လါအီကူး ၁၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဘုသိၣ်ကီၢ်ဆၣ် ဖီထၣ်သဝီ သီခါဖၠၣ်ကရၢၢ်အပူၤ သုးမီၤစိရိၤကဘီယူၤလဲၤတ့ၢ်လီၤဝဲ ပီၣ်(၅၀၀)မ့ၣ်ပိၢ်အဃိ သီခါပှၢ်လၢအအီၣ်ဖၠၣ်ဖဲန့ၣ်တပါယူၤကွံၥ်ဝဲဒီး တၢ်သူၣ်ထီၣ်ဟးဂူၥ်ဟးဂီၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါအီကူး ၁၈ သီ မုၢ်ထူၣ် ၁၂း၃၀ ဘျဲၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၄ ဖျၢၣ် လၢခီပူးကရူၢ် ဖီထၣ်သဝီသီခါဖၠၣ်ကရၢၢ်ပူၤဃုၥ်ဒီးအခိၣ်အဃၢၤအံၤန့ၣ်လီၤ.
ဘၣ်ဃးကဘီယူၤအတၢ်လဲၤခးလီၤတၢ်ဘျီဝဲအံၤ ဒ်သဝီဖိတဖၣ်စံးဝဲအသိးန့ၣ် ကဘီယူၤဟဲတ့ၢ်လီၤဝဲပီၣ်(၅၀၀)မ့ၣ်ပိၢ် ၄ ဖျၢၣ်ဒီး တဖျၢၣ်န့ၣ်လီၤတဲၥ်ဝဲလိၤလိၤလၢသီခါဖၠၣ်မဲၥ်ညါကရၢၢ်ပူၤဒီး တဖျၢၣ်န့ၣ်လီၤတဲၥ်ဝဲလၢသီခါဖၠၣ်တၢ်ဟးလီၢ်အဃၢၤဝံၤ မ့မ့ၢ်လၢ အဂၤ (၂)ဖျၢၣ်န့ၣ်လီၤတဲၥ်ဝဲလၢတၢ်ကလဲၤထီၣ်ဃိၣ်ကျဲအံၤ န့ၣ်လီၤ.
ခီဖျိလၢကဘီယူၤဟဲခးလီၤတၢ်လီၤတဲၥ်ပိၢ်ဖးထီၣ်ဝဲလၢသီခါဖၠၣ်ကရၢၢ်ပူၤအဃိ သီခါပှၢ်တပါလၢအသးနံၣ်အိၣ်ဝဲ(၃၃)နံၣ် အံၤ ယူၤကွံၥ်ဝဲတဘျီဃီဖဲတၢ်ကဲထီၣ် အသးန့ၣ်ဒီး လၢန့ၣ်အမဲၥ်ညါသီခါဖၠၣ်တၢ်သူၣ်ထီၣ်ဟးဂီၤဘၣ်ဒိဘၣ်ထံးတစှၤန့ၢ်ဝဲ (၃)ဖျၢၣ် အဂ့ၢ်န့ၣ် သဝီဖိတဖၣ်စံးဝဲအသိး သ့ၣ်ညါဘၣ်န့ၣ်လီၤ.
တကးဒံးဘၣ် ဖီထၣ်သဝီလၢကဘီယူၤလဲၤခးလီၤတၢ်ခဲအံၤန့ၣ် သဂၢၢ်ဘၣ်ဝဲဒီးသုးမီၤစိရိၤကဘီယူၤအတၢ်လဲၤခးလီၤ တၢ်ဒီးခဲအံၤ တဘျီန့ၣ်အိၣ်လံဝဲ(၅)ဘျီလံဒီး အပူၤကွံၥ်ကဘီယူၤလဲၤခးလီၤတၢ်အခါစ့ၢ်ကီး ကမျၢၢ်သံဘၣ်ဒိဘၣ်ထံး,တၢ်ဟးဂူၥ်ဟးဂီၤ ကဲထီၣ် တ့ၢ်ဒံးဝဲန့ၣ်လီၤ.
မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢကဘီယူၤလဲၤခးလီၤတၢ်တလီၢ်လီၢ်အံၤန့ၣ် စးထီၣ်ဖဲတနံၣ်အံၤ(၂၀၂၆) လါမ့ၤ ပယီၤသုးကျိၤ လဲၤထီၣ်ဟူးဂဲၤဘျီန့ၣ် သုးမီၤစိရိၤအံၤသူဝဲဒၣ်ကျိဖးဒိၣ်,ဒြိအမဲၥ်ညါ တနံၤဘၣ်တနံၤ သူဝဲဒၣ်ကဘီယူၤလဲၤခးလီၤတၢ်လၢ ကမျၢၢ်အိၣ်ဆိး လီၢ်ကျဲဟဲအါထီၣ်ဝဲဒၣ်ဖျိဖျိဖျါဖျါန့ၣ်လီၤ.
ဒီးခီဖျိလၢသုးမီၤစိရိၤအတၢ်မၤထီဒါပှၤဂ့ၢ်ဝီခွဲးယၥ်အံၤအဃိ လီၢ်ကဝီၤကမျၢၢ်တဖၣ်သဂၢၢ်ဘၣ်ဝဲတၢ်သံတၢ်ပှၢ်, တၢ်ဘၣ်ဒိ ဘၣ်ထံး အိၣ်ဝဲတလီၢ်လီၢ်န့ၣ်လီၤ.
