လါယူၤလံ ၁၅, ၂၀၂၄နံၣ်, ခ့ၣ်အဲၣ်စံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၃)ချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်,နၣ်သၣ်ကွ့တၢ်လီၢ်အပူၤ,သုးကီၣ်းခးလီၤကျိဖးဒိၣ်လီၤတဲၥ်ပိၢ်ဖးဘၣ်ဝဲကမျၢၢ်(၂)ဂၤအဃိ,လီၢ်က၀ီၤဖိဖဲအဘူးတဖၣ်ဘၣ်ဃ့ၢ်ပူၤဖျဲးထီၣ်၀ဲအသးအဂ့ၢ်,ခ့ၣ်အဲၣ်ယူၣ်ထုးထီၣ်ပၥ်ဖျါ၀ဲဖဲတနံၤအံၤလါယူၤလံ(၁၅)သီအနံၤန့ၣ်လီၤ.
အပူၤကွံၥ်လါယူၤလံ(၁၂)သီမုၢ်နၤခီ(၇)နၣ်ရံၣ်အဆၢကတီၢ်သုးကီၣ်ကးလၢဆီလီၤသးအိၣ်ဆိးဝဲလၢနၣ်သၣ်ကွ့ ဝ့ၢ်ပူၤတဖၣ်,ခးလီၤ၀ဲကျိဖးဒိၣ်(၃)ဖျၢၣ်လီၤတဲၥ်ပိၢ်ဖးထီၣ်ဝဲလၢသ့ၣ်ဂ့ၤလူၢ်သဝီဒီးဘၣ်ဒိဘၣ်ထံးဝဲသဝီဖိနီၢ်လ့ၣ်စၣ်လၢအသးနံၣ်အိၣ်ဝဲ(၄၂)နံၣ်ဒီးစီၤအဲၣ်ဒိၣ်ထူအဒီမါ၀ၤခံဂၤအံၤအဂ့ၢ်,ခ့ၣ်အဲၣ်ယူၣ်ပၥ်ဖျါဝဲန့ၣ်လီၤ.
ဒီးဖဲလါယူၤလံ(၁၃)သီအနံၤမုၢ်နၤခီအဆၢကတီၢ်စ့ၢ်ကီးသုးကီၣ်ကးလၢအိၣ်နၣ်သၣ်ကွ့တဖုအံၤခးလီၤကဒီးဝဲကျိဖးဒိၣ်(၆)ဖျၢၣ်လီၤတဲၥ်ပိၢ်ဖးဝဲလၢ(ယ့ၣ်လဲ)သဝီပူၤအဃိ,ဒူသဝီကမျၢၢ်လီၢ်ကဝီၤဖိတဖၣ်အိၣ်ဆိးက့ၤဝဲလၢသဝီပူၤတဘူၣ်လၢၤဘၣ်ဒီးဘၣ်ဃ့ၢ်ထီၣ်အိၣ်ကဒုကွံၥ်ဝဲအသးအဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်န့ၣ်လီၤ.
လၢန့ၣ်အမဲၥ်ညါ,သုးကီၣ်ကးလၢခးလီၤကျိဖးဒိၣ်တဖၣ်အံၤအသုးကျိၤနုၥ်လီၤဟူးဂဲၤဝဲ,နုၥ်လီၤအိၣ်ဆိးဟံန့ၢ်တၢ်ဘံၣ်တၢ်ဘၢလၢကမျၢၢ်ဒူသဝီအပူၤ,ခးလီၤဒိးလီၢ်ကဝီၤဖိလၢအမၤအီၣ်စံၥ်သ့ၣ်တဖၣ်အိၣ်ဝဲဒီးမၤပျံၤမၤဖုးဝဲကမျၢၢ်လီၢ်ကဝီၤဖိတဖၣ်အိၣ်ဝဲအဃိ,လီၢ်ကဝီၤဖိတဖၣ်တမၤအီၣ်မၤအီ,ထူဘၣ်လၢၥ်စံၥ်,ဘၣ်ပၥ်တ့ၢ်ကွံၥ်ဝဲအစံာ်တၢ်လီၢ်တၢ်ကျဲသ့ၣ်တဖၣ်အါမးအဂ့ၢ်,ပၥ်ဖျါစ့ၢ်ကီးဝဲန့ၣ်လီၤ.
တကးဒံးဘၣ်,မူကီၢ်ဆၣ်အပူၤခီဖျိသုးကီၣ်ကးတဖၣ်ပညိၣ်ခးလီၤဝဲကမျၢၢ်ကဝီၤဖိတဖၣ်အံၤကိးမုၢ်နံၤအဃိလီၢ်က၀ီၤဘၣ်ဃ့ၢ်ထီၣ်အိၣ်ကဒုဝဲအသးအဖီခိၣ်တၢ်စူၤခါအဆၢကတီၢ်သဂၢၢ်ဘၣ်ဝဲထံတကဆှီတၢ်ကီတၢ်ခဲဒီးတူၢ်ဘၣ်ဝဲတၢ်ဟၢဖၢလူတၢ်ဆါတဖၣ်အဃိလိၣ်ဘၣ်ဝဲကသံၣ်ကသီဒီးတၢ်အိၣ်ဆိးလီၢ်ကျဲသ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,သုးဟံန့ၢ်တၢ်စိကမီၤအလီၢ်ခံ,သုးက့(၃)ချၢၣ်လွံၢ်ထူၣ်ကီၢ်ရ့ၣ်ကီၢ်ဆၣ်တဖၣ်အပူၤ,သုးကီၣ်ကးမၤထီဝဲပှၤကညီဂ့ၢ်၀ီခွဲးယၥ်အဃိ,ကမျၢၢ်လီၢ်ကဝီၤဖိတဖၣ်ဘၣ်ကဲထီၣ်၀ဲပှၤလီၢ်အိၣ်ကဒုဖိအါထီၣ်ဝဲဒီးစးထီၣ်ဖဲ(၂၀၂၄)လါယနူၤအါရံၤတုၤလၢလါယူၤအပူၤန့ၣ်,တၢ်ဒုးကဲထီၣ်၀ဲလၢချၢၣ်လွံၢ်ထူၣ်ကီၢ်ရ့ၣ်အပူၤအိၣ်၀ဲ(၄၃၃)ဘျီဒီးကမျၢၢ်ပှၤလီၢ်အိၣ်ကမှံအိၣ်အါထီၣ်၀ဲတုၤလၢ(၄၃၀၁၆၁)ဂၤအဂ့ၢ်,ခ့ၣ်အဲၣ်ယူၣ်(၆)လါအတီၢ်ပူၤတၢ်မၤနီၣ်အိၣ်စ့ၢ်ကီး၀ဲန့ၣ်လီၤ.
ဒ်န့ၣ်အသိး,ဒ်ခ့ၣ်အဲၣ်ယူၣ်(၂၀၂၄)နံၣ်(၆)လါအတၢ်မၤနီၣ်အသိးန့ၣ်,ခ့ၣ်အဲၣ်ယူၣ်တၢ်ပၢဟီၣ်ကဝီၤကီၢ်ရ့ၣ်သ့ၣ်တဖၣ်အကျါ,သုးက့(၃)ချၢၣ်လွံၢ်ထူၣ်ကီၢ်ရ့ၣ်အံၤမ့ၢ်၀ဲတၢ်ဒုးတၢ်ယၤကဲထီၣ်အါကတၢၢ်ဟီၣ်ကဝီၤဒီးကမျၢၢ်လီၢ်ကဝီၤဖိဘၣ်ဃ့ၢ်အိၣ်ကဒုအါကတၢၢ်ကီၢ်ရ့ၣ်တဘ့ၣ်အဂ့ၢ်,သ့ၣ်ညါဘၣ်န့ၣ်လီၤ.
