KIC News

လါအီးကထိဘၢၣ် ၁၁ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကီၢ်ဆၣ်အိၣ်(၅)ဘ့ၣ်အကျါ မီၤစကိၤကီၢ်ဆၣ်ပူၤ သုးကီၣ်ကးအတၢ် ဟးထၢဟံၣ်ခိၣ်စရီန့ၢ်၀ဲအမျးကယၤပှဲၤပှဲၤဘၣ်ဆၣ် မ့မ့ၢ်ကီၢ်ဆၣ်အဂၤလၢခ့ၣ်အဲၣ်ယူၣ်ဆီလီၤတၢ်ပၢတၢ်ြပးန့ၢ်သ့ၣ်တဖၣ်န့ၣ် ထၢ၀ဲဟံၣ်ခိၣ်စရီတန့ၢ်ဘၣ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ. ဒူသထူၣ်ကီၢ်ရ့ၣ်ပူၤ လီၤဆီဒၣ်တၢ် မီၤကိၤကီၢ်ဆၣ်အံၤ သုးကီၣ်နုၥ်လီၤထၢ၀ဲဟံၣ်ခိၣ်စရီလၢဒူသ၀ီကိးဖျၢၣ်ဒဲးအပူၤန့ၢ်၀ဲဒီး ဘၣ်ဆၣ်မ့မ့ၢ်လၢကၠဲးထိၣ်,ဘံလ့,ဖၣ်အၣ်,သထူၣ်ကီၢ်ဆၣ်ဒူသ၀ီတကပၤန့ၣ် ခီဖျိခ့ၣ်အဲၣ်ယူၣ်ပၢဆှၢ၀ဲန့ၢ်အဃိ တၢ်ဟဲထၢဟံၣ်ခိၣ် စရီတအိၣ်၀ဲဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ်...

လါအီးကထိဘၢၣ် ၁၀သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢသုးက့(၇)ဖၣ်အၣ်ကီၢ်ရ့ၣ်ဒူယီၢ်ကီၢ်ဆၣ်အပူၤ,တနံၤအံၤလါအီးကထိ(၁၀)သီအနံၤဂီၤခီ(၇)နၣ်ရံၣ်ဘျဲၣ်အဆၢကတီၢ်,တၢ်ခးဝဲသုးကီၣ်ကးအပှၤလၢအိၣ်ခိးတၢ်ထၢဖးဖီမုၢ်စရီတၢ်ဘံၣ်တၢ်ဘၢတဖၣ်ဖဲသၣ်မညၣ်,ဝ့စ့ၤသဝီဟီၣ်ကဝီၤအပူၤအဂ့ၢ်လီၢ်ကဝီၤဖိတဖၣ်စံးဝဲန့ၣ်လီၤ. သုးကီၣ်ကးအံၤလၢကအိၣ်ခိးဝဲတၢ်ထၢဖးဖီမုၢ်စရီတၢ်ဘံၣ်တၢ်ဘၢဖဲသၣ်မညၣ်ဝ့စ့ၤသဝီခိၣ်ထိးအဂီၢ်,ဟဲထီၣ်ဝဲဒီးသိလ့ၣ်တခိၣ်ဒီးခီဖျိတၢ်ခးဝဲအဝဲသ့ၣ်တဖၣ်အဃိအပှၤသံ(၃)ဂၤဒီးအသိလ့ၣ်ဟးဂီၤကွံၥ်ဝဲအဂ့ၢ်,လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တၢ်ကဲထီၣ်သးန့ၣ်မ့ၢ်ဝဲတၢ်ခးသုးကီၣ်ကးလီၤ.တၢ်လီၢ်တၢ်ကျဲတခီမ့ၢ်ဝဲဖဲသၣ်မညၣ်အဃၢၤ(ယၤကၠ့ၤ)ဝ့စ့ၤသဝီန့ၣ်လီၤ.သုးကီၣ်ကးန့ၣ်ဟဲထီၣ်ဒီးအသိလ့ၣ်ဖိဆံးတခိၣ်လၢကဟံတၢ်ဘံၣ်တၢ်ဘၢလၢပှၤထၢဖးဖီမုၢ်စရီဖိတဖၣ်အဂီၢ်န့ၣ်လီၤ.အဝဲသ့ၣ်စံၣ်လီၤလၢသိလ့ၣ်အပူၤအဆၢကတီၢ်တၢ်ခးအဝဲသ့ၣ်တဘျီအသုပှၤသံ(၃)ဂၤမ့မ့ဘၣ်ဒိဒုပှၤဆိမိၣ်ကအိၣ်(၄)ဂၤညါ.ပှၤခးအသုန့ၣ်ဘၣ်ဃုၥ်ဒီးသိလ့ၣ်အဃိန့ၣ်သိလ့ၣ်လၢဟဲဒိးဝဲန့ၣ်မ့ၣ်အူအီၣ်ကွံၥ်ဝဲန့ၣ်လီၤ.ဒီးပယီၤသုးတဖၣ်အံၤတချူးမၤတၢ်ထၢစရီအခါ,လ့ၢ်ထီၣ်လ့ၢ်လိၤဟံးဃၥ်ဝဲတၢ်ဘံၣ်တၢ်ဘၢဖဲဝ့စ့ၤဟီၣ်ကဝီၤအပူၤစးထီၣ်လၢမဟါတဟါလံ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,သုးကီၣ်ကးသ့ၣ်တဖၣ်အံၤတဘျီလၢ်လၢ်ဖဲဟးထီၣ်ဟးလီၤလၢကျဲပူၤအဆၢကတီၢ်,သုးခိးကီၢ်ဆၢ(BGF)အတၢ်ပၣ်ဃုၥ်ပၣ်ဂီၢ်အိၣ်ဝဲဘၣ်ဆၣ်,တဂီၤအံၤတၢ်ခးဝဲပှၤခိးတၢ်ဘံၣ်တၢ်ဘၢတဖၣ်အကျါ(BGF)တပၣ်ဝဲနီတဂၤဘၣ်အဂ့ၢ်,လီၢ်ကဝီၤကမျၢၢ်အံၤစံးအါထီၣ်ဝဲဒၣ်န့ၣ်လီၤ. တကးဒံးဘၣ်,ဘၣ်ဃးဒီးသုးကီၣ်ကးမၤဝဲတၢ်ထၢဝဲဖးဖီမုၢ်စရီလၢဒူယီၢ်ကီၢ်ဆၣ်ဟီၣ်ကဝီၤဒူသဝီတဖၣ်အပူၤဒီးဟီၣ်ကဝီၤလၢအဘူးဒီးဖၣ်အၣ်ဝ့ၢ်တဖၣ်အပူၤအိၣ်ဝဲအဖီခိၣ်အံၤန့ၣ်သုးက့(၇)ဖၣ်အၣ်ကီၢ်ရ့ၣ်ခိၣ်,ပဒိၣ်စီၤအီၣ်မီၣ်အ့စံးဝဲဒ်အံၤန့ၣ်လီၤ. အဝဲစံးဝဲလၢ“သုးက့(၇)ဖၣ်အၣ်ကီၢ်ရ့ၣ်အပူၤဘၣ်ဃးသုးကီၣ်ကးအတၢ်မၤဝဲတၢ်ထၢဖးဖီမုၢ်စရီအံၤဒုကီၢ်ဆၣ်အဂၤတဖၣ်အပူၤ,ပှၤဘၣ်မူဘၣ်ဒါတဖၣ်တဲယၤတအိၣ်ဒံးဘၣ်,တထံၣ်ဝဲဒံးဘၣ်.မ့မ့ၢ်ဒူယီၢ်ဒီးထံၣ်လိၤကီၢ်ဆၣ်တၢ်လီၢ်တဖၣ်ဒုအိၣ်ဘူးဒီးဖၣ်အၣ်ဝ့ၢ်,ဖၣ်အၣ်တၢ်လီၢ်တၢ်ကျဲအဃိန့ၣ်အဝဲသ့ၣ်မၤဝဲဒၣ်အိၣ်ဝဲန့ၣ်လီၤ.ဒ်သိးဟီၣ်ကဝီၤလၢပဝဲပ(Control)န့ၢ်တဖၣ်န့ၣ်ဒုမၤဝဲတၢ်ထၢတအိၣ်ဘၣ်.