လါစဲးပထ့ဘၢၣ် ၉ သီ, ၂၀၂၆ နံၣ်, ခ့ၣ်အဲးစံၣ်
ထံသဲလ့သဝီလၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢ သဂၢၢ်ဘၣ်ဝဲ ကျိဖးဒိၣ်, ကဘီယူၤအတၢ်လဲၤခးလီၤတၢ်တလီၢ်လီၢ်အံၤန့ၣ် ဖဲလါစဲးပထ့ဘၢၣ် ၇ သီ တနံၤဃီအတီၢ်ပူၤ ကဘီယူၤလဲၤတ့ၢ်လီၤကဒီးဝဲ မ့ၣ်ပိၢ် ဒီးပယီၤသုးခးလီၤစ့ၢ်ကီးဝဲကျိဖးဒိၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါစဲးပထ့ဘၢၣ် ၇ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ် ကဘီယူၤလဲၤတ့ၢ်လီၤဝဲမ့ၣ်ပိၢ်(၄)ဖျၢၣ်လၢ ကတၢတံၥ်ကရူၢ် ထံသဲလ့သဝီပူၤဒီး တကတီၢ်ဃီလၢန့ၣ်အမဲၥ်ညါပယီၤသုးလၢအိၣ်ကတၢတံၥ်သုးကလၢၤအံၤတဖၣ် ခးလီၤ စ့ၢ်ကီးဝဲကျိဖးဒိၣ်(၅)ဖျၢၣ် န့ၣ်လီၤ.
လၢကဘီယူၤအတၢ်လဲၤခးလီၤတၢ်ဒီးပယီၤသုးခးလီၤကျိဖးဒိၣ်ဘျီဝဲအံၤအပူၤန့ၣ် ကမျၢၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ် ဟံၣ်ဟးဂီၤလီၤပှီၢ်ဝဲ(၅)ဖျၢၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
အဝဲစံးဝဲလၢ“ကဘီယူၤခးလီၤတၢ်ဘျီဝဲအံၤပှၤသဝီဖိတၢ်သံတၢ်ဘၣ်ဒိဘၣ်ထံးဒုတအိၣ်ဘၣ်.ဘၣ်မနုၤလဲၣ်န့ၣ်ပှၤသဝီဖိန့ၣ်ဃ့ၢ်ထီၣ်ဟးစံၣ် အိၣ်ဖးယံၤလံ. ဘၣ်ဆၣ်ဟံၣ်န့ၣ်ဟးဂီၤ(၅)ဖျၢၣ်”အဂ့ၢ်န့ၣ် စံးဝဲန့ၣ်လီၤ.
ထံသဲလ့သဝီအံၤတမ့ၢ်ထဲတၢ်တဘျီအံၤဘၣ်မ့မ့ၢ်တခီအပူၤကွံၥ်လၢညါခါစ့ၢ်ကီးဘၣ်ကွၢ်ဆၢၣ်မဲၥ်ဝဲသုးမီၤစိရိၤအကဘီယူၤဒီး ကျိဖးဒိၣ်အတၢ်ထီၣ်ဒုးအိၣ်ဝဲတပယူၥ်ဃီဒီး အဘူးကတၢၢ်ဖဲလါအီကူးထီၣ်အခါန့ၣ်စ့ၢ်ကီးကဘီယူၤလဲၤခးလီၤဒံးတၢ်လၢသဝီပူၤ ဝဲအံၤအဃိ ကမျၢၢ်ဟံၣ်ဟးဂီၤဒံးဝဲန့ၣ်လီၤ.
တကီၢ်ခါခဲအံၤလၢကလဲၤထီၣ်ဆူဖၣ်ပူၣ်အဂီၢ်တၢ်ဆၢကတီၢ်မ့အိၣ်ဝဲ(၄)လါဘျဲၣ်လံဘၣ်ဆၣ် ပယီၤသုးကျိၤသ့ၣ်တဖၣ်အံၤအိၣ်က တၥ်ထီဒံးအသးဖဲကတၢတံၥ်ကရူၢ် ဖါလိဒိၣ်ဟီၣ်ကဝီၤဒီး ခီဖျိဘၣ်တၢ်ခိးခးအဝဲသ့ၣ်လၢဟီၣ်ကဝီၤ(KNLA)သုးပၥ်ဖှိၣ်အဃိ ဆဲးထီၣ်ဆူညါတန့ၢ်ဒံးဘၣ်န့ၣ်လီၤ.
ဘၣ်ဃးပယီၤသုးကျိၤတၢ်အိၣ်သးအံၤန့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲလၢ“ပယီၤသုးလၢအဟဲထီၣ်တဖၣ် အံၤခဲအံၤအိၣ်ဒံးဝဲဒၣ်ဖဲဖါလိဒိၣ်ဟီၣ်ကဝီၤန့ၣ်ဒံးလီၤ. ဆဲးထီၣ်ဝဲလၢညါတန့ၢ်ဒံးဘၣ်.တၢ်ဒုးဒုကဲထီၣ်ကိးမုၢ်နံၤဒဲးဃၣ်ဃၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
စးထီၣ်လၢပယီၤသုးဟဲထီၣ်ဟူးဂဲၤဝဲလၢကတၢတံၥ်ကရူၢ်ပူၤန့ၣ် ထံသဲလ့သဝီဃုၥ်ဒီး ကရူၢ်လၢအဂၤ ဒူသဝီလၢအိၣ်ဘူးဖဲန့ၣ် သ့ၣ်တဖၣ် အါဒၣ်တက့ၢ်သဂၢၢ်ဘၣ်ဝဲကျိဖးဒိၣ်ဒီးကဘီယူၤအတၢ်ဟဲခးလီၤတၢ်ကိးမုၢ်နံၤဒဲးဃၣ်ဃၣ်ဒီး ဒ်န့ၣ်အသိးခီဖျိလၢ တၢ်သ့ၣ်တဖၣ်အံၤအဃိစ့ၢ်ကီး ကမျၢၢ်သံဘၣ်ဒိဘၣ်ထံးအမဲၥ်ညါဟံၣ်,တၢ်ဘူၣ်တၢ်ဘါတၢ်သူၣ်ထီၣ်ဟးဂီၤကဲထီၣ်ဝဲ တလီၢ်လီၢ်စ့ၢ်ကီးန့ၣ်လီၤ.
