လါအီကူၥ် ၁၇သီ, ၂၀၂၆နံၣ်, ခ့ၣ်အဲးစံၣ်,
ကမျၢၢ်ထံဖိကီၢ်ဖိတဖၣ် ကအိၣ်ပလီၢ်သးလၢ သတူၢ်ကလၥ် ထံဒိၣ်လုၢ်ဘၢတၢ်ဒီး ကလံၤဆူၣ်လပီမုၢ်ဒိၣ် အတၢ်ဘၣ်ဒိဘၣ်ထံးဒီး တၢ်လီၤဘၣ်ယိၣ် အဂီၢ်ကၠီၣ်တဲၣ်မူခိၣ်ကလံၤသီၣ်ဂီၤဝဲၤကျိၤ (Thai Meteorological Department)ဒီး တၢ်ဒီသဒၢမၤလီၤစှၤခိၣ်ဃၢၤန့ဆၢၣ် တၢ်ဘၣ်ဒိဘၣ်ထံး (Department of Disaster Prevention and Mitigation) ဆီၣ်တခူ ဟ့ၣ်ပလီၢ်ပၥ်ဖျါဝဲဒၣ်န့ၣ်လီၤ.
ကီၢ်ကၠီၣ်တဲၣ်အပူၤ တလါအံၤလါအီကူၥ်(၁၈)သီတုၤလၢ(၂၂)သီအနံၤအပူၤ ထံဒိၣ်,ကစၢၢ်ထံလီၤ,ဟီၣ်ခိၣ်လၥ် ဒီး ကလံၤအူဆူၣ် လပီမုၢ်ဒိၣ် ထံလုၢ်ဘၢတၢ်သတူၢ်ကလၥ်ကဲထီၣ်သးသ့ဝဲအဃိ ကီၢ်ရ့ၣ်(၄၂)ဘ့ၣ်အပူၤ ကမျၢၢ်တဖၣ် ကအိၣ်လၢ တၢ်ပလီၢ်ပဒီသးပူၤအဂ့ၢ်, (TMD)ဒီး(DDPM) ထုးထီၣ်ဟ့ၣ်ပလီၢ်ဝဲဒၣ်ဖဲ မဟါလါအီကူၥ်(၁၇)သီ အနံၤ န့ၣ်လီၤ.
လၢန့ၣ်အမဲၥ်ညါ, တၢ်လီၢ်လၢ ထံလုၢ်ဘၢတၢ်ကဲထီၣ်သးသ့ဝဲသ့ၣ် တဖၣ်အံၤမ့ၢ်ဝဲ ကလံၤစိးဟီၣ်ကဝီၤ တၢ်လီၢ်(၁၇) တီၤ, မုၢ်ထီၣ်ကလံၤ စိးတၢ်လီၢ် (၁၅) တီၤ, ထံကီၢ်ကံၢ်သးဟီၣ်ကဝီၤ(၇)ဘ့ၣ် ဒီး, ကလံၤအူလပီမုၢ်ဒိၣ်ကဲထီၣ်သးသ့ ဝဲတၢ်လီၢ်တဖၣ်တခီ မ့ၢ်ဝဲဒၣ် ကလံၤထံးဟီၣ်ကဝီၤ (ရနီ)(ဖါငၣ်)(ဖူခဲး) တဖၣ်အဂ့ၢ်,ပၥ်ဖျါဝဲန့ၣ်လီၤ.