ဘၣ်ဆၣ်မ့မ့ၢ်လၢပ(Control)တန့ၢ်လၢလၢပှဲၤပှဲၤဒံးဘၣ်တဖၣ်န့ၣ်ဒုမၤဝဲအိၣ်ဝဲ”အဂ့ၢ်စံးဝဲန့ၣ်လီၤ. တကတီၢ်ဃီ,တၢ်ခးဝဲသုးကီၣ်ကးအပှၤခိးတၢ်ထၢဖးဖီမုၢ်စရီတၢ်ဘံၣ်တၢ်ဘၢဖိတဖၣ်အံၤဝံၤအလီၢ်ခံ,သုးကီၣ်ကးအံၤလၢကမၤအါထီၣ်ဝဲဂံၢ်ဘါအဂီၢ်အသိလ့ၣ်အခိၣ်(၁၀)ဘျဲၣ်ဟဲထီၣ်ကဒီးဝဲလၢဖၣ်အၣ်ဝ့ၢ်တကပၤဒီးသုးကီၣ်ကးအပှၤလၢဟဲထီၣ်တဖၣ်အံၤမ့ၢ်ဝဲ(တမ၂၂)အပှၤ,သုးခိးကီၢ်ဆၢ(BGF)အပှၤဃုၥ်ဒီးဖၣ်အၣ်ဝ့ၢ်ပူၤသုးဒီးပၢၤကီၢ်တဖၣ်လီၤအဂ့ၢ်,သုးက့(၇)ဖၣ်အၣ်ကီၢ်ရ့ၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဒ်န့ၣ်အသိး,ခီဖျိသုးကီၣ်ကးအပှၤတဖၣ်ဟဲထီၣ်ဝဲအါအါဂီၢ်ဂီၢ်အဖီခိၣ်ကမျၢၢ်လီၢ်ကဝီၤဖိတဖၣ်အိၣ်ဝဲဒီးတၢ်ကိၢ်တၢ်ဂီၤ,တၢ်သူၣ်ပျံၤသးဖုးအဂ့ၢ်,လီၢ်ကဝီၤကမျၢၢ်တဖၣ်စံးဝဲန့ၣ်လီၤ.

လါအီးကထိဘၢၣ် ၁၀ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ်အပူၤ စးထီၣ်လၢ(DKBA) ဟဲအိၣ်ဆီလီၤသးတ့ထီၣ်ဘှီထီၣ်တၢ်သူၣ်ထီၣ်လၢ၀ၣ်တရဲၢ်ကၠိမဲၥ်ညါန့ၣ်၀ံၤလီၢ်ခံန့ၣ် လီၢ်က၀ီၤသ၀ီဖိတဖၣ်ဘၣ်အိၣ်က့ၤလၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲ အသိးသ့ၣ်ညါဘၣ်န့ၣ်လီၤ. တကီၢ်ခါခဲအံၤ၀ၣ်တရဲၢ်တီၤထီကၠိမဲၥ်ညါလၢ(DKBA)အိၣ်ဆီလီၤသးအံၤန့ၣ် အပူၤကွံၥ်အိၣ်ဒၣ်ထဲ(DKBA)အပှၤလီၤ ဒီး ဘၣ်ဆၣ်ခဲအံၤဟဲအါထီၣ်လၢပယီၤသုးတကးဒံးဘၣ်လၢအ၀ဲသ့ၣ်တၢ်လီၢ်န့ၣ်(DKBA)သီခါနီၣ်တယၢ်အမဲၥ်ညါ အိၣ်အါထီၣ်၀ဲ လၢ(BGF)နီၣ်တယၢ်အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤ စံး၀ဲဒ်အံၤန့ၣ်လီၤ. အ၀ဲစံး၀ဲလၢ“ ယလဲၤဖၠးလၢတၢ်မဲၥ်ညါန့ၣ်သီခါသုး(DKBA)န့ၣ်အိၣ်လၢအစှၤလီၤ.အိၣ်အါလၢပယီၤသုးလီၤ....

လါစဲးပထ့ဘၢၣ် ၉သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢသုးက့(၆)ဒူပျၥ်ယၥ်ကီၢ်ရ့ၣ်ဝီၢ်ရ့ၣ်ကီၢ်ဆၣ်အပူၤ,ကမျၢၢ်လီၢ်ကဝီၤပှၤဃ့ၢ်တၢ်ဒုးလီၢ်အိၣ်ကမှံဖိလၢအိၣ်ကဒုအသးယံၤလၢ(၅)လါဘျဲၣ်သ့ၣ်တဖၣ်အံၤ,ကတီၢ်ယံၤအဂီၢ်ကဆဲးအိၣ်ဆိးဖံးမၤအီၣ်အီကီခဲဝဲအဂ့ၢ်,ပှၤဃ့ၢ်တၢ်ဒုးလီၢ်အိၣ်ကမှံဖိတဖၣ်စံးဝဲန့ၣ်လီၤ. ဝီၢ်ရ့ၣ်ကီၢ်ဆၣ်ကၠၢၢ်ခၠီကမျၢၢ်လီၢ်ကဝီၤပှၤဃ့ၢ်တၢ်ဒုးလီၢ်အိၣ်ကမှံဖိတဖၣ်အံၤ,ဃ့ၢ်အိၣ်ကဒုဝဲစးထီၣ်လၢတၢ်ထီၣ်မၤန့ၢ်လ့နိးပယီၤသုးကလၢၤဝံၤအလီၢ်ခံအခါလံၤလံၤဒီးတက့ၤအိၣ်ဘၣ်ဒံးဝဲလၢအနီၢ်ကစၢ်ဟံၣ်ဃီတၢ်လီၢ်တၢ်ကျဲအပူၤဒံးဘၣ်အဖီခိၣ်သဂၢၢ်ဘၣ်ဝဲတၢ်အိၣ်ဆိးအီၣ်အီတၢ်ကီတၢ်ခဲသ့ၣ်တဖၣ်အဂ့ၢ်,ပှၤဃ့ၢ်တၢ်ဒုးလီၢ်အိၣ်ကမှံဖိတဖၣ်အနီၢ်ကစၢ်တဖၣ်စံးဝဲန့ၣ်လီၤ. ဘၣ်ဃ့ၢ်အိၣ်ကဒုအသးအလါယံၤထီၣ်ဒီးသဂၢၢ်ဘၣ်ဝဲတၢ်ကီတၢ်ခဲအါမံၤအမဲၥ်ညါ,ကတီၢ်ယံၤကဆဲးအိၣ်ဆိးဝဲအဂီၢ်အိၣ်ဝဲဒီးတၢ်သူၣ်ကိၢ်သးဂီၤဒီးခါဆူညါကအိၣ်မူဝဲအဂီၢ်အိၣ်ဝဲဒီးတၢ်ဘၣ်ယိၣ်ဘၣ်ဘှီလၢတၢ်သူၣ်ထီၣ်က့ၤတၢ်အိၣ်မူလၢအသီအဂ့ၢ်,နိၣ်ခၠိနဲၣ်လီၢ်ကဝီၤပှၤဃ့ၢ်ထီၣ်အိၣ်ကဒုအသးဆူကၠၢၢ်ခၠီသဝီတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“ပသးသမူကပူၤဖျဲးအဂီၢ်ပဟဲစံၣ်စုယၢ်ခီ,ပဘၣ်ပၥ်တ့ၢ်ပဟံၣ်ပဃီပတၢ်လီၢ်တၢ်ကျဲ,ပကအိၣ်ထိးသူသးအဂီၢ်ပတၢ်တပၣ်နီမံၤ,ပဘူးတံၢ်ဆွ့ၣ်မၠိတအိၣ်နီတဂၤ,ပဘၣ်ဃ့ဝဲတၢ်မၤစၢၤဖဲသဝီအပူၤအံၤန့ၣ်လီၤ.