လါစဲးပထ့ဘၢၣ် ၂၄ သီ, ၂၀၂၆ နံၣ်, ခ့ၣ်အဲးစံၣ်
ပဒိၣ်မါရှၤသးစၢ်ခိၣ်နၢ်ဖိခိၣ်ဖး လၢတၢ်ဟ့ၣ်ဝဲသးစၢ်(၃၅)နံၣ်ဆူဖီလၥ်လၢအဟူးဂဲၤဖံးမၤတၢ်လၢပှၤတဝၢတၢ်ဒိၣ်ထီၣ်ထီထီၣ်ဂီၢ်လၢ အတကွၢ်နီၢ်ကစၢ်တၢ်ဘၣ်ဘျုးဘၣ်အံၤန့ၣ် တနံၣ်အံၤ(၂၀၂၆)အဂီၢ် ပတံထီၣ်မံၤသ့ဝဲလံအဂ့ၢ်န့ၣ် (Phan Foundation) ထုးထီၣ်ဒုးသ့ၣ်ညါပၥ်ဖျါကဒီးဝဲဖဲမဟါလါစဲးပထ့ဘၢၣ် ၂၃ သီအံၤန့ၣ်လီၤ.
Phan Foundation ခိၣ်ဖးလၢတၢ်ဟ့ၣ်လီၤဝဲကိးမုၢ်နံၣ်ဒဲးအံၤန့ၣ် ဒ်သိးတၢ်ကမၤဖျါထီၣ်ဝဲ ကညီသူၣ်ဘီၣ်သးစၢ်လၢအအိၣ်ဒီး တၢ်ဂုၥ်ကျဲးစၢၤ,ဟ့ၣ်လီၤသးနီၢ်နီၢ်လၢပှၤကလုၥ်တၢ်ဖံးတၢ်မၤပူၤသ့ၣ်တဖၣ်အဃိ တၢ်ကရၢကရိခိၣ်နၢ်တဖၣ်ဆှၢထီၣ်ကရူၢ် ပှၤမၤသကိးဖိ သးစၢ်သ့ၣ်တဖၣ်အံၤမံၤသ့ဝဲဒၣ်လံအဂ့ၢ်န့ၣ် စံးဝဲန့ၣ်လီၤ.
“ခိၣ်ဖးဝဲအံၤန့ၣ်တမ့ၢ်ထဲပှၤလၢအဟ့ၣ်လီၤသးမၤစၢၤတၢ်လၢကညီကလုၥ်အဂီၢ်ဘၣ်မ့မ့ၢ်တခီ ဒုးကဲထီၣ်စ့ၢ်ကီးဝဲဒၣ်တၢ်ဂံၢ်တၢ်ဘါဒီး ဒုးထိၣ်ဟူးထိၣ်ဂဲၤထီၣ်ပသးလၢပှၤခဲလၢၥ်အဂီၢ်လီၤ.”အဂ့ၢ်န့ၣ် ပှၤနဲၣ်တၢ် နၣ်ဘွါဘွါဖါ စံးဝဲဒၣ်လၢ(Phan Foundation)အလံၥ် တၢ်ပၥ်ဖျါ အပူၤ န့ၣ်လီၤ.
ပဒိၣ်မါရှၤသးစၢ်ခိၣ်နၢ်ဖိခိၣ်ဖးအဂီၢ်တၢ်ပၥ်ပနီၣ်ဝဲလၢ ကဘၣ်မ့ၢ်ဝဲကညီကလုၥ်,သးနံၣ်ကဘၣ်အိၣ်ဝဲ (၃၅)နံၣ်ဆူ ဖီလၥ်ဒီး ကယဲၢ်မ့ၢ် ကညီသူၣ်ဘီၣ်သးစၢ်လၢအိၣ်တၢ်လီၢ်တတီၤတတီၤဂ့ၤမ့ၢ်ဂ့ၤ, အပူၤကွံၥ်ပှၤလၢအပတံထီၣ်ဃၥ် မံၤလၢတဒိးန့ၢ်ဘၣ် ခိၣ်ဖးအံၤဒံး ဘၣ် တဖၣ်စ့ၢ်ကီး ပတံထီၣ်ကဒါသ့ဝဲအဂ့ၢ်န့ၣ် လီၤ.
ဒီးကညီသူၣ်ဘီၣ်သးစၢ်လၢအပတံထီၣ်တၢ်အံၤတဖၣ် ကဘၣ်ကွဲးလီၤအမံၤတၢ်ဂ့ၢ်တၢ်ကျိၤလၢကညီကျိၥ်, ပယီၤကျိၥ် မ့တမ့ၢ် ကီၤလၤဝါကျိၥ်ဝံၤဆှထီၣ်အီၤဆူ bwabwa.phan@phanfoundation.org ဒီး လံၥ်ပတံထီၣ် အံၤတၢ်ကတူၢ်လိၥ်ဝဲ စဲၤခံကတၢၢ်ဖဲ (၂၀၂၆) လါဒံၣ်စ့ဘၢၣ် ၃၁ သီအံၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဖဲန့ၣ်ဝံၤပှၤလၢအကြၢးဝဲဒီးပဒိၣ်မါရှၤသးစၢ်ခိၣ်နၢ်ဖိခိၣ်ဖးလၢတၢ်ဃုထၢထီၣ်ဝဲအံၤ တၢ်ကဘိးဘၣ်ရၤလီၤကဒါက့ၤဝဲဖဲ(၂၀၂၇)နံၣ် ထီၣ်အံၤ ဒီး ခိၣ်ဖးအံၤတၢ်ကဟ့ၣ်လီၤမၤလၤကပီၤဝဲလၢကီၢ်အမဲရၤကၤစ့ဒီလၣ်(၅၀၀၀)ဃုၥ်ဒီးလံၥ်တၢ်လၤကပီၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
လၢတၢ်သ့ၣ်နီၣ်ထီၣ်က့ၤခ့ၣ်အဲၣ်ယူၣ်-ကညီဒီကလုၥ်စှဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါဒီး အမါနၣ်ကၠ့ၤစွ့ၤ (၂)ဂၤအံၤအဂီၢ် Phan Foundation အံၤဘၣ်တၢ်စးထီၣ်ဒုးအိၣ်ထီၣ်အီၤဖဲ(၂၀၀၈)နံၣ်လၢအဖိမုၣ်ဖိခွါ(၄)ဂၤအံၤသ့ၣ်တဖၣ် န့ၣ်လီၤ.
ဒီးစးထီၣ်လၢတၢ်ဒုးအိၣ်ထီၣ်ဝဲ Phan Foundation အံၤဝံၤလီၢ်ခံန့ၣ် တနံၣ်တဘျီသးစၢ်ခိၣ်နၢ်ဖိခိၣ်ဖးအမဲၥ်ညါ Foundation အံၤ ဂဲၤလိၥ်ဃုၥ်ဝဲလၢတၢ်လၢကူၣ်သ့,ပှၤဂ့ၢ်ဝီခွဲးယၥ်,တၢ်ဆဲးတၢ်လၤတကပၤဒီး တကးဒံးဘၣ်ကညီကမျၢၢ်လၢဘၣ် ကွၢ်ဆၢၣ်မဲၥ်ဝဲ တၢ်ဒုးတၢ်ယၤသ့ၣ်တဖၣ် ဆှၢလီၤဟ့ၣ်ဝဲတၢ်ဆီၣ်ထွဲမၤစၢၤအိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
