(သုးက့ ၅)လါတဝၥ်အတီၢ်ပူၤ သုးမီၤစိရိၤသူကဘီယူၤတၢ်ထီၣ်ဒုး(၈၀)ဘျဲၣ်, ကမျၢၢ်သံဘၣ်ဒိ(၁၁)ဂၤဒီး တၢ်သူၣ်ထီၣ်ဟးဂီၤ (၉၀)ဘျဲၣ်

လါအီကူး ၁၈ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤလၢတၢ်ဒုးဆူၣ်ထီၣ်ဝဲအဖၢမုၢ်အံၤန့ၣ် လါအီကူး ၁ သီတုၤ ၁၅ သီ လၢလါ တဝၥ်အတီၢ်ပူၤ ကျိဖးဒိၣ်,ဒြိအမဲၥ်ညါ သုးမီၤစိရိၤသူဝဲဒၣ်ကဘီယူၤတၢ်ထီၣ်ဒုးတစှၤန့ၢ်ဝဲအဘျီ(၈၀)ဒီး ဖဲန့ၣ်ကမျၢၢ်သံဘၣ်ဒိ ဘၣ်ထံး ဝဲ(၁၁)ဂၤ, တၢ်သူၣ်ထီၣ်ဟးဂီၤအဖျၢၣ်(၉၀)ဘျဲၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ ဝဲဖဲမဟါလါအီ ကူး ၁၇ သီအံၤ န့ၣ်လီၤ.

ဒ်လါတဝၥ်တၢ်ပၥ်ဖျါပူၤအသိးန့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤ တၢ်ဒုးကဲထီၣ်ဝဲ (၅၁)ဘျီ ဒီး ပယီၤသုးတကပၤသံ(၁၄)ဂၤ,ဘၣ်ဒိဘၣ်ထံး(၂၃)ဂၤန့ၣ်လီၤ. ဒီးလၢပှၤသံတဖၣ်အံၤအကျါပၣ်ဃုၥ်ဝဲသုးခိၣ်စိပတီၢ်(၂)ဂၤ အသိး ဘၣ်ဒိတဖၣ်အကျါစ့ၢ်ကီးပၣ်ဃုၥ်ဝဲသုးခိၣ်စိ(၁)ဂၤအဂ့ၢ်န့ၣ် စံးဝဲန့ၣ်လီၤ.

ခီဖျိလၢဟီၣ်ကဝီၤပူၤတၢ်ဒုးကဲထီၣ်အဃိမ့ၢ်ဂ့ၤ,တၢ်ဒုးကဲထီၣ်တအိၣ်ဘၣ်အလီၢ်မ့ၢ်ဂ့ၤ သုးမီၤစိရိၤအံၤသူဝဲဒၣ် Y-12 ကဘီယူၤ (၆၅)ဘျီ, (Jet fighter)ကဘီယူၤ(၁၆)ဘျီ ပၥ်ဖှိၣ်ခဲလၢၥ်(၈၁)ဘျီတကးဒံးဘၣ် သူဝဲဒၣ်ဒြိ(၃)ဘျီဒီးခးလီၤဝဲ 120 MM ကျိဖးဒိၣ် (၁၇)ဘျီ, ခးလီၤဃုၥ်ဝဲကျိဒိၣ်အချံ (၇၀)ဖျၢၣ်လၢ ဒူသဝီ,ကမျၢၢ်တၢ်ဖံးအီၣ်မၤအီၣ်လီၢ်ကျဲတဖၣ်အံၤအပူၤန့ၣ်လီၤ.

ဒီးလၢကဘီယူၤဒီးကျိဖးဒိၣ်,ဒြိအတၢ်ထီၣ်ဒုးသ့ၣ်တဖၣ်အံၤအဃိ လီၢ်ကဝီၤကမျၢၢ်လၢတၢ်ကမၣ်တအိၣ်ဘၣ်အံၤ ဘၣ်သံကွံၥ် ဝဲ(၃)ဂၤဒီး ဘၣ်ဒိဘၣ်ထံးဝဲ(၈)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.

တကးဒံးဘၣ်လၢန့ၣ်အမဲၥ်ညါလၢသုးမိၤစိရိၤအတၢ်ဟူးတၢ်ဂဲၤအံၤအဃိ ကမျၢၢ်ဟံၣ်(၉၀)ဖျၢၣ်,သီခါဖၠၣ်တၢ်သူၣ်ထီၣ်(၂)ဖျၢၣ်, သိလ့ၣ်ယီၢ်(၂)ခိၣ်ဟးဂူၥ်ဟးဂီၤဘၣ်ဒိဘၣ်ထံးဝဲဒီး ထိး,ဆီ,မဲးတဲးလဲးသ့ၣ်တဖၣ်စ့ၢ်ကီးသံဝဲဒၣ်န့ၣ်လီၤ. တကတီၢ်ဃီ လၢတၢ်ဟူး တၢ်ဂဲၤအံၤအဃိ ကၠိဖိတဖၣ်စ့ၢ်ကီးတဖံးလိမၤဒိးဘၣ်တၢ်,ဘၣ်ဃ့ၢ်မှံဟးဖျိးဒီး ကမျၢၢ်တဖၣ်ဘၣ်အိၣ်ဝဲလၢတၢ်ပျံၤတၢ်ဖုး တၢ်ဘၣ် ယိၣ် ဘၣ်ဘှီပူၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.

ဒ်န့ၣ်အသိး(သုးက့ ၅)ဟီၣ်ကဝီၤအပူၤ ဒ်ကီၢ်ရ့ၣ်တလါတဘျီတၢ်မၤနီၣ်စရီပူၤအိၣ်ဝဲအသိးန့ၣ် အပူၤကွံၥ်လါယူၤလံ တလါအတီၢ် ပူၤန့ၣ်စ့ၢ်ကီး သုးမီၤစိရိၤသူဝဲဒြိ,ကျိဖးဒိၣ်ဒီးကဘီယူၤ ဟးခးလီၤတၢ်ပၥ်ဖှိၣ်အိၣ်ဝဲအဘျီ(၉၀)ဘျဲၣ်စ့ၢ်ကီးဒီး ဖဲန့ၣ်ကမျၢၢ်ဘၣ်ဒိ ဘၣ်ထံးဒံးဝဲ(၆)ဂၤဒံး န့ၣ်လီၤ.