ပကအိၣ်လၢပှၤဟံၣ်ယံၤယံၤပအိၣ်တသ့ဘၣ်အဃိန့ၣ်,ပဆိမိၣ်ကဒါက့ၤလၢခါဆူညါဘၣ်ဆဲးဖံးအီၣ်မၤအီၣ်အဂီၢ်ပအိၣ်ဝဲဒီးတၢ်ကီတၢ်ခဲ,ပကဘၣ်လဲၤခီဖျိတၢ်ဒ်အံၤအပူၤကွံၥ်ပတဆိမိၣ်ဘၣ်နီတဘျီဘၣ်,ပဘၣ်သူၣ်ထီၣ်ပတၢ်အိၣ်မူလၢသီအဃိန့ၣ်ပဘၣ်ဆိကမိၣ်အါမးကီခဲဝဲဒၣ်လၢပဂီၢ်ကိးမံၤဒဲးလီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,ဝီၢ်ရ့ၣ်ကီၢ်ဆၣ်ကၠၢၢ်ခၠီသဝီအပူၤလီၢ်အိၣ်ကမှံဖိလၢအိၣ်ကဒုဝဲသးတဖၣ်အံၤအါတက့ၢ်မ့ၢ်ဝဲပနီကျဲခံ,နိၣ်ခၠိနဲၣ်,တိၤဃီဖူ,ကၠီးဘလူ,ဝ့ခနးကမျၢၢ်လီၢ်ကဝီၤဖိတဖၣ်ဒီးအဝဲသ့ၣ်တဖၣ်အံၤအနီၣ်ဂံၢ်နီၣ်ဒွးအိၣ်ဝဲလၢ(၆၀၀)ဂၤဃၣ်ဃၣ်အဂ့ၢ်,ပှၤကွၢ်ထွဲလီၢ်အိၣ်ကဒုပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ကၠၢၢ်ခၠီသဝီကျဲအံၤခီဖျိတၢ်ဟးထီၣ်က့ၤလီၤကီခဲအိၣ်ဝဲအဃိ,ပှၤမၤစၢၤတၢ်ဖိတဖၣ်လဲၤတတုၤဝဲညီညီဘၣ်ဒီး,လီၢ်အိၣ်ကမှံဖိတဖၣ်အံၤအပူၤကွံၥ်ဒိးန့ၢ်ဘၣ်ဝဲတၢ်မၤစၢၤတဆံးတက့ၢ်လၢဟီၣ်ကဝီၤကရူၢ်ကရၢတဖၣ်အအိၣ်,အိၣ်ဝဲဘၣ်ဆၣ်,တကူတလၢဝဲဘၣ်အဃိ,ဒ်သဝီပူၤတၢ်ဖံးတၢ်မၤအိၣ်ဝဲအသိး,အဝဲသ့ၣ်တဖၣ်လဲၤဒိးလဲကျီဝဲနီၣ်လၢဘီးက့ၣ်တံၢ်ကျီးပူၤဒီးဒိးလဲသူၣ်ဝဲဘုလၢစံၥ်ပူၤအိၣ်ဝဲဒၣ်န့ၣ်လီၤ. ဒီးလီၢ်အိၣ်ကမှံဖိတဖၣ်အံၤတဒိးန့ၢ်ဘၣ်ဝဲတၢ်အိၣ်ဆူၣ်အိၣ်ချ့တၢ်အံးထွဲကွၢ်ထွဲလၢပှဲၤဘၣ်အဖီခိၣ်လိၣ်ဘၣ်ဝဲကသံၣ်တၢ်ဆီၣ်ထွဲမၤစၢၤနီၢ်နီၢ်အဂ့ၢ်,ကၠၢၢ်ခၠီလီၢ်ကဝီၤဖိလၢအပှၤကွၢ်ထွဲလီၢ်အိၣ်ကမှံဖိတဖၣ်စံးဝဲန့ၣ်လီၤ. အဝဲစံးဝဲလၢ“တၢ်အိၣ်ဆူၣ်အိၣ်ချ့ဒုလၢအဝဲသ့ၣ်တဖၣ်အဂီၢ်န့ၣ်အရ့ဒိၣ်မး,ပှၤမၤစၢၤတၢ်ဖိတအိၣ်ဘၣ်အဃိန့ၣ်ဖးနးညါ.ပဝဲနါက့တသ့ဖဲအသ့ပဟူးဂဲၤန့ၣ်လၢအဝဲသ့ၣ်အဂီၢ်လီၤ.ပတီၣ်ထီၣ်န့ၣ်အဝဲသ့ၣ်တဖၣ်လၢတၢ်အရ့ဒိၣ်ကတၢၢ်န့ၣ်မ့ၢ်,ကသံၣ်ကသီ,တၢ်အီၣ်တၢ်အီ,တၢ်ခိၣ်ဒုးသ့ၣ်တဖၣ်မီၤ.နါက့ကသံၣ်န့ၣ်လၢပကဒိးန့ၢ်ဘၣ်လၢတၢ်ကပၥ်တ့ၢ်န့ၣ်ပှၤဃ့ၢ်တၢ်ဒုးဖိအဂီၢ်တအိၣ်ဘၣ်.အိၣ်ဒၣ်ဖဲတလါခံလါတဘျီပှၤဟဲကွၢ်ဆၢကတီၢ်လီၤအဝဲသ့ၣ်ဒုးနဲၣ်ပၠးသးဝံၤ,ပှၤက့ၤတလၢအလီၢ်ခံမ့အိၣ်တဆူၣ်အိၣ်တချ့ဘၣ်န့ၣ်တဒိးန့ၢ်ဘၣ်ကသံၣ်ဘၣ်အဃိန့ၣ်တၢ်ကီတၢ်ခဲအိၣ်ဝဲဒိၣ်မး”အဂ့ၢ်စံးဝဲန့ၣ်လီၤ. လၢတၢ်န့ၣ်အဃိ,ဒ်သိးပှၤဃ့ၢ်တၢ်ဒုးလီၢ်အိၣ်ကမှံဖိလၢအိၣ်ထိးသူအသးအိၣ်ဆိးဖဲ(ကၠၢၢ်ခၠီ)သဝီအပူၤတဖၣ်အံၤ,ကအိၣ်ဆိးဖံးမၤအီၣ်အီဘၣ်ဂ့ၤဂ့ၤဒီးကဒိးန့ၢ်ဘၣ်တၢ်အိၣ်ဆူၣ်အိၣ်ချ့တၢ်အံးထွဲကွၢ်ထွဲ,ကအိၣ်မူဘၣ်ဘျ့ဘျ့ဆှီဆှီဒ်ပှၤသဝီဖိတဖၣ်အဂီၢ်,သဝီလီၢ်ကဝီၤပှၤဘၣ်မူဘၣ်ဒါလၢအကွၢ်ထွဲပှၤလီၢ်အိၣ်အိၣ်ကဒုဖိတဖၣ်မုၢ်လၢ်ဝဲလၢကရူၢ်ကရၢ(မ့တမ့ၢ်)နီၢ်တဂၤပှၤမၤစၢၤတၢ်ဖိတဖၣ်,ကဂဲၤဆၢထၢၣ်မၤစၢၤသကိးဝဲဒၣ်ပှၤသ့ၣ်တဖၣ်အံၤန့ၣ်လီၤ. တကတီၢ်ဃီ,ဝီၢ်ရ့ၣ်ကီၢ်ဆၣ်အပူၤကွံၥ်လါမ့ၤအပူၤတၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ကွံၥ်ဝဲသုးကီၣ်ကး(လ့နိး)သုးကလၢၤလံဘၣ်ဆၣ်ခီဖျိမ့ၣ်ပိၢ်တၢ်လီၤဘၣ်ယိၥ်အဃိ,လီၢ်ကဝီၤဖိတဖၣ်အံၤက့ၤအိၣ်ဆိးဒံးဝဲလၢအနီၢ်ကစၢ်ဟံၣ်ဃီတအိၣ်ဒံးဝဲဒၣ်ဘၣ်ဒီးတကီၢ်ခါခဲအံၤခံခီခံကပၤတၢ်ဒုးဆူၣ်ဝဲလၢနိၣ်ခၠိနဲၣ်ပယီၤဒုးယၤသုးကလၢၤတၢ်လီၢ်အပူၤအဖီခိၣ်,နိၣ်ခၠိနဲၣ်သဝီဃုၥ်ဒီးခိၣ်ဃၢၤသဝီဒ်အမ့ၢ်ပနီကျဲခံ,တိၤဃီဖူ,ကၠီးဘလူ,ဝ့ခနးသ့ၣ်တဖၣ်ဘၣ်ဃ့ၢ်အိၣ်ကဒုအသးတကးဘၣ်,ပယီၤသုးလၢအိၣ်ဝဲကလံၣ်သုးကလၢၤတဖၣ်ခးလီၤဝဲကျိဖးဒိၣ်အဃိ,ယဲတကိၤ,ဖါပြး,လိးရှါ,မဲၤကျုၢ်,နီခွံၣ်,ထံထိၣ်ကီးဃုၥ်ဒီးခိၣ်ဃၢၤသဝီလၢအဂၤအပူၤကမျၢၢ်တဖၣ်ဘၣ်ဃ့ၢ်အိၣ်ကဒုဝဲအသးစ့ၢ်ကီးန့ၣ်လီၤ. ...

