လါစဲးပထ့ဘၢၣ် ၂၉ သီ, ၂၀၂၆ နံၣ်, ခ့ၣ်အဲးစံၣ်
သုးမီၤစိရိၤကဘီယူၤ ကဘီယူၤလဲၤခးလီၤတၢ်လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ်ပူၤ ယိၤကျါသဝီမုၢ်နုၥ်ဒီး သဝီမုၢ်ထီၣ်ကၠိ ဝံၤလီၢ်ခံ ဒူသဝီကၠိလၢအဂၤသ့ၣ်တဖၣ် ဆဲးမၤလိတၢ်လၢကၠိပူၤတဘူၣ် လၢၤဘၣ် ဘၣ်သုးလီၢ်မၤလိက့ၤတၢ်လၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်တလါအံၤလါစဲးပထ့ဘၢၣ် ၁၉ သီ မုၢ်နၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစရိၤအံၤပၥ်ဝဲတၢ်ခး ပနီၣ်လဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၄ ဖျၢၣ်ဆူ ယိၤကျါသဝီမုၢ်နုၥ်ကၠိ ဒီး ယိၤကျါသဝီမုၢ်ထီၣ်ကၠိအဃိ တၢ်သံတၢ်ဘၣ်ဒိဘၣ်ထံး မ့တအိၣ်ဘၣ်ဘၣ်ဆၣ် ဖဲန့ၣ်ကၠိတၢ်သူၣ်ထီၣ်လီၤပှီၢ်ဟးဂီၤဝဲတစှၤန့ၢ်(၅)ဖျၢၣ်ဒီးကမျၢၢ်ဟံၣ်ဘၣ်ဒိဘၣ်ထံးဝဲအဖျၢၣ်(၄၀)ဃၣ်ဃၣ် န့ၣ်လီၤ.
ဒီးစးထီၣ်ဖဲယိၤကျါသဝီသဂၢၢ်ဘၣ်ဝဲကဘီယူၤတၢ်ထီၣ်ဒုးဝံၤလီၢ်ခံန့ၣ် ဒူသဝီကၠိအဂၤလၢအိၣ်ဘူးဖဲတၢ်အခိၣ်အဃၢၤတဖၣ် တၢ်အိးထီၣ်ဝဲတဘူၣ်လၢၤဘၣ်တကးဒံးဘၣ် တုၤလၢခဲအံၤကဘီယူၤတၢ်လီၤဘၣ်ယိၣ်အိၣ်ဒံးဝဲအဖီခိၣ် ကီၢ်ဆၣ်လၢအဂၤ ကၠိပှၤဘၣ်မူဘၣ်ဒါတဖၣ် ရဲၣ်ကျဲၤမၤလိက့ၤကၠိဖိလံၥ်လၢတၢ်လၢတၢ်ဘံၣ်တၢ်ဘၢလီၢ်ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ကၠိသရၣ်မုၣ်လၢအအိၣ်တယံၤတဘူးဒီးယိၤကျါသဝီအံၤတဂၤ စံးဝဲလၢ “ဖဲကဘီယူၤဟဲခးလီၤတၢ်ဖဲယိၤကျါဝံၤအခါန့ၣ် ပကၠိ စ့ၢ်ကီးအိးထီၣ်တဘူၣ်လၢၤဘၣ်. တချုးအဟဲခးလီၤတၢ်ဒံးဘၣ်အခါဒုပမၤလိဒံးတၢ်လၢကၠိပူၤလီၤ.ဘၣ်ဆၣ်စးထီၣ်လၢတၢ်ကဲ ထီၣ်သးဖဲန့ၣ်ဘျီပထီၣ်လၢကၠိပူၤတဘူၣ်လၢၤဘၣ်. ဒ်သိးပှၤကၠိဖိတဖၣ်သုတစဲၤခံလၢလံၥ်တဂ့ၤအဂီၢ် ပနီၤဖးလီၤသးဒီးပမၤ လိန့ၢ်က့ၤအဝဲသ့ၣ်လၢတၢ်ဘံၣ်တၢ်ဘၢလီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘံလ့ကီၢ်ဆၣ်ဟီၣ်ကဝီၤအမဲၥ်ညါ ကၠိလၢအိၣ်ကီၢ်ဆၣ်အဂၤအပူၤတဖၣ်စ့ၢ်ကီး ဘၣ်ယိၣ်ဝဲလၢကဘီယူၤကဟဲခးလီၤတၢ်ဒ် ယိၤကျါကၠိအံၤဒီးတကးဒံးဘၣ်ဟီၣ်ကဝီၤအပူၤကဘီယူၤဟဲဆှၣ်တၢ်ကိးမုၢ်နံၤဒဲးအဃိ ကၠိတဖၣ်အါဒၣ်တက့ၢ်န့ၣ်တဆဲးမၤလိ တၢ်လၢကၠိပူၤလၢၤ ဘၣ်မ့မ့ၢ်တခီ သုးလီၢ်သုးကျဲမၤလိက့ၤတၢ်လၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်လၢ ပှၤဘၣ်မူဘၣ်ဒါ အအိၣ် န့ၣ်လီၤ.