လါယူၤလံ ၁၄သီႇ ၂၀၂၄နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤသုးက့(၄)ဘျံးဒဘျံးကီၢ်ရ့ၣ်တၢ်အဲၣ်-ထံခံကျဲအလီၢ်အပူၤႇမဟါလါယူၤလံ(၁၃)သီအနံၤအပူၤႇကီၢ်သူလ့ၤသုးမုၢ်ဒိၣ်(KTLA)ခိးခး၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိလ့ၣ်အဃိ(KNLA)တကပၤဘၣ်ဒိ(၅)ဂၤအဂ့ၢ်ႇဘျံးဒ၀ဲၢ်ကီၢ်ရ့ၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
မဟါမုၢ်ထူၣ်ထီၣ်အဆၢကတီၢ်သုးခိၣ်အဲၣ်ခွံတီခိၣ်ရိၥ်မဲ၀ဲကီၢ်သူလ့ၤသုးမုၢ်ဒိၣ်(KTLA)တဖၣ်ခး၀ဲ(KNLA)အသိလ့ၣ်လၢအဟဲက့ၤလီၤလၢထံခံမံၣ်တၤကျဲအဃိႇၦၤသုးဖိဘၣ်ဒိဘၣ်ထံးအိၣ်၀ဲဒီးခီဖျိနၢ်ဟူဆိ၀ဲတၢ်ကစီၣ်အဃိအိၣ်ခိးခး၀ဲအဂ့ၢ်ႇသုးက့(၄)ကီၢ်ရ့ၣ်ခိၣ်ပဒိၣ်ဖျိးစိ၀့စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ကဲထီၣ်အသးဖဲမဟါမုၢ်ထူၣ်အဆၢကတီၢ်ဖဲပၣ်ရ့ၣ်မံကစၢၢ်အဘၢၣ်စၢၤန့ၣ်ၦၤဟဲက့ၤလီၤဒိးကါႇခးစိ၀ဲကါလၢမဲာ်ညါခံခိၣ်အဃိကါလၢလီၢ်ခံတဖၣ်အိၣ်ပတုာ်ကွံာ်၀ဲလီၤႉအ၀ဲသ့ၣ်ခိးခးဒီးလၢတၢ်ဖီလာ်တခီဆဲလီၤ၀ဲမ့ၣ်ပိၢ်စ့ၢ်ကီးလီၤႉၦၤဟဲက့ၤလီၤအဃိအ၀ဲသ့ၣ်အိၣ်ခိးခး၀ဲလၢကျဲလီၤႉလၢ(KTLA)တကပၤဒုမ့ၢ်မတၤသ့ၣ်တဖၣ်ပၣ်လဲၣ်န့ၣ်ပတသ့ၣ်ညါဘၣ်ႉ”စံး၀ဲန့ၣ်လီၤႉ
(KNLA)သိလ့ၣ်လၢအဟဲက့ၤလီၤ(၅)ခိၣ်အံၤအပူၤန့ၣ်ႇၦၤနီၢ်ဂံၢ်ကအိၣ်၀ဲအဂၤ(၄၀)ဃၣ်ဃၣ်ဒီးသုးရ့ၣ် (၁၀)ဒီးသုးရ့ၣ် (၁၂)အၦၤသ့ၣ်တဖၣ်ပာ်ဃုာ်၀ဲအဂ့ၢႇ်သ့ၣ်ညါဘၣ်လၢကီၢ်ရ့ၣ်ၦၤဘၣ်မူဘၣ်ဒါအအိၣ်န့ၣ်လီၤႉ
ဒီးတၢ်ကဲထီၣ်သးအလီၢ်အံၤမ့ၢ်၀ဲ(KTLA)တၢ်လီၢ်လၢအအိၣ်တ့ၢ်ထဲတတီၤဧိၤအဃိတၢ်ခိးတြီ၀ဲ(KNLA)အၦၤတဖၣ်လၢတဘၣ်လဲၤခီတဲာ်၀ဲဘၣ်အိၣ်၀ဲခဲအံၤခဲအံၤဘၣ်ဆၣ်ႇခီဖျိ(KNLA)တကပၤတဒိကနၣ်၀ဲဘၣ်အဃိႇတၢ်ကဲထီၣ်သးဒ်အံၤလီၤအဂ့ၢ်(KTLA)သုးရိၣ် မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤနၢၤဒါဘိၤမၠးစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ဂ့ၢ်န့ၣ်ၦၤဆှၢန့ၣ်ယၤတၢ်ကစီၣ်လၢဘံၣ်ကၠံၣ်အဲၣ်န့ၣ်ကအိၣ်အဂၤ(၂၀)ဒ၀ဲၢ်(တးမဒီၤ)န့ၣ်ပာ်ဖှိၣ်ထီၣ်အသးဒီးသုးက့(၄)အၦၤလၢကဟဲထီၣ်ဒုး(KTLA)အဃိန့ၣ်အ၀ဲသ့ၣ်လဲၤခိးလီၤပာ်လၢကစၢၢ်ခီၣ်ထံးဘျီကါဟဲထီၣ်ဒၢးၦၤခးလီၤမီၤႉၦၤတဲအီၤတဘၣ်ဟဲတဂ့ၤမ့အဲၣ်ဒိးဟဲန့ၣ်ၦၤပျဲဟိန့ၣ်ကျဲလၢအ၀ဲတကပၤမီၤလၢန့ၣ်တကပၤန့ၣ်တဘၣ်နီတမံၤဘၣ်ႉ(KTLA)အတၢ်လီၢ်ခီန့ၣ်အိၣ်တ့ၢ်ထဲတတီၤလီၤၦၤတဲအီၤဟဲတဂ့ၤအ၀ဲသ့ၣ်ခီတကနၣ်၀ဲဘၣ်ႉဟဲထီၣ်န့ၣ်ပၣ်ဃုာ်ပၣ်ဂီၢ်ဒီးပယီၤသုးအဃိၦၤခးလီၤႉမ့တခးဘၣ်မၤတဘၣ်လၢၤအဃိလီၤ”အဂ့ၢ်စံး၀ဲန့ၣ်လီၤႉ
တကဒံးဘၣ်ႇဒ်မ့ၢ်ကညီဖီၣ်စုက၀ဲၤကဒဲကဒဲသ့ၣ်တဖၣ်အသိးန့ၣ်တဖုဒီးတဖုလၢတၢ်ပာ်ကဲလိာ်သးအဖီခိၣ်ကြၢးဒိကနၣ်မၤထွဲ၀ဲတၢ်တြီတံာ်ဃာ်တဖၣ်အဃိတၢ်ကဲထီၣ်သးအံၤမ့ၢ်တၢ်ဒီသဒၢ၀ဲတၢ်လီၢ်တၢ်ကျဲလၢအအိၣ်တ့ၢ်က့ၤထဲတတီၤအံၤလီၤအဃိကဲထီၣ်၀ဲသးအဂ့ၢ်သုးခိၣ်ကျၢၢ်ဒိၣ်စိစီၤနၢၤဒါဘိၤမၠးစံးအါထီၣ်၀ဲဒၣ်စ့ၢ်ကီးန့ၣ်လီၤႉ
တကတီၢ်ဃီႇဖဲအပူၤကွံာ်(၂၀၂၃)နံၣ်အဆၢကတီၢ်ႇဘျံးဒ၀ဲၢ်ကီၢ်ရ့ၣ် (KNLA)သုး ရ့ၣ် (၁၂)တၢ်ပၢဟီၣ်က၀ီၤအပူၤႇတၢ်ခိးခးသိလ့ၣ်ကဲထီၣ်တ့ၢ်၀ဲအသးဒ်အံၤအဃိအဃိ(KNLA)ႇသုးခိၣ်ဒိၣ်ဖိစီၤဖိဆံးဒီးအၦၤဘၣ်သံကွံာ်၀ဲဒၣ်အိၣ်၀ဲန့ၣ်လီၤႉ
ဒ်န့ၣ်အသိးႇဘျံးဒ၀ဲၢ်ကီၢ် ရ့ၣ်အပူၤအံၤကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးကီၢ်သူလ့ၤသုးမုၢ်ဒိၣ်(KTLA)သုးခိၣ်အဲၣ်ခွံအစုတီၤဖီလာ်အဘၢၣ်စၢၤတၢ်ခးလိာ်သးကဲထီၣ်၀ဲခဲအံၤခဲအံၤအိၣ်၀ဲဒီးဟီၣ်က၀ီၤအပူၤ(KTLA)အတၢ်လီၢ်တၢ်ကျဲတနီၤအပူၤ(KNLA)လဲၤထီၣ်ခး၀ဲအိၣ်စ့ၢ်ကီး၀ဲအဂ့ၢ်ႇသ့ၣ်ညါဘၣ်န့ၣ်လီၤႉ
လါယူၤလံ ၁၃သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲးယူၣ်-ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤအပူၤႇ(၆)လါအတီၢ်ပူၤတၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်တီခိၣ်ရိၣ်မဲသုးပာ်ဖှိၣ်ဒီးပယီၤသုးကီၣ်ကးအဘၢၣ်စၢၤအဖီခိၣ်သုးကီၣ်ကးတကပၤသံ၀ဲ(၁၉၀၃)ဂၤဒီးႇဘၣ်ဒိ၀ဲ(၁၂၇၅)ဂၤအဂ့ၢ်ႇခ့ၣ်အဲၣ်ယူၣ်ပာ်ဖျါ၀ဲဖဲမဟါလါယူၤလံ(၁၂)သီအနံၤန့ၣ်လီၤႉ