လါအီးကထိဘၢၣ် ၉ သီ, ၂၀၂၄ နံၣ်, ခ့ၣ်အဲးစံၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဒူသ၀ီတနီၤအပူၤ လၢသုးကီၣ်ကးအတၢ်ဟးထၢဖးဖီမုၢ်စရီအဖီခိၣ်အံၤ ခီဖျိဒူသ၀ီပှၤဘၣ်မူဘၣ်ဒီးကမျၢၢ်တနီၤတတူၢ်လိၥ်၀ဲဘၣ်အဃိဟးပလဲၥ်သးလၢတၢ်လီၢ်အဂၤအိၣ်၀ဲအဂ့ၢ်န့ၣ် လီၢ်က၀ီၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲန့ၣ်လီၤ. ဖၣ်အၣ်ကီၢ်ဆၣ်ပူၤ စးထီၣ်ဖဲလါအီးကထိဘၢၣ် ၁ သီအံၤ သုးကီၣ်ကးနုၥ်လီၤထၢ၀ဲဖးဖီမုၢ်စရီလၢ ဒူသ၀ီစှၤကိၥ်ဖျၢၣ်အပူၤဒီး ခီဖျိတၢ်ထၢဖးဖီမုၢ်စရီဘျီ၀ဲအံၤလီၢ်က၀ီၤပှၤဘၣ်မူဘၣ်ဒါ,ကမျၢၢ်တနီၤတတူၢ်လိၥ်၀ဲဘၣ်အဃိ အ၀ဲသ့ၣ်ဘၣ်ဟးပလဲၥ်အသးကဲထီၣ် ၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်တဖၣ်စံး၀ဲန့ၣ်လီၤ. သုးကီၣ်ကးအတၢ်ဟးထၢဖးဖီမုၢ်စရီဘျီ၀ဲအံၤမ့မ့ၢ်လၢမဲၢ်ကရီသ၀ီတကပၤန့ၣ်သုးကီၣ်ကးအပှၤတဟဲလၢအနီၢ်ကစၢ်ဘၣ်ဒီး မ့မ့ၢ်တခီကိးမၢ၀ဲဒၣ်ဒူပူၤသ၀ီပူၤကၠိသရၣ်/မုၣ်တဖၣ်လၢကထၢ၀ဲဒၣ်ဖးဖီမုၢ်စရီအိၣ်ဘၣ်ဆၣ် မ့ၢ်လၢကၠိသရၣ်တနီၤတအဲၣ်ဒိး မၤပၣ်ဃုၥ်ပၣ်ဂီၢ်သးဘၣ်အဃိဟးပလဲၥ်သးအိၣ်၀ဲဒီးလၢတၢ်တသ့တဘၣ်ဘၣ်အဖီခိၣ်ဘၣ်မၤထွဲ၀ဲဒ်န့ၣ်စ့ၢ်ကီးအိၣ်အဂ့ၢ်န့ၣ်...

လါအီးကထိဘၢၣ် ၈သီ, ၂၀၂၄နံၣ်, ခ့ၣ်အဲးစံၣ်, အ့ယၣ်ဝတံၣ်ကီၢ်ခီဒိၣ်,အ့ၣ်မဲဝ့ၢ်ဟီၣ်ကဝီၤသုးကီၣ်ကးတၢ်ထၢဖးဖီမုၢ်စရီဟံၣ်တၢ်ကတိၤကျိၥ်တၢ်သံကွၢ်သံဒိးအပူၤ,လီၢ်ကဝီၤဖိတဖၣ်သူဝဲကညီကျိၥ်လၢဟံၣ်တၢ်ကတိၤကျိၥ်အိၣ်ဝဲဘၣ်ဆၣ်,သုးကီၣ်ကးအပှၤထၢစရီဖိတဖၣ်အံၤပညိၣ်ကွဲးလီၤကမၣ်ဝဲဒၣ်လိၤလိၤလၢ,တၢ်သူဝဲပယီၤကျိၥ်အိၣ်ဝဲအဂ့ၢ်,လီၢ်ကဝီၤကမျၢၢ်ပိၥ်မုၣ်လၢအသဂၢၢ်ဘၣ်တၢ်လၢအနီၢ်ကစၢ်တဂၤစံးဝဲဒၣ်န့ၣ်လီၤ. ဖဲတလါအံၤလါအီးကထိဘၢၣ်(၁)သီအနံၤအပူၤသုးကီၣ်ကးအစုတီၤဖီလၥ်ပှၤဘၣ်မူဘၣ်ဒါတဖၣ်တီခိၣ်ရိၢ်မဲစးထီၣ်မၤဝဲတၢ်ထၢဖးဖီမုၢ်စရီဒီးလၢဖးဖီမုၢ်စရီအတၢ်သံကွၢ်အပူၤ,အပူၤကွံၥ်တၢ်ဘၣ်ဒၢနုၥ်လီၤဝဲ“ကလုၥ်ဒူၣ်”အလီၢ်အံၤန့ၣ်တကီၢ်ခါခဲအံၤသုးကီၣ်ကးဆီတလဲက့ၤဝဲလၢ“ဟံၣ်တၢ်ကတိၤကျိၥ်”အိၣ်ဝဲအဖီခိၣ်လီၢ်ကဝီၤဖိတနီၤကတိၤဝဲကညီကျိၥ်လၢဟံၣ်ပူၤအိၣ်ဝဲဘၣ်ဆၣ်ပှၤထၢစရီဖိတဖၣ်,ပညိၣ်ဒၢနုၥ်လီၤဝဲလိၤလိၤလၢပယီၤကျိၥ်ဒ်အနီၢ်ကစၢ်သးအသိးအဂ့ၢ်,အ့ၤမဲလီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဖဲ(၆)သီအနံၤန့ၣ်သုးကီၣ်ကးအစုတီၤဖီလၥ်သရၣ်မုၣ်တဖၣ်ဟဲထၢဖးဖီမုၢ်စရီအဆၢကတီၢ်,ပတဲအီၤလၢပဝဲပအိၣ်လၢဟံၣ်ပကတိၤထဲကညီကျိၥ်လီၤတပကတိၤပယီၤကျိၥ်ဘၣ်,ဘၣ်ဆၣ်သရၣ်မုၣ်တဂၤအံၤအကစၢ်ဒၣ်ဝဲဒၢနုၥ်လီၤဝဲလၢပကတိၤတၢ်လၢပယီၤကျိၥ်လၢအနီၢ်ကစၢ်သးလီၤ.ပဟံၣ်ဖိဃီဖိလၢအအိၣ်ကွၢ်စုၣ်တၢ်လၢတၢ်လီၢ်ခံတဂၤထံၣ်ဝဲလၢပှၤဒၢနုၥ်လီၤလၢပကတိၤပယီၤကျိၥ်တဘျီ,အဝဲမၢသရၣ်မုၣ်အံၤဆီတလဲက့ၤလၢကညီကျိၥ်အဖီခိၣ်,သရၣ်မုၣ်အံၤတဲဆၢကဒါက့ၤပှၤလၢ,အခဲအံၤသုတဲဒၣ်ပယီၤကျိၥ်လီၤတမ့ၢ်ယၤ.အနီၢ်နီၢ်န့ၣ်အဝဲဟဲထၢစရီကတိၤတၢ်ဒီးပှၤလၢပယီၤကျိၥ်အဃိန့ၣ်ပကတိၤဆၢက့ၤလၢပယီၤကျိၥ်လီၤ.