လါအီးကထိဘၢၣ် ၉သီ, ၂၀၂၆နံၣ်, ခ့ၣ်အဲးစံၣ်.
ခ့ၣ်အဲၣ်ယူၣ် – ကီၢ်ရ့ၣ်ဘျံးဒဝဲၢ် ကီၢ်ဆၣ်ကစၢၢ်ဒိၣ် စီဃ့ဟီၣ်ကဝီၤ ထံမဲးဘီသဝီအပူၤ ဖဲလါအီးထိဘၢၣ် ၆ သီအနံၤန့ၣ် သုးမီၤစိရိၤအသုး ဖီၣ်ဆူၣ်မၤတၢ်မၤအၢမၤနး ဒီးမၤသံဝဲဒၣ် ပှၤထံဖိကီၢ်ဖိတဂၤအဂ့ၢ် ကညီဒီကလုာ်စၢဖှိၣ်ကရၢ (KNU)- ကီၢ်ရ့ၣ်ဘျံးဒဝဲၢ် ထုးထီၣ်ပာ်ဖျါဝဲ ဖဲလါအီးထိဘၢၣ် ၉ သီအနံၤန့ၣ်လီၤ.
တၢ်ဘိးဘၣ်ပာ်ဖျါအပူၤ ပာ်ဖျါဝဲလၢ သုးမီၤစိရိၤအသုးရ့ၣ် (ခမရ- ၄၀၃, ၄၀၄, ၄၀၉) ပာ်ဖှိၣ်သုးကျိၤ ဖီၣ်ဆူၣ်မၤနးဒီး မၤသံဝဲဒၣ် ထံမဲးဘီသဝီ (သဲခၠီကၠံသဝီ) အပူၤ ပှၤထံဖိကီၢ်ဖိတဂၤ လၢအတအိၣ်ဒီးတၢ်ဂ့ၢ်တၢ်ကျိၤနီတမံၤဘၣ်န့ၣ်လီၤ.
ဘၣ်ဃးဒီးတၢ်ဂ့ၢ်အံၤန့ၣ် ခီဖျိ ထံလုၢ်ဘၢတၢ်အဃိ ပှၤသဝီဖိတဖၣ်အံၤဒ်သိးကလဲၤပှ့ၤတၢ်အီၣ်လၢဝ့ၢ်ပူၤအဂီၢ်သဂၢၢ်ဘၣ်ဒီးသုးကရူၢ်အပှၤဒီးဖီၣ်မၤသံဝဲဒ်အံၤလီၤအဂ့ၢ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် အပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ.
အဝဲစံးဝဲဒၣ်လၢ “ထံလုၢ်ဘၢတၢ်,တၢ်ဟးဂူၥ်ဟးဂီၤဝံၤအလီၢ်ခံန့ၣ် ပှၤသဝီိဖတဖၣ်လဲၤပှ့ၤအီၣ်တၢ်ဆူဝ့ၢ်ပူၤအိၣ်န့ၣ်လီၤ.ဖဲလဲၤလၢကျဲအခါသဂၢၢ်ဘၣ်ဒီး သုးကရူၢ်အပှၤဒီးဘၣ်တၢ်မၤသံန့ၣ်လီၤ.”အစံးဝဲဒၣ်န့ၣ်လီၤ.
လၢန့ၣ်အမဲၥ်ညါ သယဲးခၠီ ဟီၣ်ကဝီၤပူၤ ဖဲလါစဲးပထ့ဘၢၣ် ၂၇ သီ ဒီး ၂၈ သီအနံၤန့ၣ် ထံလုၢ်ဘၢဒီး ဟီၣ်ခိၣ်လီၤလၥ်တၢ်အဃိ ဒူသဝီတဖၣ်အပူၤ သုးမီၤစိရိၤအသုးတဖၣ် စံးဝဲလၢ ကမၤဂ့ၤထီၣ်ကျဲဒီး တိၤတဖၣ် ဒီးကမၤစၢၤပှၤဘၣ်ကီဘၣ်ခဲတဖၣ်အဂီၢ် ဟဲနုာ်လီၤဝဲဒီး သုးဂံၢ်ဘါအါအါ ဒ်သိးကဟဲထီၣ်ထိ သုးကျိၤ အဂ့ၢ်န့ၣ် ဘျံးဒဝဲၢ်ကီၢ်ရ့ၣ် ပှၤဘၣ်မူဘၣ်ဒါဝဲတဲအါထီၣ်ဝဲဒၣ် န့ၣ်လီၤ.
ဘျံးဒဝဲၢ်ကီၢ်ရ့ၣ်အပူၤ ထံလုၢ်ဘၢတၢ်အဃိ ပှၤသဝီဖိတဖၣ် လဲၤပှ့ၤတၢ်အီၣ်တၢ်အီလၢဝ့ၢ်ပူၤအခါ သုးမီၤစိရိၤအသုးတဖၣ် ဖီၣ်န့ၢ်ဝဲဒီး မၤသံဝဲလၢကျဲအဖီခိၣ်အဂ့ၢ်န့ၣ် သ့ၣ်ညါဘၣ်လၢ ပှၤဘၣ်မူဘၣ်ဒါတဂၤအအိၣ်န့ၣ်လီၤ.
တကီၢ်ခါခဲအံၤ သုးကရူၢ်အပှၤသ့ၣ်တဖၣ် ဒ်သိးဒိၣ်စိက့ၤဝဲဒၣ် နီၣ်ဂံၢ်(၈)ကျဲမုၢ်ဖးဒိၣ်အကန့ၢ်အဂီၢ် ဟဲထီၣ်ဝဲဒၣ်ဒီးပှၤနီၣ်ဂံၢ်(၂၀၀)ဃၣ်ဃၣ် လၢခိတကပၤဒီး ခီဖျိ တိဝဲတၢ်တဖျိဘၣ်အဃိ ခီလီၤဝဲဒၣ်ဆူပီၣ်လဲၣ်ပူၤဖဲ သယဲၣ်ခၠီဖီလၥ် ပံတဲၤသဝီဒီး လဲၤထီၣ်ကဒါက့ၤဝဲဒၣ် ဆူ ဝ့ဝးသုးကလၢၤ လၢထံကျဲတကပၤအဂ့ၢ် သ့ၣ်ညါဘၣ်လၢ ဘျံးဒဝဲၢ်ကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
