လါယနူၤအါရံၤ ၂၆သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢမဲၢ်ဆီး,ရၤမတံသူမွဲထံကျိကၢၢ်နံၤဟီၣ်ကဝီၤတၢ်လီၢ်တဖၣ်အပူၤ,ချံသန့တြဲၤလၢယံၤဒီးတိၤခဲလၢၥ်ဃၣ်ဃၣ်တၢ်က့ၤအိးထီၣ်ဝဲဒၣ်ဘၣ်ဆၣ်,ချံတြဲၤလၢအဘူးဒီးတိၤတဖၣ်တၢ်ဆဲးပံးဃၥ်ဝဲအဖၢမုၢ်လီၤအဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
သူမွဲထံကျိကၢၢ်နံၤချံတြဲၤသ့ၣ်တဖၣ်အံၤစးထီၣ်ဖဲအပူၤကွံၥ်လါယနူၤအါရံၤ(၁၃)သီအနံၤအပူၤအါတက့ၢ်တၢ်က့ၤအိးထီၣ်ကဒါက့ၤဝဲဒၣ်ဒီး,မ့မ့ၢ်ချံတြဲၤလၢအဘူးဒီးရၤမတံတၢ်ရ့လိၥ်မုၥ်လိၥ်တိၤသ့ၣ်တဖၣ်တခီတၢ်အိးထီၣ်ဝဲတဘူၣ်ဒံးဘၣ်အဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“အပူၤကွံၥ်ချံတြဲၤလၢညီနုၢ်တၢ်အိးထီၣ်ဝဲဒီးဘၣ်တၢ်ပံးဃၥ်တဖၣ်က့ၤအိးထီၣ်ကဒါက့ၤအသးလံ,တၢ်အိးထီၣ်ကအိၣ်တနွံဘျဲၣ်ဘျဲၣ်လံန့ၣ်လီၤ.သနၥ်က့ချံတြဲၤလၢအဘူးဒီးတိၤသ့ၣ်တဖၣ်ဒုတအိးထီၣ်အသးဒံးဘၣ်.မဟါတဟါယနၢ်ဟူလၢတဲဝဲလၢအဝဲသ့ၣ်အိးထီၣ်ဝဲတဘူၣ်ဒံးဘၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
အပူၤကွံၥ်(၂၀၂၅)နံၣ်လါဒံၣ်စဲဘၢၣ်အပူၤရၤမတံကလံၤထံးဟီၣ်ကဝီၤအပူၤတၢ်ခးလိၥ်သးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကရူၢ်အဘၢၣ်စၢၤဒီးပယီၤသုးကျိချံလီၤတဲၥ်ဝဲဆူကီၢ်ကၠီၣ်တဲၣ်တကပၤအဃိ,ဖဲလါဒံၣ်စဲဘၢၣ်(၅)သီအနံၤအပူၤပံးကွံၥ်ဝဲကီၢ်ဆၣ်(၅)ဘ့ၣ်အပူၤထံဆၢကီၢ်ဆၢချံတၢ်ဟးထီၣ်က့ၤလီၤအဂ့ၢ်,သ့ၣ်ညါဘၣ်န့ၣ်လီၤ.
တၢ်ပံးဝဲချံတြဲၤအကျါပၣ်ဃုၥ်ဝဲဒီးရၤမတံမဲၢ်ဆီးဟီၣ်ကဝီၤအဃိချံတြဲၤတဖၣ်ကးတံၥ်သးအဆၢကတီၢ်,ကီၢ်ပယီၤထံနံၤတကပၤကမျၢၢ်မုၢ်ဆ့ၣ်မုၣ်ဂီၤတၢ်သူတၢ်စွဲဒီးတၢ်အီၣ်တၢ်အီတၢ်လိၣ်ဘၣ်တဖၣ်အပှ့ၤဒိၣ်ထီၣ်ဝဲအသိး,တၢ်ဟးထီၣ်က့ၤလီၤစ့ၢ်ကီးကီခဲဝဲအဂ့ၢ်ကမျၢၢ်တဖၣ်စံးဝဲဒၣ်န့ၣ်လီၤ.
တကတီၢ်ခါခဲအံၤ,ခီဖျိတၢ်အိးထီၣ်က့ၤဝဲတြဲၤအဃိရၤမတံမဲၢ်ဆီးတၢ်စိၥ်ဆှၢတၢ်ဖိတၢ်လံၤတဖၣ်လဲၤသးဘၣ်ဂ့ၢ်ဘၣ်ဝီအသိး,တၢ်ဟးထီၣ်က့ၤလီၤဘၣ်ဘှီးဘၣ်ဒါက့ၤဝဲအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ရၤမတံမဲၢ်ဆီးကီၢ်ဆၢဟီၣ်ကဝီၤအံၤခံခီခံကပၤတၢ်ဂ့ၢ်မ့အိၣ်ထီၣ်တမံၤလၢ်လၢ်,တၢ်မၤဝဲချံတြဲၤတၢ်သမံသမိးဒီးတၢ်ကးတံၥ်ချံတြဲၤတဖၣ်အိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,လၢတၢ်ကတြီဆၢဒီသဒၢဝဲ(အိၤလဲ)တၢ်လံၣ်အီလီအီၣ်တၢ်ဖံးတၢ်မၤဒီးမၤထီဒါပှၤကူပှၤကညီတၢ်ဖံးတၢ်မၤအဂီၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်အံၤခိးကွၢ်ဟုၣ်ကွၢ်စုၣ်ဝဲတၢ်အိးသးတဖၣ်တပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