ပအိၣ်လၢဟံၣ်ပကတိၤဒၣ်ကညီကျိၥ်လီၤ”အဂ့ၢ်စံးဝဲဒၣ်န့ၣ်လီၤ. သုးကီၣ်ကးအံၤပညိၣ်ဝဲလၢ(၂၀၂၅)နံၣ်အပူၤကမၤဝဲတၢ်ဃုထၢအဂီၢ်,(မဲ)တၢ်ဖးအနီၢ်ဂံၢ်အရ့ဒိၣ်ဝဲဒီးဟးထၢဝဲဖးဖီမုၢ်စရီ,ပှၤနီၢ်ဂံၢ်နီၢ်ဒွးဒီးဟံၣ်တၢ်ဂ့ၢ်တၢ်ကျိၤတဖၣ်အဖီခိၣ်,အစုတီၤဖီလၥ်ကူၣ်သ့ဝဲၤကျိၤပှၤမၤတၢ်ဖိ,ကမျၢၢ်သုး,ပၢၤကီၢ်,ပှၤသုးဖိဒီးပှၤမၤသံမ့ၣ်အူပှၤမၤတၢ်ဖိတဖၣ်မၤစၢၤဝဲလၢတၢ်ထၢဖးဖီမုၢ်စရီအံၤန့ၣ်လီၤ. လၢန့ၣ်အမဲၥ်ညါ,သုးကီၣ်ကးဆီတလဲဝဲဖးဖီမုၢ်စရီအတၢ်သံကွၢ်သံဒိးလၢ“ကလုၥ်ဒူၣ်”ဆူ“ဟံၣ်တၢ်ကတိၤကျိၥ်”အံၤ,တၢ်ဘၣ်ယိၥ်ဘၣ်ဘှီအိၣ်ဝဲဒၣ်လၢကလုၥ်ဒူၣ်ဖိတဖၣ်ကစှၤလီၤကွံၥ်ဝဲဒီးလီၤမၢ်ကွံၥ်ဝဲအဂ့ၢ်,အဝဲစံးအါထီၣ်ဝဲဒၣ်န့လီၤ. တကးဒံးဘၣ်,လီၤဆီဒၣ်တၢ်ကညီကလုၥ်ဒူၣ်ဖိသ့ၣ်တဖၣ်အံၤတူၢ်လိၥ်ဝဲအပှၤကလုၥ်တၢ်ဟဲအိၣ်ဆီလီၤသးဘၣ်ဆၣ်,တဒိးန့ၢ်မၤလိဘၣ်ဝဲအလံၥ်အလဲၢ်,တၢ်ဆဲးတၢ်လၤ,တၢ်ကတိၤကျိၥ်လၢလၢပှဲၤပှဲၤဘၣ်ဒီးဘၣ်ကတိၤဝဲပယီၤကျိၥ်ဒီးကတိၤက့ၤဝဲအနီၢ်ကစၢ်ကျိၥ်တဘၣ်လၢၤဘၣ်အိၣ်ဝဲတနီၤအဖီခိၣ်,တၢ်သူၣ်ကိၢ်သးဂီၤအိၣ်ထီၣ်ဝဲဒၣ်န့ၣ်လီၤ. ဒီးလၢတၢ်ဆီတလဲဒုးအိၣ်ထီၣ်ဝဲတၢ်သံကွၢ်လၢဖးဖီမုၢ်စရီအံၤအဖီခိၣ်,ဝ့ၢ်တကူၣ်ကညီလံၥ်လဲၢ်တၢ်ဆဲးတၢ်လၤကမံးတံၥ်တဖၣ်ဆှၢထီၣ်လံၥ်သံကွၢ်သံဒိးဝဲသုးကီၣ်ကးအပှၤဘၣ်မူဘၣ်ဒါဒီးဃ့ထီၣ်ဝဲလၢတၢ်ကဆီတလဲက့ၤဝဲဘၣ်ဆၣ်,တၢ်ဆီတလဲတအိၣ်ဝဲဘၣ်အဂ့ၢ်,ပှၤလၢအဘူးဒီးလံၥ်လဲၢ်တၢ်ဆဲးတၢ်လၤကမံၥ်တံၥ်တဖၣ်စံးဝဲန့ၣ်လီၤ. တကတီၢ်ဃီ,ဘၣ်ဃးဒီးသုးကီၣ်ကးအတၢ်ဆီတလဲအံၤအ့ယၣ်ဝတံၣ်ကညီသးစၢ်လၢတုၤထီၣ်လၢကညီကီၢ်စဲၣ်အပူၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“သုးကီၣ်ကးအတၢ်ဆီတလဲက့ၤဝဲတၢ်သံကွၢ်သံဒိးဒီးတၢ်ပညိၣ်ဒၢနုၥ်လီၤကမၣ်ဝဲတၢ်ဂ့ၢ်တၢ်ကျိၤလိၤလိၤဒ်အံၤန့ၣ်မ့ၢ်ဝဲကလုၥ်ဒိၣ်စိသနူအတၢ်ဖံးတၢ်မၤန့ၣ်လီၤ.ဒီးတၢ်မၤအံၤမ့ၢ်ဝဲတၢ်လၢအကမၤလီၤမၢ်,မၤစှၤလီၤကွံၥ်ဝဲကလုၥ်ဒူၣ်ဖိလၢအကတိၤက့ၤအနီၢ်ကစၢ်ကျိၥ်တဘၣ်လၢၤတဖၣ်အနီၢ်ဂံၢ်နီၢ်ဒွးစ့ၢ်ကီးန့ၣ်လီၤ.လၢတၢ်န့ၣ်အဃိ,ဖဲတၢ်ဒုးအိၣ်ထီၣ်ဖဲၣ်ဒရဲၣ်ဒံၣ်မိၣ်ကရံၣ်စံၣ်တန့ၢ်ဒံးဘၣ်အဆၢကတီၢ်,သုးပဒိၣ်လၢတဖိးသဲစးတဖၣ်ဒုးလိၣ်ထီၣ်ဖးထီၣ်ဝဲတၢ်သ့ၣ်တဖၣ်အံၤဒီးအတၢ်ပိၢ်ထွဲထီၣ်ခံတဖၣ်န့ၣ်ပဝဲကလုၥ်ဒူၣ်ဖိတဖၣ်ကဘၣ်တူၢ်ဝဲဒၣ်ဒံးန့ၣ်လီၤ.”အဂ့ၢ်စံးဝဲန့ၣ်လီၤ. သုးကီၣ်ကးအတၢ်ထဲဝဲဖးဖီမုၢ်စရီအံၤ,တၢ်ပၢၢ်ဆၢကလုၥ်ဒူၣ်ဖီၣ်စုကဝဲၤကရူၢ်ကရၢတဖၣ်တတူၢ်လိၥ်ဝဲဘၣ်အဖီခိၣ်ထုးထီၣ်ပၥ်ဖျါဝဲအတၢ်ဘၣ်သးအိၣ်ဝဲဒီးခီဖျိမကွ့ကီၢ်ခီဒိၣ်ဒီးပကိကီၢ်ခီဒိၣ်တၢ်လီၢ်တနီၤအပူၤတၢ်ထၢဝဲဖးဖီမုၢ်စရီအိၣ်ဝဲအဃိ,တၢ်ထီဒါမၤပိၢ်ဖးထီၣ်ဝဲ(ပိ)မ့ၣ်ပိၢ်တဖၣ်ကဲထီၣ်အသးအိၣ်ဝဲန့ၣ်လီၤ. ဒ်န့ၣ်အသိး,သုးကီၣ်ကးအံၤကမၤဝဲတၢ်ထၢဖးဖီမုၢ်စရီဖဲတလါအံၤတုၤလၢ(၁၅)သီအသိး,ကလုၥ်ဒူၣ်ဖီၣ်စုကဝဲၤဟီၣ်ကဝီၤတၢ်ဒုးကဲထီၣ်တၢ်လီၢ်တဖၣ်အပူၤစ့ၢ်ကီးကမၤဝဲတၢ်ထၢဖးဖီစရီအံၤလၢပၥ်ပနီၣ်ဝဲတၢ်ဆၢကတီၢ်တဖၣ်အပူၤအိၣ်ဝဲအဂ့ၢ်,စံးဝဲဒၣ်စ့ၢ်ကီးန့ၣ်လီၤ.

