လါအီကူၥ် ၂၁သီ, ၂၀၂၆နံၣ်, ခ့ၣ်အဲးစံၣ်,
သူမွဲထံကျိဒိၣ်ထီၣ်ဝဲအဃိ, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢ ရၤမတံဝ့ၢ်ပူၤလီၢ်ကဝီၤကမျၢၢ်အဂၤ(၅၀၀)ဃၣ်ဃၣ် ဘၣ်သုးလီၢ်သုးကျဲဒီး လၢကီၢ်ကၠီၣ်တဲၣ် မဲၢ်ဆီးဝ့ၢ်ကမျၢၢ်လီၢ်ကဝီၤဖိလၢအိၣ် တၢ်လီၤဘၣ်ယိၣ်လီၢ်တဖၣ် ကသုးလီၢ်ကျဲ ဒီး အိၣ်ကတီၤ ဆိပၥ်ဝဲအသးအဂ့ၢ်,ကၠီၣ်တဲၣ်တၢ်မၤစှၤလီၤတၢ်ဘၣ်ဒိဘၣ်ထံး(DDPM)ဟ့ၣ်ပလီၢ်ဝဲဒၣ်န့ၣ်လီၤ.
သူမွဲထံကျိအံၤ မဟါလါအီကူၥ်(၂၀)သီမုၢ်နၤခီအဆၢကတီၢ် ဒိၣ်ထီၣ်တလၢဝဲ ထံတၢ်လီၤဘၣ်ယိၣ် အတၢ်ပၥ်ပနီၣ်တၢ် မၤနီၣ်အဃိ, ရၤမတံဝ့ၢ်လီၢ်ကဝီၤကမျၢၢ်(၅၀၀)ဃၣ်ဃၣ်ဘၣ်သုးလီၢ်သုးကျဲဆူ ဂ့ၢ်ဂီၢ်အူတၢ်ပၥ်ပနီၣ်တၢ်အိၣ်ကဒုလီၢ်ဒီး တနံၤအံၤ လါအီကူၥ်(၂၁)သီဂီၤခီအပူၤ မဲၢ်ဆီးဝ့ၢ်ဟီၣ်ကဝီၤပူၤ ကမျၢၢ်လီၢ်ကဝီၤဖိလၢအိၣ်တၢ်လီၢ်လီၤဖုၣ်ဒီး တၢ်ဘၣ် ယိၣ်တဖၣ် ကအိၣ်ကတီၤသးလၢ တၢ်သုးလီၢ်သုးကျဲအဂ့ၢ် (DDPM)ဟ့ၣ်ပလီၢ်ဝဲဒၣ်စ့ၢ်ကီးန့ၣ်လီၤ.
တနံၤအံၤ ထံဒိၣ်ထီၣ်အတၢ်အိၣ်သးအဖီခိၣ်, ဝ့ၢ်လီၢ်ကဝီၤပိၥ်မုၣ်လၢအိၣ်ဘူးဒီး ရၤမတံမဲၢ်ဆီးတိၤနီၣ်ဂံၢ်(၁) Rim Moei Market တဂၤစံးဝဲ လၢ “တဂီၤအံၤထံဒိၣ်ထီၣ် ပဘၣ်ယိၣ်လၢထံကနုၥ်လီၤပဟံၣ်ပူၤအဃိခဲအံၤ ပကတီၤထီၣ်တၢ်ဖိတၢ်လံၤ န့ၣ်လီၤ. ပှၤတနီၤဒုစိၥ် အတၢ်ဖိတၢ်လံၤ သုးအသးအိၣ်ဝဲန့ၣ်လီၤ.”အဂ့ၢ်စံးဝဲန့ၣ်လီၤ.
ခီဖျိထံဒိၣ်ထီၣ်ဝဲအဃိ, ကမျၢၢ်အိၣ်ထံကျိကၢၢ်နံၤ အဟံၣ်တနီၤအပူၤ ထံနုၥ်လီၤဝဲဒီး သိလ့ၣ်တနီၤဟးက့ၤဝဲတသ့လၢၤဘၣ်အဂ့ၢ်, သ့ၣ်ညါ ဘၣ်န့ၣ်လီၤ.
တၢ်အံၤအဖီခိၣ်, ရၤမတံဝ့ၢ်ကလံၤထံး သ့ၣ်ဘီဘိ ပှၤကွၢ်ထွဲလီၢ်အိၣ်ကဒုဆူချ့မူဒါခိၣ် စီၤလါဝါ စံးဝဲလၢ“မဟါန့ၣ် တထီၣ်ထဲအံၤဘၣ်, တဂီၤအံၤထီၣ်ဒိၣ်ထီၣ် တစဲးအဃိ ခဲအံၤထံထီၣ်ဘၢလၢထံကျိနံၤ ပှၤဆါတၢ်ကျးဒီး ပှၤဟံၣ်သ့ၣ် တဖၣ်န့ၣ်အပူၤလံ သနၥ်က့မ့မ့ၢ်လၢ ပတၢ်ဆါဟံၣ်ဒုတတုၤထီၣ်ဒံးဘၣ်.”အဂ့ၢ်စံးဝဲန့ၣ်လီၤ.
ဒ်ရၤမတံဝ့ၢ်ပှၤဘၣ်မူဘၣ်ဒါတဖၣ် ထိၣ်ဒွးဝဲအသိးန့ၣ်, သူမွဲထံကျိအံၤ တနံၤအံၤလါအီကူၥ် (၂၁)သီမုၢ်ဝါထီၣ်(၂)နၣ်ရံၣ် အဆၢကတီၢ် ဒိၣ်ထီၣ်ဝဲတုၤ လၢ(၁၀၆၆)စ့ၣ်တံၣ်မံၣ်ထၢၣ် ဒီး တနၣ်ရံၣ်အတီၢ်ပူၤ ဒိၣ်ထီၣ်ဝဲ (၂၀)မျးကယၤ စ့ၣ်တံၣ် မံၣ်ထၢၣ်အဂ့ၢ်, သ့ၣ်ညါဘၣ် န့ၣ်လီၤ.
ဒ်န့ၣ်အသိး, ကၠီၣ်တဲၣ် မဲၢ်ဆီးဝ့ၢ်ပူၤတကပၤစ့ၢ်ကီး တၢ်လီၢ်တနီၤအပူၤထံဒိၣ်ဝဲဒီးတၢ်ဟးထီၣ်က့ၤလီၤကီ, တၢ်လီၤ ဘၣ်ယိၣ်အိၣ်ဝဲ အဃိ ကၠိအါဖျၢၣ် ပံးကွံၥ်ဝဲအသးအဂ့ၢ်, သ့ၣ်ညါဘၣ်န့ၣ်လီၤ.
