သီ, ၂၀၂၆ နံၣ်, ခ့ၣ်အဲးစံၣ်
လၢကထီၣ်ဒိၣ်စိက့ၤကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ရၤမတံ-ဂီၤလ့ၤ ကျဲတၢ်လီၢ်လၢဘၣ်ဟ့ၣ်ဆှူဝဲတဖၣ်အံၤအဂီၢ် ပယီၤသုးကျိၤလၢဟဲထီၣ်ဟူးဂဲၤလၢလ့က့ၣ်ကိၥ်ဟီၣ်ကဝီၤ ယဲကိ (ရဲကုန်း)တၢ်လီၢ် တဖၣ်အံၤဆဲးထီၣ်ဆူညါတန့ၢ် ဘၣ်ကွၢ်ဆၢၣ်မဲၥ်ဝဲတၢ်သံတၢ်ဘၣ်ဒိဘၣ်ထံးတပယူၥ်ဃီအဂ့ၢ်န့ၣ် KNLA တၢ်ပၢၢ် ဆၢသုးကရူၢ် တကပၤစံးဝဲန့ၣ်လီၤ.
ပယီၤသုးဂံၢ်ဘါအကထိလၢအဟဲထီၣ်နုၥ်လီၤဟံန့ၢ်အလီၢ်အကျဲဟူးဂဲၤဝဲစးထီၣ်ဖဲအပူၤကွံၥ်လါယူၤလံထီၣ်အခါအံၤတဖၣ် တၢ်ဆၢ ကတီၢ် အိၣ်တလါဘျဲၣ်လံဘၣ်ဆၣ် ယဲကိတၢ်လီၢ်လၢအဝဲသ့ၣ်လဲၤထီၣ်တုၤဟူးဂဲၤဝဲအံၤတဆီ လၢကဆဲးထီၣ်ဆူညါ အဂီၢ် ဘၣ်တၢ်ခိးခးလီၤအဝဲသ့ၣ်လၢ(KNLA)သုးပၥ်ဖှိၣ်ကရူၢ် ကိးမုၢ်နံၤဒဲးဃၣ်ဃၣ် န့ၣ်လီၤ.
ဒီးစှၤသီအတီၢ်ပူၤ စးထီၣ်က့ၤဖဲလါအီကူး ၉ သီ ဟါခီ ၂း၀၀ နၣ်ရံၣ်အဆၢကတီၢ်န့ၣ် ပယီၤသုးကျိၤအံၤဟဲထီၣ်ဝဲလၢ ယဲကိမုၢ်ထီၣ် ညီၣ်ပ့ၣ်ကိ (ညောင်ပင်ကုန်း)တကပၤဒီး တၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်အဂ့ၢ်န့ၣ် (KNLA)ပှၤဘၣ်မူဘၣ်ဒါ လၢ အိၣ် တၢ်မဲၥ်ညါတဂၤ စံးဝဲဒ်အံၤန့ၣ်လီၤ.
“စးထီၣ်လၢလါထီၣ် ၉ သီအံၤ ဒုၣ်ဒါသုးကျိၤဟဲထီၣ် တၢ်ဒုးက့ၤဆူၣ်ထီၣ်ကဒါ. အဟဲထီၣ်လၢယဲကိမုၢ်ထီၣ် လ့ဒ့ၣ် ညီၣ်ပ့ၣ်ကိ အခိၣ်အဃၢၤတကပၤန့ၣ်. တၢ်တနံၤန့ၣ်ဖဲအဝဲသ့ၣ်ဟဲထီၣ်အခါခီဖျိအဝဲသ့ၣ်တၢ်သံတၢ်ဘၣ်ဒိဘၣ်ထံးအိၣ်အဃိ က့ၤဂုၤကဒါ လီၢ်ခံ. မ့မ့ၢ်လၢပပှၤတကပၤဒုတၢ်ဘၣ်ဒိဘၣ်ထံးတအိၣ်ဝဲဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးပယီၤသုးအံၤဖဲအဝဲသ့ၣ်သုးကျိၤဟဲထီၣ်အခါ ပၥ်ဂံၢ်ပၥ်ဘါသူနၢၤက့ၤဝဲဒၣ် ကဘီယူၤသ့ၣ်တဖၣ် တပယူၥ်ဃီတုၤလၢ တနံၤအံၤလါအီကူး ၁၁ သီအံၤအဂ့ၢ်န့ၣ် တၢ်ပၢၢ်ဆၢကရူၢ်ကရၢတကပၤစံးဝဲအသိး သ့ၣ်ညါဘၣ် န့ၣ်လီၤ.
“တုၤလၢတနံၤအံၤလါအီကူး ၁၁ သီအံၤ ကၤမံၤကၤစံၤဒြိတူၢ်သံသး, (Y-12)ဒီး(Jet fighter)ကဘီယူၤဟဲခးလီၤ တၢ်တပယူၥ် ဃီလီၤ. ဖဲယဟ့ၣ်နၤတၢ်ကစီၣ်ခဲအံၤ(Y-12)ကဘီယူၤဟဲခးလီၤတၢ်အဖၢမုၢ်လီၤ. ဖဲလါထီၣ်(၉)သီတနံၤန့ၣ် တၢ်ဒုးကဲထီၣ်ဒိၣ်ဒိၣ် မုၢ် မုၢ် ဘၣ်ဆၣ်မ့မ့ၢ်တနံၤအံၤဒုတၢ်ဒုးကဲထီၣ်တအိၣ်ဒံးဘၣ်.သနါက့ လၢအဝဲသ့ၣ်ကဟဲထီၣ်အဂီၢ်မၤဆှဲဝဲကျဲဒီးကဘီယူၤ. တနံၤအံၤ ကဘီယူၤဟဲခးလီၤတၢ်အိၣ်(၃)ဘျီလံ. ပယီၤသုးအံၤဂုၥ်ကျဲးစၢးဟဲထီၣ်ဝဲဒီး မ့ဟဲထီၣ်နါက့အိၣ်ဒၣ်ကသံအါလီၤ. အဝဲသ့ၣ်န့ၣ် တပၥ်လုၢ်ပၥ်ပှ့ၤအသးသမူလၢၤဘၣ်.”အဂ့ၢ်န့ၣ် တၢ်ပၢၢ်ဆၢကရူၢ်တဂၤဃီဝဲန့ၣ် စံးအါထီၣ်ဝဲန့ၣ်လီၤ.
ခဲအံၤလၢဟီၣ်ခိၣ်မဲၥ်ဖံးခိၣ်န့ၣ်တၢ်မ့စူၤကိးမုၢ်နံၤဒဲးဘၣ်ဆၣ် ပယီၤသုးအံၤဟဲထီၣ်ဆူညါကန့ၢ်အဂီၢ် ဂုၥ်ကျဲးစၢးဝဲသပှၢ်ပှၢ်အဃိ လၢကဟဲအံၤတၢ်ဘၣ်သဂၢၢ်ခးလိၥ်သးကဆဲးကဲထီၣ်အါထီၣ်န့ၢ်အလီၢ်ဒံးသ့အသိး လၢတၢ်တြီဆၢဒီသဒၢလီၤက့ၤဟီၣ်ကဝီၤအဂီၢ် ကခီၣ်ဆၢကဒါဝဲလၢအဂ့ၤကတၢၢ် အဂ့ၢ်န့ၣ် တၢ်ပၢၢ်ဆၢသုးကရူၢ်တကပၤစံးဝဲဒၣ်န့ၣ်လီၤ.
