သုးမီၤစိရိၤအတၢ်ထီၣ်ဒုးအဖီခိၣ် ကျဲအိၣ်က့ၤထဲဒၣ်လၢကဘၣ်ခီၣ်ဆၢက့ၤအဂ့ၢ် KNU ထုးထီၣ်လံာ်တၢ်ပာ်ဖျါ

လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဟီၣ်က၀ီၤအပူၤ ဒ်သိးကဒီတဒၢကညီကမျၢၢ်ဒီးနီၢ်ကစၢ်တၢ်ဆၢတဲာ်လီၤသးအဂီၢ် သုးမီၤစိရိၤ အတၢ်ထီၣ်ဒုးအဖီခိၣ် ကျဲအိၣ်က့ၤထဲဒၣ်လၢကဘၣ်ခီၣ်ဆၢက့ၤအဂ့ၢ်န့ၣ် ဖဲမဟါ(လါမးရှး ၃၀)သီအနံၤ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့ ၅ ထုးထီၣ်လံာ်တၢ်ပာ်ဖျါဒီးစံး၀ဲန့ၣ်လီၤႉ

“ဆၢကတီၢ်ခဲအံၤ ကီၢ်ပယီၤသုးမုၢ်ဒိၣ်အသုးတဖၣ် ဟဲနုာ်လီၤတလၢ၀ဲလၢပဟီၣ်က၀ီၤအပူၤလံန့ၣ်လီၤႉ ခီဖျိတၢ်အိၣ်သးအံၤအဃိ ပသူၣ်ကိၢ်သးဂီၤတၢ်လၢကမျၢၢ်ထံဖိကီၢ်ဖိတၢ်အိၣ်မူအိၣ်ဂဲၤတၢ်ဘံၣ်တၢ်ဘၢအဂီၢ် ဒိၣ်မးလီၤႉ လၢပဟီၣ်က၀ီၤပူၤႇဒ်သိးကဒီတဒၢကညီကမျၢၢ်ဒီးအ၀ဲသ့ၣ်နီၢ်ကစၢ်တၢ်ဆၢတဲာ်အဂီၢ် ကီၢ်ပယီၤသုးမုၢ်ဒိၣ်လၢအဟံးဆူၣ်ကွံာ်ထံကီၢ်တၢ်စိတၢ်ကမီၤအတၢ်ထီၣ်ဒုးအံၤ ကျဲလၢ ကဃုထၢတအိၣ်ဘၣ်ဒီးကက့ၤခီၣ်ဆၢကဒါလီၤ”အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဖဲအပူၤကွံာ်(လါမးရှး ၂၇)သီအနံၤ ခ့ၣ်အဲၣ်ယူၣ် သုးက့ ၅ လဲၤထီၣ်ဒုးဟံးန့ၢ်ကွံာ် သံမုၢ်ထၣ်ပယီၤသုး ကလၢၤလၢအအိၣ်ဖဲမုၢ်တြီၢ်ကီၢ်ရ့ၣ် ဃိၣ်လိာ်ကျိကၢၢ်နံၤ၀ံၤအလီၢ်ခံ ခီဖျိပယီၤသုးမီၤစိရိၤအသုးကဘီယူၤ ဟဲကွံာ်လီၤမ့ၣ်ပိၢ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ် သုးက့ ၅ ဟီၣ်က၀ီၤအပူၤအဃိ လီၢ်က၀ီၤကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲဒၣ်အဖီခိၣ် ခ့ၣ်အဲၣ်ယူၣ် သုးက့ ၅ ဘၣ်ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါဒ်အံၤန့ၣ်လီၤႉ

ခီဖျိပယီၤသုးမီၤစိရိၤအသုးဟဲကွံာ်လီၤမ့ၣ်ပိၢ်ဒီးကဘီယူၤအဃိ ဖိဒံဖိသၣ်ဃုာ်ဒီးကမျၢၢ် ၈ ဂၤသံ၀ဲဒီး ဘၣ်ဒိဘၣ်ထံး၀ဲ ၈ ဂၤအသိး မုၢ်တြီၢ်ကီၢ်ရ့ၣ် လီၢ်က၀ီၤကမျၢၢ် ၁၀ႇ၀၀၀ ဘျဲၣ် ဘၣ်ပာ်တ့ၢ်ကွံာ်အဟံၣ်အဃီအတၢ်ဖံးအီၣ်မၤအီၣ်လီၢ်ကျဲဒီး ဘၣ်လဲၤစံၣ်အိၣ်ခူသူၣ်လၢကစၢၢ်ခိၣ်ကလိကျါန့ၣ်လီၤႉ လၢန့ၣ်အမဲာ်ညါ ဃိၣ်လိာ်ကျိကၢၢ်နံၤအကပိၤကပၤ လီၢ်ကလီၤသ၀ီဖိ ၃ႇ၀၀၀ ဘျဲၣ် ဘၣ်လဲၤဃ့ၢ်ထီၣ်ဆူဃိၣ်လိာ်ကျိထံ၀ၢ်ခီကီၢ်ကၠီၣ်တဲၣ်တကပၤစ့ၢ်ကီးန့ၣ်လီၤႉ

ခီဖျိပယီၤသုးမီၤစိရိၤအတၢ်ထီၣ်ဒုးအံၤအဃိ ကမျၢၢ်ထံဖိကီၢ်ဖိလၢအဘၣ်ဃ့ၢ်မှံဟးဖျိးတဖၣ် ဒ်သိးကီၢ်ကၠီၣ်တဲၣ်ပဒိၣ်ဃုာ်ဒီး ထံဂုၤကီၢ်ဂၤကရူၢ်ကရၢတဖၣ်ကဟ့ၣ်တၢ်ဒီတဒၢအဂီၢ်ဒီး ကဟ့ၣ်မၤစၢၤ၀ဲၦၤဂ့ၢ်၀ီအတၢ်လိၣ်ဘၣ်တဖၣ်အဂီၢ် ဃ့ကညးဃ့ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ကီၢ်ပယီၤသုးမုၢ်ဒိၣ်လၢအဟံးဆူၣ်ကွံာ်ထံကီၢ်တၢ်စိတၢ်ကမီၤအံၤ ထံဂုၤကီၢ်ဂၤ တဘၣ်ပာ်ပနီၣ်အီၤဘၣ်ဒီး ကပတုာ်ကွံာ်၀ဲ သုးဂ့ၢ်၀ီႇမုၢ်ကျိၤ၀ဲၤကွာ်လၢအမၤဃာ်၀ဲသ့ၣ်တဖၣ်ခဲလၢာ်အဂ့ၢ်ႇ ကပတုာ်ကွံာ်တၢ်ထီၣ်ခးကမျၢၢ်ထံဖိကီၢ်ဖိဒီးကျိတဖၣ်အံၤတဘျီဃီအဂ့ၢ်ဒီး ဒ်သိးထံဂုၤကီၢ်ဂၤကရူၢ်ကရၢ ကဟ့ၣ်တၢ်ဆီၣ်သနံးဆူကီၢ်ပယီၤသုးမုၢ်ဒိၣ်အအိၣ်အဂီၢ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ဃ့ထီၣ်၀ဲန့ၣ်လီၤႉ