(၂၀၂၄)လါယနူၤအါရံၤတုၤလၢလါယူၤအတီၢ်ပူၤႇတၢ်ဒုးကဲထီၣ်၀ဲလၢသုးကီၣ်ကးဒီးကညီတၢ်ထူၣ်ဖျဲးသုးမုၢ်ဒိၣ်( K.N.L.A)ႇကညီဒီကလုာ်ဂၢၤသးသုးမုၢ်ဒိၣ်( K.N.D.O)ဒီးႇတၢ်ပၢၢ်ဆၢသုးပာ်ဖှိၣ်ဘၢၣ်စၢၤခဲလၢာ်(၁၈၂၇)ဘျီဒီးႇပယီၤသုးတကပၤသံ၀ဲ(၁၉၀၃)ဂၤႇဘၣ်ဒိဘၣ်ထံး၀ဲအဂၤ(၁၂၇၅)ဂၤဒီးတၢ်ပၢၢ်ဆၢသုးပာ်ဖှိၣ်တကပၤဘၣ်ဒိဘၣ်ထံး၀ဲ(၂၉၈)ဂၤအသိးဘၣ်ဟ့ၣ်လီၤကွံာ်အသးလၢထံကီၢ်ဒီးၦၤကလုာ်အဂီၢ်(၈၁)ဂၤအဂ့ၢ်ႇပာ်ဖျါ၀ဲလၢလံာ်ဘိးရၤလီၤအပူၤန့ၣ်လီၤႉ
ဒီးဖဲ(၆)လါအတီၢ်ပူၤအံၤႇတၢ်ဒုးကဲထီၣ်၀ဲလၢကီၢ်သူလ့ၤတၢ်ပၢဟီၣ်က၀ီၤသုးက့ကိးဘ့ၣ်ဒဲးအပူၤအိၣ်၀ဲဒီးတၢ်ဒုးကဲထီၣ်၀ဲအါကတၢၢ်လၢသုးက့(၅)မုၢ်တြီၢ်ကီၢ်ရ့ၣ်ဒီးသုးက့(၃)ချၢၣ်လွံၢ်ထူၣ်ကီၢ်ရ့ၣ်သ့ၣ်တဖၣ်အပူၤအိၣ်၀ဲအဂ့ၢ်ခ့ၣ်အဲၣ်ယူၣ်တၢ်ပာ်အပူၤပာ်ဖျါ၀ဲစ့ၢ်ကီးန့ၣ်လီၤႉ
လၢန့ၣ်အမဲာ်ညါႇသုးကီၣ်ကးတဖၣ်အံၤမၤဘၣ်ဒိ၀ဲၦၤကညီဂ့ၢ်၀ီခွဲးယာ်ဒ်အမ့ၢ်သူကဘီယူၤခးလီၤတၢ်ဆူကမျၢၢ်အိၣ်ဆိးလီၢ်ကျဲႇခးလီၤကျိဖးဒိၣ်ဆူကမျၢၢ်အိၣ်ဆိးတၢ်လီၢ်ႇသူဒြိခးလီၤတၢ်ဆူကမျၢၢ်အိၣ်ဆိးလီၢ်ကျဲႇခးသံကမျၢၢ်လၢတၢ်ဂ့ၢ်တအိၣ်နီတမံၤဘၣ်ႇဒိးလီၤမ့ၣ်ပိၢ်လၢကမျၢၢ်သူကျဲတၢ်ဟးထီၣ်က့ၤလီၤပူၤႇဖီၣ်ကမျၢၢ်လၢတၢ်ဂ့ၢ်တၢ်ကျိၤတအိၣ်နီတမံၤဘၣ်ႇဒွဲၣ်အူအီၣ်ကမျၢၢ်တၢ်စုလီၢ်ခီၣ်ခိၣ်ႇမၢဆူၣ်မၢစိးကမျၢၢ်ႇဟံဆူၣ်ဟံစိးကမျၢၢ်တၢ်ဖိတၢ်လံၤႇမၢဆူၣ်မၢစိးကမျၢၢ်လၢကသုးလီၢ်သုးကျဲသ့ၣ်တဖၣ်အိၣ်၀ဲဒီးကိးဆူၣ်၀ဲကမျၢၢ်လၢကဟး၀ံစိာ်တီဆှၢတၢ်ဒီးဟးဒုးနဲၣ်ကျဲအဂ့ၢ်ႇခ့ၣ်အဲၣ်ယူၣ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
တကးဒံးဘၣ်ႇ(၆)လါအတီၢ်ပူၤသုးကီၣ်ကးတဖၣ်မၤကမၣ်၀ဲၦၤကညီဂ့ၢ်၀ီခွဲးယာ်အကလုာ်(၁၀)ဆူအဖီခိၣ်အိၣ်၀ဲဒီးအဘျီတစှၤန့ၣ်(၂၃၀၃)ဘျီဘၣ်အိၣ်၀ဲအသိးႇဖီၣ်၀ဲကမျၢၢ်(၉၆)ဂၤလၢတၢ်ဂ့ၢ်တၢ်ကျိၤတအိၣ်နီတမံၤဘၣ်ဒီးႇဘၣ်ဒိဘၣ်ထံး၀ဲ(၄၃၉)ဂၤဒီးႇဘၣ်သံ၀ဲ(၁၃၄)ဂၤအိၣ်၀ဲအမဲာ်ညါႇတၢ်ဘါယွၤသရိၥ်(၆)ဖျၢၣ်ႇသီခါဖၠၣ်(၂၃)ဖျၢၣ်ႇတၢ်မၤလိကၠိ(၁၄)ဖျၢၣ်ႇတၢ်ဟ့ၣ်ကသံၣ်ဒၢး(၂)ဖျၢၣ်ႇတၢ်ဆါဟံၣ်(၂)ဖျၢၣ်ႇကမျၢၢ်တၢ်သူၣ်ထီၣ်(၇၉)ဖျၢၣ်ႇဘုဖီ(၃၂)ဖျၢၣ်ႇကမျၢၢ်တၢ်သူၣ်တၢ်ဖျးအီၣ်ကျီး(၆)လီၢ်ဃုာ်ဒီးဟံၣ်(၁၀၂၄)ဖျၢၣ်ဘၣ်ဟးဂီၤကွံာ်၀ဲစ့ၢ်ကီးအဂ့ၢ်ပာ်ဖျါ၀ဲန့ၣ်လီၤႉ
တကတီၢ်ဃီႇ ခီဖျိသုးကီၣ်ကးမၤထီဒါ၀ဲၦၤကညီဂ့ၢ်၀ီခွဲးယာ်ဒီးပညိၣ်ခး၀ဲကမျၢၢ်လီၢ်က၀ီၤဖိတဖၣ်အဃိ(၂၀၂၄)လါဖ့ၤဘြူၤအါရံၤတုၤလၢလါယူၤအပူၤႇကီၢ်သူလ့ၤတၢ်ပၢဟီၣ်က၀ီၤကီၢ်ရ့ၣ်(၇)ဘ့ၣ်လၢာ်အပူၤကမျၢၢ်လီၢ်အိၣ်ကဒုဖိတဖၣ်အါထီၣ်၀ဲအဂ့ၢ်ခ့ၣ်အဲၣ်ယူၣ်တၢ်ကစီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးႇသုးကီၣ်ကးပညိၣ်ခးလီၤ၀ဲကမျၢၢ်အဃိစးထီၣ်လၢ(၂၀၂၁)နံၣ်သုးဟံန့ၢ်တၢ်စိကမီၤဒီးတုၤလၢ(၂၀၂၄)နံၣ်လါယူၤအပူၤကီၢ်သူလ့ၤတၢ်ပၢဟီၣ်က၀ီၤအပူၤႇကမျၢၢ်လီၢ်အိၣ်ကဒုအိၣ်၀ဲတုၤလၢ( ၁ယ၂၄၄ယ၄၁၅)အဂ့ၢ်ခ့ၣ်အဲၣ်ယူၣ်ပာ်ဖျါ၀ဲဒၣ်န့ၣ်လီၤႉ
လါယူၤလံ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ်
ကညီကီၢ်စဲၣ်တီအူကီၢ်ရ့ၣ်သုးက့နီၣ်ဂံၢ်(၂)ဒီၣ်ဖးခိၣ်ကီၢ်ဆၣ်ဟီၣ်က၀ီၤလီၤဆီလၢအမ့ၢ်(ကၠိဒီကိ)သ၀ီအပူၤဖဲမဟါလါယူၤလံ(၁၁)သီအနံၤဂီၤခီအဆၢကတီၢ်ခီဖျိသုးကီၣ်ကးခးလီၤကျိဖးဒိၣ်အဃိကမျၢၢ်လီၢ်က၀ီၤဖိ(၂)ဂၤဒီး(KECD)ကၠိဖိဖိသၣ်(၁)ဂၤဘၣ်ဒိ၀ဲအသိးဖိသၣ်ကၠိဖိအပါဘၣ်သံ၀ဲစ့ၢ်ကီးအဂ့ၢ်တီအူကီၢ်ရ့ၣ်ကညီကူၣ်သ့ဆဲးလၤ၀ဲၤကျိၤ(KECD)ၦၤဘၣ်မူဘၣ်ဒါစံး၀ဲန့ၣ်လီၤႉ
ဖဲမဟါအနံၤဂီၤခီ(၉)နၣ်ရံၣ်ဘျဲၣ်ခိၣ်ဃၢၤအဆၢကတီၢ်တၢ်ဒုးတၢ်ယၤကဲထီၣ်အသးတအိၣ်နီမံၤဘၣ်ဘၣ်ဆၣ်ပယီၤသုးကီၣ်ကးအံၤခီဖျိပညိၣ်ခးလီၤ၀ဲကျိဖးဒိၣ်အဃိဘၣ်ဒိ၀ဲဖိသၣ်ကၠိဖိလၢအထီၣ်ကညီကူၣ်သ့ဆဲးလၤ(KECD)ကၠိတဂၤဘၣ်၀ဲအမဲာ်ချံအစ့တကပၤဒီးဘၣ်ဒိဃုာ်စ့ၢ်ကီး၀ဲၦၤသးၦၢ်(၂)ဂၤတၢ်လီၤဘၣ်ယိၣ်တအိၣ်ဘၣ်အဂ့ၢ်သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါကၠိဖိဖိသၣ်ဖိလၢအဘၣ်ဒိတဂၤအံၤမ့မ့ၢ်လၢအပၢ်ခီန့ၣ်ဘၣ်၀ဲအဟၢဖၢဘၣ်သံကွံာ်၀ဲတဘျီဃီဒီးဖဲတနံၤဃီ၀ဲန့ၣ်န့ၣ်ဘၣ်တၢ်ခူၣ်လီၤပာ်လီၤကွံာ်၀ဲအစိၣ်၀ံၤလံအဂ့ၢ်န့ၣ်လီၢ်က၀ီၤပိာ်မုၣ်လၢအိၣ်ဘူးဖဲန့ၣ်တဂၤစံး၀ဲဒၣ်န့ၣ်လီၤႉ
အ၀ဲစံး၀ဲလၢ “တၢ်ဒုးကဲထီၣ်အသးတအိၣ်နီမံၤဘၣ်ဘၣ်ဆၣ်န့ၣ်အ၀ဲသ့ၣ်ခးလီၤ၀ဲကျိဖးဒိၣ်ဒ်န့ၣ်လီၤႉ ဖိသၣ်ဖိအ ပါန့ၣ်ဘၣ်သံ၀ဲဖဲန့ၣ်တဘျီဃီလီၤႉ ဖဲမဟါန့ၣ်တၢ်ခူၣ်လီၤပာ်လီၤအီၤမီၤနီၤႉ အ၀ဲမ့ၢ်ၦၤလၢအိၣ်မုာ်မုာ်ခုၣ်ခုၣ်ဒီးဒူသ ၀ီဖဲန့ၣ်ၦၤသ့ၣ်ညါအီၤခဲလၢာ်လီၤႉ အ၀ဲအိၣ်ဒီးအဖိတဂၤလီၤမီၤနီၤႉ မ့မ့ၢ်ဖိသၣ်တဂၤခီန့ၣ်အတၢ်အိၣ်သးကိၢ်ညၣ်၀ဲ လီၤႉ မ့မ့ၢ်လၢအပၢ်တဂၤခီန့ၣ်သးတမုာ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဖဲမဟါဂီၤခီသုးကီၣ်ကးခးလီၤကျိဖးဒိၣ်၀ံၤအလီၢ်ခံဖဲမုၢ်ဃ့ၢ်လီၤ(၃)နၣ်ရံၣ်ဃၣ်ဃၣ်အဆၢကတီၢ်ကဒီးန့ၣ်သုးကီၣ်ကးအံၤခးလီၤကျိဖးဒိၣ်ဆူ(ကၠိဒီကိ)သ၀ီပူၤအဖီခိၣ်တၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ်မ့မ့ၢ်သ၀ီပူၤ(KECD)တၢ်မၤလိကၠိတခီတၢ်ဘၣ်ပတုာ်ကွံာ်အီၤလၢကတီၢ်ဖုၣ်အဂ့ၢ်လီၢ်က၀ီၤပိာ်မုၣ်တဂၤဃီ၀ဲန့ၣ်စံးအါထီၣ်၀ဲဒၣ်န့ၣ်လီၤႉ
ဒ်သိးဖိဒံဖိသၣ်သ့ၣ်တဖၣ်ကထီၣ်ဘၣ်ကၠိချုးဆၢချုးကတီၢ်အဂီၢ်(KECD)ကၠိသ့ၣ်တဖၣ်ဒီးနီၢ်ကစၢ်ဆၢထၢၣ်ကၠိသ့ၣ်တဖၣ်ဂုာ်ကျဲးစၢၤအိးထီၣ်မၤလိန့ၢ်၀ဲဒၣ်ဘၣ်ဆၣ်လၢတၢ်အိၣ်သးတဘံၣ်တဘၢႇ တဂၢၢ်တကျၢၤဘၣ်အကျါ ဘၣ်မၤလိမၤဒိး၀ဲတၢ်အဂ့ၢ်န့ၣ်သ့ၣ်ညါဘၣ်လၢဒီၣ်ဖးခိၣ်ကီၢ်ဆၣ်လီၢ်က၀ီၤဂံၢ်ခီၣ်ထံးသ့ၣ်တဖၣ်အအိၣ်န့ၣ်လီၤႉ
ဒ်န့ၣ်အသိးတီအူကီၢ်ရ့ၣ်ဟီၣ်က၀ီၤအပူၤဖဲပူၤကွံာ်၂၀၂၃နံၣ်လါယူၤအဆၢကတီၢ်အခါန့ၣ်စ့ၢ်ကီးခီဖျိသုးကီၣ်ကးခးလီၤကျိဖးဒိၣ်ဆူထိၣ်လွံၢ်၀ါတီၤထီကၠိတၢ်လီၢ်တၢ်ကျဲပူၤအဃိလီၤတဲာ်ပိၢ်ဖးထီၣ်ဘၣ်ဒိ၀ဲၦၤကၠိဖိ(၃)ဂၤအမဲာ်ညါလၢတၢ်ကဆဲးလဲၤတရံးက့ၤ၀ဲကၠိအဂီၢ်သဂၢၢ်ဘၣ်ဒီးတၢ်ကီတၢ်ခဲအါမးန့ၣ်လီၤႉ
လါယူၤလံ ၁၂သီႇ ၂၀၂၄နံၣ်ႇ ခ့ၣ်အဲးစံၣ်ႇ
ကီၢ်ကၠီၣ်တဲၣ်အပူၤႇကီၢ်ပယီၤခီကီၢ်ၦၤမၤတၢ်ဖိလၢတအိၣ်ဒီးလံာ်အုၣ်ကီၤသးလၢအဖိးသဲးစးဘၣ်တဖၣ်ႇကဒိးန့ၢ်မၤဘၣ်တၢ်ဖံးတၢ်မၤလၢအဖိးသဲစးဒီးႇဒ်သိးကအိၣ်ဒီးလံာ်တၢ်အုၣ်သးလၢအဖိးသဲစးအဂီၢ်ႇတၢ်မၤန့ၢ်၀ဲလံာ်အုၣ်ကီၤသးအလွဲၢ်လါ(သက်သေခံလက်မှတ် အစိမ်းရောင်စာအုပ်)( CI Certificate of Identity)အံၤကၠီၣ်တဲၣ်ပဒိၣ်ပတုာ်ကွံာ်၀ဲလံဒီးတကီၢ်ခါခဲအံၤဆဲးအိးထီၣ်က့ၤ၀ဲ(CI)တၢ်မၤလံာ်အုၣ်သး၀ဲၤလီၢ်ထဲ(Samut Sakhon)ကီၢ်ရ့ၣ်(Mahachai)၀့ၢ်တတီၤဧိၤလီၤအဂ့ၢ်ႇသ့ၣ်ညါဘၣ်န့ၣ်လီၤႉ
တၢ်ထုးထီၣ်န့ၣ်၀ဲခီကီၢ်ၦၤမၤတၢ်ဖိအလံာ်အုၣ်သး(CI)၀ဲၤလီၢ်တဖၣ်အပူၤႇကတ့လံာ်အုၣ်သးအဂီၢ်ၦၤမၤတၢ်ဖိတဖၣ်ဟဲတီၣ်ထီၣ်လံာ်လဲၢ်အိၣ်စှၤ၀ဲအဃိႇဒ်ကီၢ်ပယီၤတကပၤဃ့ထီၣ်၀ဲအသိးတၢ်ဘၣ်ပံးကွံာ်၀ဲတၢ်မၤလံာ်အုၣ်ကီၤသးတၢ်လီၢ်တဖၣ်လီၤအဂ့ၢ်ႇကၠီၣ်တဲၣ်ၦၤမၤတၢ်ဖိကိတိၤ၀ဲၤကျိၤတကပၤစံးပာ်ဖျါထီၣ်၀ဲအိၣ်၀ဲဒီးတကီၢ်ခါခဲအံၤႇတၢ်အိးထီၣ်က့ၤ၀ဲ(CI)၀ဲၤလီၢ်တၢ်မၤလံာ်အုၣ်သးလီၢ်လၢတၢ်ပာ်ပနီၣ်အပူၤထဲတၢ်လီၢ်တတီၤဧိၤလီၤအဂ့ၢ်ႇၦၤဟူးဂဲၤလၢကီၢ်ပယီၤၦၤမၤတၢ်ဖိဂ့ၢ်၀ီကရူၢ်ကမံာ်တံာ်(JACBA)ၦၤပၢၤလီၢ်ဆ့ၣ်နီၤ(အူမိကၠိ)စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“စမိၤစခီမဟၤခၠဲတၢ်လီၢ်အပူၤတၢ်အိးထီၣ်၀ဲတၢ်မၤလံာ်အုၣ်သးလီၢ်အိၣ်ထဲတတီၤဧိၤလီၤအဃိတၢ်ဘၣ်ပာ်ပနီၣ်ထုးထီၣ်က့မၤအီၤန့ၣ်လီၤႉ(CI)တစိၢ်တလီၢ်ဖးစပီးအံၤတချူးဒံးလၢတၢ်မၤန့ၣ်(PJ-Passport)ဒံးဘၣ်အဆၢကတီၢ်ဘၢၣ်စၢၤန့ၣ်တၢ်ဟးထီၣ်က့ၤလီၤ၀ဲလၢကီၢ်ရ့ၣ်အပူၤတၢ်လီၢ်တဖၣ်သ့၀ဲအဃိတၢ်သူအီၤဒ်တစိၢ်တလီၢ်ဖးစပီးအသိးသ့၀ဲလီၤႉအခဲအံၤ(CI)တၢ်မၤလံာ်အုၣ်သးလီၢ်ခဲလၢာ်(၆)တီၤန့ၣ်တၢ်ပံးကွံာ်၀ဲ(၅)တီၤန့ၣ်လီၤႉအခဲအံၤၦၤလၢအဲၣ်ဒိးမၤသ့ၣ်တဖၣ်န့ၣ်မၤ၀ဲလဲၤမၤ၀ဲလၢ(Samut Sakhon) (Mahachai)သ့၀ဲန့ၣ်လီၤႉၦၤလၢဖးစပီးတအိၣ်ဘၣ်တဖၣ်န့ၣ်အဲၣ်ဒိးဖီၣ်၀ဲ(CI)ကိးဂၤလီၤႉဘၣ်ဆၣ်လၢတၢ်ဂ့ၢ်အကလုာ်ကလုာ်ဘၣ်လဲၤခီတဲာ်၀ဲစီၤနီၢ်ခိၣ်(၅)တီၤအဃိတၢ်လၢာ်ဘူၣ်လၢၤစ့ၤအိၣ်၀ဲအါမး”အဂ့ၢ်စံး၀ဲန့ၣ်လီၤႉ