လါအီးကထိဘၢၣ် ၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကီၢ်ဆၣ်(၃)ဘ့ၣ် လါစဲးပထ့ဘၢၣ်တလါအတီၢ်ပူၤ တၢ်ဒုးကဲထီၣ်ခဲလၢၥ်(၂၀)ဘျီဒီး ပယီၤသုးတကပၤသံ(၃၃)ဂၤ,ဘၣ်ဒိ(၄၆)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ် န့ၣ်လီၤ. ဒူသထူၣ်ကီၢ်ရ့ၣ် ဘံလ့ကီၢ်ဆၣ်,ကၠဲးထိၣ်ကီၢ်ဆၣ်,သထူၣ်ကီၢ်ဆၣ် ကီၢ်ဆၣ်(၃)ဘ့ၣ်အံၤအပူၤ စးထီၣ်လါစဲးပထ့ဘၢၣ် ၁ သီတုၤ ၃၀ သီ လၢတလါအတီၢ်ပူၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးကဘၢၣ်စၢၤ...

လါအီးကထိဘၢၣ် ၇သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ရၤမတံအ့ရှၢကျဲမုၢ်ဖးဒိၣ်လၢတၢ်ကးတံၥ်ဃၥ်ဝဲယံၥ်လၢ(၂)နံၣ်ဃၣ်ဃၣ်အံၤတၢ်အိၣ်သးအဖီခိၣ်,တကီၢ်ခါခဲအံၤလ့ၤတက့ၤအိးထီၣ်တသ့ဘၣ်အဂ့ၢ်,(KNU)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ရၤမတံအ့ရှၢကျဲမုၢ်အံၤအရ့ဒိၣ်ဝဲလၢတၢ်စိၥ်တီဆှၢပနံၣ်ဖီကၤ,ကမျၢၢ်တၢ်ဟးထီၣ်က့ၤလီၤဒီးတၢ်ဖံးအီၣ်မၤအီၣ်အဂီၢ်ဘၣ်ဆၣ်တကီၢ်ခါခဲအံၤထံရုၢ်ကီၢ်သဲးတၢ်အိၣ်သးအဖီခိၣ်,လၢတၢ်ကမၤဟးဂီၤကွံၥ်သုးကီၣ်ကးအဂီၢ်ကျဲအံၤအရ့ဒိၣ်စ့ၢ်ကီးဝဲလၢသုးဂ့ၢ်ဂီတကပၤအဃိလ့ၤတက့ၤအိးထီၣ်တသ့ဒံးဘၣ်အဂ့ၢ်,(KNU)ပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ. အဝဲစံးဝဲလၢ“တကီၢ်ခါခဲအံၤထံကီၢ်ဒီတဘ့ၣ်အပူၤဒုးယၤတၢ်သဘံၣ်သဘုၣ်အရ့ဒိၣ်ဝဲအဆၢကတီၢ်,လၢတၢ်အိၣ်သးအံၤအဖီခိၣ်,ရၤမတံကီးတရံးအ့ရှၢကျဲမုၢ်အံၤအရ့မ့ဒိၣ်လၢတၢ်ကိးကပၤဒဲးအပူၤဘၣ်ဆၣ်,လၢသုးဂ့ၢ်ဝီတကပၤပပၥ်သးပ့ၤနီၣ်ပသးတသ့ဘၣ်န့ၣ်လီၤ.ဒီးကၠီၣ်တဲၣ်ပဒိၣ်တဖၣ်စ့ၢ်ကီးပသ့ၣ်ညါဘၣ်လၢအဝဲသ့ၣ်အဲၣ်ဒိးဝဲလၢတၢ်ကအိးထီၣ်ကျဲအံၤလီၤ.ဘၣ်ဆၣ်မ့မ့ၢ်လၢပဝဲတကပၤတခီပဘၣ်ဆိကမိၣ်က့ၤတၢ်လၢသုးကီၣ်ကးတဖၣ်အတၢ်မူထီၣ်ဂဲၤထီၣ်,မၤနးမၤဖှီၣ်တၢ်အဂီၢ်အဃိန့ၣ်မ့မ့တကီၢ်ခါခဲအံၤကျဲအံၤလ့ၤတက့ၤတဘၣ်လီၢ်ဘၣ်စးလၢတၢ်ကအိးထီၣ်ဝဲဘၣ်”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ထံရူၢ်ကီၢ်သဲးတၢ်အိၣ်သးအဖီခိၣ်ဘၣ်ဃးဒီးရၤမတံအ့ရှၢကျဲမုၢ်နံၤကအိးထီၣ်အဂီၢ်အံၤလ့ၤတက့ၤမုၢ်လၢ်တသ့ဒံးဝဲဘၣ်အဂ့ၢ်,သုးက့(၆)တၢ်မဲၥ်ညါပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ကျဲအံၤကအိးထီၣ်က့ၤန့ၣ်တဘၣ်မုၢ်လၢ်တဂ့ၤ,လ့ၤတက့ၤမုၢ်လၢ်တသ့ဘၣ်,တမ့ၢ်ပတဲလၢတစိၤသးတအိးထီၣ်လၢၤဘၣ်တမ့ၢ်ဘၣ်.တၢ်ခဲလၢၥ်န့ၣ်ဒိးသန့ၤထီၣ်အသးလၢထံရူၢ်ကီၢ်သဲးအဖီခိၣ်လီၤ.ခဲအံၤပအိၣ်လၢတၢ်မဲၥ်ညါန့ၣ်,ပပှၤဘၣ်သံဘၣ်ဒိထဲလဲၣ်ပသ့ၣ်ညါလီၤ.တၢ်ဟ့ၣ်ကူၣ်ပှၤလၢပဘၣ်မၤဒံအံၤဒံန့ၣ်သ့ၣ်တဖၣ်န့ၣ်,တၢ်သ့ၣ်တဖၣ်န့ၣ်ကဘၣ်အိၣ်ဒီးတၢ်မၤနီၢ်နီၢ်,တၢ်မၤနီၢ်နီၢ်မ့အိၣ်မးပကတုၤဆူတၢ်မၤနၢၤအဖီတၢၣ်လီၤ.အဃိန့ၣ်ပတဲလၢတၢ်မ့ၢ်တၢ်တီလီၤလ့ၤတက့ၤအိးထီၣ်တန့ၢ်ဘၣ်.”