လါအီကူၥ် ၁၉သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ် ကီၢ်ပယီၤကီၢ်ဆၢ တးခ်ကီၢ်ရ့ၣ် ထၣ်ဆီၤယါကီၢ်ဆၣ် မဲၢ်လးကညီဘၣ်ကီဘၣ်ခဲဒဲကဝီၤအပူၤ ဖိသၣ်(၁၃) ဂၤလၢအ တဆဲးထီၣ်ဘၣ်ကၠီၣ်တဲၣ်ကၠိလၢၤဘၣ်အဃိ, မိၢ်ပၢ်တဖၣ် ဆှၢထီၣ်လံၥ်တၢ်သးကညီၤဆူ ကၠီၣ်တဲၣ်(MOE)အအိၣ်အဂ့ၢ် သ့ၣ်ညါဘၣ်န့ၣ်လီၤ.
ဖိသၣ်သ့ၣ်တဖၣ်အံၤမ့ၢ်ပှၤလၢ အိၣ်ဖျဲၣ်ထီၣ်ဝဲဒၣ်လၢ မဲၢ်လးဘၣ်ကီဘၣ်ခဲဒဲကဝီၤအပူၤဒီး အိၣ်ဝဲဒီး ကီၢ်ကၠီၣ် တဲၣ်ကိ တိၥ်ဝဲၤကျိၤ (MOI)ထုးထီၣ်ဟ့ၣ်တၢ်နီၣ်ဂံၢ်(၁၃)ဖျၢၣ် သ့ၣ်တဖၣ်ဒီး တၢ်ဘၣ်ဘျးလိၥ်သးလၢဟးထီၣ်ဖံး လိမၤလိတၢ် လၢဒဲကဝီၤ အချၢတန့ၢ်ဝဲဘၣ်အဃိ, စးထီၣ်ဖဲတလါအံၤလါအီကူၥ်အပူၤ ဘၣ်အိၣ်ပတုၥ်ဃၥ်ဝဲကၠိ အဂ့ၢ်(MOE) ထုးထီၣ် ပၥ် ဖျါဝဲ အဂ့ၢ် ကၠီၣ်တဲၣ် တၢ်ကစီၣ်သန့ (The Reporters) ပၥ်ဖျါဝဲန့ၣ်လီၤ.
ဘၣ်ဃးဒီး ဒဲကဝီၤဖိသၣ်တနီၤဘၣ်ပတုၥ်ဃၥ်ဝဲကၠိအဖီခိၣ် မဲၢ်လးဒဲကဝီၤခိၣ် စီၤစၢဒ့စံးဝဲဒၣ်လၢ
“ပသ့ၣ်ညါလၢ ကၠိဖိမိၢ်ပၢ်တဂၤဟဲတဲပၠးပှၤအဃိလီၤ.လီၤဆီဒၣ်တၢ်ပသ့ၣ်ဘါဘၣ်လၢ ဖိသၣ်လၢကဘၣ်ထီၣ်ဝဲ တီၤခၢၣ်သး(M-1)န့ၣ်လီၤ.အနံၣ်တဆံပှဲၤထီၣ် တၢ်ကဘၣ်ဒိဝဲအနံၣ်(၁၀)တၢ်ဂီၤအဆၢကတီၢ် ဘၣ်ဘျးလိၥ်ဝဲအသးဒီး (MOI)နီၢ်ဂံၢ် (၁၃)ဖျၢၣ်န့ၣ်လီၤ.” အဂ့ၢ်စံးဝဲန့ၣ်လီၤ.