ကီၢ်ပယီၤခီကီၢ်ၦၤမၤတၢ်ဖိတနီၤန့ၣ်ႇမၤပာ်၀ဲထဲကဖံးကမၤတၢ်လံာ်လဲၢ်ဒ်အမ့ၢ်(ပန်းရောင်းကဒ်)သ့ၣ်တဖၣ်အိၣ်၀ဲဒီးၦၤလၢတမၤဘၣ်ဒံး၀ဲ(CI)လံာ်လဲၢ်သ့ၣ်တဖၣ်အိၣ်၀ဲအါမးအသိးႇၦၤလၢတအိၣ်ဒီး(CI)လံာ်လဲၢ်သ့ၣ်တဖၣ်ႇမ့လဲၤခီတဲာ်၀ဲကီၢ်ဆၣ်ဒီးဆီတလဲ၀ဲအတၢ်မၤကစၢ်အခိၣ်အမံၤသ့ၣ်တဖၣ်န့ၣ်ႇသဂၢၢ်ဘၣ်၀ဲတၢ်ကီတၢ်ခဲသ့ၣ်တဖၣ်အိၣ်၀ဲအဂ့ၢ်ႇသ့ၣ်ညါဘၣ်န့ၣ်လီၤႉ
ဘၣ်ဃးဒီးတၢ်ပံးကွံာ်၀ဲ(CI)၀ဲၤလီၢ်တၢ်မၤလံာ်အုၣ်သးအလီၢ်အံၤန့ၣ်ႇကီၢ်ပယီၤခီကီၢ်ၦၤမၤတၢ်ဖိလၢအဟဲနုာ်လီၤလၢကၠီၣ်တဲၣ်အပူၤလၢတဖိးသဲးစးဘၣ်ခဲလၢာ်ခီဖျိကဘၣ်က့ၤမၤ၀ဲသုးကီၣ်ကး(PJ)လံာ်လဲၢ်အဃိႇတကီၢ်ခါခဲအံၤထံရူၢ်ကီၢ်သဲးတၢ်အိၣ်သးတဂၢၤကျၢၤဒံးဘၣ်အဖီခိၣ်ၦၤမၤတၢ်ဖိတနီၤကက့ၤမၤ၀ဲ(PJ)လံာ်လဲၢ်ကီခဲ၀ဲအဃိၦၤဟူးဂဲၤလၢၦၤမၤတၢ်ဖိအဂီၢ်တဖၣ်ဃ့ထီၣ်၀ဲကၠီၣ်တဲၣ်ပဒိၣ်လၢကထုးထီၣ်န့ၣ်၀ဲလံာ်(ပန်းရောက်ကဒ်)ဒ်သိးလၢညါထုးထီၣ်၀ဲလၢကီၢ်ဆၣ်တဖၣ်အပူၤန့ၣ်လီၤႉ
ဒ်န့ၣ်အသိးႇတကီၢ်ခါခဲအံၤႇ(စမိၤပကၤႇပထိၤထါနံႇခၠိဘူရံႇစူၤရၣ်ထါနံႇဒီးကံၢ်မဲကီၢ်ရ့ၣ်တၢ်လီၢ်သ့ၣ်တဖၣ်အပူၤႇကၠီၣ်တဲၣ်ၦၤမၤတၢ်ဖိကိာ်တိၤ၀ဲၤကျိၤတကပၤကးတံာ်ကွံာ်၀ဲတၢ်မၤ(CI)၀ဲၤလီၢ်တဖၣ်လံအဂ့ၢ်သ့ၣ်ညါဘၣ်န့ၣ်လီၤႉ
လါယူၤလံ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်ကလံၤထံး ထံမူထၣ်သ၀ီအပူၤ ဖဲလါယူၤလံ ၉ သီအနံၤ သုးကီၣ်ကးအအီၣ်စ့ၣ်ယးသုးကျိၤခးလီၤကျိဖးဒိၣ်အဃိ ထံမူထၣ်သ၀ီဖိဘၣ်ဒိ(၃)ဂၤ အကျါ ပၣ်ဃုာ် ဖိသၣ်(၂)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ
ဖဲလါယူၤလံ ၉ သီ ဂီၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအ(အီၣ်စ့ၣ်ယး)သုးကျိၤလၢ အိၣ်မၠၣ်တ၀ံၣ်-ကီးတရံးအ့ရှါကျဲကစၢၢ်ခီၣ်ထံးအံၤ ခးလီၤ၀ဲကျိဖးဒိၣ်လီၤတဲာ်ပိၢ်ဖးထီၣ်၀ဲလၢထံမူထၣ်သ၀ီပူၤအဃိ ဖါတံၢ်(၅၅)နံၣ် တဂၤဒီးဖိသၣ်(၅)နံၣ်တဂၤ,(၁၁)နံၣ်တဂၤသ့ၣ်တဖၣ်အံၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် ဒူပျာ်ယာ်ကီၢ်ရ့ၣ် တၢ်ကစီၣ် ထုးထီၣ်ပာ်ဖျါ၀ဲဖဲတနံၤအံၤအသိး သ့ၣ်ညါဘၣ်န့ၣ်လီၤႉ
တကးဒံးဘၣ်အမဲာ်ညါကျိဖးဒိၣ်အံၤအဃိထံမူထၣ်သ၀ီဖိအဟံၣ်အဃီဟးဂီၤ၀ဲဒၣ်(၁၂)ဖျၢၣ်ႇသိလ့ၣ်ဃုာ်ဒီး ဟံၣ်တၢ်ဖိ တၢ်လံၤသ့ၣ်တဖၣ်ဟးဂီၤ၀ဲဒၣ်တနီၤဒီးဒ်န့ၣ်အသိး ပှၤဘၣ်ဒိသ့ၣ်တဖၣ်အကျါမ့မ့ၢ်လၢဖါတံၢ်(၅၅)နံၣ်တဂၤ အံၤခီဖျိ ဘၣ်ဒိနးနးကျံၤကျံၤအဃိဘၣ်တၢ်ဆှၢထီၣ်အီၤဆူကီၢ်ကၠဲၣ်တဲၣ်...
လါယူၤလံ ၁၁သီႇ ၂၀၂၄နံၣ်ႇ ခ့ၣ်အဲးစံၣ်
ကညီကီၢ်စဲၣ်-ကီၢ်ကၠီၣ်တဲၣ်ကီၢ်ဆၢရၤမတံ၀့ၢ်ပူၤတၢ်မၤကသံၣ်မူၤဘှီးဒီးတၢ်တၤကျိၣ်တၤစ့တၢ်ဂ့ၢ်သ့ၣ်တဖၣ်အံၤသုးမုၢ်သံၣ်သံၣ်ဘိတဖၣ်လ့ၤတက့ၤတဘၣ်မၤ၀ဲဘၣ်အဂ့ၢ်ႇကညီတၢ်မုာ်တၢ်ခုၣ်ကီၣ်ကးကရၢ( KNU/KNLA-PC)ဒီးဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ထုးထီၣ်၀ဲလံာ်တၢ်ကလုၢ်တဘ့ၣ်ဖဲမဟါလါယူၤလံ(၁၀)သီအနံၤန့ၣ်လီၤႉ
ရၤမတံ၀့ၢ်ပူၤဘၣ်ဃးတၢ်တၤကျိၣ်တၤစ့တၢ်ဖံးတၢ်မၤတဖၣ်အံၤအ၀ဲသ့ၣ်အသုးမုၢ်သံၣ်ဘိတဖၣ်တၢ်ပၣ်ဃုာ်ပၣ်ဂီၢ်တအိၣ်၀ဲဘၣ်ဘၣ်ဆၣ်သုးမုၢ်သံၣ်ဘိအကျါစှၤကိးဂၤမၤ၀ဲတၢ်ဂဲၤလိာ်ကွဲ(Game)အိၣ်အဃိထုးထီၣ်၀ဲတၢ်ကလုၢ်လၢတၢ်ကဘၣ်ပံးကွံာ်တၢ်ဂဲၤလိာ်ကွဲ(Game)တၢ်လီၢ်သ့ၣ်တဖၣ်ဒီးတဘၣ်မၤ၀ဲကသံၣ်မူၤဘှီးတၢ်ဖံးတၢ်မၤဘၣ်အဂ့ၢ်ရၤမတံ၀့ၢ်ပနံာ်တၢ်ကၤဒီးတၢ်ရ့လိာ်မုာ်လိာ်မူဒါခိၣ်ခံ(သုးခိၣ်ဒိၣ်ဂီၢ်ဂ့ၢ်)စီၤအဲၣ်ဒိၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“လၢညါလံၤလံၤန့ၣ်တၢ်တၤကျိၣ်တၤစ့ဒီးတၢ်မၤကသံၣ်မူၤဘှီးန့ၣ်(ဖံၣ်စံၣ်)ဒုတမၤ၀ဲဘၣ်ႉဘၣ်ဆၣ်လၢအကျါတဂၤခံဂၤဒုမၤ၀ဲအိၣ်အဃိန့ၣ်ဒ်သိးကပံးကွံာ်ခဲလၢာ်အဂီၢ်န့ၣ်ပထုးထီၣ်လံာ်လီၤႉအခဲအံၤဘၣ်ဃးရၤမတံ၀့ၢ်ပူၤအံၤ(KNU/KNLA-PC/DKBA/BGF)ဘၣ်ဃးတၢ်မၤသ့ၣ်တဖၣ်အံၤၦၤမၤတန့ၢ်နီတဂၤလၢၤဘၣ်ႉမ့အိးထီၣ်န့ၣ်ပၠးသနၤထီၣ်အါမီၤႉတၢ်တၤကျိၣ်တၢ်စ့သ့ၣ်တဖၣ်တၢ်လိာ်ကွဲသ့ၣ်တဖၣ်အလီၢ်ခံန့ၣ်တၢ်မၤဆါကသံၣ်မူဘှီးအိၣ်အဃိဖိသၣ်သးစၢ်တဖၣ်ဟးဂီၤအါထီၣ်တၢ်အီၣ်ဟုၣ်တၢ်အါထီၣ်၀ဲအသးန့ၣ်တကီၢ်ခါခဲအံၤရၤမတံ၀့ၢ်ပူၤတၢ်ရ့လိာ်မုာ်လိာ်အဖီလာ်ဒုတၢ်မၤသ့ၣ်တဖၣ်န့ၣ်တအိၣ်နီတဖျၢၣ်ဘၣ်ဘၣ်ဆၣ်အိၣ်ဂ့ၤတအိၣ်ဂ့ၤကဘၣ်ထုးထီၣ်တၢ်ကလုၢ်လီၤ”အဂ့ၢ်စံး၀ဲန့ၣ်လီၤႉ