ဘၣ်ဃးတၢ်ဂ့ၢ်အံၤ ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဝဲလၢ “ဒူသဝီလၢအိၣ်ဘူးယိၤကျါသဝီတကးဒံး ဘၣ်န့ၣ် ကီၢ်ရ့ၣ်ပူၤကီၢ်ဆၣ်လၢအဂၤတဖၣ်န့ၣ်စ့ၢ်ကီး ပသ့ၣ်ညါဘၣ်လၢကၠိတဖၣ်သိၣ်လိတၢ်လၢကၠိပူၤတဘူၣ်လၢၤဘၣ်.အဃိ ကၠိကမံးတံၥ်တဖၣ်န့ၣ်ရဲၣ်ကျဲၤဝဲဒီး ပှၤကၠိဖိတဖၣ်န့ၣ်ပှၤမၤလိန့ၢ်က့ၤအဝဲသ့ၣ်လံၥ်လၢတၢ်ချၢတၢ်ဘံၣ်တၢ်ဘၢအလီၢ်လီၤ.
မ့မ့ၢ် လၢကၠိပူၤန့ၣ်တၢ်ဘၣ်ယိၣ်အိၣ်လၢကဘီယူၤကဟဲခးလီၤတၢ်ဒီးပှၤနၢ်ဟူလၢကဘီယူၤဟဲခးလီၤတၢ်ဖဲယိၤကျါကၠိဝံၤဘျီန့ၣ် အဝဲ သ့ၣ်တၢ်ဘၣ်ယိၣ်ဘၣ်ဘှီအိၣ်အဃိတပျဲသိၣ်လိဖိသၣ်လံၥ်လၢကၠိပူၤလၢၤဘၣ်ဒီးရဲၣ်ကျဲၤန့ၢ်က့ၤဝဲတၢ်လီၢ်လၢအဂၤ”အဂ့ၢ်န့ၣ် စံးစ့ၢ်ကီးဝဲန့ၣ်လီၤ.
ဒူသထူၣ်ကီၢ်ရ့ၣ်ဟီၣ်ကဝီၤအမဲၥ်ညါကီၢ်ရ့ၣ်/သုးက့ဃုၥ်ဒီးကလုၥ်ဒူၣ်တၢ်ပၢၢ်ဆၢဟီၣ်ကဝီၤအဂၤတဖၣ်အပူၤ သုးဟံန့ၢ်ဆူၣ်ထံကီၢ် တၢ်စိတၢ်ကမီၤဝံၤလီၢ်ခံ တၢ်ဒုးတၢ်ယၤကဲထီၣ်ဒီးသုးမီၤစိရိၤဘၣ်ဟ့ၣ်ဆှူ ကွံၥ်အသုးကလၢၤဟီၣ်ကဝီၤတၢ်လီၢ်တၢ်ကျဲအါမးအဖီခိၣ် သူဝဲကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်လၢဒူသဝီ, ကၠိတၢ်သူၣ်ထီၣ်ဒီး တၢ်ဘူၣ်တၢ်ဘါလီၢ်လၢအတၢ်ဘျးစဲတအိၣ်ဝဲဒီး တၢ်ပၢၢ်ဆၢ ကရူၢ်ကရၢအံၤဟဲအိၣ်ထီၣ်ဝဲဖျိဖျိဖျါဖျါန့ၣ်လီၤ.
တကီၢ်ခါခဲအံၤ လၢကၠဲးထိၣ်ကီၢ်ဆၣ်ဟီၣ်ကဝီၤ ဒူသဝီကမျၢၢ်တၢ်ဖံးအီၣ်မၤအီၣ်လီၢ်ကျီးပူၤဃုၥ်ဒီး(PDF)အိၣ်ဆိးလီၢ်တဖၣ်စ့ၢ်ကီး စှၤသီအတီၢ်ပူၤအံၤ ကျိဖးဒိၣ်အမဲၥ်ညါကဘီယူၤလဲၤခးလီၤဝဲတၢ်ကိးမုၢ်နံၤဒဲးဃၣ်ဃၣ်ဒီး ကမျၢၢ်စ့ၢ်ကီးသံဘၣ်ဒိဘၣ်ထံးအိၣ်ထီၣ် တပယူၥ်ဃီအသိး ကၠိလၢအိၣ်ဘူးတၢ်ကဲထီၣ်သးလီၢ်အခိၣ်အဃၢၤအံၤတဖၣ် ဘၣ်ဆိကတီၢ်ကွံၥ်ဝဲတၢ်ဖံးလိမၤဒိး ဒီးဘၣ်သုးလီၢ် သုးကျဲ မၤလိက့ၤတၢ်လၢတၢ်ဘံၣ်တၢ်ဘၢအိၣ်အလီၢ်အိၣ်ဝဲအါးမး စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤ.
