လါစဲးပထ့ဘၢၣ် ၂၅ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ လါစဲးပထ့ဘၢ ၁ သီတုၤလၢ ၁၅ သီ လၢလါတဝၥ် အတီၢ်ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်ဝဲ(၄၇)ဘျီ အဂ့ၢ်န့ၣ် ကီၢ်ရ့ၣ် တၢ်ကစီၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
လၢ(၁၅)သီ တၢ်ဒုးကဲထီၣ်(၄၇)ဘျီအတီၢ်ပူၤအံၤ ပယီၤသုးသံ(၂၂)ဂၤ,ဘၣ်ဒိဘၣ်ထံးဝဲ(၂၀)ဂၤဒီး ဘၣ်ဒိဘၣ်ထံးတဖၣ်အကျါ ပၣ်ဃုၥ်ဝဲ သုးခိၣ်စိ(၂)ဂၤဒီးသုးခိၣ်ဖိ(၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဟီၣ်ကဝီၤပူၤတၢ်ဒုးတၢ်ယၤကဲထီၣ်အမဲၥ်ညါ သုးမီၤစိရိၤအံၤသူဝဲဒၣ်ကဘီယူၤ(၅)ဘျီ ခးလီၤဝဲမ့ၣ်ပိၢ်(၂၉)ဖျၢၣ်, တ့ၢ်လီၤဝဲ ဒြိမ့ၣ်ပိၢ်(၃၀)ဘျီဒီး ခးလီၤဝဲ(၁၂၀ မမ)ကျိဖးဒိၣ်(၁၆)ဘျီ အချံ(၇၈)ဖျၢၣ်ဆူလီၢ်ကဝီၤကမျၢၢ်ဒူသဝီ,တၢ်ဖံးအီၣ်မၤအီၣ် လီၢ်ကျဲ တဖၣ်အပူၤန့ၣ်လီၤ.
ဒီးခီဖျိလၢသုးမီၤစိရိၤအကဘီယူၤ,ကျိဖးဒိၣ်ဒီးဒြိတၢ်ဟူးတၢ်ဂဲၤသ့ၣ်တဖၣ်အံၤအဃိ လၢ(၁၅)သီအတီၢ်ပူၤအံၤ ကမျၢၢ်ဟံၣ်(၁၆)ဖျၢၣ် ဒီး ဒဲ(၄)ဖျၢၣ်လီၤပှီၢ်ဟးဂူၥ်ဟးဂီၤဘၣ်ဒိဘၣ်ထံးအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
(သုးက့ ၅)ဟီၣ်ကဝီၤလၢတၢ်ဒုးကဲထီၣ်ဝဲတပယူၥ်ဃီအံၤ ဒ်တလါတဘျီတၢ်မၤနီၣ်စရီပူၤအိၣ်ဝဲအသိးန့ၣ် အပူၤကွံၥ်လါအီကူး တၢ်ဒုး ကဲထီၣ်တလါအတီၢ်ပူၤန့ၣ် ခံခီခံကပၤအဘၢၣ်စၢၤတၢ်ဒုးကဲထီၣ်ဝဲ(၁၁၇)ဘျီဒီးဖဲန့ၣ်ပယီၤသုးတကပၤသံဝဲ(၄၃)ဂၤ, ဘၣ်ဒိဘၣ်ထံး (၄၂)ဂၤကဲထီၣ်ဒံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤဟီၣ်ကဝီၤပူၤဖဲန့ၣ်အပူၤ ကမၤမိၢ်-ကတၢတဲၥ်ဘၢၣ်စၢၤလၢပယီၤသုးဟဲထီၣ်ဟူးဂဲၤဝဲတၢ်ဆၢကတီၢ်န့ၢ်ဝဲ (၆) လါဃၣ်ဃၣ်အံၤ ဒုးယၤတၢ်ဖ့ၣ်စၢဆဲးကဲထီၣ်ဝဲလၢခံခီခံကပၤအဘၢၣ်စၢၤအဖၢမုၢ်တုၤလၢခဲအံၤန့ၣ်လီၤ.