ဘၣ်ဃးလံာ်တၢ်ထုးထီၣ်တၢ်ကလုၢ်အံၤထုးထီၣ်ရၤလီၤသဃဲၤ၀ဲဒီး (KNU/KNLA-PC/DKBA/BGF)သုးကလၢၤႇသုးရ့ၣ်ႇ၀ဲၤကျိၤဘၣ်ထွဲသ့ၣ်တဖၣ်ခဲလၢာ်ဃုာ်ဒီးရၤမတံ၀့ၢ်သုးကီၣ်ကးသုးတၢ်မဲာ်ညါသုးတြိၤ(၄၄)ရၤမတံသုးတၢ်မဲာ်ညါ၀ဲၤကျိၤႇသုးကီၣ်ကးစုတီၤဖီလာ်သုးဒ့ခိၣ်ႇ၀့ၢ်ပူၤပၢၤကီၢ်ရူႇသုးခိးကီၢ်ဆၢ( BGF)ဘံၣ်ဘၢရူဒီးဒံၣ်မိၤကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ
ခီဖျိတၢ်တၤကျိၣ်တၤစ့ဒီးတၢ်မၤကသံၣ်မူၤဘှီးအဃိရၤမတံ၀့ၢ်ပူၤတၢ်အီၣ်ဟုၣ်သိလ့ၣ်ဆဲးကဲးတဖၣ်ကဲထီၣ်အသးတလီၢ်လီၢ်အိၣ်၀ဲဒီးၦၤလၢအဟးအီၣ်ဟုၣ်၀ဲဆဲးကဲးသ့ၣ်တဖၣ်အံၤလဲၤဒိးလဲ၀ဲဒီးတၢ်မူၤတၢ်ဘှီးသ့ၣ်တဖၣ်ကဲထီၣ်သးအိၣ်၀ဲအါမးအဂ့ၢ်သုးခိၣ်ဒိၣ်ဂီၢ်ဂ့ၢ်စီၤအဲၣ်ဒိၣ်စံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အခဲအံၤတၢ်ဟုၣ်တၢ်ဘျၣ်အါထီၣ်မီၤၦၤဖီၣ်မ့န့ၢ်န့ၣ်န့ၢ်ထဲဖိသၣ်သးစၢ်သ့ၣ်တဖၣ်လီၤႉဟးဟုၣ်၀ဲသိလ့ၣ်ဆဲးကဲးသ့ၣ်တဖၣ်၀ံၤလဲၤလဲအိ၀ဲဒီးကသံၣ်မူၤဘှီးသ့ၣ်တဖၣ်မီၤႉတၢ်၀ဲန့ၣ်အဃိသးတၢ်မူၤတၢ်ဘှီးန့ၣ်ဟးထီၣ်လၢတၢ်လိၣ်ကွဲလီၢ်လီၤႉတၢ်လိၣ်ကွဲလီၢ်မ့အိၣ်န့ၣ်တၢ်မူၤတၢ်ဘှီးအိၣ်လီၤႉအဃိန့ၣ်တၢ်လိၣ်ကွဲလီၢ်မ့တအိၣ်လၢၤဘၣ်န့ၣ်ကသံၣ်မူၤဘှီးတဖၣ်ကလီၤစှၤ၀ဲတစဲးမီၤႉလ့ၤတက့ၤတအိၣ်လၢၤဘၣ်ဒုပတတဲဘၣ်ႉဘၣ်ဆၣ်ကလီၤစှၤ၀ဲမီၤႉတၢ်တၤကျိၣ်တၢ်စ့မ့လီၤမၢ်ဒုတၢ်ဟုၣ်တၢ်ဘျၣ်နါက့ကကိညၢ်တစဲးမီၤ”အဂ့ၢ်စံး၀ဲန့ၣ်လီၤႉ
လၢန့ၣ်အဃိလၢ (KNU/KNLA-PC)လီၢ်ခၢၣ်သးထုးထီၣ်လံာ်တၢ်ကလုၢ်အပူၤပာ်ဖျါ၀ဲလၢဒ်တၢ်သိၣ်တၢ်သီတၢ်ဘျၢအိၣ်၀ဲလၢသုးမုၢ်သံၣ်ဘိတဖၣ်လ့ၤတက့ၤတဘၣ်မၤ၀ဲကသံၣ်မူၤဘှီးဒီးတၢ်တၤကျိၣ်တၤစ့တၢ်ဖံးတၢ်မၤအံၤဘၣ်အသိးန့ၣ်တၢ်မ့ၢ်တလူၤပိာ်ထွဲမၤထွဲ၀ဲဘၣ်န့ၣ်ကဟံး၀ဲအရ့တုၤလီၤတီၤလီၤအဂ့ၢ်ပာ်ဖျါ၀ဲန့ၣ်လီၤႉ
တကတီၢ်ဃီဖဲတၢ်ထုးထီၣ်လံာ်တၢ်ကလုၢ်မဟါလါယူၤလံအသီ(၁၀)အနံၤဂီၤခီအဆၢကတီၢ်န့ၣ်ရၤမတံ၀့ၢ်ပူၤဖီၣ်စုက၀ဲၤကရူၢ်ကရၢတဖၣ်ဖီၣ်ချူး၀ဲတၢ်လိၣ်ကွဲလီၢ်(၅)ဖျၢၣ်ဒီးကသံၣ်ကသ့ၣ်အဖျၢၣ်ဃိးကထိ(၈၀၀၀)ဘျဲၣ်အိၣ်၀ဲအသိးတၢ်ဖီၣ်န့ၣ်၀ဲကသံၣ်မူၤဘှီးဒီးတၢ်လိၣ်ကွဲလီၢ်ၦၤမၤတၢ်ဖိတဖၣ်အံၤတၢ်ဆှၢ၀ဲဆူ(ရွ့ၣ်ကိၣ်ကိၤ)( BGF)ပၢဆှၢတၢ်အလီၢ်အဂ့ၢ်သုးခိၣ်ဒိၣ်ဂီၢ်ဂ့ၢ်စီၤအဲၣ်ဒိၣ်စံးစ့ၢ်ကီး၀ဲန့ၣ်လီၤႉ
ကီၢ်ဆၢ၀့ၢ်တ၀့ၢ်လၢအမ့ၢ်၀ဲရၤမတံ၀့ၢ်ပူၤတၢ်ခးညၣ်တၢ်လိၣ်ကွဲလီၢ်ဒီး( ONLINE) တၢ်တၤကျိၣ်တၤစ့တၢ်လီၢ်သ့ၣ်တဖၣ်အံၤဟီၣ်က၀ီၤအပူၤဖီၣ်စုက၀ဲၤကရူၢ်ကရၢတနီၤအတၢ်ပၣ်ဃုာ်ပၣ်ဂီၢ်အိၣ်ဒံး၀ဲအဖၢမုၢ်အဂ့ၢ်၀့ၢ်ပူၤဖီၣ်စုက၀ဲၤကရူၢ်ကရၢတဖုအကျါၦၤလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
ဒီးရၤမတံ၀့ၢ်ပူၤအံၤကညီတၢ်မုာ်တၣ်ခုၣ်ကီၣ်ကးကရၢ( KNU/KNLA-PC)သုးခိးကီၢ်ဆၢ( BGF)ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တဖၣ်တကးဘၣ်သုးကီၣ်ကးအၦၤသ့ၣ်တဖၣ်စ့ၢ်ကီးဟူးဂဲၤ၀ဲအဂ့ၢ်သ့ၣ်ညါဘၣ်န့ၣ်လီၤႉ
ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ကရူၢ်ကရၢသ့ၣ်တဖၣ်စ့ၢ်ကီးထုးထီၣ်၀ဲလံာ်လၢတၢ်ကဘၣ်ပံးကွံာ်တၢ်လိၣ်ကွဲအလီၢ်တဖၣ်ဒီးသုးမုၢ်သံၣ်ဘိတဖၣ်တဘၣ်မၤ၀ဲကသံၣ်မူၤဘှီးဒီးတၢ်တၤကျိၣ်တၤစ့တဖၣ်ဘၣ်အသိးဒ်လံာ်တၢ်ကလုၢ်အသိးတၢ်မ့တလူၤပိာ်ထွဲမၤထွဲ၀ဲဘၣ်န့ၣ်ကဟံ၀ဲအရ့တုၤလီၤတီၤလီၤစ့ၢ်ကီးအဂ့ၢ်ပာ်ဖျါစ့ၢ်ကီး၀ဲလၢအလံာ်ထုးထီၣ်တၢ်ကလုၢ်အပူၤန့ၣ်လီၤႉ
ဒ်န့ၣ်အသိးသုးခိးကီၢ်ဆၢ(BGF)သ့ၣ်တဖၣ်စ့ၢ်ကီးဟ့ၣ်ပလီၢ်၀ဲလၢတၢ်ကဘၣ်ပံးကွံာ်ညၣ်တၢ်လိၣ်ကွဲအလီၢ်ဒီးအိၤလဲတၢ်တၤကျိၣ်တၤစ့တၢ်လီၢ်သ့ၣ်တဖၣ်ခဲလၢာ်အိၣ်၀ဲအဂ့ၢ်ထုးထီၣ်၀ဲလံာ်တၢ်ဟ့ၣ်ပလီၢ်ဖဲအပူၤကွံာ်လါယူၤ(၂၆)သီအိၣ်၀ဲဒီးစးထီၣ်ဖီၣ်၀ဲတၢ်လိၣ်ကွဲလီၢ်တနီၤလၢရၤမတံ၀့ၢ်ပူၤဖဲလါယူၤ(၂၇)သီအနံၤအိၣ်၀ဲဒၣ်န့ၣ်လီၤႉ