အဂ့ၢ်စံးဝဲဒၣ်န့ၣ်လီၤ. လၢတၢ်ကအိးထီၣ်က့ၤဝဲရၤမတံအ့ရှၢကျဲမုၢ်အံၤအဂီၢ်,အပူၤကွံၥ်လါစဲးပထ့ဘၢၣ်(၂၄)သီအနံၤအပူၤကညီဖီၣ်စုကဝဲၤကရူၢ်ဒ်အမ့ၢ်(ခ့ၣ်အဲၣ်ယူၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA )သုးက့(၆),သုးက့(၇)ခိၣ်နၢ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA),သုးခိးကီၢ်ဆၢ(BGF)ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ(PC)သ့ၣ်တဖၣ်မၤတ့ၢ်ဝဲတၢ်ထံၣ်လိၥ်တၢၣ်ပီၣ်တဲသကိးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကးဒံးဘၣ်,အပူၤကွံၥ်လါစဲးပထ့ဘၢၣ်(၉)သီအနံၤအပူၤ,ကီၢ်ပယီၤဘၣ်ထွဲကီၢ်ကၠီၣ်တဲၣ်မီၢ်သီ(H.E.Mr.Mongkol Visitstump)ဒီးသုးကီၣ်ကးအစုတီၤဖီလၥ်ကညီကီၢ်စဲၣ်ကိတိၥ်ခိၣ်ကျၢၢ်(အူစီမၠ့ၣ်အူ)မၤဝဲတၢ်ထံၣ်လိၥ်တဲသကိးဘၣ်ဃးထံကီၢ်ခံဘ့ၣ်ကီၢ်ဆၢတၢ်ဝံစိၥ်ခီဆှၢပနံၥ်တၢ်ဖိတၢ်လံၤ,ကျဲတၢ်ဟးထီၣ်က့ၤလီၤအိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ရၤမတံအ့ရှၢကျဲမုၢ်အံၤအပူၤကွံၥ်(၂၀၁၂)နံၣ်ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,အကရၢခိၣ်လီၢ်လံၤသုးခိၣ်ကျၢၢ်ဒိၣ်စိစီၤမူၤတူၤစ့ဖိဆဲးလီၤဝဲတၢ်ပတုၥ်တၢ်ခး(NCA)အစုမုၢ်ကျၢၢ်အဆၢကတီၢ်လၢတၢ်မုၥ်တၢ်ခုၣ်အတၢ်ပနီၣ်အဂီၢ်,ဒုးအိၣ်ထီၣ်ဝဲအ့ရှၢကျဲမုၢ်ဖးဒိၣ်အံၤအဂ့ၢ်,သ့ၣ်ညါဘၣ်န့ၣ်လီၤ.

လါစဲးပထ့ဘၢၣ် ၄သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,တၢ်ပၢဟီၣ်ကဝီၤကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်ပူၤ,ပှၤတရူးဖိလၢဟဲဆီလီၤသးနုၥ်လီၤအိၣ်ဆိးဝဲတဖၣ်မၤမုၢ်ကျိၥ်ဝဲၤကွၥ်ဒီးတၢ်တၤကျိၣ်တၤစ့အါထီၣ်ဝဲအဂ့ၢ်,ဝ့ၢ်လီၢ်ကဝီၤဘံၣ်ဘၢပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဃိၣ်သၢဖျၢၣ်ဝ့ၢ်ပူၤပှၤတရူးဖိလၢအနုၥ်လီၤအိၣ်ဆိးဝဲတဖၣ်အံၤ,တနီၤအိၣ်ဝဲလၢဖိးမံသဲးစးဘၣ်ဆၣ်,တနီၤအိၣ်ဆိးဝဲလၢတဖိးမံသဲစးဘၣ်ဒီးအဝဲသ့ၣ်တဖၣ်အံၤတကီၢ်ခါခဲအံၤဆီလီၤဝဲအမုၢ်ကျိၤဝဲၤကွၥ်တၢ်ဖံးတၢ်မၤဒီးတၢ်တၤကျိၣ်တၢ်စ့တၢ်မၤတဖၣ်အါထီၣ်ဝဲဒၣ်ကွ့ၢ်ကွ့ၢ်အဂ့ၢ်,ဝ့ၢ်လီၢ်ကဝီၤဘံၣ်ဘၢပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဃိၣ်သၢဖျၢၣ်ဝ့ၢ်အပူၤပှၤတရူးဖိလၢနုၥ်လီၤအိၣ်ဆိးဝဲတဖၣ်န့ၣ်,အိၣ်ဝဲဒၣ်ခံမံၤန့ၣ်လီၤ.တၢတမံၤန့ၣ်ပှၤလၢအိၣ်ဝဲဖိးမံသဲးစးတဖၣ်ဒီး,မ့မ့ၢ်ခံမံၤတမံၤန့ၣ်မ့ၢ်ပှၤအိၣ်ဝဲခူသူၣ်ခူလံၤလၢတဖိးသဲစးဘၣ်တဖၣ်န့ၣ်လီၤ.ဒီးပှၤလၢအအိၣ်ဖိးမံသဲစးတဖၣ်အံၤအိၣ်ဆိးဝဲလၢပှၤဂၤအကျါသူၣ်ထီၣ်ဝဲအတၢ်လီၢ်တၢ်ကျဲဆီလီၤဝဲအမုၢ်ကျိၤဝဲၤကွၥ်ဒ်အမ့ၢ်တၢ်အီၣ်ကျး,တၢ်ကူတၢ်သိးကျး,ပိၥ်မုၣ်အတၢ်မၤဃံမၤလၤကျးဃုၥ်ဒီးကျးလၢအဂၤသ့ၣ်တဖၣ်အိၣ်ဝဲအမၠိမၠိန့ၣ်လီၤ.မ့မ့ၢ်ပှၤလၢတဖိးမံသဲးစးအိၣ်ခူသူၣ်ခူလံၤတဖၣ်အံၤတခီ,အိၣ်ဝဲလၢအနီၢ်ကစၢ်ကရၢၢ်ပူၤဒီးမ့ၢ်ပှၤလၢအမၤတၢ်တၤကျိၣ်တၤစ့,တၢ်လံၣ်တၢ်လီသ့ၣ်တဖၣ်န့ၣ်လီၤ.ဒီးပှၤလၢအိၣ်အနီၢ်ကစၢ်ကရၢၢ်ပူၤတဖၣ်အံၤဝ့ၢ်ဟီၣ်ကဝီၤပှၤဘၣ်မူဘၣ်ဒါတဖၣ်ကနုၥ်လီၤဝဲအကရၢၢ်ပူၤအဂီၢ်ကီခဲဝဲ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,တရူးထံဖိကီၢ်ဖိလၢအအိၣ်ဆိးဝဲဖဲဃိၣ်သၢဖျၢၣ်ဝ့ၢ်အပူၤလၢအဖိးမံသဲစးတဖၣ်အံၤအိၣ်ဝဲဒီးကီၢ်ပယီၤထံဖိကီၢ်ဖိအခိၣ်ဂီၤ(မှတ်ပုံတင်)သ့ၣ်တဖၣ်အသိးအဝဲသ့ၣ်တဖၣ်အံၤဖီၣ်ဝဲ(၁၃/)ယိၤဒိၣ်ကီၢ်စဲၣ်ဒီး(၁/)(ကခၠ့ၣ်)ခၠီကီၢ်စဲၣ်(မှတ်ပုံတင်)အဂ့ၢ်သ့ၣ်တဖၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကးဒံးဘၣ်,တရူးထံဖိလၢနုၥ်လီၤအိၣ်ဖိးမံသဲစး,အိၣ်ဝဲဒီးကီၢ်ပယီၤခိၣ်ဂီၤဒီးဆီလီၤမုၢ်ကျိၤဝဲကွၥ်သ့ၣ်တဖၣ်အံၤခီဖျိကပှ့ၤဝဲဟီၣ်ခိၣ်ကပံၥ်ဒီးတၢ်လီၢ်တၢ်ကျဲတဖၣ်လၢအနီၢ်ကစၢ်အမံၤတန့ၢ်ဝဲဘၣ်အဖီခိၣ်,ဒိးလဲအိၣ်ဝဲဟံၣ်ဒီးကဲထီၣ်ဝဲတၢ်ဘၣ်ဒိးဘၣ်ထံးလၢကမျၢၢ်လီၢ်ကဝီၤဖိလၢအိၣ်ဆိးဒိးလဲညီနုၢ်တ့ၢ်ဟံၣ်သ့ၣ်တဖၣ်အဂီၢ်အဂ့ၢ်,ဃိၣ်သၢဖျၢၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပှၤလၢဟဲအိးထီၣ်ဝဲကျးတဖၣ်အံၤပှ့ၤဟီၣ်ခိၣ်ကပံၥ်တၢ်လီၢ်တၢ်ကျဲလၢအနီၢ်ကစၢ်မံၤတန့ၢ်ဘၣ်အဃိန့ၣ်,ငါအိၣ်ဝဲပှၤဟံၣ်,ဟ့ၣ်ဝဲဟံၣ်ကစၢ်တဖၣ်ဟံၣ်လဲအပှ့ၤဂ့ၤဂ့ၤန့ၢ်ဒီးဟံၣ်ကစၢ်တဖၣ်မၤအါထီၣ်ဟံၣ်လဲအဃိ,ပှၤလၢဆဲးငါအိၣ်ဝဲတန့ၢ်လၢၤဘၣ်တဖၣ်တၢ်နီစံၣ်လီၤကွံၥ်ဝဲအဖီခိၣ်,ကဲထီၣ်တၢ်မူးဒီးဘၣ်လဲၤထံၣ်လိၥ်ဝဲသးလီၢ်ကဝီၤပှၤဘၣ်မူဘၣ်ဒါတဖၣ်အိၣ်ဝဲအဃိန့ၣ်,ကဲထီၣ်တၢ်သဘံၣ်ဘုၣ်ဒီးဘၣ်ဒိဘၣ်ထံးက့ၤဝဲကမျၢၢ်လီၢ်ကဝီၤဖိမုၢ်ဆ့ၣ်မုၢ်ဂီၤပှၤမၤအီၣ်တနံၤဂီၢ်တနံၤဂီၢ်ဖိလၢညီနုၢ်ငါအိၣ်ဟံၣ်တဖၣ်အဂီၢ်”အဂ့ၢ်စံးဝဲန့ၣ်လီၤ. တကတီၢ်ဃီ,တရူးထံဖိကီၢ်ဖိတဖၣ်အံၤ(၂၀၂၄)နံၣ်လါအ့ဖြ့ၣ်တါလိၣ်ဝံၤအလီၢ်ခံစးထီၣ်နုၥ်လီၤဝဲလၢဃိၣ်သၢဖျၢၣ်ဝ့ၢ်ပူၤဒီးတကီၢ်ခါခဲအံၤနုၥ်လီၤအိၣ်ဆိးဝဲအနီၢ်ဂံၢ်နီၢ်ဒွးအိၣ်ဝဲထဲလဲၣ်အဂ့ၢ်တၢ်မၤလီၢ်တံၢ်အီၤတန့ၢ်ဒံးဘၣ်အဖီခိၣ်,ဒ်သိးကသ့ၣ်ညါဘၣ်တရူးထံဖိကီၢ်ဖိတဖၣ်အံၤအနီၢ်ဂံၢ်နီၢ်ဒွးလီၤတံၢ်လီၤဆဲးအဂီၢ်,ခ့ၣ်အဲးစံၣ်ပှၤထၢတၢ်ကစီၣ်ဖိတဖၣ်ဃုသ့ၣ်ညါမၤလီၤတံၢ်ဝဲအဖၢမုၢ်လီၤအဂ့ၢ်,ဒုးသ့ၣ်ညါဘၣ်ပှၤဒိကနၣ်တၢ်ဖိတဖၣ်န့ၣ်လီၤ. ဃိၣ်သၢဖျၢၣ်ဝ့ၢ်အံၤခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢအကရူၢ်ကရၢတဖၣ်အမဲၥ်ညါ,ဖီၣ်စုကဝဲၤကရူၢ်ကရၢဒ်အမ့ၢ် (DKBA၊KNU/KNLA-PC BGF)ဒီးမိၢ်ကီၢ်သီပၣ်တံၢ်ကရူၢ်ကရၢတဖၣ်နုၥ်လီၤဟူးဂဲၤအိၣ်ဆိးဝဲအိၣ်ဝဲအသိး,သုးကီၣ်ကးတဖၣ်စ့ၢ်ကီးဆီလီၤအသးအိၣ်ဆိးဝဲလၢဝ့ၢ်ဃၢၤ(အသုးကလၢၤ)ကရၢၢ်အပူၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. ဒ်န့ၣ်အသိး,ဃိၣ်သၢဖျၢၣ်ဝ့ၢ်အံၤမ့ၢ်ဝဲကီၢ်ကၠီၣ်တဲၣ်ကီၢ်ပယီၤကီၢ်ဆၢဒီးလၢဝ့ၢ်ပူၤတၢ်ပၢတၢ်ြပးတကပၤခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢပှၤဘၣ်မူဘၣ်ဒါတဖၣ်တီခိၣ်ရိၢ်မဲဝဲဒီးမ့မ့ၢ်ဝ့ၢ်ဟီၣ်ကဝီၤတၢ်ဘံၣ်တၢ်ဘၢတခီဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တီခိၣ်ရိၢ်မဲဝဲအဂ့ၢ်,သ့ၣ်ညါဘၣ်န့ၣ်လီၤ.

လါအီးကထိဘၢၣ် ၄သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ, သုးက့(၅),မုၢ်ြတီၢ်ကီၢ်ရ့ၣ်,လူၤသီကီၢ်ဆၣ်,စီၤမုၢ်ပျီဟီၣ်ကဝီၤ တၢ်ဒုးကဲထီၣ်ဝဲလၢ သုးက့(၅)ဂၢၤကီၢ်သုးဒ့(၁)ဒီးပယီၤသုးကီၣ်ကးအဘၢၣ်စၢၤ (၃)နၣ်ရံၣ်ဘျဲၣ်ဒီးပယီၤသုးသံအဂၤ(၃၀)အကျါပၣ်ဃုၥ် သုးရ့ၣ်ခိၣ်တဂၤဒီးသုးဒ့ခိၣ်(၂)ဂၤအဂ့ၢ် သ့ၣ်ညါဘၣ်လၢ ကီၢ်ရ့ၣ်အပှၤဘၣ်မူဘၣ်ဒါအိၣ်န့ၣ်လီၤ. ဖဲအပူၤကွံၥ်လါစဲးပထ့ဘၢၣ် အသီ(၃၀)အနံၤန့ၣ် ပယီၤသုးကီၣ်ကးအပှၤလၢအိၣ် ဖါဂီၤလိ သ့ၣ်တဖၣ်ဆီတလဲအလီၢ်ဝံၤဒ်သိးကက့ၤလီၤဆူ ဖိဃ့ခိၣ်အဂီၢ် ဖဲတၢ်ဘၢၣ်စၢၤတုၤဖဲဒါဝါထၣ်တၢ်လီၢ်န့ၣ် သုးက့(၅)ဂၢၤကီၢ်သုးဒ့(၁)ခိးထုးအဝဲသ့ၣ်ဒီးမ့ၣ်ပိၢ်ဒီးခးအဝဲသ့ၣ်အဃိ ပယီၤသုးတကပၤသံဝဲဂၤ(၃၀)အဂ့ၢ် မုၢ်တြီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဖဲလါစဲးပထ့ဘၢၣ် အသီ(၃၀)ဂီၤခီ (၆)နၣ်ရံၣ်တခီ တုၤ...