ဒ်(The Reporters) တၢ်ကစီၣ်သန့ ပၥ်ဖျါထီၣ်ဝဲအသိးန့ၣ်, မဲၢ်လးဒဲကဝီၤအပူၤ ဖိဒံဖိသၣ်လၢ အထီၣ်ဝဲ ကၠီၣ်တဲၣ်ပဒိၣ်ကၠိသ့ၣ်တဖၣ်အံၤ ခဲလၢၥ်အိၣ်ဝဲ (၄၆)ဂၤဒီး အဂၤ(၃၃)ဂၤစ့ၢ်ကီး ကူၣ်သ့ဝဲၤဒၢးဆဲးမၤဝဲ တၢ်သမံသမိး ဖိသၣ်တဖၣ် အတၢ်ဂ့ၢ်တၢ်ကျိၤဒီး ကဘၣ်ပတုၥ်ဝဲကၠိ တၢ်အိၣ်သးအိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ကၠီၣ်တဲၣ်ပဒိၣ်“တၢ်ကူၣ်ဘၣ်ကူၣ်သ့လၢ ပှၤကိးဂၤဒဲးအဂီၢ်”တၢ်ဘျၢသဲးစးအံၤ မ့ၢ်ဒၣ်ထဲလၢ ခီကီၢ်ပှၤမၤတၢ်ဖိတဖၣ် အဖိအလံၤအဂီၢ်ဒီး မ့မ့ၢ်လၢဒဲကဝီၤအပူၤ ဖိဒံဖိသၣ်တဖၣ်အဂီၢ် တၢ်ဘျၢအံၤ တအိၣ်ဒံးဝဲဘၣ်အဂ့ၢ်, ကညီဘၣ်ကီဘၣ်ခဲကူၣ်သ့ကမံးတံၥ်တၢ်မၤမုၢ်ကျၢၢ် (KRCEE)နဲၣ်ရွဲၣ် စီၤထူကပီၤ စံးဝဲန့ၣ်လီၤ.
အဝဲစံးဝဲလၢ“ကီၢ်ကၠီၣ်တဲၣ်အပူၤ ခီကီၢ်ပှၤမၤတၢ်ဖိတဖၣ် အဖိအလံၤအဂီၢ် နုၥ်လီၤဝဲလၢ ကၠီၣ်တဲၣ်ကူၣ်သ့ဝဲၤကျိၤတၢ်ပၢတၢ်ြပး အဖီလၥ်န့ၣ်လီၤ. ဒဲကဝီၤဖိသၣ်တဖၣ်အဂီၢ် ကၠီၣ်တဲၣ်ကူၣ်သ့အဖီလၥ် တၢ်ဟ့ၣ်ခွဲးတအိၣ်ဒံးဘၣ် ” အဂ့ၢ်စံးဝဲန့ၣ်လီၤ.
လၢတၢ်န့ၣ်အဃိ, ဒဲကဝီၤအပူၤ မိၢ်ပၢ်လၢ ဟးထီၣ်မၤဘၣ်ဝဲတၢ်လၢအဖိးသဲစးဆူ တၢ်ချၢတဖၣ်အံၤ လၢကကိးဃုၥ်ဝဲအဖိဒီး ကထီၣ်ဘၣ်ဝဲ ကၠီၣ်တဲၣ်ပဒိၣ်ကၠိလၢအဖိးသဲစးအဂီၢ် (KRCEE)ဒီး ကီၢ်ဆၢပှၤတဝၢ ကရူၢ်ကရၢတဖၣ် ဃ့ထီၣ်ဝဲဒၣ်အိၣ်ဝဲန့ၣ်လီၤ.
ဒ်န့ၣ်အသိး, ခီဖျိတၢ်အိၣ်သးဒ်အံၤသ့ၣ်တဖၣ်အဃိ ကီၢ်ကၠီၣ်တဲၣ်ကီၢ်ပယီၤကီၢ်ဆၢ ဒဲကဝီၤ(၉)ဘ့ၣ်အပူၤ ကိးနံၣ်ဒဲး ကၠိဖိ(၅၀၀)ဘျဲၣ် ဖျိထီၣ်ဝဲကၠိဘၣ်ဆၣ် ကၠိဖိလၢဖိထီၣ်တဖၣ်အံၤ တန့ၢ်ထီၣ်ဘၣ်ဝဲ ကၠီၣ်တဲၣ်ပဒိၣ် ဖၠၣ်စိမိၤဒီး ခွဲးယၥ်တအိၣ်လၢ ကဆဲးမၤလိဝဲ ပတီၢ်ထီကူၣ်သ့ပီညါတဖၣ် ဘၣ်အဂ့ၢ်, သ့ၣ်ညါဘၣ်န့ၣ်လီၤ.