လါယူၤလံ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့နီၣ်ဂံၢ်(၄)လၢၢ်မုၢ်လါကီၢ်ဆၣ်ဟီၣ်က၀ီၤအပူၤ(ပလီၢ်) ၀့ၢ်ပယီၤသုးအသုးကျိၤလၢဟဲထီၣ်ၦၤနီၣ်ဂံၢ်(၅၀)ဂၤဘျဲၣ်သ့ၣ်တဖၣ်မ့ၢ်လၢတၢ်ခိးခးအ၀ဲသ့ၣ်အဃိပယီၤသုးအၦၤသံ(၅)ဂၤအကျါဘၣ်ဃုာ်အသုးကျိၤခိၣ်သုးခိၣ်ဒိၣ်ဖိ(၁)ဂၤအဂ့ၢ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ
ဖဲမဟါလါယူၤလံ(၁၀)သီအနံၤမုၢ်ထူၣ်(၁၂)နၣ်ရံၣ်ကတီၢ်န့ၣ်(ပလီၢ်)၀့ၢ်ပယီၤသုးခီၣ်သုးရ့ၣ်(ခလရ-၂၈၅)အ သုးကျိၤနီၣ်ဂံၢ်(၁)အၦၤနီၣ်ဂံၢ်(၅၀)ဂၤဘျဲၣ်အံၤဟဲထီၣ်၀ဲဖဲ(၅တၢၣ်)သ၀ီအဆၢကတီၢ်ခီဖျိကညီဒီကလုာ်ဂၢၤသးကရၢ(KNDO)သုးရ့ၣ်(၇)အသုးဒ့(၅)အၦၤဒီးတၢ်ပၢၢ်ဆၢသုးပာ်ဖှိၣ်သ့ၣ်တဖၣ်က၀ီၤတံၢ်ခိးခး၀ဲဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးကီၣ်ကးခီၣ်သုးရ့ၣ်(ခလရ-၂၈၅)သုးကျိၤ(၁)အံၤန့ၣ်မ့ၢ်၀ဲ၀့ၢ်တိၣ်ရ့ၣ်ပယီၤသုးသ့ၣ်တဖၣ်လၢအက့ၤ လီၤပာ်ဖှိၣ်က့ၤအသးဖဲ(ပလီၢ်)၀့ၢ်အသုး၀ဲၤလီၢ်ခိၣ်သ့ၣ်သ့ၣ်တဖၣ်ဒီးဖဲအ၀ဲသ့ၣ်ဟးဟံးန့ၢ်၀ဲတၢ်ဘံၣ်တၢ်ဘၢလၢ၀့ၢ်ချၢဒီးတုၤဖဲ(ယဲၢ်တၢၣ်)သ၀ီအဆၢကတီၢ်တၢ်ခးအ၀ဲသ့ၣ်အဂ့ၢ်န့ၣ်ဘျံးဒ၀ဲၢ်ကီၢ်ရ့ၣ်ခိၣ်ပဒိၣ်စီၤဖျိးစိ၀့စံး၀ဲဒၣ်အသိးသ့ၣ်ညါဘၣ်န့ၣ်လီၤႉ
“အ၀ဲသ့ၣ်က့ၤအိၣ်ဒၣ်ဖဲ(ပလီၢ်)၀့ၢ်မကၠံကိအသုး၀ဲၤလီၢ်ခိၣ်သ့ၣ်ဖဲန့ၣ်လီၤႉ အ၀ဲသ့ၣ်ဟးထီၣ်ဟံန့ၢ်တၢ်ဘံၣ်တၢ် ဘၢလၢ၀့ၢ်ချၢအဃိန့ၣ်ၦၤနုာ်လီၤဂဲၤအ၀ဲသ့ၣ်မီၤနီၤႉ ပယီၤသုးသ့ၣ်တဖၣ်န့ၣ်မ့ၢ်၀ဲ၀့ၢ်တိရ့ၣ်အၦၤသ့ၣ်တဖၣ် လီၤႉ အ၀ဲသ့ၣ်န့ၣ်က့ၤတုၤလၢအသုး၀ဲၤလီၢ်ခိၣ်သ့ၣ်လံမီၤနီၤႉ မ့ၢ်၀ံၤန့ၣ်ၦၤက့ၤဃ့ၢ်လၢ(ကၠီၣ်လိကၠံ)တဒူၣ်န့ၣ်နါ က့မ့ၢ်၀ဲ၀့ၢ်တိၣ်ရ့ၣ်အၦၤလီၤမီၤႉ အ၀ဲသ့ၣ်က့ၤတုၤလၢန့ၣ်ဒီးပာ်ဖှိၣ်ထီၣ်အသးဟးဟူးဂဲၤ၀ဲဖဲ၀့ၢ်ကပိာ်ကပၤဒီး တၢ်ခးအ၀ဲသ့ၣ်ဒ်န့ၣ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပယီၤသုးကီၣ်ကးအၦၤလၢဘၣ်သံ(၅)ဂၤသ့ၣ်တဖၣ်န့ၣ်မ့ၢ်၀ဲသုးကျိၤခိၣ်သုးခိၣ်ဒိၣ်ဖိလၢအမ့ၢ်(သဲၣ်ထိအီၤ)ႇ သုးစကီၤ(၁)ဂၤႇ သုးစကီၤဖိ(၂)ဂၤဒီးသုးစကီၤပြံ(၁)တဂၤအသိးတၢ်မၤန့ၢ်ဃုာ်စ့ၢ်ကီး၀ဲတၢ်စုက၀ဲၤကျိချံၦာ် သၣ်သ့ၣ်တဖၣ်ဒ်အမ့ၢ် MA-7 ၆၀မမကျိဖးဒိၣ်ပျီ(၁)ခိၣ်ႇ ၆၀မမအချံ (၃)ဖျၢၣ်ႇ MA-1(၁)ခိၣ်ႇ MA-2(၂) ခိၣ်ႇ MA-3(၃)ခိၣ်ႇ MA-5ကျိဖုၣ်(၁)ခိၣ်ႇ အံးနါကါ(၁)ဖျၢၣ်ႇ မ့ကိသံ(၆)ဖျၢၣ်ႇ MA-14ခီၣ်မ့ၣ်ပိၢ်(၃)ဖျၢၣ်ႇ MAကျိဆၣ်ဒၢ(၂၇)ဘ့ၣ်ႇ MA-2ကျိဆၣ်ဒၢ(၁)ဘ့ၣ်ႇ ကျိချံ(၂၄၁၂)ဖျၢၣ်ႇ သုးခိၣ်ဖျီၣ်(၆)ဖျၢၣ်ႇ...
လါယူၤလံ ၁၁သီႇ ၂၀၂၄နံၣ်ႇ ခ့ၣ်အဲၣ်စံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇသုးက့(၆)ဒူပျာ်ယာ်ကီၢ်ရ့ၣ်ႇ၀ီၢ်ရ့ၣ်ကီၢ်ဆၣ်ႇ၀ီၢ်ရီဟီၣ်က၀ီၤလ့နိးသ၀ီအပူၤႇတၢ်ပၢၢ်ဆၢသုးပာ်ဖှိၣ်ထီၣ်မၤန့ၣ်ကွံာ်ပယီၤသုးကလၢၤယံာ်လံ(၂)လါဘျဲၣ်လံဘၣ်ဆၣ်ဟီၣ်က၀ီၤပူၤသုးကီၣ်ကးသုးဒိးလီၤပာ်ဟီၣ်လာ်မ့ၣ်ပိၢ်အိၣ်ဒံး၀ဲအဃိႇကမျၢၢ်လီၢ်က၀ီၤဖိတဖၣ်က့ၤအိၣ်ဆိး၀ဲလၢအဟံၣ်အဃီတဘူၣ်၀ဲဒံးဘၣ်အဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်လ့နိးပယီၤကလၢၤ၀ံၤအလီၢ်ခံႇမၤ၀ဲတၢ်ရှဲလဲဟီၣ်က၀ီၤဒီးခီဖျိဒူသ၀ီခိၣ်ဃၢၤတၢ်လီၢ်တဖၣ်အပူၤပယီၤသုးဒိးလီၤပာ်ဟီၣ်လာ်မ့ၣ်ပိၢ်အိၣ်၀ဲအါမးဒီးတၢ်ရှဲလဲကွံာ်၀ဲတ၀ံၤတတဲာ်လၢာ်ဒံးဘၣ်အဃိႇကမျၢၢ်လီၢ်က၀ီၤဖိတဖၣ်တက့ၤအိၣ်ဘၣ်လၢအနီၢ်ကစၢ်ဟံၣ်ဃီဒံးဘၣ်အဂ့ၢ်ႇ၀ီၢ်ရ့ၣ်ကီၢ်ဆၣ်-နဲၣ်ရွဲၣ်သဃဲၤ(စီၤဆၣ်လီၤအဲၣ်)စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“လ့နိးပယီၤသုးကလၢၤန့ၣ်တၢ်ထီၣ်န့ၢ်၀ံၤအလီၢ်ခံမ့ၣ်ပိၢ်အိၣ်ဖးအါညါႇဒီးတၢ်သမံသမိးကွံာ်၀ဲ၀ံၤတၢ်ရှဲကွံာ်လဲကွံာ်၀ဲဘၣ်ဆၣ်သနာ်က့တုၤမုၢ်မဆါတနံၤအံၤန့ၣ်မ့ၣ်ပိၢ်န့ၣ်အိၣ်ဒံးဒၣ်တၢ်ဒံးလီၤႉအဃိန့ၣ်ၦၤဘၣ်မၤနီၣ်ဃာ်ဒ်သိး(Dangerous+Zone)သ့ၣ်တဖၣ်န့ၣ်လီၤႉအဃိသတးန့ၣ်ၦၤလီၢ်က၀ီၤကမျၢၢ်သ့ၣ်တဖၣ်န့ၣ်ခဲကနံၣ်အံၤဒုတက့ၤအိၣ်၀ဲလၢအတၢ်လီၢ်တၢ်ကျဲအပူၤဒ်ဘၣ်ႉဘၣ်အိၣ်စီၤစုၤဒံး၀ဲလီၤမီၤႉအဃိန့ၣ်ကမျၢၢ်သ့ၣ်တဖၣ်န့ၣ်လၢဘၣ်ဟးဖးဒီးပာ်တ့ၢ်ဟံၣ်ဃီသ့ၣ်တဖၣ်န့ၣ်အတၢ်ကီတၢ်ခဲအိၣ်၀ဲလီၤႉမ့မ့ၢ်လၢၦၤက့ၤအိၣ်လၢသ၀ီပူၤဒုၦၤက့ၤအိၣ်ဘူၣ်တအိၣ်နီတဂၤဒံးဘၣ်”အဂ့ၢ်စံး၀ဲန့ၣ်လီၤႉ
