လါနိၣ်ဝ့ဘၢၣ် ၈သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(ဖၣ်ပူၣ်)ဒီး ဒူပျၥ်ယၥ်ကီၢ်ရ့ၣ်ဟီၣ်ကဝီၤအပူၤ အပူၤကွံၥ် လါအီးကထိဘၢၣ်အပူၤ ပှၤဃ့ၢ်တၢ်ဒုးလီၢ်အိၣ်ကဒုဖိအါထီၣ်ဝဲ အဂ့ၢ်, ကီၢ်ပူၤ ကညီပှၤလီၢ်အိၣ်ကမျံဖိ ကမံးတံၥ်(CIDKP) ထုးထီၣ်ပၥ်ဖျါဝဲဖဲ လါနိၣ်ဝ့ဘၢၣ် (၆)သီအနံၤန့ၣ်လီၤ.
ဒ်အပူၤကွံၥ် လါအီကူၥ်အပူၤ တၢ်မၤနီၣ်မၤဃါအိၣ်ဝဲအသိးန့ၣ် မုၢ်တြီၢ်ကီၢ်ရ့ၣ်အပူၤ တၢ်သဘံၣ်သဘုၣ် အဃိ တၢ်ဘၣ်ဃ့ၢ်ထီၣ်အိၣ်ကဒုသးအိၣ်ဝဲလၢ(၇)ကလးဘျဲၣ်ဃၣ်ဃၣ် ဒီး တၢ်က့ၤထိၣ်သတြီၤက့ၤဝဲအဆၢကတီၢ် လါအီးကထိဘၢၣ်အပူၤ ပှၤဃ့ၢ်တၢ်ဒုးလီၢ်အိၣ်ကဒုဖိ အိၣ်ထီၣ်ဝဲလၢ (၈၄,၄၅၉)ဂၤ အဖီခိၣ် ဒူပျၥ်ယၥ်ကီၢ်ရ့ၣ်အပူၤ ပှၤဃ့ၢ်တၢ်ဒုးလီၢ်အိၣ်ကဒုဖိ အါထီၣ်ဝဲ (၂၁၄,၇၅၃) တုၤလၢ (၂၁၄,၉၃၇) အဂ့ၢ် (CIDKP)ပၥ်ဖျါဝဲန့ၣ်လီၤ.
သုးကရူၢ်အံၤ မၤဝဲ ကလံၤကျါတၢ်ထီၣ်ဒုး တၢ်ကွံၥ်လီၤမ့ၣ်ပိၢ် လၢ တမ့ၢ် သုးဟီၣ်ကဝီၤ ဘၣ်ဒီး ခးတပျူၤတပျီၤဝဲတၢ် တပယူၥ်ဃီအဃိ, ဘၣ်ဒိဘၣ်ထံး ဝဲ ကမျၢၢ်လီၢ်ကဝီၤဖိတဖၣ် တၢ်ဘံၣ်တၢ်ဘၢ တၢ်အိၣ်တၢ်ဆိး ဒီး တၢ်ဘၣ်ဃ့ၢ်ထီၣ် ကဒီးဝဲ အိၣ်ထီၣ်ကဒီးဝဲ အဂ့ၢ်(CIDK) ပၥ်ဖျါဝဲန့ၣ်လီၤ.
တၢ်အံၤအဖီခိၣ်, ဒ်လါယူၤတုၤလါအီးကထိဘၢၣ်အပူၤ ခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤ ကီၢ်ရ့ၣ်(၇)ဘ့ၣ် အပူၤ တၢ်ဘၣ်ဃ့ၢ်ထီၣ်အိၣ်ကဒုနီၣ်ဂံၢ် တၢ်ဆီတလဲတၢ်မၤနီၣ်မၤဃါအိၣ်ဝဲအသိးန့ၣ်, အပူၤကွံၥ် အိၣ်ဝဲ (၁,၁၆၀,၆၀၅) ဒီး လါအီးကထိဘၢၣ်အပူၤ လီၤစှၤဝဲလၢ (၉၄၄,၇၁၁) အဂ့ၢ် သ့ၣ်ညါဘၣ်န့ၣ်လီၤ.
