လါနိၣ်ဝ့ဘၢၣ် ၆သီ, ၂၀၂၆နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ရၤမတံကလံၤထံးချံသန့ တၢ်ဟးထီၣ်က့ၤလီၤကျဲသ့ၣ်တဖၣ်အံၤ တၢ်ပံးကွံၥ်ဝဲယံၥ် တနွံ ဝံၤအလီၢ်ခံ, တနံၤအံၤ လါနိၣ်ဝ့ဘၢၣ် (၆)သီအနံၤအပူၤ တၢ်က့ၤအိၣ်ထီၣ်ကဒါက့ၤ ဝဲအဂ့ၢ်, သ့ၣ်ညါဘၣ်န့ၣ်လီၤ.
ခီဖျိ ရၤမတံဝ့ၢ်ကလံၤထံး ဖလူ, မ့လဲၣ်ပၣ် တကပၤ ကျိချံပှၥ်သၣ်တဖၣ် လဲၤလီၤတဲၥ်ဝဲလၢ ကီၢ်ကၠီၣ်တဲၣ် ဒူသဝီပူၤ အဃိ,သူမွဲထံကျိဒီတကျိၤအပူၤ တဖိးသဲစး ချံသန့ စးထီၣ်လၢ ရၤမတံ-မဲၢ်ဆီး တိၤနီၢ်ဂံၢ်(၁) တုၤလီၤ လၢ ဖိးဖြၣ်ဝ့ၢ်, မိၤရူၤခၠဲ, မဲၢ်ကိးက့ ဟီၣ်ကဝီၤ သ့ၣ်တဖၣ်အံၤ တၢ်စးထီၣ်ပံးကွံၥ်ဝဲဖဲ အပူၤကွံၥ်လါအီးကထိဘၢၣ် (၃၀) သီအနံၤအဂ့ၢ်, သ့ၣ်ညါဘၣ်န့ၣ်လီၤ.
ဒီးချံသန့ သ့ၣ်တဖၣ်အံၤ ကမျၢၢ်တၢ်ဟးထီၣ်က့ၤလီၤအဂီၢ် တနံၤအံၤ တၢ်က့ၤအိးထီၣ်ကဒါက့ၤဝဲဒ် ညီနုၢ်အသိးလံအဂ့ၢ်, ဖိးဖရၣ်ဝ့ၢ်လီၢ်ကဝီၤ ကမျၢၢ်တဂၤစံးဝဲဒ်အံၤန့ၣ်လီၤ.
“တနံၤအံၤ တၢ်မၤလီၤတံၢ် လၢတၢ်အိးထီၣ်က့ၤဝဲလံန့ၣ်လီၤ. အိးထီၣ်က့ၤချံသန့အံၤ အဖီခိၣ် ဂ့ၤဝဲလၢကီၢ်ဆၢ ကၠိဖိ လ့ၢ်ထီၣ်လ့ၢ်လိၤတဖၣ်အဂီၢ် ဒီး ပှၤဖံးအီၣ်မၤအီၣ်တၢ်တဖၣ် အဂီၢ်န့ၣ်လီၤ.ကညီကီၢ်တကပၤ ဒုးယၤ တၢ်အိၣ်သး အဖီခိၣ်, တၢ်ဘၣ်ဒိးသန့ၤသးလၢ ကီၢ်ကၠီၣ်တဲၣ် ဒီး ကျဲသ့ၣ်တဖၣ်အံၤ လီၤ”အဂ့ၢ် စံးဝဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဆီးဒီး ဖိးဖြၣ် ဟီၣ်ကဝီၤ တဖိးသဲစး ချံသန့သ့ၣ်တဖၣ်အံၤ အိၣ်ဝဲလၢ အတီၤ(၁၀) ဃၣ်ဃၣ် ဒီး ဒ်အလီၢ်အိၣ်ဝဲအသိး လၢတၢ်နၢ်ပၢၢ် အဖီခိၣ်, ကမျၢၢ်လီၢ်ကဝီၤဖိတဖၣ် ဟးထီၣ်က့ၤလီၤဝဲ န့ၢ်ဝဲအမဲၥ်ညါ, တၢ်စိၥ်ဆှၢခီဝဲ ပနံၥ်တၢ်ကၤ ဒီး တၢ်ဖိတၢ်လံၤ ဖဲအကြၢးအဘၣ် အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, တဘျီလၢ်လၢ်ဖဲကျိချံပှၥ်သၣ်တၢ်သဘံၣ်ဘုၣ်ဒီး ထံကီၢ်ခံဘ့ၣ်အဘၢၣ်စၢၤ တၢ်အိၣ်သးတဂၢၢ်ကျၢၤဘၣ် အိၣ်ထီၣ်ကတီၢ် တၢ်ပံးကွံၥ်ဝဲ တစိၢ်တလီၢ် အိၣ်ဝဲဘၣ်ဆၣ် တၢ်က့ၤအိးထီၣ်ကဒါက့ၤဝဲ ဒ်ညီနုၢ်အသိး အိၣ်ဝဲထီဘိ အဂ့ၢ်,သ့ၣ်ညါဘၣ်န့ၣ်လီၤ.