လၢန့ၣ်အမဲာ်ညါႇတကီၢ်ခါခဲအံၤသုးကီၣ်ကးအကဘီယူၤဟးဆှးတၢ်ႇဟဲထီၣ်ဆှၢတၢ်အီၣ်တၢ်အီဃုာ်ဒီးကျိချံၦာ်သၣ်လၢနိၣ်ခၠိးနဲၣ်သုးကလၢၤတကပၤတပယူာ်ဃီအိၣ်စ့ၢ်ကီး၀ဲအဂ့ၢ်ႇအ၀ဲစံးအါထီၣ်၀ဲဒၣ်န့ၣ်လီၤႉ
တကးဒံးဘၣ်ႇဖဲအပူၤကွံာ်လါယူၤလံ(၅)သီအနံၤအဆၢကတီၢ်ႇသုးကီၣ်ကးကဘီယူၤဟဲခးလီၤ၀ဲတၢ်လၢကၠါမံတိၤႇဖၣ်ယၣ်သ၀ီတၢ်လီၢ်တၢ်ကျဲတဖၣ်အပူၤအိၣ်၀ဲအသိးႇအပူၤကွံာ်လါယူၤအတီၢ်ပူၤသနာ်က့ႇသုးကီၣ်ကးကဘီယူၤဟဲခးလီၤတၢ်ဒီးအီလံၣ်ကၢၣ်ကျိလၢတကူတၢၣ်ႇစံဖၠူၣ်ကိႇသ၀ီခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်စ့ၢ်ကီး၀ဲအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဒ်န့ၣ်အသိးႇဖဲအပူၤကွံာ်လါမ့ၤ(၁၈)သီအနံၤဂီၤခီ(၈)နၣ်ရံၣ်တခီအဆၢကတီၢ်ႇပယီၤသုးလၢအိၣ်နိၣ်ခၠိနဲၣ်သုးကလၢၤပူၤတဖၣ်ခးသံကွံာ်၀ဲနိၣ်ခၠိနဲၣ်သ၀ီဖိ(စီၤအီၤဟ့)လၢအသးနံၣ်အိၣ်၀ဲ(၂၇)နံၣ်တဂၤအံၤဖဲအက့ၤဘုၣ်လီၤထိးအဆၢကတီၢ်အိၣ်စ့ၢ်ကီး၀ဲအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တကတီၢ်ဃီႇခီဖျိမ့ၣ်ပိၢ်တၢ်လီၤဘၣ်ယိၣ်ဒီးသုးကီၣ်ကးကဘီယူၤတၢ်လီၤဘၣ်ယိၣ်အိၣ်ဒံး၀ဲအဖၢမုၢ်အဃိႇကမျၢၢ်လီၢ်က၀ီၤဖိတဖၣ်ဘၣ်ဃ့ၢ်အိၣ်ကဒုအသးယံာ်ထီၣ်လၢ(၃)လါဃၣ်ဃၣ်လံဒီးႇတဖံးအီၣ်မၤအီၣ်ဘၣ်၀ဲတၢ်ဘၣ်အမဲာ်ညါဘၣ်ဆဲးအိၣ်ကဒုအသးဒံးအဃိႇသဂၢၢ်ဘၣ်၀ဲအိၣ်ဆိးအီၣ်အီတၢ်ဃံးတၢ်စ့ၤတၢ်ကီတၢ်ခဲသ့ၣ်တဖၣ်အဂ့ၢ်ႇလ့နိးၦၤဃ့ၢ်အိၣ်ကဒုၦၤသ၀ီဖိတဖၣ်စံး၀ဲန့ၣ်လီၤႉ
လါယူၤလံ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ်
ကရ့ၣ်နံၣ်ကီၢ်စဲၣ်အပူၤ ကမျၢၢ်ၦၤဃ့ၢ်မှံဟးဖျိးလၢအိၣ်ဖရူၤစိၤကီၢ်ဆၣ်မုၢ်နုာ်တကပၤတဖၣ် တကီၢ်ခါခဲအံၤ သဂၢၢ်ဘၣ်၀ဲ တၢ်အီၣ်တၢ်အီလီၤတူာ်လီၤကာ်တၢ်ဂ့ၢ်ကီအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအိၣ်ဖဲန့ၣ်သ့ၣ်တဖၣ် စံး၀ဲန့ၣ်လီၤႉ
ဖရူၤစိၤ၀့ၢ်မုၢ်နုာ်လီၢ်က၀ီၤကမျၢၢ်တဖၣ်အါဒၣ်တက့ၢ်လုၢ်အီၣ်အသးသမူလၢတၢ်မၤအီၣ်ခုးမၤအီၣ်သံၣ်ဒီး ကမျၢၢ်လၢအဃ့ၢ် တၢ်ဒုးတဖၣ်လၢကမၤအီၣ်ခုးမၤအီၣ်သံၣ်အဂီၢ်ခီဖျိဟီၣ်ခိၣ်လီၢ်လီၤစှၤအဃိ အ၀ဲသ့ၣ်သဂၢၢ်ဘၣ်၀ဲ တၢ်အီၣ်တၢ်အီလီၤတူာ်ဒ် အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအိၣ်ကရ့ၣ်နံၣ်ကီၢ်စဲၣ်ပူၤ တဂၤစံး၀ဲန့ၣ်လီၤႉ
အ၀ဲစံး၀ဲလၢ“လီၢ်က၀ီၤကမျၢၢ်တဖၣ်အါလၢအ၀ဲသ့ၣ်မၤအီၣ်ခုးမၤအီၣ်သံၣ်အဃိၦၤလီၢ်အိၣ်ကမှံၤဖိတဖၣ် ကမၤအီၣ်တၢ် အဂီၢ်ကီခဲမီၤနီၤႉမ့၀ံၤနကငါတၢ်လီၢ်အဂီၢ်နါက့ဟီၣ်ခိၣ်အဘူးအလဲဒိၣ်အဃိဒွးတကဲးဘၣ်ႉ အဃိအ၀ဲသ့ၣ်လိၣ်ဘၣ်၀ဲ ဂ့ၢ်ဂီၢ်အူတၢ်အီၣ်တၢ်အီတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါဖရူၤစိၤကီၢ်ဆၣ်အံၤကျဲတၢ်လဲၤတၢ်က့ၤတၢ်ဆဲးကျိးစ့ၢ်ကီးကီခဲတကးဒံးဘၣ်အမဲာ်ညါ ၦၤလီၢ်အိၣ်ကမှံဖိ သ့ၣ်တဖၣ်အံၤၦၤလဲၤမၤစၢၤအ၀ဲသ့ၣ်တအိၣ်အါအါအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိး တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
“ခဲအံၤ(၁၀၂၇)ဒုးယၤတၢ်ဟူးတၢ်ဂဲၤစ့ၢ်ကီးစးထီၣ်ကဒါလံအဃိလၢအံၤတကပၤနါက့ဘၣ်အိၣ်ဒီးတၢ်ပလီၢ်စ့ၢ်မီၤနီၤႉ တၢ်ကီလၢတၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်ခံဆးဘျဲၣ်ညါလံႉၦၤဟဲမၤစၢၤတၢ်စ့ၢ်ကီးတအိၣ်အါအါဘၣ်ႉအဃိလၢတၢ်အီၣ်တၢ်အီတကပၤန့ၣ်ဖးနးညါ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါသုးဟံန့ၢ်တၢ်စိတၢ်ကမီၤသၢနံၣ်ဘျဲၣ်အတီၢ်ပူၤအံၤခီဖျိလီၢ်က၀ီၤကမျၢၢ်သ့ၣ်တဖၣ်အံၤဘၣ်ဃ့ၢ် မှံဟးဖျိးဟး ပလဲာ်သးတဖံးအီၣ်မၤအီၣ်ဘၣ်တၢ်ဘၣ်အဃိ အ၀ဲသ့ၣ်ဘၣ်ပာ်ဂံၢ်ပာ်ဘါဒိးသန့ၤထီၣ်အသးလၢ တၢ်မၤစၢၤကစၢ်တဖၣ် အအိၣ် န့ၣ်လီၤႉ
ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤလၢအ၀ဲသ့ၣ်ဟီၣ်က၀ီၤအပူၤန့ၣ်ခီဖျိတၢ်ဒုးကဲထီၣ်၊တၢ်ဒိးလီၤဃာ်၀ဲဟီၣ်လာ် မ့ၣ်ပိၢ် အဃိအ၀ဲသ့ၣ်က့ၤအိၣ်လၢအဟံၣ်အဃီအတၢ်လီၢ်တၢ်ကျဲတဘူၣ်၀ဲဒံးဘၣ်အသိး...