လါနိၣ်ဝ့ဘၢၣ် ၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ဒီးမူကီၢ်ဆၣ်အပူၤ သုးမီၤစိရိၤခးလီၤဝဲ ကျိဖးဒိၣ်, တ့ၢ်လီၤဝဲဒြိမ့ၣ်ပိၢ်ဒီးပၤရၤမီၤတၤကဘီယူၤစ့ၢ်ကီးလဲၤတ့ၢ်လီၤဝဲမ့ၣ်ပိၢ်အဃိ ကမျၢၢ်သံ(၁)ဂၤဒီး ဘၣ်ဒိဘၣ်ထံးဝဲ (၆)ဂၤ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲန့ၣ်လီၤ.
ဖဲအပူၤကွံၥ်လါအီးကထိဘၢၣ် ၂၈ သီအနံၤန့ၣ် လၢမူကီၢ်ဆၣ် တရ့စံၥ်လီၢ်သဝီအပူၤ ပယီၤသုးလဲၤတ့ၢ်လီၤဝဲဒြိမ့ၣ်ပိၢ်(၂)ဖျၢၣ်ဒီး ဖဲန့ၣ်ကမျၢၢ် စီၤမၤနၢၤစိ(၃၅)နံၣ်အံၤဘၣ်ဒိဝဲဒီး မၤကဒီးဖဲလါအီးကထိဘၢၣ် ၃၁ သီ ဟါခီ(၄း၀၀)ဃၣ်ဃၣ်အဆၢကတီၢ်န့ၣ် ပယီၤသုးလဲၤတ့ၢ်လီၤစ့ၢ်ကီးဝဲဒြိမ့ၣ်ပိၢ်(၂)ဖျၢၣ်လၢဝဲပၠ့(ဝဲလ်ပြေး)သဝီပူၤအဃိ သဝီဖိပိၥ်ခွါ(၄၈)နံၣ်တဂၤဘၣ်ဒိကဒီးဝဲန့ၣ်လီၤ.
မူကီၢ်ဆၣ်အမဲၥ်ညါလၢၢ်ဒိၣ်ကီၢ်ဆၣ်အပူၤစ့ၢ်ကီး ဖဲအပူၤကွံၥ်တလါအံၤလါနိၣ်ဝ့ဘၢၣ် ၁ သီ အနံၤစ့ၢ်ကီး ပယီၤသုးခီၣ်ချ့သုးရ့ၣ် (ခမရ-၄၃၉)အံၤ ခးလီၤဝဲ(၈၁ မမ)ကျိဖးဒိၣ် ၄ ဖျၢၣ်ဆူ မၠဲၣ်နံၤကွ့သဝီပူၤအဃိ ကမျၢၢ်သံဝဲ(၁)ဂၤဒီးဘၣ်ဒိဘၣ်ထံးဝဲ (၄)ဂၤ န့ၣ်လီၤ.
ဒ်ခ့ၣ်အဲၣ်ယူၣ်တၢ်ပၥ်ဖျါပူၤအသိးန့ၣ် ကမျၢၢ်လၢအသံတဂၤန့ၣ်မ့ၢ်ဝဲ စီၤပျိၢ်ဆၢ(၃၅)နံၣ်ဒီး ပှၤဘၣ်လၢအဘၣ်ဒိဘၣ်ထံး(၄)ဂၤန့ၣ် စီၤဟဲလၢၢ်မူ(၃၃)နံၣ်, စီၤဖိဂ့ၤ(၃၆)နံၣ်, စီၤစံၥ်ပီကၠံ(၆၀)နံၣ် ဒီး ဖိသၣ်မုၣ်နီၢ်သဒါဆၢ(၁၂)နံၣ်သ့ၣ်တဖၣ်အံၤန့ၣ်လီၤ.
တကးဒံးဘၣ်ပယီၤသုးခးလီၤကျိဖးဒိၣ်ဖဲန့ၣ်ဝံၤလီၢ်ခံဖဲလါနိၣ်ဝ့ဘၢၣ် ၄ သီ ဂီၤခီ ၉း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး (ပၤရၤမီၤတၤ)ကဘီယူၤလဲၤတ့ၢ်လီၤကဒီးဝဲမ့ၣ်ပိၢ်(၄)လၢမၠဲၣ်နံၤကွ့သဝီပူၤအံၤအဃိ ကမျၢၢ်အဒဲတၢ်သူၣ်ထီၣ်ဟးဂီၤဝဲ(၂)ဖျၢၣ်ဒံး န့ၣ်လီၤ.
အဃိမ့ဘၣ်ကွၢ်လၢတၢ်ကဲထီၣ်သး(၄)သီအတီၢ်ပူၤအံၤ ခီဖျိလၢသုးမီၤစိရိၤအဒြိ,ကျိဖးဒိၣ်အံၤအဃိ ကီၢ်ဆၣ်(၂)ဘ့ၣ်အံၤအပူၤ ကမျၢၢ်သံဘၣ်ဒိဘၣ်ထံးပၥ်ဖှိၣ်ခဲလၢၥ်အိၣ်ဝဲ(၇)ဂၤန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်အပူၤ သုးမီၤစိရိၤအံၤတၢ်ဒုးကဲထီၣ်အိၣ်ဂ့ၤ,တအိၣ်ဂ့ၤပၥ်ဝဲဒၣ်တၢ်ခးပနီၣ်ဆူကမျၢၢ်အအိၣ် လၢကဘီယူၤဒီးပၤရၤမီၤတၤကဘီယူၤအံၤတဆီ လဲၤတ့ၢ်လီၤဝဲမ့ၣ်ပိၢ်ဒီး ခးလီၤဝဲကျိဖးဒိၣ်,ဒြိကဲထီၣ်အိၣ်ဝဲတလီၢ်လီၢ် န့ၣ်လီၤ.
လၢတၢ်န့ၣ်အဃိအပူၤကွံၥ်ဟီၣ်ကဝီၤပူၤဖဲန့ၣ်ခီဖျိလၢသုးမီၤစိရိၤတၢ်အဟူးတၢ်ဂဲၤဒ်အံၤသ့ၣ်တဖၣ်အဃိ ကမျၢၢ်ဃုၥ်ဒီးဖိဒံဖိသၣ် သံဘၣ်ဒိဘၣ်ထံးကဲထီၣ်အိၣ်ဝဲတလီၢ်လီၢ်ဒီး ဟံၣ်,ကၠိ,တၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်ဟးဂီၤ အိၣ်ဝဲခဲအံၤခဲအံၤ န့ၣ်လီၤ.