ဒူသထူၣ်ကီၢ်ရ့ၣ်အပူၤ လါအီကူးအပူၤ ပှၤဃ့ၢ်တၢ်ဒုးလီၢ်အိၣ်ကဒုဖိအိၣ်ဝဲ (၁၄၄,၃၆၂) ဒီး လါအီးကထိဘၢၣ်အပူၤ လီၤစှၤဝဲတုၤလၢ (၁၄၀,၁၆၃) ဒီး တီအူကီၢ်ရ့ၣ်အပူၤ (၁၇၆,၉၉၇) ဆူ(၁၆၆,၁၃၀) ဒီး ချၢၣ်လွံၢ်ထူၣ်ကီၢ်ရ့ၣ်အပူၤ (၃၆၁,၀၄၆) ဆူ (၁၅၈,၅၆၉) လီၤစှၤဝဲအိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, ဘျံး-ဒဝဲၢ်ကီၢ်ရ့ၣ် လါအီကူၥ်အပူၤ ပှၤလီၢ်အိၣ်ကဒုလၢ အိၣ် (၁၄၇,၀၉၂) အံၤ အိၣ်တ့ၢ်က့ၤဝဲထဲ (၁၄၁,၁၀၁) အသိး, ဖၣ်အၣ်ကီၢ်ရ့ၣ်အပူၤ စ့ၢ်ကီး (၄၀,၇၇၇) ဂၤလီၤစှၤဝဲလၢ (၃၉,၃၅၂) အဂ့ၢ်, တၢ်မၤနီၣ်မၤဃါအိၣ်ဝဲန့ၣ်လီၤ.
ပှၤဃ့ၢ်တၢ်ဒုးလီၢ်အိၣ်ကဒုဖိတဖၣ် လီၤစှၤကွံၥ်ဝဲဟီၣ်ကဝီၤတဖၣ်အံၤ မ့ၢ်ဒၣ် ခီဖျိတၢ်ဒုးတၢ်ယၤပတုၥ်သးတစိၢ် တလီၢ်အဃိ တၢ်က့ၤလၢနီၢ်ကစၢ်တၢ်လီၢ်တၢ်ကျဲ သ့ဝဲဒီး တနီၤ ဃ့ၢ်ထီၣ်ကွံၥ်ဝဲလၢ တၢ်သဘံၣ်ဘုၣ် ဟီၣ်ကဝီၤအပူၤဒီး သုးလီၢ်သုးကျဲက့ၤဝဲလၢ အယံၤအဂ့ၢ်, (CIDKP)တကပၤ ပဲၥ်ထံနီၤဖးစံးဝဲ န့ၣ်လီၤ.
ဒ်န့ၣ်အသိး, ခ့ၣ်အဲၣ်ယူၣ်တၢ်ပၢဟီၣ်ကဝီၤ ကီၢ်ရ့ၣ်(၇)ဘ့ၣ်အပူၤ စုကဝဲၤတၢ်သဘံၣ်ဘုၣ်တဖၣ် အိၣ်ဝဲဘၣ်ဆၣ်, လီၤဆီဒၣ်တၢ် ဒူပျၥ်ယၥ်ကီၢ်ရ့ၣ် ဒီး မုၢ်တြီၤကီၢ်ရ့ၣ် ဟီၣ်ကဝီၤအပူၤအံၤ သုးကရူၢ်အံၤ လၢတၢ်ကဒိၣ်စိဒီးပၢၤက့ၤဝဲတၢ်လီၢ်တၢ်ကျဲအဂီၢ် မၤဝဲ သုးကျိၤနုၥ်လီၤတၢ်ဟူးတၢ်ဂဲၤ ဒီး တၢ်ခးလိၥ်သး ခံခီခံကပၤ အဃိ မ့ၢ်ဟီၣ်ကဝီၤလၢ တၢ်ဒုးဆူၣ်ဝဲ တၢ်လီၢ်တဖၣ် အဂ့ၢ်, သ့ၣ်ညါဘၣ်န့ၣ်လီၤ.
