လါနိၣ်ဝ့ဘၢၣ် ၂၇ သီ, ၂၀၂၅ နံၣ်, ခ့ၣ်အဲးစံၣ်
ကညီကီၢ်စဲၣ် ဖၣ်အၣ်ဝ့ၢ်ပူၤ စှၤသီအတီၢ်ပူၤအံၤ (ကၠါဖၠၣ်)ပှၤမၤတၢ်ဖိလၢအိၣ်ဃ့ၢ်ထီၣ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ် ဟီၣ်ကဝီၤ (KK park)အပူၤတဖၣ် နုၥ်လီၤအိၣ်ဆိးဝဲလၢ(Hotel)ပူၤဟဲအါထီၣ်ဝဲအဃိ (ဟိၤထဲ)လၢအိၣ်ဝ့ၢ်,ဝ့ၢ်ချၢတဖၣ် ပှဲၤဝဲ ခဲလၢၥ်ဃၣ်ဃၣ် အဂ့ၢ်န့ၣ် ကမျၢၢ်လၢအိၣ်ဝ့ၢ်ပူၤတဖၣ် စံးဝဲန့ၣ်လီၤ.
ကၠါဖၠၣ်ပှၤမၤတၢ်ဖိလၢအိၣ်ဃ့ၢ်ထီၣ်လၢ(KK park)အပူၤတဖၣ်အါဒၣ်တက့ၢ်န့ၣ်မ့ၢ်ဝဲယိၤဒိၣ်တရူးကလုၥ်သ့ၣ်တဖၣ်လီၤဒီး ဘၣ်ဃးအဝဲသ့ၣ်နုၥ်လီၤငါအိၣ်အလီၢ်လၢဖၣ်အၣ်ဝ့ၢ်(Hotel)ပူၤအဂ့ၢ်အံၤန့ၣ် ကမျၢၢ်လၢအိၣ်ဝ့ၢ်ပူၤတဂၤ စံးဘၣ်ခ့ၣ်အဲးစံၣ်-ကညီ တၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“အမ့ၢ်လီၤ ကၠါဖၠၣ်ဟဲတုၤဒီဒူၣ်.တၢ်တသီခံသီအတီၢ်ပူၤအံၤ လၢဝ့ၢ်ပူၤ(Hotel)ခဲလၢၥ်န့ၣ်အဝဲသ့ၣ်ပှဲၤပှဲၤလီၤ. တရူးတဖၣ်အံၤမ့ၢ်တရူးလၢအိၣ်ယိၤဒိၣ်တကပၤ.အဝဲသ့ၣ်န့ၣ်အိၣ်ဒီးယိၤဒိၣ်(မၣ်ပိၤတ့ၤ)တၢ်ဂီၤ.အတဲတၢ်ထဲတရူးကျိၥ်လီၤ. တနီၤန့ၣ်အတဲပယီၤကျိၥ်ဘၣ်စ့ၢ်ကီးလီၤ”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤလၢဖၣ်အၣ်ဝ့ၢ်ပူၤတၢ်လီၢ်အါဒၣ်တက့ၢ်န့ၣ် တရူး(ကၠါဖၠၣ်)ဃုၥ်ဒီးပှၤမဲၥ်သီနါသီလၢတၢ်တထံၣ်ဘူဘၣ်ဝဲနီတဘျီဘၣ် အံၤ တဖၣ်ဟးထီၣ်က့ၤလီၤဟဲအါထီၣ်ဝဲအဂ့ၢ်န့ၣ် လီၢ်ကဝီၤကမျၢၢ်တဂၤဃီဝဲန့ၣ် စံးအါထီၣ်ဝဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါ(ကၠါဖၠၣ်)ပှၤမၤတၢ်ဖိသ့ၣ်တဖၣ်အံၤတနီၤန့ၣ် နုၥ်လီၤလၢဝ့ၢ်ပူၤကန့ၢ်အဂီၢ် ဘၣ်တၢ်ဆှၢနုၥ်အဝဲသ့ၣ်လၢ ဖီၣ်စုကဝဲၤကရူၢ်ကရၢလီၤ အဂ့ၢ်န့ၣ် တၢ်ကစီၣ်ဟးထီၣ်ဝဲအိၣ်စ့ၢ်ကီးန့ၣ်လီၤ.
ခီဖျိလၢတရူး(ကၠါဖၠၣ်)ပှၤမၤတၢ်ဖိနုၥ်လီၤအိၣ်လၢဝ့ၢ်ပူၤအိၣ်ထီၣ်ဒ်အံၤအဖီခိၣ် ကမျၢၢ်ထံဖိကီၢ်ဖိလၢအိၣ်ဝ့ၢ်ပူၤတဖၣ်ဘၣ်အိၣ်လၢ တၢ်ဘၣ် ယိၣ်ဘၣ်ဘှီပူၤကိးမုၢ်နံၤဒဲးအဂ့ၢ်န့ၣ် ကမျၢၢ်လၢအိၣ်ဝ့ၢ်ပူၤတဖၣ်စံးဝဲအသိး သ့ၣ်ညါဘၣ်န့ၣ်လီၤ.
(ကၠါဖၠၣ်)ပှၤမၤတၢ်ဖိလၢအိၣ်ဃ့ၢ်ထီၣ်ဆူ(KK park)ကရၢၢ်ပူၤသ့တဖၣ်အံၤ မ့ၢ်ပှၤအိၣ်ဟဲဝဲလၢထံကီၢ်အါဘ့ၣ်အပူၤဒီး တကးဒံးဘၣ်အဝဲသ့ၣ်အမဲၥ်ညါအကျါန့ၣ် ပၣ်ဃုၥ်စ့ၢ်ကီးဝဲပှၤကီၢ်ပယီၤဖိသ့ၣ်တဖၣ်န့ၣ်လီၤ.