ကီၢ်ကၠီၣ်တဲၣ် ကလံၤထံး, ကလံၤစိးဒီး ထံကီၢ်ခၢၣ်သး ဟီၣ်ကဝီၤသ့ၣ်တဖၣ်အံၤ အပူၤကွံၥ် (၂၀၂၅)နံၣ် လါယူၤလံဒီး လါအီကူၥ် အပူၤ မူခိၣ်စူၤ ထံဒိၣ်လုၢ်ဘၢတၢ် ကလံၤမုၢ်လီၤ လပီမုၢ်ဒိၣ်အဃိ, ကီၢ်ရ့ၣ်အဘ့ၣ် (၃၀)ဘျဲၣ် အပူၤ တၢ်ဘၣ် ဒိဘၣ်ထံး တၢ်ဟးဂူၥ်ဟးဂီၤကဲ ထီၣ်တ့ၢ်ဝဲအသးအိၣ်ဝဲ အဂ့ၢ်, သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ, (၂၀၂၆)န့ၣ်အပူၤ လၢကမၤဂ့ၤထီၣ်ဒီး ဒီသဒၢ မၤလီၤစှၤဝဲ တၢ်ဘၣ်ဒိဘၣ်ထံးအဂီၢ် အပူၤကွံၥ်လါယူၤ အပူၤ ပဒိၣ်ပပှၢ်ပှၤဘၣ်မူ ဘၣ်တဖၣ် ပၥ်ဂၢၢ်ပၥ်ကျၢၤဝဲ တၢ်စူၤခါကတီၢ် တၢ်မၤရဲၣ်ကျဲၤ (၉)ထံၣ်အဂ့ၢ်, ကၠီၣ်တဲၣ် တၢ်ကစီၣ်သန့တဖၣ် ပၥ်ဖျါတ့ၢ်ဝဲန့ၣ်လီၤ.
ဒီးတၢ်မၤရဲၣ်ကျဲၤသ့ၣ်တဖၣ်အ့ၤ မ့ၢ်ဝဲ (၁) ထိၣ်ဒွးဆိဒီးဟ့ၣ်ပလီၢ်ဆိတၢ်ဘၣ်ဒိဘၣ်ထံးတၢ်လီၤဘၣ် ယိၣ်တၢ်လီၢ် တၢ် ကျဲ (၂) အိၣ်ကတီၤပၥ်သးလၢတၢ်ဖိတၢ်လံၤတၢ်လိၣ်ဘၣ်ဒီးတၢ်ရဲၣ်သဲကတီၤထံတီၤပတီၢ် (၃)ကရၢကရိဒုးအိၣ်ထီၣ်ပှၤ မၤတၢ်ဖိလၢအဘၣ်ဃးဒီးစဲးဖီကဟၣ်တဖၣ် (၄) သမံသမိးတမၢၣ်ဒီးထံပၥ်ကီၤအလီၢ်တဖၣ် (၅)မၤဂ့ၤထီၣ်ထံကျိၤအ တၢ်ယွၤလီၤဟးထီၣ် (၆) ကတီၤပၥ် ဂ့ၢ်ဂီၢ်အူတၢ်မၤပူၤဖျဲး တၢ်အိၣ်ကဒုလီၢ်တဖၣ် အခိၣ်ဒုး (၇) ပၥ်ကီၤက့ၤထံ လၢ တၢ် ကိၢ်ခါကတီၢ်အဂီၢ် (၈) ဟ့ၣ်တၢ်သ့ၣ်ညါနၢ်ပၢၢ်ဆူကမျၢၢ် (၉) မၤတၢ်ဃုထံၣ်သ့ၣ်ညါသမံသမိးတပယူၥ်ဃီ သ့ၣ်တဖၣ် အဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, တနံၣ်အံၤ ထံဒိၣ်လုၢ်ဘၢတၢ်ဒီး ကလံၤဆူၣ်လပီမုၢ်ဒိၣ် တၢ်ဘၣ်ဒိဘၣ်ထံးအဂီၢ် မူခိၣ်ကလံၤသီၣ်ဂီၤဝဲၤ ကျိၤသ့ၣ်တဖၣ်ဆီၣ်တခူဝဲလၢ တၢ်ကအိၣ်ခိးကွၢ်ဝဲ ပဒိၣ်ပပှၢ်တၢ်ဘိးဘၣ်ပၥ်ဖျါတပယူၥ်ဃီဒီး လူၤပိၥ်မၤထွဲဝဲ အသိး လၢဂ့ၢ်ဂီၢ်အူတၢ်မၤစၢၤအဂီၢ် တၢ်ဆဲးကျိးဝဲ (Thai Disaster Alert)app, (LINE), (1784) တဖၣ်သ့ဝဲအဂ့ၢ် ပၥ်ဖျါ ဃုၥ်ဝဲဒၣ်န့ၣ်လီၤ.
